10-NJY SAPAK
Siz hakyky dini nädip tapyp bilersiňiz?
1. Ýeke-täk hakyky din barmy?
«Ýalan pygamberlerden ägä boluň» (MATTA 7:15).
Isa şägirtlerine ýeke-täk hakyky diniň bardygyny öwredipdi. Hakyky dini ebedi ýaşaýşa eltýän ýol bilen deňeşdirse bolýar. Isa pygamber bu ýoly «tapýanlar azdyr» diýdi (Matta 7:14). Allatagala diňe Mukaddes Ýazgylara esaslanan seždäni kabul edýär. Diýmek, Hudaýyň hakyky gullukçylarynyň ählisi bir dine uýýarlar. Ýahýa 4:23, 24; 14:6; Efesliler 4:4, 5-nji aýatlary okaň.
2. Isa ýalan mesihçiler barada näme diýdi?
«Olar Hudaýy tanaýandyklaryny iliň öňünde aýdýarlar, emma edýän işleri bilen Hudaýdan ýüz öwürýärler» (TITUS 1:16).
Isa mesihçileriň arasynda ýalan mugallymlaryň peýda boljakdygyny duýdurdy. Bu ýalan mugallymlar göräýmäge hakyky gullukçylara meňzeýärler we özlerine mesihçi diýýärler. Emma olaryň hakyky mesihçidigini ýa-da däldigini bilip bolýar. Nädip? Hakyky mesihçileri gowy häsiýetlerinden we özlerini alyp barşyndan tanap bolýar. Matta 7:13—23-nji aýatlary okaň.
3. Hudaýyň hakyky gullukçylaryny nädip tanap bolýar?
Aşakda getirilen bäş aýratynlyk olary tanamaga kömek edýär:
Hakyky dine uýýanlar Mukaddes Ýazgylaryň Hudaýyň Sözüdigine ynanýarlar. Olar Mukaddes Ýazgylardaky prinsipler boýunça ýaşamaga jan edýärler. Diýmek, hakyky din adamlaryň pikirlerine esaslanan dinlerden düýbünden tapawutlanýar (Matta 15:7—9). Hudaýyň hakyky gullukçylary öwredýän zatlaryny durmuşynda ulanýarlar. Ýahýa 17:17; 2 Timoteos 3:16, 17-nji aýatlary okaň.
Hakyky dine uýýanlar Allatagalanyň adyny şöhratlandyrýarlar. Isa adamlara Hudaýyň ady barada gürrüň berip, ony şöhratlandyrýardy. Ol adamlara Hudaýy tanamaga kömek edýärdi we Onuň adyny şöhratlandyrmagy öwredýärdi (Matta 6:9). Siziň ýaşaýan ýeriňizde kimler Hudaýyň ady hakda wagyz edýär? Zebur 8:1; Ýahýa 17:26-y okaň.
Allatagalanyň hakyky gullukçylary Hudaýyň Patyşalygy barada wagyz edýärler. Allatagala Isany Patyşalyk baradaky hoş habary wagyz etmäge iberdi. Hudaýyň Patyşalygy adamzat kynçylyklaryny çözüp biljek ýeke-täk hökümetdir. Isa iň soňky demine çenli bu Patyşalyk barada wagyz edipdi (Luka 4:43; 8:1; 23:42, 43). Ol şägirtleriniň hem bu hakda wagyz etjekdigini aýtdy. Şu günler Hudaýyň Patyşalygy barada kimler wagyz edýär? Matta 24:14-i okaň.
Hakyky dine uýýanlar bu zalym dünýäniň işlerine goşulmaýarlar. Olar syýasy işlere, dawalara we jemgyýetde döreýän gozgalaňa gatnaşmaýarlar (Ýahýa 17:16; 18:36). Şeýle-de olar dünýäniň ahlaksyz işlerinden we ýaramaz pikirlerinden gaça durýarlar. Ýakup 4:4-i okaň.
Hudaýyň hakyky gullukçylary birek-birege söýgi bildirýärler. Olar Hudaýyň Sözüni okap, ähli milletli adamlara hormat goýmagy öwrenýärler. Ýalan dinler köplenç milletara uruşlary goldaýarlar. Emma Hudaýyň hakyky gullukçylary olara goşulmaýarlar (Mika 4:1—3). Hawa, olar başgalara kömek etmek we göwünlik bermek üçin öz wagtyny hem-de serişdesini ýürekden sarp edýärler. Ýahýa 13:34, 35; 1 Ýahýa 4:20-ni okaň.
4. Siz hakyky dini nädip tapawutlandyryp bilersiňiz?
Haýsy diniň taglymatlary Hudaýyň Sözüne esaslanýar we Allatagalanyň adyny şöhratlandyrýar? Kimler adamzadyň ýeke-täk umydy bolan Hudaýyň Patyşalygy barada wagyz edýär? Kimler ähli adamlary söýüp, uruşlara gatnaşmaýar? Siziň pikiriňizçe, bu zatlary kimler ýerine ýetirýär? 1 Ýahýa 3:10—12-nji aýatlary okaň.