³ Diýmek, mesihçiler bir zadyny berip ýa-da bir zadyndan geçip, Ýehowa gurban berip bilýärler. Ýehowanyň ysraýyllylardan nähili gurbanlary talap edendigini bilip, biziň hem gurbanlarymyzy Hudaýyň kabul etjekdigine nädip ynanyp bileris?

«Ýalan sözlemeýän Hudaýyň ezelden wada eden baky ýaşaýşynyň umydyna daýanyň» (TITUS 1:2).

1. Kynçylyklarda Ýehowanyň berýän umydy nädip kömek edýär?

ÝEHOWA — «umyt Hudaýy». Pawlus resul şeýle diýýär-de, soňra biz «Mukaddes Ruhuň gudraty bilen umytda artar ýaly», Ýehowa bizi «imanda bütin şatlyk we parahatlyk bilen doly edýär» diýýär (Rim. 15:13). Eger biziň umydymyz berk bolsa, onda durmuşda döreýän ähli kynçylyklara hötde gelip bileris, ýüregimizde şatlyk hem parahatlyk bolar. Mesh edilen mesihçileriňem, beýleki mesihçileriňem umydy «jan labyry ýaly ynamly hem berkdir» (Ýew. 6:18, 19). Durmuşyň kynçylyklary tupan ýaly abansa-da, umyda berk ýapyşsak, Hudaýdan daşlaşmarys we imanymyz gowşamaz (Ýewreýler 2:1; 6:12-nji aýatlary okaň).

2. Häzirki mesihçileriň nähili iki dürli umydy bar we «başga goýunlar» näme üçin mesh edilen mesihçileriň umydy bilen gyzyklanýar?

² Soňky günlerde ýaşaýan mesihçileriň iki dürli umydy bar. Mesh edilen mesihçileriň «kiçijik sürüsiniň» galan agzalary Mesih bilen göklerdäki Patyşalykda patyşalar we ruhanylar hökmünde baky höküm sürmäge umyt baglaýarlar (Luka 12:32; Ylh. 5:9, 10). «Başga goýunlaryň» «uly märekesi» bolsa, Mesihi Patyşalygyň raýatlary hökmünde ýer ýüzünde boljak jennetde ebedi ýaşamaga umyt edýärler (Ylh. 7:9, 10; Ýahýa 10:16). Başga goýunlar halas bolmak üçin Mesihiň entek ýerde ýaşaýan «doganlaryny» yhlasly goldamalydygyny hiç haçan unutmaly däl (Matta 25:34—40). Mesh edilen mesihçiler sylagyny alar, başga goýunlaryň umydy hem hökman amala aşar (Ýewreýler 11:39, 40-njy aýatlary okaň). Geliň, ilki bilen, mesh edilen mesihçileriň umydyna seredeliň.

MESH EDILEN MESIHÇILERIŇ «DIRI UMYDY»

3, 4. Mesh edilen mesihçiler «diri umyda gowuşmak» üçin nädip gaýtadan dogulýarlar we olaryň näme umydy bar?

³ Petrus resul mesh edilen mesihçilere iki hat ýazyp, olara «saýlananlar» diýýär (1 Pet. 1:1, 2). Ol kiçijik sürä berlen umyt barada jikme-jik gürrüň berip, şeýle diýýär: «Rebbimiz Isa Mesihiň Atasy Hudaýa öwgüler! Ol Öz uly rehimdarlygy bilen Isa Mesihiň ölülerden direlmegi arkaly diri umyda gowuşmak üçin, size Gökde saklanan çüýremez, tegmiltsiz, solmaz mirasy almak üçin, biziň gaýtadan dogulmagymyzy üpjün etdi. Siz ahyrky wagtda aýan bolmaga taýýar duran gutulyş üçin, Hudaýyň güýji bilen iman arkaly goralýarsyňyz... siz muňa begeniň» (1 Pet. 1:3—6).

⁴ Ýehowanyň Mesih bilen gökdäki Patyşalykda höküm sürmek üçin saýlan mesihçileri Hudaýyň ruhy ogullary hökmünde «gaýtadan dogulmaly». Olar Mesih bilen bilelikde patyşalyk hem ruhanylyk etmek üçin mukaddes ruh bilen mesh edilýärler (Ylh. 20:6). Petrusyň aýtmagyna görä, mesh edilen mesihçiler «gaýtadan doglup», olara «gökde saklanýan çüýremez, tegmiltsiz, solmaz mirasy» almaga «diri umyt» berilýär. Dogrudan-da, mesh edilen mesihçiler «diri umydyna» begenip biler! Emma olar umydynyň amala aşmagy üçin wepaly galmaly.

5, 6. Mesh edilen mesihçiler näme üçin wepaly galmaly?

⁵ Petrus ikinji hatynda mesh edilen mesihçileri «çagyrylmagyny, saýlanmagyny berkitmek üçin, köpräk gaýrat etmegi» maslahat berýär (2 Pet. 1:10). Olar iman, takwalyk, doganlyk söýgüsi hem-de söýgi ýaly mesihi häsiýetleri ösdürmek üçin köp tagalla etmelidi. Soňra Petrus: «Şu zatlar sizde bar bolsa, köpelse, sizi Rebbimiz Isa Mesihi tanamakda bikär hem miwesiz goýmaz» diýýär (2 Petrus 1:5—8-nji aýatlary okaň).

⁶ Kiçi Aziýada ýerleşýän Filadelfiýadaky ýygnagyň mesh edilen ýaşulularyna direlen Isa şeýle diýýär: «Sözümi berjaý edip, sabyr bilen çydanyň üçin, ýer ýüzünde ýaşaýanlary synama maksady bilen, bütin dünýäniň üstüne injek synag sagadyndan seni goraryn. Men basym gelerin. Täjiňi hiç kime aldyrmajak bolup, baryňy gaýym sakla» (Ylh. 3:10, 11). Eger mesh edilen mesihçi wepaly bolmasa, onda ölýänçä wepaly galýan «saýlananlara» beriljek «solmaz şöhrat täji» alyp bilmez (1 Pet. 5:4; Ylh. 2:10).

PATYŞALYGA GIRMEK

7. Ýahuda ýazan hatynda nähili ajaýyp umydy agzap geçýär?

⁷ Takmynan b. e. 65 ýylynda Isanyň dogany Ýahuda mesh edilen mesihçilere hat ýazyp, olara «çagyrylanlar» diýip ýüzlendi (Ýahuda 1; Ýewreýler 3:1-i deňeşdiriň). Ýahuda başda olara mesh edilen mesihçileriň gutulyş umydy hakda ýazmakçy bolsa-da, başga wajyp meseleler barada aýtmaly bolýar (Ýahuda 3). Emma gysga hatynyň soňunda mesh edilen mesihçileriň ajaýyp umydy hakda ýazýar: «Halasgärimiz ýalňyz Hudaý sizi büdremekden goramagy, şöhratynyň huzurynda uly şatlyk bilen tegmiltsiz duruzmagy başarýandyr. Şöhrat, ululyk, gudrat we häkimiýet Rebbimiz Isa Mesih arkaly ähli döwürlerden öň, häzir we ähli döwürleriň dowamynda Hudaýyňky bolsun!» (Ýahuda 24, 25).

8. Mesh edilen mesihçileriň biri ölýänçä wepaly galsa, göklerde uly şatlyk bolýandygyny nireden bilýäris?

⁸ Elbetde, her bir mesh edilen mesihçi «büdräp», heläk bolmakdan ägä bolmaly. Olar Isa Mesihiň ölümden direltjekdigine umyt edýärler. Şonda olar Hudaýyň öňünde kämil ruhy şahsyýet hökmünde durarlar. Olardan biri ölýänçä wepaly galsa, onda ol hökman «ruhy tende galar» we «çüýremezlikde» hem «şöhratda» direler (1 Kor. 15:42—44). Eger «toba eden ýeke günäkär üçin» gökde uly şatlyk bolýan bolsa, onda Mesihiň doganlarynyň biri Hudaýa ölýänçä wepaly galsa, onda göklerde nähili şatlyk bolýandyr?! (Luka 15:7). Her bir mesh edilen mesihçi sylagyny uly begenç bilen alar, Ýehowa we ruhy şahsyýetler hem muňa begener (1 Ýahýa 3:2-ni okaň).

9. Mesh edilen mesihçilere Patyşalyga girmek nähili manyda «boldan berilýär»? Bu ýer ýüzünde gulluk edýän mesh edilen mesihçilere nähili täsir edýär?

⁹ Ýahuda ýaly, Petrus hem mesh edilen mesihçilere wepaly galsalar, aljak sylagy hakda şeýle diýýär: «Rebbimiz hem Halasgärimiz Isa Mesihiň ebedi Patyşalygyna girme size boldan berler» (2 Pet. 1:10, 11). Petrus olara Patyşalyga girme «boldan berler» diýmek bilen, olaryň göklere uly şöhrat bilen girjegini aýdýar. Şeýle-de ol mesh edilen mesihçileriň göklerde aljak ençeme bereketlerini göz öňünde tutýan bolmaly. Mesh edilen mesihçiler Hudaýa wepaly gulluk edişini şatlyk hem minnetdarlyk bilen ýatlarlar. Bu olara ýer ýüzünde wepaly gulluk etmäge höweslendirýär (1 Pet. 1:13).

BAŞGA GOÝUNLAR ÜÇIN UMYT

10, 11. a) Başga goýunlaryň näme umydy bar? b) Başga goýunlaryň umydynyň Mesih we «Hudaýyň ogullarynyň aýan bolmagy» bilen näme baglanyşygy bar?

¹⁰ Pawlus resul Hudaýyň mesh edilen ogullarynyň şöhratly umydy, ýagny Mesihiň mirasdaşlary boljakdygy barada ýazýar. Soňra ol Ýehowanyň ençeme başga goýunlara-da berjek umydy hakynda şeýle diýýär: «Ýaradylyş Hudaýyň ogullarynyň aýan bolmagyna küýseg bilen garaşýar. Sebäbi ýaradylyş öz islegi bilen däl-de, ony tabyn Etdireniň islegi bilen puçluga tabyn boldy. Munda ýaradylyşyň özi hem çüýreme gullugyndan azat edilip, Hudaýyň perzentleriniň şöhratly azatlygyna gowşar diýen umyt bar» (Rim. 8:14—21).

¹¹ Ýehowa «nesil» arkaly «köne ýylan» Şeýtan Iblisi ýok etjekdigi hakynda wada edip, adamlara umyt beripdi (Gel. çyk. 3:15; Ylh. 12:9). Wada edilen «nesil», esasanam, Isa Mesihdi (Gal. 3:16). Şöhratly mesh edilen mesihçiler hem şol «nesle» degişli. Isanyň ölümi we direlişi adamlara günäden we ölümden azat bolmaga umyt berdi. Şol umyt Hudaýyň ogullarynyň aýan bolmagy bilen amala aşar. Olar Isa bilen Şeýtanyň zalym dünýäsini ýok edenlerinde aýan bolarlar (Ylh. 2:26, 27). Şonda agyr muşakgatdan çykyp gelen başga goýunlar halas bolar (Ylh. 7:9, 10, 14).

12. Mesh edilen mesihçileriň aýan bolmagy adamlara nähili bereketler getirer?

¹² Mesihiň müňýyllyk hökümdarlygynda «ýaradylyş», ýagny adamzat azatlyga çykar! Şol döwür «Hudaýyň ogullary» has-da aýan bolup, Mesih bilen ruhanylar hökmünde adamzada töleg gurbanyndan peýdalanmaga kömek eder. Hudaýyň Patyşalygynyň ýer ýüzünde höküm sürmegi bilen Ýehowa gulak asýan adamlar kem-kemden «çüýreme gullugyndan azat ediler». Diýmek, indi olar günäniň we ölümiň gulçulygynda bolmazlar. Eger olar müň ýylyň dowamynda we soňky synagda Ýehowa wepaly galsalar, onda olaryň atlary «ýaşaýyş kitabyna» hemişelik ýazylar. Şeýdip, olar «Hudaýyň perzentleriniň şöhratly azatlygyna gowşar» (Ylh. 20:7, 8, 11, 12). Dogrudan-da, ajaýyp umyt!

UMYDYŇYZY UNUTMAŇ

13. Biziň umydymyzyň amala aşmagy nämä bagly? Mesih haçan «görner»?

¹³ Petrusyň ýazan ylhamly hatlary mesh edilen mesihçilere we başga goýunlara umydyny ýatda saklamaga kömek edýär. Petrus olaryň umydynyň amala aşmagy edýän işlerine däl-de, Ýehowanyň merhemetine baglydygyny düşündirip, şeýle diýdi: «Hüşgär bolup, Isa Mesihiň görünmegi bilen özüňize getiriljek merhemete baş-bitin umyt baglaň» (1 Pet. 1:13). Isa Mesih wepaly şägirtlerini sylaglamak hem-de erbet adamlary heläk etmek üçin «görner» (2 Selanikliler 1:6—10-njy aýatlary okaň).

14, 15. a) Umydymyzy unutmazlyk üçin näme etmeli? b) Petrus resul nähili maslahat berdi?

¹⁴ Biz umydymyzy unutmak islemeýän bolsak, onda «Ýehowanyň gününiň» tizden geljekdigini hemişe ýatda saklamaly we şoňa görä ýaşamaly. Şol gün Ýehowa «Gögi», ýagny häzirki ynsan hökümetleri hem-de «ýeri», ýagny erbet adamlary we onuň «elementlerini» ýok eder. Soňra Petrus resul şeýle diýdi: «Siziň nähili adamlar bolmagyňyz gerek? Hudaýyň gününiň gelmegine garaşyp, ony çaltlandyryp, mukaddes ýaşaýyşda, takwalykda gezmelisiňiz. Şol gün zerarly Gök ot alyp dargar, elementler ýanyp erär» (2 Pet. 3:10—12).

¹⁵ Häzirki «Gögüň» we «ýeriň» deregine «täze Gök (Mesihiň gökdäki patyşalygy) täze ýer (täze adamzat jemgyýeti)» geler (2 Pet. 3:13). Petrus täze dünýä «garaşmak», ýagny umydymyzy unutmazlyk barada gönümel maslahat berýär: «Eý, söýgüli doganlar, bulara garaşýandygymyz üçin, Hudaýyň ýanynda parahatlykda tegmiltsiz, müýnsüz boljak bolup gaýrat ediň» (2 Pet. 3:14).

UMYDYMYZA GÖRÄ ÝAŞALYŇ

16, 17. a) «Mukaddes ýaşaýyşda, takwalykda gezmek» üçin näme etmeli? b) Biziň umydymyz nädip amala aşar?

¹⁶ Biz diňe umydymyzy unutmazlyk bilen çäklenmän, eýsem, şoňa görä-de ýaşamaly. Petrus hem bize Ýehowany razy edip, ýaşamalydygymyzy ýatladýar. «Mukaddes ýaşaýyş» Hudaýyň ahlak kadalary boýunça ýaşap, «milletler arasynda oňat edim-gylymly bolmagy» aňladýar (2 Pet. 3:11; 1 Pet. 2:12). Şeýle-de «biri-birimize söýgimiz bolmaly». Diýmek, bütindünýä doganlygyň, esasan-da, ýerli ýygnagyň agzybirligini saklamak üçin güýjümizi gaýgyrmaly däl (Ýahýa 13:35). «Takwalykda gezmek» bolsa, Ýehowa bilen dostlugymyzy berkidýän işleri etmegi aňladýar. Muňa manyly doga etmek, Mukaddes Ýazgylary her gün okamak, çuňňur şahsy okuwy we maşgala okuwyny geçirmek hem-de «Patyşalyk baradaky bu Hoş Habary» yhlasly wagyz etmek ýaly işler degişlidir (Mat. 24:14).

¹⁷ Biziň ählimiz Ýehowany razy edip, zalym dünýä ýok edilende, halas bolmak isleýäris. Şonda «Hudaýyň ezelden wada eden baky ýaşaýşyna» bolan umydymyz amala aşar (Titus 1:2).

[22-nji sahypadaky surat]

Mesh edilen mesihçiler «diri umyda gowuşmak» üçin gaýtadan dogulýarlar

[24-nji sahypadaky surat]

Maşgalaňyz umydyny unutmasyn

Lenard Smit gürrüň berdi

Men ýetginjekkäm, Mukaddes Ýazgylaryň iki aýady maňa örän täsir etdi. Şondan bäri, 70 ýyl geçse-de, men Zakarýa 8:23-üň manysyna doly düşünendigim henizem ýadymda. Ol aýatda şeýle diýilýär: «On adam ýehudynyň eteginden tutup: «Biz siziň bilen gitjek, çünki Hudaýyň siz bilendigini eşitdik diýerler».

«Ýehudy» mesh edilen mesihçileri aňladýan bolsa, «on adam» bolsa «başga goýunlary», öňki aýdylyşy ýaly «Ýonadab toparyny» aňladýara (Ýahýa 10:16). Men muňa düşünenimde, ebedi ýaşamak üçin, mesh edilen mesihçileri wepaly goldamalydygyma göz ýetirdim.

Isanyň Matta kitabynyň 25:31—46-njy aýatlaryndaky «goýunlar» we «geçiler» diýen tymsaly-da maňa güýçli täsir etdi. «Goýunlar» bu soňky günlerde ýer ýüzünde ýaşaýan mesh edilen mesihçilere ýagşylyk edip, höküme edilende aklanjak adamlary aňladýar. Men ýaş Ýonadab hökmünde, özüme: «Len, sen Mesihiň goýny bolasyň gelse, onuň mesh edilen doganlaryny goldap, baştutanlygyna boýun bolmalysyň, sebäbi Hudaý olar bilendir» diýdim. Men muňa ýetmiş ýyldan gowrak eýerýärin.

«MENIŇ ÝERIM NIREDE?»

Ejem 1925-nji ýylda Beýtelde, ýygnak geçirilýän zalda suwda çokundyryldy. Bu ýere London çadyry diýilýärdi we onda Londonda hem-de töwereginde ýaşaýan doganlar ýygnanýardy. Men 1926-njy ýylyň 15-nji oktýabrynda doguldym. 1940-njy ýylyň mart aýynda Angliýanyň kenarynda ýerleşýän Duwr şäherinde geçirilen kongresde suwda çokundyryldym. Meniň hakykata bolan söýgim gitdigiçe artýardy. Ejem mesh edilen mesihçi bolandygy üçin, meniň birinji tutan «ýehudynyň etegi» ejemiňkidi. Şol wagt kakam bilen uly gyz doganym Ýehowa gulluk etmeýärdiler. Biz Angliýanyň günorta-gündogarynda ýerleşýän Jillingem şäherindäki ýygnaga barýardyk, şol ýygnakda kän mesh edilen dogan-uýalar bardy. Ejem yhlasly wagyz edip, ajaýyp görelde görkezýärdi.

1941-nji ýylyň sentýabrynda Lester şäherinde geçirilen kongresde «Aýypsyzlyk» diýen doklatda Älem jahanyň hökümdarlygy baradaky meselä seredildi. Şol doklad maňa Şeýtan we Ýehowanyň arasyndaky jedelli meselä biziň hem degişlidigimize düşünmäge kömek etdi. Şol sebäpli biz Ýehowanyň tarapyny tutup, Älemiň hökümdarynyň öňünde aýypsyzlygymyzy saklamaly.

Bu kongresde pioner gullugyna köp üns berlip, ýaşlar pioner gullugyna başlamaga höweslendirildi. Men «Guramada pioneriň orny» diýen doklady diňläp, «Meniň ýerim niredekä?» diýen sorag barada oýlandym. Şol kongres maňa Ýonadab hökmünde mesh edilen mesihçilere wagyz işinde bar güýjüm bilen kömek etmelidigime düşünmäge ýardam etdi. Men edil şol ýerde Lester şäherinde pionerler üçin resmikagyzy doldurdym.

URUŞ DÖWRI PIONER GULLUGY

1941-nji ýylyň 1-nji dekabrynda 15 ýaşymdakam, meni ýörite pioner edip bellediler. Ejem meniň ilkinji ýoldaşym boldy, emma ol bir ýyldan saglyk ýagdaýy sebäpli pioner gullugyny goýmaly boldy. Şonda Londonyň filialy meniň bilen bile gulluk eder ýaly, häzir Puerto-Rikonyň filialynyň komitetinde gulluk edýän Ron Parkini belledi.

Bizi Kent graflygynyň kenar ýakasyndaky Brodsters we Ramsgit şäherlerine iberdiler. Biz kireýine alnan otagda ýaşadyk. Şol wagt ýörite pioner her aýda 40 şilling (8 dollara golaý) alýardy. Otagymyz üçin pul töländen soň, birazajyk pulumyz galýardy we biz indiki sapar haçan çörek iýjekdigimizi bilmeýärdik. Nähili bolaýanda-da, Ýehowa ähli gerek zatlarymyzyň hemişe aladasyny edýärdi.

Biz köplenç tigirli aýlanýardyk. Biz Demirgazyk deňzinden öwüsýän şemala garşy agyr ýükli tigirleriň pedalyny zordan aýlaýardyk. Şeýle-de biz samolýotlaryň hüjümini we Kent şäheriniň üstünden Londona tarap barýan gaty pesden uçýan Fau—1 nemes raketalaryny gördük. Bir sapar edil meniň üstümden bomba geçende, men tigrimden böküp, özümi ýaba zyňmaly boldum. Bomba golaýymdaky meýdanda ýaryldy. Her niçik-de bolsa, Kentde pioner bolup gulluk edenimde, şatlygymy ýitirmeýärdim.

BEÝTELÇI BOLDUM

Ejem hemişe Beýtel barada höwes bilen gürrüň berýärdi. Ol: «Men şeýle bir seniň beýtelçi bolmagyňy isleýärin» diýerdi. Göz öňüne getiriň, 1946-njy ýylyň ýanwarynda Londondaky Beýtele üç hepde işlemäge çagyrylanymda, begenjimiň çägi bolmady. Üç hepdeden soň filialda gulluk edýän Praýs Hýuz atly dogan Beýtelde galmagymy haýyş etdi. Şol ýerde öwrenen zatlarym maňa şu çaka çenli kömek edýär.

Şonda Londonyň Beýtelinde 30 adam, esasanam, ýaş öýlenmedik doganlar gulluk edýärdi. Şeýle-de birnäçe mesh edilen mesihçiler, şol sanda Ýolbaşçylyk maslahatynyň agzalary bolan Praýs Hýuz, Edgar Kleý we Jek Barr gulluk edýärdi. Meniň ýaly oglanjyk üçin, Mesihiň doganlaryny goldap, şeýle «diregleriň» ruhy gözegçiliginde gulluk etmek uly hormatdy! (Gal. 2:9).

Beýtelde bir sapar dogan ýanyma gelip, bir uýanyň gapynyň agzynda garaşýandygyny aýtdy. Onuň ejemdigini bilenimde, haýran galdym. Ejemiň elinde bir dolangy zat bardy. Ol meniň işime päsgel bermez ýaly, girmejekdigini aýtdy. Ejem şol dolangy zady berdi-de, gitdi. Onda ýylyja palto bardy. Ejemiň şeýle mähirli aladasy maňa kiçijik Samuel mukaddes çadyrda gulluk edende, Annanyň oňa eşik getirişini ýatlatdy (1 Sam. 2:18, 19).

GILEAD MEKDEBINDE ÝATDAN ÇYKMAJAK PURSATLAR

1947-nji ýylda Beýtelimizden bäş adam ABŞ-da geçirilýän Gilead mekdebiniň 11-nji klasyna çagyryldy. Biz indiki ýyl oňa okamaga gitdik. Mekdep geçirilýän ýere Nýu-Ýork ştatynyň demirgazygyna baranymyzda, gaty sowukdy. Men ejemiň sowgat eden ýylyja paltosy üçin, diýseň begenýärdim!

Gilead mekdebinde geçiren alty aýymy hiç haçan ýatdan çykarmaryn. 16 ýurtdan gelen dogan-uýalar bilen ýakyn gürrüňdeş bolup, gözýetimim giňedi. Mekdepde alan ruhy dürdänelerden başga-da, ýetişen mesihçiler bilen gürrüňdeş bolmak maňa örän peýdaly boldy. Klasdaşym Lloýd Berri, mugallymym Albert Şrýoder, şeýle-de patyşlyk fermasynyň (şol ýerde Gileat ýerleşýärdi) gözegçisi Jon But soňra Ýolbaşçylyk maslahatynyň agzasy boldular. Bu doganlaryň maňa söýgi bilen beren maslahatlary we olaryň Ýehowa hem-de guramasyna wepaly göreldesi üçin örän minnetdar.

AÝLANÝAN GÖZEGÇI WE ÝENE-DE BEÝTELDE

Gilead mekdebini gutaranymdan soň, Ogaýo ştatyna (ABŞ) aýlanýan gözegçi bellendim. Men bary-ýogy 21 ýaşymda bolsam-da, doganlar hyjuwyma dogry garap, mähirli garşyladylar. Bu welaýatda men uly ýaşly tejribeli doganlardan köp zady öwrendim.

Birnäçe aýdan soň meni Bruklindäki Beýtele ýene-de okamaga çagyrdylar. Şol ýerde men dürli wagtda Ýolbaşçylyk maslahatynda gulluk eden Milton Henşel, Karl Kleýn, Neýtan Norr, Tomas (Bat) Salliwan we Laýman Suingl ýaly «diregler» bilen tanyşdym. Men olaryň zähmet çekişine we özüni alyp barşyna syn edip, köp zatlary öwrendim. Ýehowanyň guramasyna bolan ynamym ýüz esse artdy. Meni okuwdan soň Ýewropa iberdiler.

1950-nji ýylyň fewral aýynda ejem aýryldy. Ony jaýlanymyzdan soň, kakam we aýal doganym Dora bilen aç-açan gürrüňdeş boldum. Men olardan: «Ejemem ýok, menem öýden daşda gulluk edýärin, hakykat babatda indi pikiriňiz nähili?» diýip soradym. Olar bir gartaşan mesh edilen Harri Brauning atly dogany tanaýardylar we hormatlaýardylar. Şol sebäpli onuň bilen hakykat barada gürüňdeş bolmaga razy boldular. Bir ýyl geçip geçmänkä, kakam we Dora suwda çokundyryldy. Soňra kakam Jillingemdäki ýygnakda gulluk kömekçisi bellendi. Kakam aýrylandan soň, Dora ýygnakda ýaşuly bolup gulluk edýän Roý Morton atly dogana durmuşa çykdy. Dora ömrüniň ahyryna çenli Ýehowa wepaly gulluk edip, 2010-njy ýylda aradan çykdy.

FRANSIÝADA GULLUK EDÝÄRIN

Men hususy orta mekdepde fransuz, nemes we latyn dillerini öwrendim. Maňa fransuz dilini öwrenmek kyn düşdi. Şol sebäpli Pariždäki Beýtele gidip kömek etmegi haýyş edenlerinde, men begenjegimi-de, gynanjagymy-da bilmedim. Meniň üçin ol ýerde gartaşan mesh edilen Anri Žiže dogan bilen gulluk etmek uly bagtdy. Maňa tabşyrylan bu ýumuş aňsat bolmady, şonuň üçin köp ýalňyşlar goýberdim, ýöne adamlaryň arasyndaky gatnaşyk barada kän zatlara düşündim.

Uruşdan soň, 1951-nji ýylda halkara kongresi Parižde geçirilmelidi we men ony taýýarlamaga kömekleşdim. Maňa kömek etmek üçin Beýtele ýaş aýlanýan gözegçi Leopol Žontes geldi. Soňra Leopol filialyň gözegçisi bellenildi. Kongres Eýfel diňiniň golaýyndaky Sport köşgünde geçirildi. Kongrese 28 ýurtdan delegatlar gatnaşdy. Soňky gün 6 000 sany fransuz Güwäçileri kongrese 10 456 adam gelendigini bilende, çäksiz begendiler!

Men Fransiýa gelenimde, fransuzçany gowy bilemokdym. Onuň üst-üstüne-de men diňe hemme zady dogry gürlejekdigime ynamym bolanda, agzymy açjakdygymy ýüregime düwüp, ýalňyşlyk goýberdim. Emma ýalňyşmasaň, seni hiç haçan düzetmezler we dogry gürlemegi hiç haçan öwrenmersiň.

Men ýalňyşymy düzeder ýaly başga ýurtdan gelenler üçin fransuz dili öwrenilýän mekdebe ýazyldym. Men ýygnak geçirilmeýän günleri agşamyna öwrenmäge gidýärdim. Şeýdip fransuz dilini gowy görüp başladym we ýyl-ýyldan oňa bolan söýgim artdy. Bu gullukda-da peýdaly boldy, çünki men fransuz filialynda terjime işine kömek edip bildim. Wagtyň geçmegi bilen, terjimeçi bolup, iňlis dilinden fransuz diline terjime edip başladym. Bütin dünýäde fransuz dilinde gepleýän dogan-uýalar sadyk hem akylly hyzmatkäriň berýän gymmatly ruhy iýmitini alar ýaly, terjime etmek meniň üçin uly hormatdy! (Mat. 24:45—47).

ÖÝLENDIM WE ALAN BEREKETLERIM

1956-njy ýylda men köp ýyldan bäri tanaýan Ester atly şweýsariýaly pioner uýa öýlendim. Biz London Beýteliniň ýanynda ýerleşýän Patyşalyk zalynda (ejemiň suwda çokundyrylan ýeri bolan köne London çadyrynda) toý tutduk. Toýda Hýuz dogan doklad bilen çykyş etdi. Esteriň ejesi hem meniň ejem ýaly mesh edilen mesihçidi. Men öýlenip diňe bir wepaly we ajaýyp kömekçi edinmän, eýsem, ruhy taýdan berk gaýynenem bilen birnäçe sagat ruhy gürrüňler edip, bereketler aldym. 2000-nji ýylda gaýynenemiň ýerdäki ömri tamamlandy.

Durmuş guranymyzdan soň, Ester bilen Beýtelde ýaşamadyk. Muňa garamazdan, men Beýtelde terjime işimi dowam etdim, Ester bolsa Parižiň golaýynda ýörite pioner bolup gulluk edýärdi. Ol birnäçe adama Ýehowanyň gullukçysy bolmaga kömek etdi. 1964-nji ýylda bizi Beýtelde ýaşamaga çagyrdylar. Soňra 1976-njy ýylda Fransiýada filial komiteti ilki döredilende, men onuň agzasy boldum. Ester meni ýyllar boýy hemişe goldaýar.

«MEN HEMIŞE SIZIŇ ÝANYŇYZDA BOLMARYN»

Men Nýu-Ýorkdaky bütindünýä baş edara käte baryp bilýändigime begenýärin. Şol ýere baranymda Ýolbaşçylyk maslahatynda gulluk edýän doganlardan peýdaly maslahatlary alýandygyma örän şat. Meselem, men bir gezek biynjalyklanyp, wagtynda işimi ýerine ýetirip bilmeýändigimi aýtdym. Şonda Norr dogan ýylgyryp, şeýle diýdi: «Gaýgy etme-de, işläber!» Şondan bäri ençeme gezek dürli işlerim köpelende, howsala düşmän, ilki bir işi edýän, soňra başgasyny we hemme iş öz wagtynda bitýär.

Isa ölüminiň öňüsyrasy şägirtlerine şeýle diýdi: «Men hemişe siziň bilen bolmaryn» (Mat. 26:11). Şeýle-de biz, başga goýunlar Mesihiň mesh edilen doganlarynyň ýerde hemişe bolmajakdygyny bilýäris. Şol sebäpli men 70 ýyldan gowrak mesh edilen mesihçiler bilen eginme-egin işleşýändigimi deňsiz-taýsyz hormat saýýaryn we şatlyk bilen ýehudynyň eteginden tutýaryn.

[Çykgyt]

[21-nji sahypadaky suratyň aşagyndaky sözler]

Norr dogan ýylgyryp, şeýle diýdi: «Gaýgy etme-de, işläber!»

[19-njy sahypadaky suratyň aşagyndaky sözler]

(Çepde) Ejem we kakam

(Sagda) Gilead mekdebinde ejemiň sowgat eden ýylyja paltosynda. 1948-nji ýyl

[20-nji sahypadaky suratyň aşagyndaky sözler]

Fransuz filialy bagyş edilende, Lloýd Berriniň dokladyny terjime edýärin. 1997-nji ýyl

[21-nji sahypadaky suratyň aşagyndaky sözler]

(Çepde) Ester bilen toý güni

(Sagda) Bile wagyzda

Maks Lloýd gürrüň berdi

Bu waka 1955-nji ýylda bir gün ýary gije bolupdy. Men birnäçe missionerler bilen Günorta Amerikada Paragwaýda gulluk edýärdim. Biz jaýyň içindekäk gazaba münen birnäçe adam daşymyzy gabap: «Biziň hudaýymyz ganhor hudaýdyr. Biz daşary ýurtly adamlaryň janyny almak isleýäris» diýip haýbat atdylar. Biz bu ýere nädip düşdük?

BU ENÇEME ýyl öň dogduk mekanym Awstraliýada başlapdy. Ol ýerde Ýehowa maňa islegini berjaý etmegi öwredip başlady. 1938-nji ýylda kakama Ýehowanyň Güwäçileri «Duşmanlar» diýen kitaby beripdiler. Şol wagt eýýäm ejem bilen kakam ýerli ruhanynyň Mukaddes Ýazgylaryň käbir kitaplaryna erteki diýenine lapykeç bolupdy. Bir ýyl geçip-geçmänkä olar özüni Ýehowa bagyş edip, suwda çokundyryldy. Şondan soň maşgalamyzda Ýehowanyň islegini berjaý etmegi örän wajyp saýýardyk. Soňra menden bäş ýaş uly aýal doganym Lesli suwda çokundyryldy, men bolsa 1940-njy ýylda dokuz ýaşymda suwda çokundyryldym.

Ikinji jahan urşy başlandan soň Awstraliýada Mukaddes Ýazgylara esaslanan edebiýatlary çap etmek we ýaýratmak gadagan edildi. Men ýaşlykdan imanym barada diňe Mukaddes Ýazgylar arkaly düşündirmegi öwrendim. Mekdepde näme üçin baýdaga tagzym etmeýändigimi we milletparazlygy döredýän urşy goldamaýandygymy düşündirmek üçin, men hemişe Mukaddes Ýazgylary ýanym bilen alýardym (Müs. çyk. 20:4, 5; Mat. 4:10; Ýahýa 17:16; 1 Ýahýa 5:21).

Mekdepde köp okuwçylar maňa «nemesleriň şpiony» diýip, meniň bilen gepleşmeýärdi. Bir sapar mekdepde film görkezdiler. Kino başlamazdan öň, her kim ýerinden turup milli gimni aýtdylar. Men ýerimden turmadym, şonda iki-üç oglan meniň saçymdan çekip, ýerimden galdyrjak boldular. Iň soňy Mukaddes Ýazgylara esaslanan imanym üçin meni mekdepden kowdular. Emma men soňra gaýbana okadym.

AHYR SOŇY MAKSADYMA ÝETDIM

14 ýaşym dolanda, men pioner bolup gulluk edip başlamagy maksat edinipdim. Emma ata-enem maňa ilki iş tapyp, işlemelidigimi aýdanda, örän lapykeç boldum. Olar men entek öýde ýaşaýarkam, özümi eklemelidigimi aýtdylar. Ýöne 18 ýaşym dolansoň pioner bolmaga rugsat berjekdigini söz berdiler. Aýlyk alan günlerim hemişe ata-enem meniň bilen gürrüňdeşlik geçirýärdi. Sebäbi men alan aýlygymy pioner bolup gulluk etmek üçin jemlemek isleýändigimi aýdýardym. Emma şonda-da olar pulumy alýardy.

Pioner bolup gulluk edip başlamaga wagt gelende, ata-enem meniň bilen oturyp, gazanan pullarymy banka goýup, jemländiklerini aýtdylar. Olar pioner bolup gulluk etmek üçin egin-eşik we başga zatlar almak üçin pulumy gaýdyp berdiler. Olar maňa özümi eklemegi we başgalardan muny tama etmezligi öwretdiler. Indi muny ýatlap, wajyp zady öwrenendigime düşünýärin.

Biz Lesli bilen entek çagakak, pionerler köplenç bizde myhmançylykda bolýardy we olar bilen wagyz etmegi gowy görerdik. Dynç günleri öýden-öýe, köçelerde wagyz edýärdik we Mukaddes Ýazgylar okuwyny geçirýärdik. Şol ýyllar ýygnakdaky wagyzçylar aýda 60 sagat wagyz etmegi maksat edinýärdi. Ejem hemişe diýen ýaly bu maksadyna ýetip, Lesli ikimize gowy görelde görkezýärdi.

TASMANIÝADA PIONER BOLUP GULLUK EDÝÄRIN

Men Lesli we onuň ýanýoldaşy bilen Awstraliýanyň Tasmaniýa adasynda pioner bolup gulluk edip başladym. Emma tizden olary Gilead mekdebiniň 15-nji klasyna okuwa çagyrdylar. Men örän çekinjeňdim we öň öýden hiç haçan daş gitmeýärdim. Käbirleri maňa Tasmaniýada üç aý hem galyp bilmersiň diýýärdi. Emma bir ýyldan, 1950-nji ýylda meni birleşik gullukçysy (häzirki ýaşuly maslahatynyň koordinatory) edip bellediler. Soňra meni bir ýaş dogan bilen ýörite pioner edip bellediler.

Bizi mis çykarylýan şähere bellediler, ol ýerde Ýehowanyň Güwäçileri ýokdy. Ol ýere biz agşamara awtobusly baryp, şol gije köne myhmanhanada bolduk. Ertesi güni öýden-öýe wagyz etmäge gitdik we kireýine berilýän jaý gözledik. Agşam bir adam protestantlaryň buthanasynyň golaýynda ruhanynyň jaýynyň boşdugyny we onuň kömekçisi bilen gürleşmegi maslahat berdi. Ruhanynyň kömekçisi garşy bolman, şol jaýda ýaşamaga rugsat berdi. Biziň üçin ruhanynyň öýünden her gün wagza gitmek geň zatdy.

Wagyz edýän ýerimiz hasyllydy. Wagyzda gowy gürrüňler edip, ençeme Mukaddes Ýazgylar okuwyny geçirip başladyk. Paýtagtda dini ýolbaşçylar bu barada bilip, ruhanynyň kömekçisiniň hem Ýehowanyň Güwäçilerine kömek edýänini eşidende, ondan bizi derrew kowmagy talap etdiler. Biz ýene-de jaýsyz galdyk!

Ertirsi günortana çenli wagyz edenimizden soň, biz ýene-de ýatara jaý gözledik. Ýatmak üçin iň gowy ýer diýip tapan ýerimiz, stadionyň tribunasydy. Biz ol ýerde çemedanlarymyzy gizläp, ýene-de wagyz etmäge gitdik. Garaňky düşüp ugrapdy, emma biz köçäniň ugrundaky galan öýlere hem aýlanmagy ýüregimize düwdük. Şol öýleriň birinde bir adam bize melleginiň aýak ujundan iki kiçi otagly jaýda ýaşamagy hödür etdi.

AÝLANÝAN GÖZEGÇILIK IŞI WE GILEAD MEKDEBI

Sekiz aý ýörite pioner bolup wagyz edenimden soň, men Awstraliýanyň filialyndan aýlanýan gözegçi bolmaga çakylyk aldym. Men entek 20 ýaşymdadym, şonuň üçin muňa haýran galdym. Birnäçe hepde okanymdan soň, ýygnaklara aýlanyp, dogan-uýalary ruhlandyryp başladym. Menden uly dogan-uýalar (ýagny hemmeler diýen ýaly) ýaşdygyma äsgermezlik etmän, edýän işime hormat goýýardylar.

Ýygnakdan-ýygnaga her hili ulaglarda barmaly bolýardym. Bir hepde awtobusly, indiki hepde tramwaýly, käte maşynly ýa-da motosikliň yzynda agyr çemedany we wagyz üçin sumkany tutup gidýärdim. Dogan-uýalaryňkyda bolmagy gowy görýärdim. Birleşik gullukçysy bolup gulluk edýän bir dogan jaýy doly gurlup gutarylmadyk bolsa-da, meni öýünde myhman almagy gowy görerdi. Şol hepde maňa dogan ýatar ýaly düşegi wannanyň içine düşäp berýärdi, emma Ýehowa bile gulluk edip, şonda-da hepdäni şadyýan geçirerdik.

1953-nji ýylda ýene-de bir şatlykly habary aldym, ýagny men Gilead mekdebiniň 22-nji klasyna çagyryldym. Emma men begenjegimi-de, gynanjagymy-da bilmedim. Sebäbi aýal doganymy ýanýoldaşy bilen Gilead mekdebini 1950-nji ýylyň 30-njy iýulynda tamamlansoň, Pakistana ugratdylar. Bir ýyl geçip-geçmänkä, Lesli ol ýerde keselläp, aýryldy. Gilead mekdebini gutaransoň, dünýäniň haýsydyr bir künjegine gitmegime ata-enem nähili gararka diýip biynjalyk bolýardym. Emma olar: «Ýehowa nirä iberse, şol ýere git» diýdiler. Şondan soň men kakamy görmedim. Ol 1957-nji ýylda aradan çykdy.

Tizden men Nýu-Ýork şäherine barmak üçin awstraliýaly bäş dogan-uýa bilen gämä münüp, alty hepdelik ýol geçdik. Ýolda Mukaddes Ýazgylary okaýardyk, ýolagçylara wagyz edýärdik. Biz Nýu-Ýorgyň demirgazygynda ýerleşýän Saut-Lansinge Gilead mekdebine barmazdan öň, 1953-nji ýylyň iýul aýynda «Ýanki» stadionynda geçirilýän halkara kongresine bardyk. Kongrese 165 829 delegat geldi!

Gilead mekdebinde klasymyzda okan 120 student dünýäniň ähli künjeginden gelipdiler. Biz soňky güne çenli nirede gulluk etjekdigimizi bilmedik. Muny bilen badymyza, bellenen ýurtlarymyz barada köpräk bilmek üçin, Gilead mekdebiniň kitaphanasyna eňdik. Men Paragwaýa bellenipdim. Bu ýurtda syýasy rewolýusiýalar köp bolýardy. Paragwaýa baranymda, bir güni irden başga missionerlerden şu gije nähili «baýramçylyk» bellediler diýip soradym. Olar ýylgyryp: «Sen birinji rewolýusiýany başdan geçirdiň. Gapyny açyp seret» diýdiler. Her burçda esgerler durdy!

ÝATDAN ÇYKMAJAK WAKA

Bir sapar men aýlanýan gözegçi bilen uzakda ýerleşýän ýygnaga «Täze dünýä jemgyýeti hereketde» diýen filmi görkezmäge gitdim. Biz sekiz ýa dokuz sagat ilki otluda, soňra atly, iň soňy öküze dakylan arabada ýöredik. Biz ýanymyz bilen generator we kinoproýektory aldyk. Ahyry barmaly ýerimize bardyk we indiki gün daýhanlaryň öýüne aýlanyp, olaryň hemmesini agşam kino görmäge çagyrdyk. Kinony görmäge 15-e golaý adam geldi.

Filmi 20 minuda golaý görensoň, bize mümkin boldugyndan, derrew öýe giriň diýdiler. Biz kinoproýektory alyp, öýe girdik. Soňra bir topar adam gygyrşyp, ok atyşyp: «Biziň hudaýymyz ganhor hudaýdyr. Biz daşary ýurtly adamlaryň janyny almak isleýäris» diýip, haýbat atyp başladylar. Öýde diňe iki daşary ýurtly adam bardy, olaryň biri mendim. Ol adamlar öýe kürsäp girmez ýaly, filmi görenler gapyny daşyndan saklap durdular. Daňdan sagat üçe golaý pitneçiler ýene gelip, ok atyşyp, şähere yzymyza gaýdanymyzda ýolda tutarys diýip haýbat atyp gitdiler.

Doganlar döwlet işgäri bilen gepleşdiler we ol öýlän iki sany at bilen bizi şähere alyp gitmäge geldi. Biz gidip barýarkak, ol jeňňelligiň ýa-da gür gyrymsy agaçlaryň golaýyndan geçenimizde, döwlet işgäri şol ýeri barlamak üçin ýaragyny çykaryp, öňümizden ýöreýärdi. Men şonda atyň gowy ulagdygyna göz ýetirdim we soňra bir at aldym.

TÄZE MISSIONERLER GELÝÄR

Dini ýolbaşçylaryň garşylygyna garamazdan, wagyz işi gowy netijeler berýärdi. 1955-nji ýylda bäş sany missioner geldi, olaryň arasynda Gilead mekdebiniň 25-nji klasyny gutaran kanadaly ýaş uýa Elsi Swanson hem bardy. Ol başga şähere bellenmezinden öň, biziň bile filialda gulluk etdi. Elsini hakykaty kabul etmedik ata-enesi goldamasa-da, ol özüni Ýehowa bagyş edipdi. 1957-nji ýylyň 31-nji dekabrynda men Elsi uýa öýlendim we Paragwaýyň günortasyndaky missionerleriň öýünde ýeke özümiz ýaşadyk.

Öýümizde suw akýan kran ýokdy, emma oňa derek, howlymyzda guýy bardy. Jaýyň içinde duş, hajathana, kir ýuwýan maşyn, hatda holodilnik hem ýokdy. Tiz zaýalanýan iýmit önümlerini her gün satyn alýardyk. Sada ýaşaýandygymyza garamazdan, dogan-uýalar bilen mähirli gatnaşykda bolup, özümizi örän bagtly duýýardyk.

1963-nji ýylda biz ejem bilen görüşmek üçin Awstraliýa baranymyzdan biraz wagt geçensoň, ejem on ýyllap ogluny görmändigi üçin, tolgunyp, ýüreginden tutdy. Paragwaýa gaýtmaly wagtymyz golaýladygy saýyn, bir uly meseläni çözmeli bolduk. Biz ejemi keselhanada goýup, biri aladasyny eder öýdüp, Paragwaýa halaýan gullugymyza dolanarysmy ýa-da ejem bilen galarys? Kän doga etdik we Elsi bilen ejeme seretmek üçin galdyk. Ejem tä aradan çykýança, ýagny 1966-njy ýyla çenli biz oňa seretdik, emma doly wagtly gullugymyzy-da goýmadyk.

Birnäçe ýyl Awstraliýada etrap we welaýat gözegçi bolup gulluk etdim hem-de ýaşulular üçin geçirilýän Hudaýa gulluk mekdebinde okatdym. Bu meniň üçin uly hormatdy! Soňra durmuşymyzda ýene-de bir özgerişik boldy. Meni Awstraliýanyň ilkinji filialynyň Komitetiniň agzasy edip bellediler. Täze filial gurlup başlanda, meni Gurluşyk komitetiniň ýolbaşçysy etdiler. Ençeme tejribeli dogan-uýalaryň kömegi bilen owadan filial gurlup gutaryldy.

Soňra meni ýurduň wagyz işine gözegçilik edýän Gulluk bölümine bellediler. Şeýle-de maňa bütin dünýädäki filiallara aýlanyp, kömek etmek we ruhlandyrmak üçin zonal gözegçisi bolup gulluk etmek hormatly işi ynanyldy. Käbir ýurtlarda birnäçe, hatda onlarça ýyl Ýehowa wepaly gulak asany üçin türmede we konsetrasion lagerde oturan dogan-uýalar bilen tanşyp, imanym hasam berkedi.

HÄZIRKI GULLUGYMYZ

2001-nji ýylda kyn zonal gözegçilik işinden dolanansoň, Birleşen Ştatlarynyň filialynyň täze döredilen Komitetinde gulluk etmek üçin Bruklinden (Nýu-Ýork) çakylyk haty geldi. Elsi bilen bu hat barada doga edip, ondaky teklibi ara-alyp maslahatlaşanymyzdan soň, ony şatlyk bilen kabul etdik. Bruklinde gulluk edýänimize eýýäm 11 ýyl boldy.

Men aýalymyň Ýehowanyň islendik haýyşyny şatlyk bilen kabul edýändigine begenýärin. Häzir Elsi bilen ýaşymyz 80-den agdy, saglygymyz hem ganymat. Biz Ýehowanyň berjek ebedi tälimine we onuň islegini berjaý edýänlere eçjek bol bereketlerine sabyrsyzlyk bilen garaşýarys.

[19-njy sahypadaky suratyň aşagyndaky sözler]

Bir hepde awtobusly, indiki hepde tramwaýly, käte maşynly ýa-da motosikliň yzynda agyr çemedany we wagyz üçin sumkany tutup gidýärdim

[21-nji sahypadaky suratyň aşagyndaky sözler]

Biz Ýehowanyň berjek ebedi tälimine sabyrsyzlyk bilen garaşýarys

[18-nji sahypadaky surat]

Çepde: Awstraliýada aýlanýan gözegçi bolan wagtym

Sagda: Men ata-enem bilen

[20-nji sahypadaky surat]

Toý güni, 31 dekabr 1957 ý.