Ang mga Kabataan ay Nagtatanong

Masama Bang Maging Popular?

Piliin ang salitang angkop sa pangungusap na ito:

․․․․․ mabuti na maging popular.

A. Laging
B. Kung minsan
C. Hindi

ANG tamang sagot ay “B.” Bakit? Dahil ang pagiging popular ay nangangahulugan lang na gusto ka ng maraming tao—at hindi naman iyan laging masama! Inihula ng Bibliya na ang mga Kristiyano ay magiging “liwanag ng mga bansa” at magugustuhan sila ng mga tao. (Isaias 42:6; Gawa 13:47) Sa ganiyang diwa, masasabing popular ang mga Kristiyano.

Alam mo ba?

Si Jesus ay popular. Bata pa lang siya, nakuha na niya ang “lingap ng Diyos at ng mga tao.” (Lucas 2:52) At ayon sa Bibliya, nang maging adulto na si Jesus, “malalaking pulutong ang sumunod sa kaniya mula sa Galilea at sa Decapolis at sa Jerusalem at sa Judea at mula sa kabilang ibayo ng Jordan.”—Mateo 4:25.

Bakit wala namang masama roon?

Dahil hindi niya hinangad ang kaluwalhatian o popularidad, at hindi ang pabor ng tao ang mahalaga sa kaniya. Ginawa lang ni Jesus ang tama—kaya naman nakuha niya ang pabor ng mga tao. (Juan 8:29, 30) Pero alam ni Jesus na pansamantala lang ang pabor ng mga tao dahil madaling magbago ang isip nila. Sinabi niya na darating ang panahon na ipapapatay siya ng mga ito!—Lucas 9:22.

Tandaan:

Ang popularidad ay katulad ng kayamanan. Hindi laging masama ang magkaroon nito. Ang problema ay nasa ginagawa ng mga tao para makuha o mapanatili ito.

Babala!

Gagawin ng maraming kabataan ang lahat para maging popular. Ang ilan ay sunud-sunuran sa gusto ng karamihan. Ang iba naman ay mga siga na namimilit na hangaan sila—kahit dahil sa takot.a

Sa kasunod na mga pahina, tatalakayin natin ang dalawang mapandayang daang iyan tungo sa pagiging popular. Saka natin tatalakayin ang tamang daan.

Marami pang impormasyon para sa mga tin-edyer ang makikita sa Web site na www.jw.org/tl

a Sa Bibliya, may binabanggit na mga siga na tinatawag na mga “Nefilim,” na tinukoy rin na “mga lalaking bantog.” Ang pinakamahalaga sa kanila ay ang kaluwalhatian nila.—Genesis 6:4.

MGA DAAN TUNGO SA PAGIGING POPULAR

ANG SUNUD-SUNURAN

Gusto kong tanggapin ako ng iba.
Para mangyari iyon, dapat kong gayahin ang ginagawa nila.

“Sinubukan kong baguhin ang paggawi ko para tanggapin ako ng iba. No’ng una, mukhang okey. Pero no’ng bandang huli, napag-isip-isip kong hindi mo kailangang baguhin ang sarili mo para lang tanggapin ka.”—Nicole.

Payo ng Bibliya: “Huwag kayong makikiisa sa karamihan, sa paggawa ng masama.”—Exodo 23:2, Magandang Balita Biblia.

ANG SIGA

Gustung-gusto ako ng iba, at ayokong mabago ’yon.
Gagawin ko ang lahat para ako ang laging pinakamagaling—kahit kailangan kong tapakan ang iba.

“Madalas, salbahe ang mga kabataan, at dahil mas popular ang mga siga, iisipin ng isang mahiyaing bata na laging tama ang sinasabi nila.”—Raquel.

Payo ng Bibliya: “Kung ano ang ibig ninyong gawin ng mga tao sa inyo, gayundin ang gawin ninyo sa kanila.”—Lucas 6:31.

ANG TAMANG DAAN
Kung susundin mo ang tatlong nabanggit na hakbang, baka hindi ka magustuhan ng iba—pero tiyak na magugustuhan ka ng mabubuting kasama!

Alamin ang pamantayan mo. Sinasabi sa Bibliya na ang mga taong may-gulang ay “nasanay . . . na makilala kapuwa ang tama at ang mali.”—Hebreo 5:14.
Manindigan sa iyong paniniwala. Tularan si Josue, na matatag na nagsabi: “Piliin ninyo ngayon para sa inyong sarili kung sino ang paglilingkuran ninyo . . . Ngunit kung para sa akin at sa aking sambahayan, maglilingkod kami kay Jehova.”—Josue 24:15.
Huwag mag-alinlangan sa pinili mong daan. Pinaalalahanan ni apostol Pablo si Timoteo: “Hindi tayo binigyan ng Diyos ng espiritu ng karuwagan, kundi ng kapangyarihan.”—2 Timoteo 1:7.