Ngɔndɔ ka dikumi

Jehowa akamɛ nsɔna akitami l’ɔkɔngɔ wa Yeso mbolwama. Mɛnamaka dia lo ntambe ka ntondo, Akristo tshɛ wa mɛtɛ waki akitami. Ɛnɔnyi nkama l’ɔkɔngɔ wa laasɔ, efula ka wanɛ wakataka dia waki Akristo kondjotetemala ndjela Kristo. Kaanga mbakidiɔ ngasɔ, l’ɛnɔnyi ɛsɔ, Jehowa akasɔnɛ tɔtɔi ta wanɛ waki Akristo wa mɛtɛ dia monga akitami. Vɔ waki oko eponga wakate Yeso ɔnɛ wayola l’atei wa nkangaka. (Mat. 13:24-30) Lo nshi y’ekomelo, Jehowa akatatetemala nsɔna anto wayonga l’atei w’anto 144 000. (Isa. 45:9; Dan. 4:35; Rɔmɔ 9:11, 16) Sho la dia mbewɔ dia nsala awui oko ase olimu wakangunɛngunɛ owandji awɔ lo kɛnɛ kakandasalɛ wanɛ wakayotatɛ olimu lo wonya w’ekomelo.—Mat. 20:8-15. w16.01 4:15

Ɛlɔ kɛnɛ, Jehowa hatɔlɔmbɛ dia sho nambola anaso, koko nde tɔlɔmbaka dia nkitanyiya wadjango ande. Mbeyaka monga ko tena dimɔ wadjango ande wekɔ wolo le so dia nkitanyiya kana hatoshihodia ɔkɔkɔ wa wadjango akɔ. Onde ndo wɛ atayaokaka ngasɔ? Le anto amɔtshi, olimu w’esambishelo wekɔ tshondo y’okakatanu. Ondo vɔ wekɔ ɛsɔnyi ndo mɛnaka wolo ntɛkɛta l’anto wahaweye. Anto akina mbokaka wɔma ndjatshikitanya l’anto wa l’olimu kana wa la kalasa. (Eto. 23:2; 1 Tɛs. 2:2) Etena kalɔmbamayɛ dia nsala dui dimɔ dia wolo, kanyiya ɛnyɛlɔ ka diambo ka mbetawɔ ndo ka dihonga ka Abrahama. Etena kakanayɛ yimba la ɛnyɛlɔ k’apami la wamato wa kɔlamelo, tɔ koka kotshutshuya dia mbaokoya ndo dia wɛ ndjasukanya la Jehowa, Ɔngɛnyi aso.—Hɛb. 12:1, 2. w16.02 1:3, 14

Etena kakate Saolo dia nde ayanga todiaka Davidɛ, Jɔnatana akahombe mbɔsa yɛdikɔ ya wolo. Nde akalange monga la kɔlamelo le she, koko nde akalange monga nto la kɔlamelo le Davidɛ. Jɔnatana akeyaka dia Nzambi aki kaamɛ la Davidɛ, koko aha la Saolo, ɔnkɔnɛ nde akasɔnɛ dia monga la kɔlamelo le Davidɛ. Nde akahɛmɔla Davidɛ dia nde ndjashɛ, ko oma laasɔ nde akatotɛ Saolo ɔkɔkɔ wahombande ntshika Davidɛ la lɔsɛnɔ. (1 Sa. 19:1-6) Hatohombe mbetawɔ dia kɔlamelo yele la so le olui ɔmɔtshi wa tɔkɛnyɔ, kalasa kɛmɔ, wodja ɔmɔtshi monga ohomba efula le so oleki kɔlamelo yaso le Jehowa. Ɛnyɛlɔ, Henry akangɛnangɛnaka nkɛnya damɛ kaamɛ l’ase olui wa kalasa kande ndo nde akalangaka mbidjɛ kalasa kawɔ otshumba. Koko l’ɔtɛ wakandakɛnyaka oseka wikɛndɛ tshɛ, nde komonga l’etena k’efula ka ntshɔ l’olimu w’esambishelo kana lo nsanganya. Henry mbutaka dia kɛnyɔ shɔ yakayongaka ohomba le nde woho wele nde akayoleka monga la kɔlamelo lo kalasa kawɔ oleki le Nzambi. Ɔnkɔnɛ nde akɔshi yɛdikɔ ya ntshika nkɛnya damɛ dikambo dia kalasa kawɔ.—Mat. 6:33. w16.02 3:10, 12

Oko weyɛ ɔlɔngɔngɔ, Yoho mɔtshi yakokayɛ mɛnya dia kana yɛdikɔ yayɛ ya batizama ndja oma k’ɛse otema ayɛ, ele lo nsɛdingola alɔmbɛlɔ ayɛ. Mbala ngana yalɔmbayɛ Jehowa? Awui akɔna watoyotaka lo alɔmbɛlɔ ayɛ? Ekadimwelo lo ambola asɔ wayɛnya woho wele diɔtɔnganelo diasayɛ la Jehowa. (Os. 25:4) Mbala efula Jehowa mbishaka ekadimwelo lo alɔmbɛlɔ aso lo tshimbo ya Bible. Ɔnkɔnɛ, yoho kina yakokayɛ mɛnya dia wɛ nangaka mɛtɛ monga suke suke la Jehowa ndo mbokambɛ oma k’ɛse otema, ele lo nsɛdingola ekongelo kayɛ ka wekelo. (Jas. 1:8) Yambola wate: ‘Ngande wele wekelo ami wa Bible w’onto ndaamɛ wa mbala la mbala? Onde dimi mbɔtɔka la lolango tshɛ l’ɔtɛmwɛlɔ aso wa lo nkumbo?’ Ekadimwelo lo ambola anɛ wayokokimanyiya dia wɛ mɛna dia kana yɛdikɔ yayɛ yabatizama yekɔ nsaki kayɛ hita. w16.03 1:11, 13

Ande ɔngɛnɔngɛnɔ wonga la so etena kadiaso lo Annuaire etombelo wonga l’olimu aso w’esambishelo wa l’andja w’otondo lee! Kanyiya nto lo kɛnɛ kendana la woho weso kaamɛ l’andja w’otondo etena kelɛso anto lo nsanganya yaso ya weke. Lɛkɔ, sho tshɛ mbokaka losango lakɔ laamɛ. Asawo, adramɛ, ndo wɛnyɛlɔ tokeketshaka dia sho mbisha Jehowa kɛnɛ koleki ɔlɔlɔ le so. Sho mongaka nto kaamɛ l’anangɛso ndo l’akadiyɛso wa l’andja w’otondo etena kasalema Eohwelo ka nyɔi ka Yeso ɔnɔnyi tshɛ. (1 Kɔr. 11:23-26) Sho sanganaka kaamɛ lo datɛ diakɔ diaamɛ, lo Nisana 14 l’ɔkɔngɔ wa ɛɔtwɛlɔ ka wonya dia mɛnya Jehowa lowando laso lo kɛnɛ kakandatosalɛ ndo lo nkitanyiya didjango dia Yeso. Ndo mingu efula la ntondo ka Eohwelo, sho kambaka kaamɛ lo mbelɛ anto efula dia ndjosala la so dui di’ohomba sɔ. La wolo aso hita, hatokoke nsambisha anto tshɛ. Koko l’ɔtɛ wakambaso kaamɛ, tekɔ l’akoka wa mbutɛ miliyɔ y’anto awui wendana la Jehowa ndo nkimanyiya anto amɔtshi dia mbotombola ndo mbosha kɛnɛmɔ. w16.03 3:4, 6, 7

Anangɛso walowanyema woho wa mɛmba ɛkɛndɛ l’etshumanelo la dia mbetshema dia kanaka yimba la atɔndɔ wa lo Bible. Ɛnyɛlɔ, ohɔsa dia ekumanyi kɛmɔ ambɔlɔmba ɔnangɛso dia nde mɔmbɛ ɔsɛsɛ w’oya lo Mbalasa ka Diolelo di’anto mbetetaka dimɛna. Wɛ koka nsɛdingola la nde Tito 2:10 ndo mbolembetshiya dia naka nde mbetɛ mbɔtwɛlɔ ka Mbalasa ka Diolelo pudipudi, kete dui sɔ diayɔlɛnga “wetshelo wa Nzambi Oshimbedi aso.” Nde koka nto nɔmba ombeki dia nde kanaka lomba lo kɛnɛ kendana l’ase etshumanelo waya esombe ndo wahɔ wayokondja anto asɔ oma lo ɔkɛndɛ ande. Naka asawo wa ngasɔ monga oko etenyi k’olowanyelo w’ombeki, kete dui sɔ ayowokimanyiya dia nde ndeka ndjasha le anto oleki lo awui akina. Nde ayonga l’ɔngɛnɔngɛnɔ lo menda wahɔ wakondja anangɛso l’akadiyɛso wa lo etshumanelo l’olimu wakambande. Ndo nto, ekumanyi koka mandola ombeki lo weolo wadjande dia nkamba l’alako. Lowando la l’otema ɔtɔi kimanyiyaka ombeki oko wakimanyiya ashi eononɛ. w15 4/15 2:7, 8

Onde wɛ amboyaokaka opoko etena kalɔshanayɛ la dui dimɔ dia wolo? Koka monga ko wɛ keema l’olimu, ekɔ lo mpomana la tɔsɛngiya ta kɔlɔ la kalasa, ekɔ l’okakatanu wendana la yonge ya demba kana ekɔ lo tenyanya tena dia wolo. Mbeyaka monga ko wɛ akalɔmbɛ anto akina ekimanyielo, koko hawokosha kɛnɛ keyɛ l’ohomba. Kɛnɛ kele mɛtɛ ele, ekɔ awui amɔtshi wahakoke kandɔma la ekimanyielo k’anto. Lo tena dia ngasɔ, onde dako dia lo Bible dia ‘ndjaɛkɛ le Jehowa’ diekɔ anyanya? (Tok. 3:5, 6) Ndooko. Bɛnyɛlɔ efula dia lo Bible toshikikɛka dia Jehowa mɛtɛ kimanyiyaka ekambi ande. Tatombɛke anto tokumbɛkumbɛ l’ɔtɛ wahawatosha ekimanyielo keso l’ohomba. Koko, l’ɛnyɛlɔ ka Pɔɔlɔ, tɔshi tena sɔ oko diaaso dia ndjaɛkɛ tshɛ lo tshɛ le Jehowa. Dui sɔ diayokeketsha wɛkamu aso le nde ndo diayetɛ diɔtɔnganelo diasaso la nde dui dia mɛtɛ. w15 4/15 4:3-5

Satana kambaka la lokeso dia mbekola anto oma le Jehowa Nzambi ka ngandji. (1 Jn. 4:8) Lo nkamba la lokeso, Satana ekɔ lo nshimba anto diaha vɔ mbeya dia “wekɔ l’ohomba wa mbeya akambo waki Nzambi.” (Mat. 5:3) Diakɔ diele, nde “ambetɛ wanɛ wele bu ambetawudi totshungu lo timba tawɔ diaha osase wa lokumu l’ɔlɔlɔ la lotombo lendana la Kristo, ɔnɛ lele efanelo ka Nzambi mbahɛtɛ.” Yoho mɔtshi yaleka nkamba la Satana dia nkesa anto ele ɔtɛmwɛlɔ wa kashi. Satana ngɛnangɛnaka etena kɛnande anto watɛmɔla watshɛwɔ, diangɔ diakatongama kana waa nyama, mbuta ate onto kana ɛngɔ kɛmɔ lo dihole dia Jehowa ‘ɔnɛ lalɔmba di’anto mbomamema paka ndamɛ oto.’ (Eto. 20:5) Kaanga efula k’anto wasɛma dia wekɔ lo ntɛmɔla Nzambi lo mɛtɛ, ndjashaka lo mbekelo y’ashidi ndo lo awui akina wa kɔlɔ. Vɔ wekɔ anto wahomba mbokama kandji l’ɛnyɛlɔ k’anto wele Jehowa akawatɛ ɔnɛ: “Lande na katetemalanyu mfuta falanga l’ɔtɛ wa kɛnɛ kele bu ɛngɔ ka ndɛ . . . ? Nyompokame dimɛna kele . . . nyayonga la ɔngɛnɔngɛnɔ w’efula lo kɛnɛ kele mɛtɛ ɔngɔnyi.”—Isa. 55:2. w15 5/15 1:14, 15

Abɛlɛ akakane yimba efula lo daka diaki Nzambi ndo akashihodia ɔnɛ onto ɔmɔtshi ‘ayolumatama lo etshindji’ di’anto wa l’andja w’otondo nkoma kokele woho waki Adama la Eva la ntondo ka vɔ nsala pɛkato. Abɛlɛ aki la mbetawɔ lo daka diaki Nzambi, diakɔ diele Jehowa aketawɔ olambo ande. (Eta. 4:3-5; Hɛb. 11:4) Nɔa akake lo mvula k’elola l’ɔtɛ wa mbetawɔ kaki la nde. (Hɛb. 11:7) L’ɔkɔngɔ wa mvula k’elola, mbetawɔ ka Nɔa kakotshutshuya dia nambola elambo wa nyama. (Eta. 8:20) L’ɛnyɛlɔ k’Abɛlɛ, aha la taamu Nɔa nde la wɔ aki la mbetawɔ di’anto wayotshungɔ oma lo pɛkato la nyɔi. Etena kakayɔtɔmbɔkwɛka Nimirɔdɛ Jehowa l’ɔkɔngɔ wa Mvula k’elola, Nɔa akatetemala nama mbetawɔ ndo elongamelo kande. (Eta. 10:8-12) Ondo nde akakanyiyaka l’otema ɔtɔi woho wakahombe anto ntshungɔ oma lo ɛlɔmbwɛlɔ ka la hiadi k’anto wakahowɔ pɛkato ndo nyɔi. Sho la wɔ koka ‘mɛna’ etena ka diambo kɛsɔ nɛ dia tɔ kaya suke.—Rɔmɔ 6:23. w15 5/15 3:4, 6

Naka sho mongaka la ekiyanu waha pe, kete dui sɔ koka monga waale lo demba ndo lo lonyuma laso. Nyɛsɔ toyaɛkɛke le Jehowa ndo tohɔke ɛtɛkɛta wa lo divɛsa di’ɛlɔ. Ɛtɛkɛta w’amɛna w’ekeketshelo w’oma le onto ɔmɔ layakiyanya dikambo diaso, koka ngɛnyangɛnya otema aso. Ndjihola otema aso otsha le ambutshi aso, olonganyi aso kana ɔngɛnyi aso wɛkɛso otema ndo lɛna akambo oko awaɛna Nzambi koka tokimanyiya dia sho mbewɔ ekiyanu. Ndooko onto lashihodia ekiyanu wele la so ko ndeka Jehowa. Pɔɔlɔ akafunde ɔnɛ: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka, ko wɔladi wa Nzambi woleki tokanyi tshɛ wayolama etema anyu la timba tanyu lo tshimbo ya Kristo Yeso.” (Flpɛ. 4:6, 7) Ekɔ ohomba nkana yimba lo kɛnɛ kendana la wanɛ wasala dia sho kokamɛ oma lo waale wa lo nyuma, mbuta ate asekaso ambetawudi, dikumanyi, ɔhɔmbɔ wa kɔlamelo, andjelo, Yeso ndo Jehowa ndamɛ. w15 5/15 4:16, 17

Lo nɔrdɛ ka tɛmpɛlɔ aki oduwa ɔmɔtshi wakelamɛka Bɛtɛzata. Elui w’anto waki la hemɔ ndo la dikɔmɔ wakatshɔka lekɔ, wele l’elongamelo ɔnɛ wayɔkɔnɔ lo yoho ya dihindo. Lo tshutshuyama la kɛtshi, Yeso akatohomana l’onto laki la hemɔ edja efula la ntondo ka nde ndjootɔ la nkɛtɛ. (Jni. 5:6-9) Yeso kakawombola dia kana nde nangaka nkɔnɔ. Pami kakɔ akakadimola esadi eto. Nde akalangaka nkɔnɔ koko kombeyaka kɛnɛ ka nsala, l’ɔtɛ wakinde komonga l’onto lakakokaka mbokimanyiya dia mbotambiya l’oduwa. Yeso akadjangɛ pami kɛsɔ dia nsala dui diakinde kokoka nsala, mbuta ate mbɔsa mbeto kande ko nkɛndakɛnda. Pami kɛsɔ akakitanyiya ɛtɛkɛta wa Yeso, akɔshi mbeto kande ko akatatɛ nkɛndakɛnda. Dihindo sɔ diekɔ djembetelo ya diambo yɛnya kɛnɛ kayosala Yeso l’andja w’oyoyo. Dihindo sɔ tɛnyaka nto dia Yeso mbokanaka kɛtshi. Nde akayangaka wanɛ waki l’ohomba w’ekimanyielo. Ɛnyɛlɔ ka Yeso la dia totshutshuya dia ntetemala nyanga anto wele l’ɛtshi kaso ka nkɛtɛ wambɔkɔmɔ l’ɔtɛ w’awui wa kɔlɔ efula wasalema l’andja ɔnɛ. w15 6/15 2:8-10

Etelo k’ɔnɛ “Shɛso,” aha “Papa kami,” toholaka ɔnɛ tehɔ lo “nkumbo k’otondo k’anangɛso” wokana ngandji ka mɛtɛ. (1 Pet. 2:17) Ande diɛsɛ dia dimɛna diele la so lee! Akristo w’akitami wakotama oko ana wa Nzambi wele la elongamelo ka tɔsɛna l’olongo, mbelɛka Jehowa ɔnɛ “Shɛso” lo yoho ya shikaa. (Rɔmɔ 8:15-17) Akristo wele la elongamelo ka ndjɔsɛna pondjo pondjo la nkɛtɛ vɔ lawɔ koka mbelɛ Jehowa ɔnɛ “Shɛso.” Nde ekɔ Ombishi awɔ wa lɔsɛnɔ ndo la ngandji tshɛ, nde kotshaka ehomba w’atɛmɔdi ande wa mɛtɛ. Wanɛ wele la elongamelo ka ndjɔsɛna la nkɛtɛ asɔ, wayoyala ana wa Nzambi lo yoho ya shikaa l’ɔkɔngɔ wa vɔ nkoma kokele ndo wa vɔ ntshikala la kɔlamelo lo ohemba w’ekomelo. (Rɔmɔ 8:21; Ɛny. 20:7, 8) Ambutshi mbishaka anawɔ woshasha wa dimɛna etena kawaetshawɔ dia nɔmba ndo kaakimanyiwɔ dia mbɔsa Jehowa oko Shɛwɔ lele l’olongo lawakotshɛ ehomba awɔ. Ndooko woshasha woleki woke wakoka ambutshi mbisha anawɔ ko ndeka wɔnɛ wa mbakimanyiya dia vɔ monga la diɔtɔnganelo dia dimɛna la Jehowa. w15 6/15 4:4-6

Dia nsɛna lo yoho yɔtɔnɛ la dɔmbɛlɔ di’ɔnɛ “ototshungole oma le Kanga kɔlɔ,” sho la dia nsala la wolo diaha monga “ase andja ɔnɛ [waki Satana].” Hatohombe nanga “andja ɔnɛ [waki Satana] kana diangɔ dia l’andja ɔnɛ.” (Jni. 15:19; 1 Jn. 2:15-17) Nsala dui sɔ ekɔ tshondo ya ta dia lushi la lushi. Ande ɔlɔ wayonga la so etena kayokadimola Jehowa dɔmbɛlɔ sɔ lo minya Satana ndo lo ndanya andja ande wa kɔlɔ lee! Koko, sho la dia mbohɔka dia etena kakakashema Satana oma l’olongo, nde akeyaka dia etena kambootshikalɛ kaya mondo. La nkɛlɛ tshɛ, nde ekɔ lo nsala kɛnɛ tshɛ kakokande nsala dia toshishɛ olowanyi aso. Diakɔ diele, totetemale nɔmba dia ntshungɔ oma le nde. (Ɛny. 12:12, 17) Onde wɛ ngɛnangɛnaka nsɛna lo andja wele Satana aya bu? Naka eelo, kete tetemala nɔmba dia Diolelo diaki Nzambi ndja, dia lokombo laki Nzambi kidiama ndo dia lolango lande salema la nkɛtɛ. Endɛka le Jehowa dia nde kokotshɛ ehomba ayɛ wa lo nyuma ndo wa lo demba. Eelo, yashikikɛ dia sɛnaka lo yoho yɔtɔnɛ la dɔmbɛlɔ dia ɛnyɛlɔ.—Mat. 6:9-13. w15 6/15 5:12, 17, 18

Hateye shikaa kɛnɛ kayeta lo etena kɛsɔ k’ehemba. Tatolongamɛke dia lɔsɛnɔ layonga wɔdu, koko ayonga ohomba sho ndjahombia. Lo ntambe ka ntondo, Akristo wakatshike mvudu yawɔ ndo wakakikɛ ekakatanu wa wolo dia ntshikala la lɔsɛnɔ. (Makɔ 13:15-18) Toyambole onto l’onto ɔnɛ: ‘Onde dimi lekɔ suke dia ntshika lomombo la l’emunyi? Onde dimi mbetawɔka nsala kɛnɛ tshɛ kele ɔlɔlɔ dia ntshikala la kɔlamelo le Jehowa?’ Ohokanyiya yema! L’etena kɛsɔ, shoamɛ ato mbayɔtɛmɔlaka Nzambi kaso oyadi kɛnɛ tshɛ kayosalema oko wakasale omvutshi Danyɛlɛ. (Dan. 6:10, 11) Mfɔnu ka woke hatonga etena ka nsambisha ‘lokumu l’ɔlɔlɔ la Diolelo.’ Laasɔ ko etena ka nsambisha losango lakɔ kambeta. L’etena kɛsɔ, “ekomelo” kayoya! (Mat. 24:14) Ekambi waki Nzambi wayewoya la dihonga tshɛ losango la wolo la kilombo layonga la nshɛngiya le anto tshɛ. Ondo losango lɔsɔ layɛnya dia andja wa kɔlɔ waki Satana wayanga ndanyema tshɛ lo tshɛ. w15 7/15 2:3, 8, 9

Hatohombe mamba naka anto wa l’andja ɔnɛ wotohetsha l’ɔtɛ wa lomangemange laso, Yeso akatɔhɛmɔla ɔnɛ anto akina wayotohetsha l’ɔtɛ wotshikitanyiso la wɔ. Tatohɛke di’anto efula watɔlɔsha haweye awui wendana la Diolelo diaki Nzambi. Diakɔ diele, vɔ hawoshihodia lande na kele ekɔ ohomba le so dia monga la kɔlamelo lo Diolelo diaki Nzambi, koko aha lo mandji y’ana w’anto. Dia monga la kɔlamelo le Jehowa, sho la dia mbokitanyiya oyadi kakɔna tshɛ kakoka anto akina tosalɛ kana totɛ. (Dan. 3:16-18) Ɛlɔngɔlɔngɔ l’esekaseka koka ndeka monga l’okakatanu dia ndjatshikitanya l’anto akina. Ambutshi le, nyokimanyiya ananyu dia vɔ monga la dihonga la kalasa. Ananyu koka monga la wɔma dia ntona ntɛmɔla dalapo kana ntona monga lo fɛtɛ mɔtshi ya lo wodja. Etena kasalanyu Ɔtɛmwɛlɔ wa lo nkumbo, nyu koka nsɛdingola woho wɔsa Jehowa akambo asɔ. Nyowaetsha woho wakokawɔ nembetshiya anto akina kɛnɛ ketawɔwɔ hwe hwe ndo la dilɛmiɛlɔ tshɛ. (Rɔmɔ 1:16) Nyokimanyiya ananyu dia nsawola l’embetsha awɔ ndo mbalembetshiya kɛnɛ ketawɔso. w15 7/15 3:15, 16

Jehowa akatosha woshasha w’oshinga w’etshungwelo “dia sho nkondja lɔsɛnɔ.” (1 Jn. 4:9) Lo dikambo dia tshelo ya ngandji ka Nzambi shɔ, ɔpɔstɔlɔ Pɔɔlɔ akafunde ate: “Kristo akavu dikambo di’anto wa kɔlɔ lo etena kakashikikɛma. Ekɔ wolo di’onto mvɔ dikambo di’onto lele la losembwe, eelo, lo dikambo di’onto ɔlɔlɔ, ondo onto koka mbetawɔ mvɔ. Koko Nzambi akatɛnya ngandji kande hita lo yoho nyɛ: Kaanga mbakiso atshi wa pɛkato, Kristo akavu dikambo diaso.” (Rɔmɔ 5:6-8) Oshinga w’etshungwelo ekɔ djembetelo yoleki woke ya ngandji katoka Nzambi ndo vɔ mbishaka anto diaaso dia monga la diɔtɔnganelo dia ma ma la nde. Oshinga w’etshungwelo mɛnyaka ngandji koka Jehowa anto tshɛ. Ande ɔngɛnɔngɛnɔ wele la so dia mbeya ɔnɛ naka sho kambɛ Nzambi la kɔlamelo, kete nde ayotosha lɔsɛnɔ loleki dimɛna tshɛ l’andja w’oyoyo lee! Ɔnkɔnɛ, nyɛsɔ tɛnya dia sho mbɔsaka oshinga w’etshungwelo la nɛmɔ, nɛ dia vɔ wekɔ djembetelo yoleki woke yɛnya ngandji ka pondjo katoka Nzambi. w15 8/15 1:13, 15

Ohokanyiya nɛmɔ diayonga laso dia nkamba l’andja w’oyoyo waki Nzambi l’ɛlɔmbwɛlɔ ka Diolelo! L’ɔkɔkɔ ɔsɔ mbele, tekɔ l’ɔngɛnɔngɛnɔ dia nkamba kaamɛ la okongamelo wa Jehowa oma ko kakianɛ ndo nkotsha ɔkɛndɛ tshɛ watoshawɔ. Koko, lo tena dimɔ, ɛkɛndɛ aso koka ntshikitana. Ɛnyɛlɔ, ase nkumbo ka Bɛtɛlɛ amɔtshi wa l’États-Unis wakalɔmbama dia ntshika Bɛtɛlɛ ko nkalola tosambisha lo bɛtshi dia nkɛtɛ. Ndo l’ɔtɛ w’ɛnɔnyi waya la wɔ kana awui akina, emendji weteta ɛmɔtshi wakatomama oko ambatshi mboka wa laande. Vɔ wekɔ l’ɔngɛnɔngɛnɔ lo ɛkɛndɛ awɔ w’eyoyo ndo Jehowa ekɔ lo mbatshɔkɔla. Naka sho nɔmba dia Jehowa tokimanyiya, naka sho nsala la wolo tshɛ dia mbookambɛ ndo mbeka dia ngɛnangɛna l’ɔkɛndɛ tshɛ wambowotosha, kete tayonga l’ɔngɛnɔngɛnɔ ndo Jehowa ayotɔtshɔkɔla. (Tok. 10:22) Ko kayotota naka l’andja w’oyoyo, tambolanga mbidjasɛ lo dihole dimɔ, koko okongamelo waki Jehowa ambotɔlɔmba dia ntshɔ lo dihole dikina? L’etena kɛsɔ, dihole diayotodjasɛ kana olimu wayotosala honga la dikambo. Tayonga tsho la lowando ɔnɛ tekɔ lo nsɛna l’andja w’oyoyo. w15 8/15 3:8

Nde kɔmbɔtɔka lɔngɛnyi l’anto waki kombokaka Jehowa ngandji. Nde la nkumbo kande wakayasha efula lo ɔsɛlɛlɔ wa waato ndo nde aki nto “osambisha w’akambo w’ɛlɔlɔ.” (2 Pet. 2:5) Nɔa, wadɛnde, anande asato ndo wadɛwɔ waki la diɔtɔnganelo dia dimɛna lam’asawɔ. Vɔ wakasalaka awui wakangɛnyangɛnyaka Nzambi, ko wakashimbamɛ lo Mvula k’elola. Sho tshɛ ɛlɔ kɛnɛ tekɔ tokanula tawɔ, diakɔ diele sho la dia monga la lowando l’ɔtɛ wakakitanyiya Nɔa nde la nkumbo kande Jehowa ndo wakawatone lɔngɛnyi la kɔlɔ. Woho akɔ waamɛ mbele, Akristo wa lo ntambe ka ntondo kɔmbɔtɔ lɔngɛnyi l’anto waki kombokaka Jehowa ngandji. Vɔ wakokitanyiya ndo wakashimbamɛ etena kakalanyema Jɛrusalɛma lo 70 l’ɔkɔngɔ wa Yeso mbotɔ.—Luka 21:20-22. w15 8/15 4:17, 18

Koko aha ɔkɔkwɛlɔ wa demba tshɛ mbele la wahɔ, mbangɛnyangɛnya kana mbakeketsha. Ngande wakoka nkum’otema kaso tokimanyiya dia ngɛnangɛna ndo nkondja wahɔ oma lo ɔkɔkwɛlɔ wa demba wetawɔ Jehowa? Bible tɔhɛmɔlaka dia mbewɔ “etsha wa demba.” L’atei awɔ mbele: “Monanyi, akambo wa mindo, lɔkɛwɔ la fumbɔ nsɔnyi, ɔtɛmwɛlɔ wa dikishi, diɔtɔnganelo dia la ɛdiɛngɛ, ɔlɔshanelo, mindjo, ɔkɔmiya, nkɛlɛ, ewanu, diatɔnelo, taato t’ɛtɛmwɛlɔ.” Pɔɔlɔ akafunde ate: “Wanɛ wasala akambo asɔ hawotokita Diolelo dia Nzambi.” (Ngal. 5:19-21) Diakɔ diele, sho koka ndjambola ɔnɛ: ‘Onde nkum’otema kami kimanyiyakami dia mbewɔ tɔkɛnyɔ t’epetenge, shɛmanedi, kɔngɔdi, kana ta ngala? Onde nkum’otema kami mbewolakami etena kahembamami dia menda filmɛ yɛnyawɔ esato wele anto etakataka, yakeketsha awui wa mindo wa dieyanelo, wodjwelo wa wanu, kana awui w’ɛdiɛngɛ?’ w15 9/15 2:11, 12

Bible tɛnyaka hwe dia Nzambi kototonga la lotshungɔ la nshikikɛ shoamɛ kɛnɛ kele ɔlɔlɔ la kɛnɛ kele kɔlɔ. Jehowa mbeyaka kɛnɛ koleki ɔlɔlɔ tshɛ le so. Ndo paka lo mbetawɔ lowandji lande ndo lo mbokitanyiya mbakokaso monga la lɔsɛnɔ la wɔladi ndo l’ɔngɛnɔngɛnɔ. Jehowa akatetsha mɛtɛ k’ohomba kɛsɔ nɛ dia nde tokaka ngandji. Ombutshi wa pami wele la ngandji kanaka yimba dimɛna dimɛna lo kɛnɛ kendana la lɔsɛnɔ la nshi yayaye l’anande. Lonyangu ko, anto efula wekɔ lo ndjakiyanya lo dikambo dia nshi yayaye, kana mbetshaka nsɛnɔ yawɔ lo nkamba dia nkondja diangɔ diahotshikala edja. (Os. 90:10) Ande lowando lele la so otsha le Jehowa, Shɛso laki kotetsha tsho woho wa monga la lɔsɛnɔ l’ɔngɛnɔngɛnɔ kakianɛ, koko nde akatolake nshi yayaye ya diambo efula lee! w15 9/15 4:10, 11

Lo nshi yakete, anto efula wakakondjaka waaso wa mɛna ndo mboka woho wakakimanyiyaka Nzambi ase Isariyɛlɛ. Jehowa akakambe la ahindo dia ntshungola wodja ande oma l’Edjibito ndo dia nɛndja nkumi ya dikanga efula yaki lo Nkɛtɛ ya daka. (Jas. 9:3, 9, 10) Atunyi w’ase Isariyɛlɛ wakalɛndjama nɛ dia vɔ wakatone mbetawɔ ɔnɛ Jehowa mbakalwɛka wodja ande ta. Edja efula oma laasɔ, Ahaba nkumekanga ka kɔlɔ akakondja waaso efula wa mɛna lonya la Nzambi. Elidja akatɛ Ahaba ate Jehowa ayanga nkumiya ɔwɔ ndo ayanga ndɔsha mvula ngembe. (1 Ku. 18:22-45) Ahaba akɛnyi ahindo tshɛ, koko nde akatetemala ntona mbetawɔ ɔnɛ nde akɛnyi wolo wa Jehowa. Wetshelo akɔna ekina wakondjaso oma lo bɛnyɛlɔ nɛ? Sho la dia nyangaka lonya la Nzambi lo lɔsɛnɔ laso. w15 10/15 1:4, 5

Hatohombe pondjo mbidja taamu ɔnɛ naka sho ndjela ɛlɔmbwɛlɔ ka Jehowa, kete nde ayotokimanyiya. Diakɔ diele, sho la dia monga la mbetawɔ ka wolo le Ɔnɛ lakoka tokimanyiya mɛtɛ. Pɔɔlɔ toholaka dia Nzambi ekɔ la “wolo ande wakamba le so, Nzambi koka mɛtɛ nsala akambo efula oleki kɛnɛ tshɛ kalɔmbaso kana kakanyiyaso.” (Ɛf. 3:20) Ekambi waki Jehowa salaka kɛnɛ tshɛ kakokawɔ dia nsala lolango la Nzambi, koko vɔ mbeyaka nto ɔnɛ wekɔ la elelo. Tekɔ la lowando l’efula nɛ dia Jehowa ekɔ la so ndo ɔnɛ nde ekɔ lo ntshɔkɔla welo aso tshɛ.Onde sho koka nongamɛ la mbetawɔ k’efula ekadimwɛlo w’alɔmbɛlɔ aso? Jehowa tolakaka dia Etena kayaɛkɛso tshɛ le Jehowa, nde ayotɔngɛnangɛna. Nde ayokadimola alɔmbɛlɔ aso wa la mbetawɔ, mbetawɔ kaso kayokeketala ndo tayokoma “anto wakoka nongola Diolelo dia Nzambi.”—2 Tɛs. 1:3, 5. w15 10/15 2:16-18

Kanaka yimba lo dikambo dia Jehowa ndo dia Yeso koka nkimanyiya onto dia nde nkoma Okristo wambotshunda lo nyuma ndo walama mbetawɔ kande nge. (Hɛb. 5:14; 6:1) Onto l’etsha wenya yema tshitshɛ dia kanyiya awui wendana la Nzambi koka tashishaka diɔtɔnganelo diande la Jehowa yema yema kana ndjokoma lo mbooka ɔkɔndɔ. (Hɛb. 3:12) Yeso akatewola dia naka sho hatoke, kana mbetawɔ Ɔtɛkɛta wa Nzambi “l’etema w’amɛna,” kete ‘hatotolama ɔtɛkɛta’ akɔ. Koko, sho koka aha la tshimbatshimba ‘ndjonganyiyama l’ekiyanu, falanga ndo ɛngɛnɔngɛnɔ wa lo lɔsɛnɔ lɔnɛ.’ (Luka 8:14, 15) Diakɔ diele, nyɛsɔ totetemala kanaka yima l’awui wa lo Bible ndo toleke mbeya Jehowa dimɛna. Dui sɔ diayototshutshuya dia mbokoya waonga ande ndo lonto lande dimɛna efula. (2 Kɔr. 3:18) Sho koka ntetemala la mbeka awui efula wendana la Sheso lele l’olongo ndo mbookoya pondjo pondjo. Ndooko dui dioleki sɔ nɛmɔ!—Ond. 3:11. w15 10/15 4:13, 14

Oko ambutshi,wɛ nangaka di’anayɛ ntshikala suke la Jehowa. Ndo Jehowa nangaka dia wɛ mbalowanya ndo mbahokola. Nde akakosha lowandji la nsala dui sɔ. (Ɛf. 6:4) Diakɔ diele, ekɔ ohomba wɛ ndjashikikɛ ɔnɛ anayɛ wekɔ lo nongola olowanyelo ɔsɔ mbala la mbala. Ohokana yimba lo dui nɛ: Wɛ ekɔ l’eshikikelo ɔnɛ naka anayɛ mbɔtɔka kalasa, kete wɛ mbeyaka dia wetshelo walongolawɔ wekɔ ohomba ndo wɛ nangaka dia vɔ ngɛnangɛna mbeka awui w’eyoyo. Woho akɔ waamɛ mbakokayɛ ndjashikikɛ lo kɛnɛ kendana la wɔtwɛlɔ awɔ lo nsanganya, nsanganya ya weke, ndo ɔtɛmwɛlɔ wa nkumbo. Laadiko di’awui asɔ tshɛ, wetshelo wakondjawɔ oma le Jehowa koka mbitsha nsɛnɔ yawɔ. Diakɔ diele, kimanyiyawɔ dia vɔ ngɛnangɛna mbeka awui wendana la Jehowa ndo yashikikɛ dia nde koka mbaetsha dia vɔ monga la lomba l’oshika. Ndo nto, lowanya anayɛ dia vɔ ntshɔka l’olimu w’esambishelo mbala la mbala. Okoya ɛnyɛlɔ ka Yeso lo mbakimanyiya dia vɔ ngɛnangɛna mbetshaka anto akina Ɔtɛkɛta wa Nzambi. w15 11/15 2:6

Jehowa akashikikɛ onto lahomba monga ɔtɛ wa nkumbo. Koko ɔtɛ hahombe monga la hiadi. Kaanga mbele omi ekɔ ɔtɛ a wadɛnde, Bible mbotɛɛka dia nde ‘mbosha kɛnɛmɔ.’ (1 Pet. 3:7) Ngande wakoka omi nsala dui sɔ? Nde koka nsɛdingola ehomba ande ndo nɛnya nango yande. Bible mbutaka ɔnɛ: “Waomi, nyotetemale nanga wadɛnyu oko wakalange Kristo etshumanelo ndo wakandayakimɔ dikambo diatɔ.” (Ɛf. 5:25) Eelo, Yeso akakome polo ndo lo nkimɔ lɔsɛnɔ lande dikambo di’ambeki ande. Naka omi ekɔ ɔtɛ wa nkumbo wele la ngandji oko Yeso, kete ayonga dui dia wɔdu dia wadɛnde mboolanga, mbookitanyiya ndo nɛnya tɛdikɔ tande.—Tito 2:3-5. w15 11/15 4:6, 7

Oko wakahandjɔnɛ lokumu l’ɔlɔlɔ, Akristo efula wakatɛkɛtaka Grɛkɛ oleki Hɛbɛru. Nɛ dia Grɛkɛ mbaki ɔtɛkɛta wakatɛkɛtamaka le anto efula, abuku wa Mateo, Makɔ, Luka, ndo Joani wakakahanyema lo Grɛkɛ. Ndo nto, mikanda w’ɔpɔstɔlɔ Pɔɔlɔ ndo abuku akina wa lo Bible wakafundama lo Grɛkɛ. Ekɔ dui dia diambo dia mɛna dia etena kakashilaka afundji w’Afundelo w’Akristo wa lo Grɛkɛ Afundelo wa lo Hɛbɛru, vɔ wakakambaka mbala efula la Septante. Lo etena kɛsɔ, eshilelo ɛsɔ wakatshikitanaka yema tshitshɛ la tɔtɛkɛta ta lo Hɛbɛru k’etatelo. Ɔnkɔnɛ, olimu w’akadimudi wele keema kokele amboyokoma etenyi kɛmɔ ka Bible keeso la tɔ ɛlɔ kɛnɛ. Kɛsɔ tetshaka dia Jehowa hɔshi di’ɔtɛkɛta ɔmɔ kana mbekelo kɛmɔ ndeka kina.—Ets. 10:34. w15 12/15 1:8, 9

Mbala mɔtshi, ekɔ dimɛna nɛmbɔhala. Bible mbutaka ɔnɛ ekɔ “etena ka mbɔlama.” (Ond. 3:7) Ɛnyɛlɔ, sho nɛmbɔhalaka etena katɛkɛta anto akina dia mɛnya dilɛmiɛlɔ diawashaso. (Jɔbɔ 6:24) Ndo nto, sho hatɔtɛkɛta akambo wa toseke ndo wahahombe anto akina mbeya. (Tok. 20:19) Ndo etena katomadja onto ɔmɔtshi, ayonga dui dia lomba dia sho nɛmbɔhala ndo aha mbuta ndooko dui. (Os. 4:4) Koko ekɔ etena kɛmɔ kele dimɛna mbuta dui dimɔ. (Ond. 3:7) Etena ka ntombola Jehowa, ka nkeketsha anto akina, ka mbuta woho wayaokaso, ndo ka mbitɛ anto akina kɛnɛ keso l’ohomba. Ndo naka sho nkamba la dikoka diaso dia ntɛkɛta lo yoho shɔ, kete tayɛnya Jehowa dia tekɔ la lowando le nde lo woho wakandatosha woshasha ɔsɔ. Laadiko dia laasɔ, etena katosha ɔngɛnyi aso ɔmɔtshi woshasha wa dimɛna efula, sho nangaka nkamba la wɔ lo yoho yoleki dimɛna tshɛ. w15 12/15 3:4, 5

Ɛlɔ kɛnɛ, ndooko ɔnangɛso lakoka nsala ahindo ndo tɔkɔnɔla. (1 Kɔr. 12:9) Koko lam’ele vɔ nangaka tokimanyiya, amɔ koka tosha dako oyadi kaanga l’etena keso hataalɔmbi diɔ. Lo mɛtɛ, alako amɔ bu waale. Ɛnyɛlɔ, Pɔɔlɔ akalake Timɔte dia nde nɔka yema ya wanu. Timɔte aki la paa ya l’otema, ondo l’ɔtɛ wakandanɔ ashi wa mindoKoko, sho la dia monga la yewo. Ɔnangɛso ɔmɔtshi koka nyanga tetawoya dia sho mbɔsa woho ɔmɔtshi w’okanga kana dikɛmɔ dimɔ kana dia sho ndɛ diangɔ dimɔ kana mbewɔ mbo ya ndɛ mɔtshi. Nde koka totɛ ɔnɛ okanga akɔ wakakimanyiya anto amɔ wa lo nkumbo kande wanɛ waki la hemɔ ka woho akɔ waamɛ. Koko, kɛsɔ halembetshiya ɔnɛ okanga akɔ wayotokimanyiya ndo sho lawɔ. Sho la dia mbohɔ dia oyadi kaanga anto efula wekɔ lo nkamba l’okanga ɔmɔtshi kana la osakelo ɔmɔtshi, vɔ koka monga la etombelo efula wa kɔlɔ.—Tok. 27:12. w15 12/15 4:13

Ohokanyiya lo dikambo nɛ: Sho tshɛ takahowɔ pɛkato oma le Adama, ndo dilanya dia pɛkato ele nyɔi. (Rɔmɔ 5:12) Ngandji mbakatshutshuya Jehowa dia nde ntoma Yeso lanɛ la nkɛtɛ dia nde ndjovwɛ anto tshɛ, ndo nde “akalɛtɛ nyɔi dikambo di’oseka onto tshɛ.” (Hɛb. 2:9) Koko, olambo waki Yeso wayosala awui woleki efula! Vɔ wayonya nyɔi lo pondjo. (Isa. 25:7, 8; 1 Kɔr. 15:22, 26) Wanɛ tshɛ wɛnya mbetawɔ le Yeso wayɔsɛna lo wɔladi ndo wayonga l’ɔngɛnɔngɛnɔ wa pondjo, oyadi wanɛ wayolɛ oko nkumi ya dikanga kaamɛ la Kristo l’olongo kana wanɛ wayokita Diolelo dia Nzambi lanɛ la nkɛtɛ. (Rɔmɔ 6:23; Ɛny. 5:9, 10) Naa ɛtshɔkɔ ekina wele lo woshasha wa Jehowa? Oko etenyi ka woshasha waki Nzambi, nkɛtɛ kayokoma paradiso, ase hemɔ wayɔkɔnɔ ndo anto wakavu wayolɔ. (Isa. 33:24; 35:5, 6; Jni. 5:28, 29) Sho nangaka Jehowa ndo Ɔnande la ngandji lo woho wakandatosha ‘woshasha w’ofele waheyama mbuta.’—2 Kɔr. 9:15. w16.01 2:5, 6

La ntondo ka Nzambi mbelɛ Akristo w’akitami dia vɔ ntshɔ otsha l’olongo, vɔ wambongaka l’elongamelo ka lɔsɛnɔ la pondjo lanɛ la nkɛtɛ. Vɔ wakalomɔlomɔka dia nkoma l’etena kayetɛ Jehowa nkɛtɛ paradiso ndo kayondonya awui wa kɔlɔ tshɛ. Ondo vɔ wakayaɛnaka walongola ose nkumbo kana ɔngɛnyi ɔmɔtshi lakavu ko ambolɔ. Vɔ nomɔlomɔka ndjodjasɛ lawɔ lo mvudu yayowoka ndo ndjɔlɛ lawɔ elowa w’oma l’etamba wakawonɛ. (Isa. 65:21-23) Ko lande na kele tokanyi tawɔ hatototshikitana? Nɛ dia vɔ hawototshama nsɔnyi di’elongamelo kawɔ. Elongamelo kawɔ hotshikitana nɛ dia hawonga ndooko l’okiyanu. Vɔ hawotonyi mbidjasɛ la nkɛtɛ, oko wayaokawɔ la shashimoyɛ dia wayodjasɛ pondjo pondjo la nkɛtɛ aha la mbotshama wɔma, vɔ kombolaka mɛna awui amɔ w’eyoyo wayosalema l’olongo. Kana onde vɔ nangaka mbeya woho wayonga lɔsɛnɔ la l’olongo? Eete na. Ɔnkɔnɛ, Nzambi ndaamɛ mbawaɔsɛ yɛdikɔ lo dikambo sɔ. Etena kawaelɛnde, nde kambaka la nyuma kande k’ekila dia ntshikitanya yoho yawɔ ya nkanyiya ndo difuto diakongɛwɔ. w16.01 3:11, 13

Jehowa mbele Onto laheme laadiko dia tshɛ. Nde mbakatonge ɛngɔ tshɛ, nde ekɔ la lomba ndo la wolo waha l’elelo. L’ɔkɔngɔ wa nde nkimanyiya Jɔbɔ dia nde nshihodia dui sɔ, Jɔbɔ akawotɛ ate: ‘Kakianɛ dimi lambeya dia wɛ ekɔ la akoka wa nsala awui tshɛ. Ndo ndooko dui dionga la yɛ lo yimba dia nsala diahayakoke nsala.’ (Jɔbɔ 42:2) Jehowa koka nsala kɛnɛ kalangande aha l’ekimanyielo k’onto. Koko nde mɛnyaka ngandji kokande anto lo nɔmba anto akina dia nkamba kaamɛ la nde dia nkotsha sangwelo diande. Nzambi akatonge Ɔnande Yeso la ntondo ka nde ntonga oseka onto tshɛ ndo oseka ɛngɔ kekina tshɛ. Oma laasɔ, Jehowa aketawɔ di’Ɔnande mbokimanyiya dia ntonga diangɔ dikina tshɛ. (Jni. 1:1-3, 18) Ɔnkɔnɛ, Jehowa kombisha tsho Ɔnande olimu ɔmɔtshi w’ohomba, koko nde akatɛ anto akina awui wendana l’olimu akɔ.—Kɔl. 1:15-17. w16.01 5:1, 2