Yâlɔngɔsɔla dia mbɔtɔ l’ɛnɔnyi kinunu wele ohomba!

LOWANDJI l’Ɛnɔnyi Kinunu laki Kristo layela anto ɛtshɔkɔ wa mamba. L’ɛlɔmbwɛlɔ ka Yeso koludi la ngandji, anto wayomɔ oma lo shɔkɔ ya nshi nyɛ ko koma l’ɔngɛnɔngɛnɔ w’anto wa kokele. Ohokanyiya kɛnɛ kakoka dui sɔ nembetshiya le yɛ. Demba dia wolo ndo dia ashashi wate kana teketa dia djɛsɛ! Ohokanyiya dia pindju tshɛ yetɔyɛ ko wɛ ndjaokaka wolo nge ndeka ndo lui kakete. Miliyɔ y’apami, wamato la ana wekɔ lo kongɛ l’asolo walomɔlomɔ dia ndjɔsɛna lo nshi shɔ y’ɔngɛnɔngɛnɔ. Wekɔ lo kongɛ nshi shɔ l’eshikikelo tshɛ ndo l’alɔmbɛlɔ awɔ vɔ ndjilɔmbaka. Oma lo wekelo awɔ wa Bible, vɔ wamboshikikɛ ɔnɛ vɔ kokaka kondja ɛtshɔkɔ ɛsɔ.

Koko la ntondo ka Lowandji lande l’Ɛnɔnyi Kinunu, Yeso ayohomba minya wanɛ tshɛ wahokana la lowandji lande oma laa nkɛtɛ. Nde ayowadiaka lo ta dielɛwɔ lo Bible ɔnɛ Aramangɛdɔna. (Enyelo 16:16) Akristo wa mɛtɛ wa lanɛ laa nkɛtɛ hawotɔlɔ ta sɔ. Ɔsɔ ekɔ ta dia Nzambi. Ndo diɔ hadiotonga paka lo dihole dimɔtshi dia lanɛ laa nkɛtɛ. Bible mbutaka ɔnɛ ta sɔ diayokoma polo ndo lo tokoma tshɛ ta nkɛtɛ. Atunyi wa lowandji la Kristo wayodiakema. Ndoko ɔtɔi a l’atei awɔ layohandɔ!​—⁠Jeremiya 25:⁠33.

Oma lâsɔ ko Yeso ndjendana la Satana Diabolo nde l’ɛdiɛngɛ ande. Ohɔsa di’oko wɛ ekɔ lo mɛna dui diakɔ, ɔnkɔnɛ wakadiɛnaka ofundji wa dibuku di’Enyelo: “Dimi lakenyi ondjelo [Yeso Kristo] ayahulo uma l’ulungu aki la sapi ka lukuki la difuku diaha la ekumelu, la molola a wuki lu lunya landi. Ndi akandi ului a wuki w’edjedja, eli Uhimbanyi, Satana ndame, akûkeleka deku kinunu.” (Enyelo 20:​1, 2) L’ɔkɔngɔ wa lâsɔ, Satana nde l’ɛdiɛngɛ ande wayoyolanyema pondjo.​—⁠Mateu 25:⁠41.

“Ului a wuki w’antu waheyama mbala” wayohandɔ l’Aramangɛdɔna. (Enyelo 7:⁠9) Kristo ayɔlɔmbɔla anto asɔ dia vɔ kondja ɛlɔlɔ tshɛ w’oma lo “teko di’ashi a lumu,” oko watɔlɔmbɔlaka olami w’ɛkɔkɔ ɛkɔkɔ ande otsha l’ashi washimbɛ lɔsɛnɔ. (Enyelo 7:17) Lam’ele Satana nde l’ɛdiɛngɛ ande hawotowadjɛ wekamu nto dia vɔ pama lo nyuma, anto asɔ wanɛ wayohandɔ l’Aramangɛdɔna wayotakimanyiyamaka yema yema dia nɛndja nsaki yawɔ ya pɛkato edja ndo vɔ koma kokele!

Lo lowandji la Yeso loludi la ngandji, lɔsɛnɔ layotalɔngɔsɔmaka tsho. Lo tshimbo ya Yeso Kristo, Jehowa Nzambi ayonya akambo tshɛ washa anto pâ la ekiyanu. Nde “ayukitula asoi tshe lu ashu awo; nyoi hayuyala ntu, delu hadiuyuyala ntu, kuyanga ndjawi, kuyanga kandji.” (Enyelo 21:⁠4) Omvutshi Isaya ekɔ lo mbidja shɔdi, ata ate: “Ashu w’akanga a tutshungu wayosena, la atui w’akanga a puki wayuka. Akanga a tshumbi wayulimbolimbo uku peli la kanga lumi ayimba esambu.” (Isaya 35:​5, 6) Ndo wanɛ wakavu, ‘wa wake ndo wa totshitshɛ,’ wayolɔ l’elongamelo k’aha ndjovɔ nto pondjo!​—⁠Enyelo 20:⁠12.

Kânga lo nshi yaso nyɛ, “ului a wuki w’antu” wayohandɔ l’Aramangɛdɔna wekɔ lo tshumanyema. Vɔ wekɔ lo ndjâlɔngɔsɔla otsha lo Lowandji l’Ɛnɔnyi Kinunu laki Kristo. Kânga mbahaweye etena kayomɛ lowandji lɔsɔ, vɔ wekɔ l’eshikikelo ɔnɛ l’etena kakashikikɛ Nzambi, lowandji lakɔ layoya. Wɛ kokaka monga l’ɔnɔngɔ w’anto asɔ, koko ndo wɛ lawɔ pombaka ndjâlɔngɔsɔla, aha lo sondja diangɔ diayɛ ko munda lɔkɛndɔ otsha lo lɛkɛ lɔmɔtshi la lanɛ laa nkɛtɛ, koko lo ntsha dia kondja ewo k’oshika ka Jehowa Nzambi ndo k’asangwelo ande l’ekimanyielo ka wekelo wa Bible. Aha la vɔ kɔlɔmba kânga lofalanga ɔtɔi kana kodjangɛ lotumu lɔmɔtshi, Ɛmɛnyi wa Jehowa wayɔngɛnangɛna dia kɛ̂nya woho wakoka wekelo wa Bible kokimanyiya wɛ la nkumbo kayɛ. Afundji wa jurunalɛ nyɛ wayonga l’ɔngɛnɔngɛnɔ dia kewoya awui akina nto lâdiko.

[Caption on page 7]

[Box on page 7]

Ɛnɔnyi kinunu: lo mɛtɛ mɛtɛ kana lo didjidji?

Lam’ele etenyi koleki woke ka dibuku dia Bible dielɛwɔ Enyelo kakafundama l’ɛtɛkɛta wa didjidji, dimbola dimɔtshi mumbɔmaka. Kayotota dia Lowandji l’Ɛnɔnyi Kinunu laki Kristo latawɔ l’Enyelo na? Onde ɔsɔ ekɔ etena ka mɛtɛ mɛtɛ kana ka didjidji?

Tolembetelo tekɔ mɛtɛ tɛ̂nya ɔnɛ yinga y’ɛnɔnyi ya mɛtɛ mɛtɛ mbatawɔ lanɛ. Enda yema: Ɔpɔstɔlɔ Paulo akelɛ Lowandji l’Ɛnɔnyi Kinunu laki Kristo, etena kayolomboyama anto, ate lushi lɔmɔtshi. (Etsha 17:31; Enyelo 20:⁠4) Ɔpɔstɔlɔ Petero akafunde ɔnɛ lushi ɔtɔi (eshidi a tango 24) le Jehowa ekɔ oko ɛnɔnyi kinunu. (2 Petero 3:⁠8) Ɔsɔ ekɔ djembetelo yɛnya ɔnɛ “lushi” l’elombwelo lɔsɔ lekɔ etena k’ɛnɔnyi kinunu wa mɛtɛ mɛtɛ. Lâdiko dia lâsɔ, lo Enyelo 20:​3, 5-7, sho mbadiaka mbala nyɛi y’etondo ɔnɛ “deku kinunu” koko aha “deku nunu la nunu.” Kɛsɔ mɛnyaka ɔnɛ ɔsɔ ekɔ lofulo la shikaa l’ɛnɔnyi kinunu koko aha lofulo laheyama l’ɛnɔnyi nunu la nunu. Dui sɔ ondo mɛnyaka ɔnɛ ɔsɔ ekɔ etena kɛmɔtshi ka shikaa.