Bible ekɔ dibuku diatetsha woho wa mbeya nsɛna
‘ƆTƐKƐTA waki Nzambi wekɔ la lɔsɛnɔ ndo la nkudu; vɔ wekɔ diɛsa ndeka ndo yɔɔmbɔ ya mpɛmɔ wedi ehende . . . ndo vɔ kokaka sɛdingola tokanyi la nsaki ya l’otema w’onto.’ (Heberu 4:12) Kɛnɛ kakoka Ɔtɛkɛta waki Nzambi sala kɛsɔ mɛnyaka mɛtɛ dia sho hatohombe mbɔsa Bible oko dibuku di’ɔlɔlɔ to, koko oko dibuku diakoka tokimanyiya l’akambo efula.
Ofundji ɔmɔtshi w’awui w’ɔtɛmwɛlɔ akafunde ate: “Losango lele lɔkɔ lekɔ ohomba efula lo nsɛnɔ yaso oko weso l’ohomba wa mpɛnga.” Nde akakotsha ate: “Naka wɛ menda mposa ndo ohomba w’efula wele laso ɛlɔ kɛnɛ wa nkɔnɔ oma lo wa hemɔ ko wɛ mbadia Bible ele la kanyi shɔ l’ɔtɛ, kete wɛ ayokondja etombelo wa diambo efula.” Oko tala diahɛta la wolo tshɛ, Bible tomanyaka fundo lo kɛnɛ kendana l’akambo efula wa wolo ndo ekakatanu wendana la lɔsɛnɔ la nshi nyɛ.—Osambu 119:105.
Lo mɛtɛ, awui wa lomba wele lo Bible wekɔ la wolo wa nɔmbɔla tokanyi taso, tokimanyiya dia kandola ekakatanu, ndowanya nsɛnɔ yaso, ndo tosha akoka wa ndɔshana l’akambo asɔ wahatakokaki tshikitanya. Kɛnɛ koleki ohomba ele, Bible tokimanyiyaka dia mbeya ndo mboka Nzambi ngandji.
Dibuku diasha onto oyango lo lɔsɛnɔ
Jehowa Nzambi, ɔnɛ lele Kiɔkɔ ya Bible, ‘mbeyaka mboka yaso tshɛ dimɛna.’ Nde koleki mbeya ehomba aso wa lo demba, wa lo yimba, ndo wa lo nyuma oleki shamɛmɛ. (Osambu 139:1-3) La ekanelo ka dimɛna, nde todjɛka elelo weyama dimɛna lo kɛnɛ kendana la yoho yahombaso kɛndakɛnda. (Mika 6:8) Lâsɔ, ekɔ ohomba efula nyanga dia shihodia elelo ɛsɔ la ɛlɔmbwɛlɔ kɛsɔ ndo mbeka dia mbɔtɔnganyiya nsɛnɔ yaso l’akambo akɔ. Omembi w’esambo akate ate: Diɛsɛ le onto “[l]atongenangenaka lu elembe wa [Jehowa].” ‘Nde ayotondoya dikambo tshɛ diatshande.’ (Osambu 1:1-3) Sunganaka mɛtɛ sho sɛdingola akambo wendana l’elongamelo kɛsɔ.
Maurice, ombetsha ɔmɔtshi wambolongola pasiɔ, aketawɔka mbala tshɛ dia Bible ekɔ l’ɛkɔndɔ ndo l’awui amɔtshi w’ohomba. Koko, nde kombetawɔka dia tɔ ndja oma le Nzambi. L’ɔkɔngɔ wa vɔ mbolembetshiya bonde kakasha Nzambi anto Ɔtɛkɛta wakinde wofundami, Maurice akasɛdingola prɔfɛsiya efula ya lo Bible. Lam’akinde êke ɔlɔngɔlɔngɔ, nde akêke ɔkɔndɔ w’anto wakasɛnaka lo nshi yakete, awui wendana la lokongɛ l’ekanda, awui wa siansɛ, ndo awui wa diewo di’okama wa nkɛtɛ. Lo mɛna efula ka tolembetelo tashikikɛ dia Bible ekɔ dibuku dia mɛtɛ, nde akasuya dia mɛtɛ nde akayaɛnaka yimba efula paka lo washo ande ndamɛ. Nde ate: “Lakayakimɔ lo tawesaka eyango w’anyanya, lo tayangaka ɔngɔnyi, ndo ɛngɛnɔngɛnɔ wa lo lɔsɛnɔ. Koko, ndoko kakameyaka lo kɛnɛ kendana la dimɛna ndo mɛtɛ ka dibuku dioleki abuku tshɛ wambofundama.”
Wony’ɔnɛ wayande l’ɛnɔnyi 70 l’ɛmɔtshi, Maurice ambohɔ ɔkɔndɔ wendana la ɛnamelo kaki Yeso le Tɔmasɛ, lo mbuta ate: “Dimi lambodja lonya lami lo ‘mpota’ ndo lambosuya dia Bible ekɔ dibuku di’akambo wa mɛtɛ, tamu tami tshɛ tamboshila.” (Joani 20:24-29) Oko wakadite ɔpɔstɔlɔ Paulo, Bible sɛdingolaka tokanyi ta l’otema, ndo mbishaka onto lɔsɛnɔ lele l’oyango. Tɔ mɛtɛ kekɔ dibuku diatetsha woho wa nsɛna.
Tɔ kimanyiyaka wanɛ wele la lɔsɛnɔ l’osukusuku
Bible mbishaka nto alako wakimanyiya anto dia vɔ ndjakokɛ oma lo mbekelo ya kɔlɔ. Danyɛlɛ akonge l’akoka wa tshika mbekelo ka kɔlɔ ka nɔka mfɔka, nde kondjakimɔ nto l’ɛngɛnɔngɛnɔ wa tshamba ndeko ndo komonga nto omunga wa wanu. (Romo 13:13; 2 Koreto 7:1; Ngalatiya 5:19-21) Lo mɛtɛ, di’onto minya mbekelo shɔ ko ndɔta ‘lonto l’oyoyo’ pombaka nde sala la wolo tshɛ. (Efeso 4:22-24) Danyɛlɛ ekɔ lo mbuta ate: “Oko weso kema kokele, ɔsɔ komonga dikambo dia tshitshɛ.” Koko nde akatondoya. Ɛlɔ kɛnɛ, Danyɛlɛ adiaka Ɔtɛkɛta waki Nzambi lushi tshɛ, ndo ɔtɛkɛta akɔ ambokimanyiya dia nde ndjasukanya la Jehowa.
Lam’akandayolaka, Danyɛlɛ akalɛnyaka Bible efula, kânga mbakinde atakiadiaka ndoko lushi, ndo nde akalɔmbaka Nzambi otsho tshɛ. Koko nde akahombaka ɛngɔ kɛmɔtshi. Ɛngɔ kakɔ ko ɔngɛnɔngɛnɔ. Lushi lakaleke tshɛ ohomba le nde ele lushi lakandɛnyi lokombo laki Nzambi mbala ka ntondo lo Bible. (Etumbelu 6:3; Osambu 83:18) Oma k’etena kɛsɔ, nde akakambe la lokombo Jehowa lam’akandasalaka dɔmbɛlɔ, ndo alɔmbɛlɔ ande wakayotamanyaka ndja oma k’ɛs’otema. Nde ate: “Jehowa akayokomaka ndo tshikala ɔngɛnyi ami woleki, polo nd’ɛlɔ.”
La ntondo ka nde ndjomɛ mbeka Bible, Danyɛlɛ komonga ndoko l’elongamelo lo kɛnɛ kendana la nshi yayaye. Nde ate: “Onto a nombe tshɛ kokaka mɛna di’andja ɔnɛ wekɔ lo tatshu paka otsha lo kɔlɔ. Dikambo sɔ diakambishaka wɔma, lâsɔ dia minya wɔma ɔsɔ oma lo yimba, dimi lakakambaka olimu wonya tshɛ.” L’ɔkɔngɔ diko, nde akayeyaka dia Nzambi ayela akambo wosembwe lo nkɛtɛ k’otondo kambɛdiama oma l’akambo wa kɔlɔ, lɛnɛ akoka anto w’ɔlɔlɔ monga la wɔladi ndo l’ɔngɛnɔngɛnɔ wa pondjo. (Osambu 37:10, 11; Danyele 2:44; Enyelo 21:3, 4) Kakianɛ, Danyɛlɛ aya l’elongamelo ka shikaa. Shɛngiya y’ɔlɔlɔ y’oma lo Bible mbokimanyiyaka dia mɛna akambo wa lo lɔsɛnɔ la sso di’ɔlɔlɔ.
Bible kimanyiyaka anto dia kandola ekakatanu wa lo yimba
George aki l’ɛnɔnyi esambele lam’akavu nyango. Nde akokaka wɔma efula dia ndala l’otsho, ndo paka wonya ambohotɔ kate lambemɔ la lɔsɛnɔ. L’ɔkɔngɔ diko nde akayadiaka kɛnɛ kakate Yeso lo dikambo dia nyɔi ndo dia eolwelo ɔnɛ: “Etena kambukuka, kayuka wane weli lu waumbu tshe diui [dia Yeso], ku vo wayutumba.” Nde akanandema nto l’ɛtɛkɛta waki Yeso w’ɔnɛ: “Dimi leko eulwelu la lumu. One lambetawo, kuyanga ndi ayuvo, ayuyala la lumu.” (Joani 5:28, 29; 11:25) Akokɛmaka dia ɔsɔ aki tokanyi t’eshika, t’amɛna, ndo takeketsha. George ate: “Akambo wa mɛtɛ asɔ kɔngɛnyangɛnya tsho yimba yami, koko vɔ wakananda ndo otema.”
Ndo Danyɛlɛ, ɔnɛ lakatatɛkɛtshi dikambo diande l’etatelo mbaki nde la wɔ la wɔma. Nyango kokoka mbodia ndamɛ, ɔnkɔnɛ nde akôkimɔ lo mvudu yodiawɔ ana. Nde akayaokaka nshi tshɛ oko okalema ndo akakombolaka efula monga l’atei wa nkumbo kokanawɔ ngandji. L’ɔkɔngɔ diko, oma l’ekimanyielo ka wekelo wa Bible nde akayosholaka kɛnɛ kakandatayangaka. Danyɛlɛ akayɔtɔka l’ɔlɔngɔswamelo w’Akristo w’Ɛmɛnyi wa Jehowa ndo akayokomaka ɔtɔi ɔmɔtshi wa lo nkumbo kɛsɔ ka lo nyuma, lɛnɛ akandayokaka dia nde mbetawɔmaka ndo nangemaka oma le anto akina. Lo mɛtɛ, Bible ekɔ dibuku diele l’alako w’eshika ndo wangɛnyangɛnya yimba.
Teye dia Jehowa mɛnaka kɛnɛ kele l’otema wakiso ndo mbeyaka kɛnɛ katatayange. Nzambi “atedikaka etema,” ndo nde atofutaka “untu l’untu uku ditshelu diandi.”—Tukedi 21:2; Jeremiya 17:10.
Tɔ kekɔ l’alako w’eshika wendana la lɔsɛnɔ la nkumbo
Bible mbishaka alako w’eshika wendana la yoho ya mbeya nsɛna l’anto. George mbutaka ate: “Ewanu wendana la shɛmanedi kana w’anto hawokana l’ɛtɛkɛta ekɔ l’atei w’akambo waleka tshindja anto wɛɔngɔ lo lɔsɛnɔ.” Ngande wasalande la ntondo k’akambo asɔ na? Nde ate: “Naka lambɛna di’onto ɔmɔtshi ambotshɛ kɔlɔ, dimi kambaka la dako di’oshika diele lo Mateu 5:23, 24 di’ata ɔnɛ: ‘Dja wɔladi lam’asayɛ l’ɔnanyɔ.’ Mbeya tsho dia dimi kokaka tɛkɛta lɔnɛ lele lami la dikambo mbelaka etombelo w’ɔlɔlɔ. Dimi kokaka monga la wɔladi waki Nzambi watɛkɛta Bible dikambo diawɔ. Alako wa lo Bible kimanyiyaka. Vɔ wekɔ ohomba efula.”—Filipi 4:6, 7.
Lam’atomba owanu lasa wadi l’omi, vɔ akɔ ahende pombaka ‘monga suke dia mpokamɛ, ɔkɔkɛ dia tɛkɛta ndo ɔkɔkɛ dia momala.’ (Jakoba 1:19) Dako sɔ ndowanyaka sawo dia lam’asawɔ. George mbutaka nto ate: “Lam’akambami la dako diata dia nanga wadɛmi ndo mbotshɛ akambo woho wayatshelami, dimi mɛnaka etombelo paka wonya akɔ wamɛ. Ndo kema wolo le nde dia nɛmiyami.” (Efeso 5:28-33) Eelo, Bible tetshaka woho wa sho mbeya munga yakiso hita, woho wa ndɔshana la yɔ ndo woho wahombaso mbikikɛ munga y’anto akina.
Tɔ kekɔ l’alako wahashile nɛmɔ
Sɔlɔmɔna, Nkumekanga ka lomba akate ate: “Ekamaki [Jehowa] l’utema aye tshe, tekamaki yimba yaye hita. Uwetawoki lu akambu aye tshe, ku ndi ayukolongoswela mbuka yaye.” (Tukedi 3:5, 6) Ɛtɛkɛta ɛsɔ mbokɛka mɛtɛ hwe, ndo wekɔ ɛtɛkɛta w’eshika!
Bible toshaka wolo wa sala kɛnɛ kele ɔlɔlɔ. Tɔ kimanyiyaka wanɛ woka Nzambi ngandji dia mbɔtɔnganyiya nsɛnɔ yawɔ la lolango lakinde ndo dia tana ɔngɛnɔngɛnɔ lo ‘kɛndakɛnda l’ɛlɛmbɛ wa Jehowa.’ (Osambu 119:1) Oyadi lɔsɛnɔ la ngande lele laso, Bible kekɔ l’ɛlɔmbwɛlɔ ndo l’alako weso lawɔ ohomba. (Isaya 48:17, 18) Adiakatɔ lushi la lushi, kanaka yimba la kɛnɛ kadiayɛ, ndo kambaka l’awui akɔ. Tɔ kayokɔmbɔla wɔɔngɔ woho wa wɛ mbika yimba l’akambo wele pudipudi ndo wasungana. (Filipi 4:8, 9) Wɛ ayeka aha tsho woho wa nsɛna ndo ngɛnangɛna la lɔsɛnɔ koko ndo woho wa nanga Otungi wa lɔsɛnɔ.
Naka wɛ sala ngasɔ, kete Bible ayokokimanyiya efula oko wakatwakimanyiya miliyɔ y’anto koko hatonga tsho dibuku di’ɔlɔlɔ le yɛ. Tɔ kayɛnya mɛtɛ dia tɔ kekɔ dibuku diatetsha woho wa mbeya nsɛna!
[Osato wa lo lɛkɛ 6]
Bible koka keketsha yɛdikɔ yamboyɔsa ya tshika mbekelo ya kɔlɔ
[Osato wa lo lɛkɛ 7]
Bible ketshaka woho wa wɛ ndjasukanya la Nzambi