Tosha Ɛnyɛlɔ lo Ditshelo di’Ɔlɔlɔ
1. Lande na kahombaso ndeka kotola yambalo yaso lo kɛnɛ kendana la dionga diahomba monga laso l’etena ka losanganya la distrikɛ?
1 Etena kasanganaso anto efula lo nsanganya ya distrikɛ, ditshelo diaso ndo yoho yɔsaso anto akina ndekaka mɛnama le anto watenda. Diakɔ diele, onto tshɛ la l’atei aso mbidjaka yimba l’akambo wofundami lo Bible wata ɔnɛ: ‘Oyali la yimba ya dimɛna, ndo oyaɛnya wɛmɛ ɛnyɛlɔ lo ditshelo di’ɔlɔlɔ.’ (Tito 2:6, 7) Mbeyaka monga ohomba dia mbidja welo wa lânde dia ‘mbidja yimba aha paka lo wahɔ asɔ oto, koko ndo lo wahɔ w’anto akina.’ (Fil. 2:4) Tɔsɛdingole awui amɔtshi wakokaso kamba l’ekeketshelo kɛsɔ lo losanganya la distrikɛ layaye lele l’ɔtɛ a dui ɔnɛ: “Tosha Nzambi Lotombo.”
2. Kakɔna kahatahombe mbohɛ lo kɛnɛ kendana l’ohangelo?
2 Ohangelo: Diaaso dioleki dimɛna le so dia sho kamba ladiɔ dia mɛnya etsha w’ɔlɔlɔ ele ohangelo w’anto. Lam’atshɔso lo losanganya, oko wele mbekelo y’anto amɔtshi, wanɛ wele l’ohomba wa pango tohangaka laka anangɛso wetawɔ dia nongola wanɛ waya lo losanganya. Koko akina ngɛnangɛnaka tohanga laka ewotɔ awɔ l’oyango wa tâsambisha lokumu l’ɔlɔlɔ kana wa towaeta dia tshɔ la wɔ lo losanganya. Ɔsɔ ekɔ dikambo dia dimɛna efula. L’ahole akɔ tshɛ wayotohanga, sho pombaka mɛnya dionga diaso dia dimɛna lo kamba l’elowa waki Nzambi wa nyuma. (Ngal. 5:22, 23) Lo dihole tshɛ diayotohanga, tatoyalake oko wanɛ wambotshɔ dia tɛndja kanga ngelo wotsho. La ntondo ka sho tshɔ lo losanganya, pombaka tayalɔngɔsɔdi dia kotsha ehomba aso tshɛ, oko olelo kana falanga ya lɔkɛndɔ y’otsha lo losanganya naka ambonga ohomba. Hatohombe nyanga dia vɔ tohangia nshi efula l’ɔkɔngɔ wa losanganya dia wahɔ aso hita. Yoho shɔ mbayotɛnya dilɛmiɛlɔ l’ɛlɔlɔ wotosalewɔ.
3. Woho akɔna wokokiso “tshela antu tshe ololo” lo mvudu yohangiso?
3 Sho pombaka mbeya dia lo dihole dohangiso, tekɔ angɛndangɛnda, ndo dikambo sɔ tɔlɔmbaka di’aha mbɔtɔ l’akambo w’ase luudu lohangiso ndo dia nɛmiya diangɔ diawɔ. Hatokoke munanda diangɔ dia kanga luudu aha la dikimɔ diande. Lo nshi yohangiso sho pombaka mbokimanyiya la tolemulemu tɔmɔtshi tele oko mɔmba luudu kana nɔnga diangɔ dimɛna. La ntondo ka sho monɛ oma lo dihole diohangiso, toyashikikɛ dia hatotshiki kanga luudu l’olimu wakatahombi takambi. Ɛtɛkɛta waki Yeso wofundami lo Mateu 7:12 mɛnyaka woho wokokiso nɔmbwama l’akambo wa ngasɔ. Lo yoho shɔ, “tutshelaki antu tshe ololo” ndo dikambo sɔ diayosha esambishelo ka dimɛna le anto akina.—Ngal. 6:10.
4, 5. Woho akɔna wakoka ana tombola Jehowa, ndo ɔkɛndɛ akɔna wele l’ambutshi?
4 Ambutshi ndo Ana: L’andja ɔnɛ wele ana efula kema la loshilambo, ana aso wekɔ la dionga diotshikitanyi, ndo dikambo sɔ tombolaka Jehowa ndo ɔlɔngɔswamelo ande. Koko mbala mɔtshi, ekakatanu ɛmɔtshi ndjotombaka naka ana hawolamemi dimɛna. (Tuk. 29:15) Ambutshi pombaka nama anawɔ dimɛna lo losanganya. Nɛ dia naka hawalami, kete wayetetaka wonya wa losanganya, hawotoyela awui watama, wayotadjaka mindjo ya wodjadja ndo tafutanyaka anto akina walanga mpokamɛ. Hakoke mbâtshika dia vɔ mbetetaka vamɛ otsha lo komba wonya wa losanganya. Naka ohomba wambonga, kete ombutshi ɔmɔtshi pombaka tshindɛ ɔnande. Ana pombaka mbidjasɛ suke l’ambutshi awɔ, onto tshɛ la Bible kande l’anya, la kayɛ ka mbɔsaka nɔtɛ y’Avɛsa, wayowokimanyiya dia mpokamɛ, ndo mbeka la mbeya woho wamboka Jehowa wɔma.—Euh. 31:12.
5 La ntondo ka losanganya tatɛ, ambutshi amɔtshi wakɛnyi ohomba dia mbohola kâmɛ l’ana awɔ awui w’endana la woho wa dionga diakokawɔ monga la diɔ. (Ef. 6:4) Vɔ kimanyiyaka ana dia shihodia ɔnɛ onto lele la ngandji ka mɛtɛ k’Okristo “hatshi akambu wa fumbo sonyi” kana ‘hayange paka wahɔ ande hita.’ (1 Kor. 13:5) Losanganya la distrikɛ ekɔ etena ka lânde ketshamaso oma le Jehowa, ndo ongi ana kana dikumanyi kokaka mɛnya dilɛmiɛlɔ l’ekongelo kɛsɔ oma lo lɔkɛwɔ lawɔ lo dihole diasalema losanganya ndo l’ahole akina.—Is. 54:13.
6. Dionga diaso koka monga la shɛngiya yakɔna le anto akina?
6 Dionga diaso dia dimɛna mbeyaka kamba efula dia komiya awui wa ditakataka lo dikambo diaso ndo dia kotola anto oya l’ɔtɛmwɛlɔ wa mɛtɛ. (Mat. 5:16; 1 Pet. 2:12) Tosale woho w’anto tshɛ wayohomana la so lo losanganya la distrikɛ sambishama oma lo kɛnɛ kasalaso ndo oma lo woho wawaɔsaso. Lo sala ngasɔ ‘mbayotoyaɛnya shamɛ ɛnyɛlɔ lo ditshelo di’ɔlɔlɔ’ ndo tombola Jehowa.—Tito 2:7.
[Kiombo ya lo lɛkɛ 4]
Ɔsa Anto Akina la Nɛmɔ
▪ Onga l’ekikelo ndo la dilɛmiɛlɔ otsha le ananyɔ ndo akadiyɛyɛ ndo otsha le onto lokosha pango
▪ Dia wahɔ aso ndo w’anto akina, kamba kâmɛ ndo yela ɛlɔmbwɛlɔ k’oma le wanɛ walɔmbɔla
▪ Tolanyake ɔlɔlɔ w’onto lakakohangia
▪ Lama ana ayɛ dimɛna