Kgaolo 36

Ke Ka Kgona Jang go Laola Tsela E Ke Lebelelang TV ka Yone?

BATHO ba le bantsi, bannye le bagolo, ba tshwakgotswe ka mo go masisi ke go lebelela TV. Dipatlisiso di supa gore mo palogareng, fa mosha wa Moamerika a nna dingwaga tse 18 o tla bo a ile a lebelela TV ka dioura tse 15 000! Gape gore batho ba tshwakgoga eletota go lemotshega fa balebeledi ba bagolo ba yone ba leka go kgaogana le tlwaelo eo.

“Ke fitlhela ke sa kgone go itshwara go lebelela thelebishene. Fa e buletswe, ga ke kgone go e itlhokomolosa. Ga ke kgone go e tswala. . . . Fa ke atamela go e tswala, mabogo a me a felelwa ke maatla. Ke bo ke nna foo dioura tse dintsi.” A ke mosha yo o sa golang? Nnyaa, yono e ne e le morutisi wa kholetšhe wa puo ya Seesemane! Mme basha le bone ba ka tshwakgolwa ke go lebelela TV. Elatlhoko kafa bangwe ba bao ba neng ba dumalana le “Beke eo go sa Lebelelweng TV ka Yone” ba neng ba itshwara ka gone:

“Ke ntse ke nna pelo e botlhoko . . . Tlhogo ya me ga e bereke sentle.”—Susan wa dingwaga tse 12.

“Ga ke bone gore a ke ka kgona go tlwaologa go e lebelela. Ke rata TV fela thata.”—Linda wa dingwaga tse 13.

“Kgatelelo e ne e le kgolo fela thata. Ke ne ka nnela go tlhotlheletsega go e leba. Nako e e neng ya nna boima thata e ne e le bosigo gareng ga nako ya borobabobedi le ya lesome.”—Louis wa dingwaga tse 11.

Ga go gakgamatse, he, go bo bontsi jwa basha bao ba neng ba tseneletse ba neng ba keteka bokhutlo jwa “Beke eo go sa Lebelelweng TV ka Yone” ka go sianela go ya go bula TV. Mme go na le gore e nne selo se se tshegisang, go tshwakgolwa ke TV go ka nna le mathata a mantsi. Akanyetsa mangwe a one a sekae fela.

Go ya kwa tlase ga maduo a ditlhatlhobo: National Institute of Mental Health (U.S.) e ne ya bega gore go lebelela TV go feta selekanyo go ka gogela mo go reng “kgono ya motho ya kwa sekolong e ye kwa tlase, segolo bogolo ya go bala.” Buka The Literacy Hoax e tlhalosa jaana gape: “Phelelo ya go lebelela thelebishene mo baneng ke gore e dira gore ba lebelele gore go ithuta e tshwanetse go nna selo se se motlhofo, se se ka itirisang fela, le seo se tlosang bodutu.” Ka gone motho yo o tshwakgotsweng ke go lebelela TV o ka fitlhela gore go ithuta ke teko e kgolo fela thata.

Mekgwa e e sa siamang ya go bala: Ke leng o ileng wa tsaya buka mme wa e bala yotlhe fela? Sebui sengwe sa Association of Book Dealers ya kwa West Germany o ile a bua jaana a utlwile botlhoko: “Re fetogile go nna morafe wa batho bao ba boelang kwa gae go tswa tirong mme re bo re thulamelela fa pele ga thelebishene. Go bala ga rona go ntse go fokotsegela pele.” Ka go tshwana pego nngwe e e tswang kwa Australia e bolela jaana: “Mo oureng nngwe le nngwe eo e senngwang go balwa, mo palogareng, ngwana wa Mo-Australia o tla bo a sentse dioura di le supa a lebeletse thelebishene.”

Go katoga ba lelapa: Mosadi mongwe wa Mokeresete o ile a kwala jaana: “Ka baka la go lebelela TV go feta selekanyo . . . ke ne ka ikutlwa ke jewa ke bodutu fela thata ebile ekete ke nosi. Go ne go tshwana jaaka ekete balelapa [la me] botlhe e ne e le baeng.” A le wena ka go tshwana o iphitlhela o senya nako e potlana le balelapa la gago ka baka la TV?

Botshwakga: Ba bangwe ba ikutlwa gore boitsemeletso jo bo bakwang ke TV “bo ka nna jwa gogela mo go reng [mosha] a nne le ditebelelo tsa gore ditlhokafalo [tsa gagwe] di tla diragadiwa kwantle ga gore a dire boiteko bope le ka go latlhelela dilo fela mo botshelong.”

Go amana le ditlhotlheletso tseo di seng molemo: Diteitšhane tsa dithelebishene dingwe di lere ditshwantsho tseo di hepisetsang tlhakanelo-dikobo mo lelapeng. Mme go e lebelela ka metlha gantsi go dira gore motho ka bonya a nne a tsenye dikotsi tsa dikoloi, go thunya, go tlhabana ka dithipa, go thuntshana, go ragana ga karate mo tlhaloganyong ya gagwe. Go ya ka tekanyetso nngwe, mosha mongwe wa United States o tla bo a setse a bone go bolawa ga batho ba le 18 000 mo TV fa a nna dingwaga tse 14, re sa bue sepe ka go itaana ka difeise le tshenyo ya thaka e tshesane.

Mmatlisisi mongwe wa Boritane William Belson o ile a fitlhela gore basimane bao ba tsayang sekgele mo go lebeleleng dibaesekopo tsa thubakanyo mo TV go ka nna ga diragala gore ba “tsenelele mo thubakanyong e e masisi.” Gape o ne a bolela gore thubakanyo ya TV e ka tlhotlheletsa “go rogana le go tlhapatsana, go nna bogoma mo metshamekong kana fa go tshamekwa, go tshosetsa go lwa le mosimane yo mongwe, go kwala mafoko mangwe mo dipoteng, [le] go thuba difensetere.” Lefa o ka tswa o akanya gore wena o ka se amiwe ke ditlhotlheletso tsa go nna jalo, patlisiso ya ga Belson e ne ya lemotsha gore go amana le thubakanyo mo TV go ne ga seka ga “fetola maikutlo a a siameng a basimane [bao] malebana le” thubakanyo. Go lebega fa go nna ba lebelela thubakanyo e le gone go neng ga koafatsa mogopolo wa bone wa go ganana le thubakanyo.

Lefa go le jalo, se ebileng se tshwenya go feta, ke phelelo eo go tshwakgolwa ke go lebelela thubakanyo mo TV go ka nnang le yone mo botsalanong jwa motho le Modimo oo o ‘ilang mongwe le mongwe yo o ratang thubakanyo.’—Pesalema 11:15.

Ke Ka Kgona go Laola go E Lebelela ga Me Jang?

Seno ga se reye gore TV e tshwanetse go lebiwa jaaka selo seo ka tlholego fela se leng bosula. Mokwadi Vance Packard o lemotsha jaana: “Bontsi jwa dilo tseo di bontshiwang mo thelebisheneng ya U.S. di ka nna le mosola . . . Gantsi go na le dithulaganyo tsa thapama tseo eleng diphitlhelelo tse dintle tsa batshwantshi ba bontsha kafa popo e dirang ka gone—go simolola ka ditiro tsa bommamanthwane, diphologotswana tsa Amerika, dinare go ya go ditlhapi dingwe. Thelebishene ya botlhe e na le balete e e kgatlhisang, baopedi ba mmino wa diletso, le baopedi ba mmino ba setlhopha se sebotlana. TV e molemo fela thata mo go boleleng ditiragalo tsa botlhokwa . . . Gangwe le gape TV e bontsha metshameko e e kgatlhisang.”

Lefa go le jalo, selo se se molemo le sone fa se dirwa thata se ka gobatsa. (Bapisa Diane 25:27.) Mme fa o fitlhela gore ga o kgone go e tima fa e bontsha dilo tse di gobatsang, go molemo go gakologelwa mafoko a ga moaposetoloi Paulo a a reng: “Ke gana go laolwa ke sepè.” (1 Bakorintha 6:12) Ke jang, he, o ka tlogelang go nna lekgoba la TV le kafa o ka laolang go e lebelela ga gago ka gone?

Mokwadi Linda Nielsen o lemotsha jaana: “Motho o simolola go ikgapa ka go ithuta go itlhomela mekgele.” Santlha, tlhatlhobisa mekgwa ya gago ya nako ya jaanong. Mo lobakeng lwa beke, elatlhoko dilo tseo o di lebelelang le gore o senya nako e e kana kang tsatsi le letsatsi o e lebeletse. A o e bulela fela fa o tsena kwa gae? O e tswala leng? Ke dipontsho dife tseo “o tshwanetseng go di bona” beke nngwe le nngwe? O ka nna wa gakgamadiwa ke dikarabo tseo o tla di bonang.

Go tswa foo akanyetsa ka kelotlhoko dipontsho tseo o ntseng o di lebelela. “A tsèbè ga e leke mahoko, hèla yaka magalapa a tla a utlwe diyō?” go botsa jalo Bibela. (Yobe 12:11) Jalo dirisa temogo (gammogo le kgakololo ya batsadi ba gago) mme o tlhatlhobe dipontsho tseo go nang le mosola go di lebelela. Bangwe ba akanyetsa go sa le gale gore ke dipontsho dife tseo ba tlileng go di lebelela mme ba bulele TV fela fa ba lebelela dipontsho tseo! Ba bangwe ba tsaya dikgato tse di gagametseng, ba tlhoma melao ya ga go lebelelwe thelebishene mo malatsing a sekolo kana ditekanyetso tsa e lebelelwa oura e le nngwefela ka letsatsi.

Mme go tweng fa lefa TV e sa bulelwa e raela fela thata? Lelapa lengwe le ne la rarabolola bothata jwa lone ka tsela eno: “Re baya thelebishene ya rona mo kamoreng e e kwa tlase gore re seka ra e bona . . . Fa e le kwa kamoreng e e kwa tlase ga re raelesege mo go kalo go e bulela fela fa re tsena mo ntlong. Motho o tshwanelwa ke go tsaya loeto a ya koo go ya go lebelela sengwe.” Go boloka thelebishene ya gago mo kamoreng ya sephiri, kana go e tlogela fela o sa e golaganya le motlakase, go ka nna ga nna le matswela a a tshwanang.

Ka mo go kgatlhisang, lefa ba ne ba le mo ‘botlhokong jwa go kgaogana nayo’ basha bao ba neng ba tsaya karolo mo “Bekeng eo go sa Lebelelweng TV ka Yone” ba ne ba bona dilo tse dingwe tse di siameng tseo ba neng ba di dira mo boemong jwa go lebelela TV. Mosetsanyana mongwe o ne a gakologelwa jaana: “Ke ne ka bua le mme. Ke ne ka simolola go mmona e le motho yo o kgatlhisang, ka gonne ke ne ke sa etle ke itewa tsebe ke go lebelela TV fa ke ne ke na nae.” Mosetsanyana yo mongwe o ne a fetisa nako eo ka go leka go tsenya letsogo mo kapeing. Mosimane mongwe yo o bidiwang Jason o bile a ba a fitlhela gore e ka nna selo se se itumedisang go ya “kwa parakeng go na le go lebelela TV,” kana go ya go tshwara ditlhapi, go bala, kana go ya kwa lotshitshing lwa lewatle.

Boitemogelo jwa ga Wyant (bona tsenyeletso ya setlhogo se se reng “Ke ne Ke Tshwakgotswe ke TV”) bo lemotsha gore tharabololo e nngwe ya go laola go lebelela TV ke go nna motho a “totahetse mo tihoñ ea Morèna.” (1 Bakorintha 15:58) Le wena o tla fitlhela gore go atamalana thata le Modimo, go ithuta Bibela ka thuso ya dikgatiso tse di molemo tseo jaanong di leng gone, le go nna o tshwaregile mo tirong ya Modimo go tla go thusa go fenya go tshwakgolwa ke go lebelela TV. (Yakobe 4:8) Ke boammaaruri gore, go lekanyetsa go lebelela ga gago TV go tla raya gore o tla tlolwa ke dingwe tsa dithulaganyo tseo o di ratang. Mme ke ka ntlhayang fa o tshwanetse go dirisa TV ka botlalo, o lebelela thulaganyo nngwe le nngwe fela ka boeleele? (Bona 1 Bakorintha 7:29, 31.) Selo se ebileng se le molemo ke gore o ‘itshware makgwakgwa’ fela jaaka moaposetoloi Paulo, yo o kileng a re: “Ke ikgōba mmele, ke o baea mo taoloñ.” (1 Bakorintha 9:27) A seno ga se botoka go na le go nna lekgoba la TV?

Dipotso tsa Puisano Kgaolo 36

◻ Ke ka ntlhayang fa go lebelela TV go ka bidiwa selo se se tshwakgolang mo basheng bangwe?

◻ Diphelelo dingwe tse di ka nnang tsa senya tsa go lebelela TV go feta selekanyo ke dife?

◻ Ditsela dingwe tsa go laola go lebelela TV ke dife?

◻ Ke eng seo o ka se dirang mo boemong jwa go lebelela TV?

[Mafoko a a mo go tsebe 295]

“Ke ntse ke nna pelo e botlhoko . . . Tlhogo ya me ga e bereke sentle.”—Susan wa dingwaga tse 12, yo o neng a tsaya karolo mo go “Beke eo go sa Lebelelweng TV ka Yone”

[Lebokoso mo go tsebe 292, 293]

‘Ke Ne Ke Tshwakgotswe Ke TV’—Potsolotso

Mmotsolotsi: O ne o le dingwaga di kae fa o ne o simolola go tshwakgolwa ke go lebelela TV?

Wyant: Ke ne ke ka nna dingwaga tse di lesome. Fa fela ke ne ke goroga kwa gae ke tswa sekolong, ke ne ke bulela TV. Santlha, ke ne ke lebelela ditshwantsho-metlae le dithulaganyo tsa bana. Go tswa foo go ne go latela dikgang, . . . ka nako eo ke ne ke ya kwa kitsing ke ya go batla sengwe seo ke neng ke ka se ja. Morago ga moo, ke ne ke boela ke ya go lebelela TV mme ke e lebelele go fitlhela ke batla go ya go robala.

Mmotsolotsi: Mme o ne o nna le nako ya go bona ditsala tsa gago leng?

Wyant: TV e ne e le yone tsala ya me.

Mmotsolotsi: Mme go raya gore o ne o seke o nna le nako ya go tshameka le ba bangwe kana ya metshameko?

Wyant: [a tshega] Ga ke na bokgoni bope mo metshamekong. Ereka ke ne ke lebelela TV nako yotlhe, ga ke ise ke ko ke kgone go bo tlhagolela. Ke motshameki yo o setshururu wa basketball. Mme fa e le mo dithutong tsa go itshidila mmele ka metlha e ne e le nna wa bofelo go kgethiwa. Lefa go le jalo, ke eletsa ekete ke ka bo ke ile ka tlhagolela dinonofo tsa me tsa metshameko botokanyana—eseng fela gore ke bo ke ne ke ile ka kgona go ikgantsha ka gone, mme eleng fela gore ke bo ke ile ka kgona go itumela.

Mmotsolotsi: Go tweng ka maduo a ditlhatlhobo?

Wyant: Ke ne ka kgona go sekae mo thuta-puong kwa sekolong. Ke ne ke robala bosigo thata mme ke dira tiro ya me ya sekolo eo e dirwang kwa gae ka motsotso wa bofelo. Mme go ne go le bokete kwa sekolong se segolwane ka gonne ke ne ke sena mekgwa e mentle ya go ithuta.

Mmotsolotsi: A nako yotlhe e o e sentseng o lebelela TV e ile ya go ama?

Wyant: Ee. Ka dinako dingwe fa ke na le batho, ke iphitlhela ke ba lebile fela—jaaka ekete ke lebile puo e e neelwang mo TV—go na le go tsaya karolo mo motlotlong oo. Ke eletsa ekete ke ka bo ke kgona go inaakanya le batho botoka.

Mmotsolotsi: Ebu, o dirile molemo fela thata mo puisanong eno. Ka phepafalo ga e sa tlhola e go tshwakgotse.

Wyant: Ke ne ka simolola go kgaogana le TV morago ga ke sena go ya kwa sekolong se segolo. . . . Ke ne ka batla ditsala mo basheng ba Basupi mme ka simolola go tswelela pele semoyeng.

Mmotsolotsi: Mme seno se ile sa amana jang le go lebelela ga gago TV?

Wyant: Fa kanaanelo ya me ya dilo tsa semoya e ntse e gola, ke ne ka simolola go lemoga gore bontsi jwa dipontsho tseo ke neng ke a tle ke di lebelele tota e ne e se tseo di neng di tshwanetse go lebelelwa ke Bakeresete. Gape, ke ne ka ikutlwa gore ke tlhoka go dira mo go oketsegileng go ithuta Bibela le go baakanyetsa dipokano tsa Bokeresete. Seo se ne se raya gore ke fokotse nako ya go lebelela TV. Go ne go se motlhofo, lefa go le jalo. Ke ne ke rata go lebelela ditshwantsho-metlae mo mosong wa Matlhatso. Mme go tswa foo mokaulengwe mongwe wa Mokeresete mo phuthegong o ne a ntaleletsa gore ke tsamaye nae re ye go dira tiro ya go rera ka ntlo le ntlo mo mosong wa Matlhatso. Seo se ne sa dira gore ke tlwaologe go lebelela TV mo mosong wa Matlhatso. Jalo kgabagare ke ne ka ithuta eleruri go fokotsa nako ya me ya go lebelela TV.

Mmotsolotsi: Gompieno go ntse jang?

Wyant: Ebu, ke santse ke na le bothata jwa gore fa TV e buletswe, ga go na sepe se ke kgonang go se dira. Jalo ke e tlogela ke sa e bulela nako e telele. Ebile tota, TV ya me e ne ya senyega dikgwedi di le mmalwa tse di fetileng mme ga ke ise ke ko ke itshwenye go e baakanya.

[Setshwantsho mo go tsebe 291]

Mo bathong bangwe go lebelela TV ke selo seo se tshwakgolang fela thata

[Setshwantsho mo go tsebe 294]

Fa thelebishene e beilwe mo lefelong leo le kgoreletsang go e lebelela, thaelesego ya go e bulela ga e kalo