Go Alosiwa ga Setlhopha sa bo-85 sa Gileade—Tiragalo E E Itumedisang

MORAGO ga go kgakolwa ga tempele dingwaga di ka nna 3 000 tse di fetileng, Solomone o ne “a naea batho tsela, me ba ea megopiñ ea bōnè, ba itumetse ba le pelo e e monate.” (2 Ditihalō 7:10) Mafoko ao a tlhalosa sentle kafa batho ba ba fetang 4 000 ba neng ba ikutlwa ka teng fa ba ne ba tswa mo Holong ya Dikopano ya Basupi ba ga Jehofa ya kwa Jersey City ka September 11, 1988. Go ne go diragalang? Go ne go alosiwa setlhopha sa bo-85 sa Sekolo sa Bibela sa Watchtower sa Gileade.

Morago ga pina, thulaganyo e ne ya simololwa ke W. L. Barry, yo eleng leloko la Setlhopha se se Laolang, ka thapelo e e amang maikutlo. T. Jaracz, yo le ene e leng wa Setlhopha se se Laolang, e ne e le modulasetulo mo letsatsing leo. ‘Gore tiragalo eno e tle e nne e e lapolosang semoyeng ebile e le e e agang eleruri,’ Jaracz o ne a rialo, ‘go tlhokega moya wa ga Jehofa le tshegofatso ya gagwe.’ Eleruri, seo se ne sa bonala fa thulaganyo e ntse e tsweletse.

Morago ga dikakgelo tseno tsa go ba amogela, baalogi ba ne ba amogela kgakololo ya go kgaogana nabo eo e neng e neelwa ka metseletsele ya dipuo tse dikhutshwane, tse di molemo. R. L. Rains wa Komiti ya Bethele e ne e le ene wa ntlha go bua. Rains fa a ne a ntsha dintlha tsa gagwe mo go Genesise 12:1, 2, o ne a tlhagisa diithuti jaana: ‘Itshupeng go nna tshegofatso mo kabelong ya lona ya borongwa.’ Mme seno ba ka se dira jang? ‘Ke ka tsela eo lo itshwarang ka yone fela fa lo goroga koo,’ o ne a gatelela jalo. Morago ga moo o ne a tlotlomatsa dilo di le pedi tseo di tla ba thusang thata: (1) Ba tshwanetse ba lemoga gore ba tla tshwanelwa ke go dira diphetogo dingwe gore ba tle ba tlwaelane le dikabelo tsa bone tse disha; le gore (2) ba tshwanetse ba boloka dikamano tsa kagiso le ba bangwe.

Ka tsela e e bothitho, le e e rotloetsang, J. E. Barr wa Setlhopha se se Laolang o ne a bua morago ga gagwe, a bua le baalogi ka setlhogo se se reng “Totisa Tumèlō ea Rona,” eo e neng e theilwe mo go Luke 17:5. Barr o ne a ba kgothatsa jaana, ‘Ka malatsi otlhe lo gakologelwe go kopa Jehofa gore a totise tumelo ya lona.’ Ka metlha ba tshwanetse ba gakologelwa lebaka la konokono la go bo Jehofa aile a ba romela kwa dikabelong tsa bone. ‘Lo kgone go utlwa maatla a phuthego ya Modimo e e sa bonaleng gammogo le ya gagwe e e bonalang a a lo tshegetsang ka metlha, motshegare le bosigo,’ Barr o ne a tlhagisa jalo. ‘Ga go le ka motlha lo ka reng lo setse 10 kopile gantsi thata mo dithapelong tsa lona gore, “Jehofa, ke kopa gore o totise tumelo ya me.”’

Fa modulasetulo a ne a itsise setlhogo seno sa sebui se se latelang, ebong F. D. Songer wa Komiti ya Faketori: “Boikarabelo Jo Eleng jwa Mofuta wa Jone Fela le Sekopololo se se Kgethegileng,” botlhe ba ne ba rata go itse ka mo go oketsegileng ka sone. Songer o ne a tsaya dintlha tsa gagwe mo go 1 Ditihalō 9:26, 27 le seo go buiwang ka sone moo mabapi le balebedi ba dikgoro ba Balefi. ‘Tiro ya bone e ne e le bongwe jwa maikarabelo a eleng a mofuta wa one fela,’ Songer o ne a tlhalosa jalo. Ba ne ba na le sekopololo—sedirisiwa seo se bontshang maatla a bone a go laola go tsena mo dikarolong tse di boitshepo tsa tempele. Ba ne ba ikanyega, ba bula dikgoro ka boikanyego moso le moso. Kwa bokhutlong, Songer o ne a bolelela baalogi jaana: ‘Lo neilwe boikarabelo jo eleng jwa mofuta wa jone fela le sekopololo se se kgethegileng, jaaka fa go ka tualo, seo lo tla bulang ka sone, moso le moso, lo bulela ba ba batlang go tsena mo malapeng a kobamelo ya boammaaruri. Tlhokomelang boikarabelo joo sentle mme lo dirise sekopololo seo ka boikanyego.’

Morago ga moo, M. G. Henschel wa Setlhopha se se Laolang o ne a bua ka setlhogo se se reng “Tshegetsa Sekaō sa Mahoko A A Tshedileñ.” Mokaulengwe Henschel o ne a tlhalosa kgakololo e Paulo a neng a e neela Timotheo, a lebisitse go 2 Timotheo 1:13, 14, gore e ne e le: ‘O dirise sekao sena sa mafoko a a tshedileng seo o se utlwileng mo go nna, mme o se tlhokomele jaaka khumo, jaaka sengwe se o se neetsweng.’ Baalogi le bone, ba amogetse khumo. Mo dikgweding tse tlhano tse di fetileng, ba ne ba ithuta Bibela le dilo tse di mabapi le bodihedi. ‘Thuto eno, sekao sena sa mafoko a a tshedileng,’ Henschel o ne a tlhalosa jalo, ‘ke sengwe seo Modimo a se tsentseng mo diatleng tsa lona gore 10 se dirise, eseng go se itirisetsa fela, nnyaa, mme go se dirisa mo go ba bangwe.’

Batlhatlheledi ba babedi ba sekolo sena ba ne ba neela kgakololo efe go diithuti tsa bone ya fa ba kgaogana natso? J. D. Redford o ne a bua pele ka setlhogo se se reng “Amogelang Diphoso tsa Lona.” Redford o ne a bontsha gore lemororo re itse gore “re tle re kgocwe rotlhe mo diloñ di le dintsi,” fa re bontshiwa gore re dirile phoso, gant si re a itlhatswa. (Yakobe 3:2) ‘Fa re gana go amogela diphoso tsa rona go tshwana le fa re ipolela gore ga re ke re dira diphoso tsa Redford o ne a rialo. Go amogela diphoso tsa rona ke tsela ya botlhale. Jang jalo? Sebui se ne sa tlhalosa jaana: ‘Ga go na ope yo o ka tlotliwang ke ba bangwe fa a tatalalela gore o siame tota le eleng fa a dirile phoso e e bonwang ke botlhe. Motho a ka ikanya jang motho yo a itseng go tswa mo go seo a se itemogetseng gore o a tle a bue maaka e le gore fela a tle a dire gore a bonwe a siame? Go amogela phoso go aga nonofo mo go rona, ya go itlotla. Mme go palelwa ke go dira jalo ke bogatlapa, mme ebile go re koafatsa mo boitsholong.’ Go dirisa kgakololo e e ntseng jalo e e molemo kwantle ga pelaelo go tla thusa baalogi gore ba dirisane sentle le ba bangwe.

U. V. Glass, ebong motlhatlheledi yo mongwe le moregisetara wa sekolo seo, o ne a theile tlhagiso ya gagwe ya bofelo mo pegong ya Bibela ya ga Gideone, yo Jehofa a neng a mo dirisa go golola Baiseraele mo seatleng sa Bamediana. (Baatlhodi, dikgaolo 6-8) Gideone o ne a bontsha gore Jehofa o ne a sa mo ikanya ka phoso, ka go bo fa batho ba ne ba batla go mo dira kgosi, o ne a gana, a re: “Yehofa o tla lo busa.” (Baatlhodi 8:23) ‘Le lona,’ Glass o ne a rialo, ‘se batleng go newa maemo a a kwa godimo. Lo itshupile. Mme sena ga se reye gore ke lona ba lo lwang. Ke Jehofa yo o lo thusang.’

Sebui sa bofelo sa mo mosong oo e ne e le A. D. Schroeder wa Setlhopha se se Laolang, mme go ne go bonala fa a nt se a bua gore o rata Sekolo sa Gileade tota. Mme o tshwanetse—e ne e le moregisetara fa sekolo sena se ne se simololwa ka 1943. Mokaulengwe Schroeder o ne a neela puo ka setlhogo se se reng “Lo Fitlhelwe Lo Le Boikanngo,” eo e neng e theilwe mo go 1 Bakorintha 4:2. Go nna boikanngo go kopanyeletsa eng? ‘Go tlhalosa go nna le tumelo ga motho mo dipolelong le mo ditsholofetsong tse di itumedisang tsa ga Jehofa Modimo,’ Schroeder o ne a tlhalosa jalo. ‘Gape go raya gore motho o boammaaruri, o tlhomame, o a ikanyega mo go Jehofa.’ A re na le dikai dipe tsa bao ba setseng ba ile ba fitlhelwa ba le boikanngo? Go ne go na le banna le basadi ba pele ga Bokeresete bao ba umakiwang mo go Bahebera kgaolo 11; Jesu Keresete; le baaposetoloi le barutwa ba bangwe bao ba tlhophilweng ba lekgolo la ntlha la dingwaga C.E. Morago ga go ba gakolola ka dingwe tsa dikai tsa motlha wa segompieno, Mokaulengwe Schroeder o ne a botsa jaana: ‘Go tweng ka rona?’ O ne a oketsa ka go re: ‘Lo ka tswa lo ikanyega kana lo sa ikanyege. Go sa kgathalesege gore a re batlodiwa kana re ba boidiidi jo bogolo, rotlhe, ba ditlhopha tseno tsoopedi, re tshwanetse ra ikanyega mo pitsong ya rona ka go tshwana.’

Morago ga dikakgelo tsa ga Mokaulengwe Schroeder, modulasetulo o ne a neela ditumediso tseo di amogetsweng go tswa kwa dinageng tse di farologaneng. Jaanong go ne ga tla nako ya gore diithuti di amogele didiploma tsa tsone. Baithuti ba le 22 ba ne ba tswa kwa dinageng di le thataro—Canada, Finland, Jeremane, Great Britain, Sweden, le United States. Lefa go le jalo, dikabelo tsa bone di tla ba isa kwa mafatsheng a le 11 a a farologaneng—Belize, Dominica, Ecuador, El Salvador, Hong Kong, Lesotho, Pakistan, Paraguay, Puerto Rico, Senegal, le Taiwan. Mme baalogi ba ne ba reng mo letsatsing la bone la kalogo? Mongwe wa diithuti o ne a bala lekwalo le le neng le kwaletswe Setlhopha se se Laolang le lelapa la Bethele, leo karolo ya lona e neng e re: “Re lo leboga lotlhe gapegape go bo lo dirile gore dikgwedi tse tlhano tseno e nne tseo re ka di gopolang go gaisa mo matshelong a rona otlhe.”

Morago ga nako ya go ikhutsa, W. L. Van De Wall wa Komiti ya Lefapha la Tirelo o ne a simolola thulaganyo ya thapama ka go tsamaisa thuto e e khutsafaditsweng ya Tora ya Tebelo. Morago ga moo, baithuti ba ne ba nna le thulaganyo e khutshwane, ba boeletsa mangwe a maitemogelo ao a kgatlhisang—ka nako tse dingwe e le a a tshegisang—ao ba neng ba nnile le one fa ba ne ba neela bosupi mo Motseng wa New York. Morago ga moo, botlhe bao ba neng ba le gone, go kopanyeletsa le setlhopha sa bo-85, ba ne ba ipelela thulaganyo e e kgethegileng e e neng e na le setlhogo se se reng “Go Tlwaelana Botoka le Barongwa ba Rona Ba Ba Tlhagafetseng.” Bareetsi ba ne ba kgona go bona—le go reetsa—barongwa bangwe ba nako e telele ka di-slides le theipi.

Jaaka bokhutlo jo bo tshwanelang, baithuti ba ne ba neela terama ya Bibela ba apere ka mokgwa wa segologolo ba otlelela botlhokwa jwa go dira thato ya Modimo ka tlhagafalo. Morago ga pina e e konelang, botlhe ba ne ba amiwa thata ke fa F. W. Franz, ebong mookamedi wa Watchtower Society yo o bogolo jwa dingwaga tse 95, a ne a konela ka go rapela thapelo e e amang maikutlo. Morago ga seno, botlhe ba ne “ba ea megopeñ ea bōnè, ba itumetse ba le pelo e e monate.”

Sekolo sa Bibela sa Watchtower sa Gileade seo se simolotsweng ka 1943, se thapisa barongwa le go ba romela kwa ntle kwa dikarolong tsotlhe tsa lefatshe. Mo ditlhopheng tsa ntlha di le 35, sekolo sene se ne se le kwa Kingdom Farm ya Watchtower Society, gaufi le kwa South Lansing, New York. Go tloga ka setlhopha sa bo-36 seo se simolotseng ka February 6, 1961, sekolo sene se ne sa fudusediwa kwa ntlongkgolo ya Mokgatlho kwa Brooklyn, New York, koo se ntseng se le gone go fitlha jaanong. Lefa go le jalo, fa setlhopha sa bo-86 se simolola ka October 17, 1988, sekolo sene se fudusediwa kwa Watchtower Farms, gaufi le Pine Bush, New York.

[Lebokoso mo go tsebe 21]

Lenaane—Palo la Setlhopha Seno:

Palogare ya dingwaga tsa bone: 29,1

Palogare ya dingwaga tsa bone ba le mo boammaaruring: 13,4

Palogare ya dingwaga tsa bone ba le mo bodiheding jwa nako e e tletseng: 9,1

Palo ya bakaulengwe ba ba sa nyalang: 2

Palo ya banyalani: 10

[Setshwantsho mo go tsebe 23]

Setlhopha se se Alogang sa boas sa Sekolo sa Bibela sa Watchtower sa Gileade

Mo lenaaneng le le fa tlase leno, mela e balwa go tloga mo pele go ya kwa morago, mme maina a thathamisitswe go tswa kafa molemeng go ya kwa mojeng mo moleng mongwe le mongwe.

(1) Johnston, Y.; Kuismin, S.; Ugarte, Z.; Williams, Z.; Grischkewitz, G. (2) Powers, E.; D’Angelo, L.; Honsberger, J.; Williams, J.; James, J. (3) Kuismin, V.; Grischkewitz, U.; Ugarte, R.; Rogerson, A.; Lantunen, K.; James, D. (4) Rogerson, M.; Johnston, R.; D’Angelo, T.; Honsberger, T.; Powers, T.; Danielson, M.