Jehofa o re Itse Sentle!

JEHOFA eleruri o a re itse, segolo bogolo fa re le batlhanka ba gagwe ba ba ikanyegang. Ditsala tsa rona tse re atamalaneng natso thata, balosika, le eleng batsadi, ga ba re itse ka botlalo jaaka ene. Ebu, Modimo o re itse botoka go na le ka moo rona re ikitseng ka gone!

Kitso e e itekanetseng ya ga Jehofa ka batlhanka ba gagwe e bontshiwa sentle mo go Pesalema 139. Dafide o ne a bua eng mo pesalemeng eo? Mme go itsiwe ga rona ke Modimo go tshwanetse ga ama mafoko a rona le ditiro jang?

Ka moo Jehofa a Re Itseng ka Gone!

Ereka Modimo e le ene Mmopi wa rona, re tshwanetse go lebelela gore a bo a re itse ka botlalo. (Ditihō 17:24-28) Ke ka gone moo Dafide a neng a ka bua jaana: “Yehofa, u mphukuditse, me u nkitsile.” (Pesalema 139:1) Go itsiwe ga ga Dafide ke Modimo go ne go le jaaka ekete o ne a batlisisitse tota kaga gagwe. Ka a ne a itumelela go bo Jehofa a ne a mo hukuditse, mopesalema o ne a ineela ka botlalo mo go laolweng ke Modimo le mo kaelong ya gagwe. Ka mo go tshwanang, Basupi ba ga Jehofa ka thapelo ba ‘pitikela tsela ya bone mo go Jehofa, ba ikaega ka ene,’ ba tlhomamisega gore o tla dira se se molemo ka metlha. (Pesalema 37:5) Re ikutlwa re sireletsegile mo semoyeng mo dipelong tsa rona ka gonne re batla go kaelwa ke botlhale jwa bomodimo, mme re ineela ka go rata mo go kaelweng ke Modimo. (Diane 3:19-26) Jaaka Dafide, re ka gomodiwa ke go itse gore Modimo o re tlhokometse, o tlhaloganya mathata a rona, mme ka metlha o iketleeleditse go re thusa.

“U itse go dula ga me le go nanoga ga me,” mopesalema o ne a bua jalo. (Pesalema 139:2a) Modimo o ne o itse sengwe le sengwe ka ditiro tsa ga Dafide, jaaka fa a ikhuditse a sena go wetsa tiro ya gagwe ya letsatsi le fa a tsoga mo borokong. Fa lo le Basupi ba ga Jehofa, tlhomamisegang gore le lona Modimo o lo itse ka botlalo.

Dafide o ne a bua jaana: “U tlhaloganyetsa mogopolō oa me kwa kgakala.” (Pesalema 139:2b) Lefa Jehofa a nna kwa legodimong kgakala le lefatshe, o ne a itse seo Dafide a neng a se akanya. (1 Dikgosi 8:43) Temogo e e ntseng jalo ga e a tshwanela go re gakgamatsa, ka go bo Jehofa ‘o bona se se leng mo pelong.’ (1 Samuele 16:7; Diane 21:2) Ntlha ya gore Modimo o kgona go bona megopolo ya rona e tshwanetse go re tlhotlheletsa go akanya ka dilo tse di itshekileng, tse di molemo, le tse di tshwanelwang ke pako. Mme abo go tshwanela jang ne gore ka metlha re tlhalose dikgopolo tsa rona ka thapelo e e tswang pelong gore re tle re bone kaelo ya bomodimo le gore re bone “kagishō ea Modimo”!—Bafilipi 4:6-9.

Mopesalema o ne a oketsa jaana: “U [lekanya] tselana ea me le go rapama ga me, me u tlwaetse mekgwa ea me eotlhe hèla.” (Pesalema 139:3) Go lekanya ga ga Jehofa maeto a a tsamaiwang ke Dafide le go tlhokomela go rapama ga gagwe fa a ikhuditse go ne go supa sentle gore Jehofa o ne a sekaseka sengwe le sengwe seo mopesalema a neng a se dira. Mogodimodimo o ne a lekanya ditiro tsotlhe tsa ga Dafide go tlhotlhomisa sentle gore o itshwara jang. Modimo o ne o itse ditsela tsa ga Dafide ka botlalo, ditsela tseo a neng a di latela mo botshelong. Fa Rraarona wa selegodimo a re tlhatlhoba ka mo go tshwanang, a a re fitlhele re mo direla ka boikanyego mme re nna ka metlha “mo tseleñ ea tshiamō” e e isang botshelong jo bo sa khutleng.—Diane 12:28.

Ereka go ne go se sepe seo a neng a ka se bua seo se neng se ka fitlhega mo Modimong, Dafide o ne a bua jaana: “Gonne, ga go na lehoko lepè mo lolemiñ loa me, ha e se go re, Yehofa o le itse yeotlhe hèla.” (Pesalema 139:4) Fa re tshwenyegile mo e leng gore ga re itse gore re ka bua eng mo thapelong, moya wa ga Jehofa o re “rapèlèla ka diphègèlō tse di sa kakeñ tsa buiwa.” (Baroma 8:26) Mo dipuisanong tsa rona, Modimo o tlhokomela dilo tse di salang mo lolemeng lwa rona re sa di bua, ka go bo o itse maikutlo a rona tota. Mme fa re na le lorato lo lo tswang mo ‘tumelong e e senang boitimokanyo,’ ga re kitla re leka go tsietsa ba bangwe ka ‘puo e e borethe.’—1 Timotheo 1:5; Baroma 16:17, 18.

Dafide o ne a oketsa jaana: “U mpotile kwa moragō le kwa pele, me u beile seatla sa gago mo go nna.” (Pesalema 139:5) Mme ebile tota, Jehofa o ne a dikaganyeditse Dafide jaaka motse o o dikaganyeditsweng ke masole. Go lebega mopesalema a ne a itse gore dilo tse a neng a ka kgona go di dira mo nakong ya botshelo jwa gagwe di ne di lekanyeditswe. O ne a itse gore o ne a ka seka a falola leitlho la Modimo le letsogo la gagwe, kana taolo ya gagwe. Legale, Dafide ga a ka a leka go tila seo, mme le rona ga re a tshwanela go dira jalo. Mme a ka metlha re itshware ka tsela e e supang fa re itse gore letsogo la ga Jehofa le mo godimo ga rona jaaka Basupi ba gagwe.

Go itse ga Modimo Dafide go ne ga mo tlatsa poifo. Ke ka gone moo a neng a bua jaana: “Kicō e e ntseñ yalo e nkgakgamatsa bobe; e kwa godimo, ga ke kake ka hitlha kwa go eōna.” (Pesalema 139:6) Modimo o itse mongwe le mongwe wa rona ka botlalo mo e leng gore ga re kake ra go tlhaloganya, go sa kgathalesege boitemogelo jwa rona le katiso. Ereka motho a sa kgone go go tlhaloganya, re ka tlhomamisega gore Jehofa o itse seo se re siametseng. Ka gone, fa re rapelela sengwe mme karabo e le nnyaa, a re ineeleng mo go rateng ga Modimo. Ke fela jaaka moaposetoloi Johane a ne a kwala jaana: “Ha re lōpa señwe kaha go rateñ ga ōna, oa re utlwa.”—1 Yohane 5:14.

Ga Re Kake ra Tila Moya wa Modimo

Jehofa ga a arabe fela dithapelo tsa batlhanka ba gagwe ba ba ikanyegang mme moya wa gagwe o dira mo go bone ebile o ba thusa go dira go rata ga gagwe. Ebile tota, Dafide o ne a botsa jaana: “Kana ke ka bo ke ka ea kae ke tlogèla mōea oa gago? Kgotsa sebōnalō sa gago nka se tshabèla kwa kae?” (Pesalema 139:7) Mopesalema o ne a itse gore ga a kake a tila moya wa Modimo, kana maatla a gagwe a a dirang, ao a kgonang go fitlhelela kwa dikarolong tse di kgakala tsa lobopo. Mme ga go ope yo a ka kgonang go iphitlhela sefatlhego sa Modimo, ke go re, a seka a mmona. Ka boammaaruri, ‘Jona o ne a nanoga a tshabela kwa Tareshisha a tswa mo ponong ya ga Jehofa,’ mme moperofeti yoo ga a ka a kgona go tila tlhapi e kgolo eo Modimo o neng wa e roma gore e mo kometse lefa e le gone go ikarabelela kaga go tila ga gagwe thomo ya Modimo. (Yona 1:3, 17; 2:10–3:4) Ka gone a re ikaegeng ka moya wa Modimo o o tla re thusang gore re wetse dikabelo tseo re di filweng ke Modimo.—Sekaria 4:6.

Ereka Dafide a ne a itse gore go ne go se ka moo a ka kgonang go tila Modimo ka gone, o ne a bua jaana: “Ha ke tlhatlogèla kwa legodimoñ, u bo u le gōna: ha ke ala phatè ea me mo Bobipoñ, bōna, u bo u le gōna hèla.” (Pesalema 139:8) Mo metlheng ya ga mopesalema, ‘go tlhatlogela kwa legodimong’ go ne go raya go tlhatloga dithaba tse di kwa godimo, tse ditlhoa tsa tsone gantsi di neng di thibilwe ke maru. Lefa go le jalo, fa re ne re le kwa setlhoeng se se kwa godimodimo sa thaba, moya wa Modimo o ne o santse o tla re fitlhelela koo. Mo godimo ga moo, re ne re sa kake ra falola go bonwa ke ene lefa bolao jwa rona bo ne bo le mo Sheol, eo e tshwantshetsang mafelo a a kwa tlase thata a lefatshe.—Bapisa Duteronome 30:11-14; Amose 9:2, 3.

“Ha ke tsaea diphuka tsa ka moshō, ke ba ke aga kwa teñ teñ ga dikhutlō tsa lewatlè,” Dafide o ne a bua jalo, “le gōna seatla sa gago se tla bo se nkgōga, le seatla sa gago se segolo se tla nchwara.” (Pesalema 139:9, 10) Go kaiwa eng ka “diphuka tsa ka moshō”? Mafoko ano a poko a tlhalosa ka moo lesedi la moso, jaaka ekete le na le diphuka, ka bonako fela le anamang go tloga kwa botlhaba go ya kwa bophirima. Mme go tweng fa Dafide a ne a ka kgona go tsaya diphuka tseno tsa moso mme a fitlha kwa lewatleng kana kwa ditlhaketlhakeng tse di kgakala tota kwa bophirima? O ne a santse a ka kgona go fitlhelelwa ke letsogo la Modimo, kana taolo ya gagwe le kaelo. Jehofa o tla bo a le koo go kaela mopesalema ka lorato le ka moya wa Gagwe.—Pesalema 51:11.

Modimo o Kgona go Fitlhelela le mo Lefifing

Bokgakala lefa e le lefifi ga di kake tsa thibela Modimo go fitlhelela motho. Ka jalo Dafide o oketsa jaana: “Ha ke re, Rure lehihi le tla mpipa, le lesedi ye le ntikologileñ le tla nna bosigo: Ye e leñ lehihi ga le gu bipele sepè, me bosigo bo phatsima yaka motshegare; lehihi le lesedi ke mo go chwanañ hèla mo go wèna.” (Pesalema 139:11, 12) Motho a ka nna a thijwa ke lefifi, jaaka ekete le mo khupeditse. Mme mo go Jehofa o tla bonala fela jaaka ekete o eme mo leseding le le tsabakelang la motshegare. Ga go ope yo a ka fitlhelang Modimo maleo a a a dirileng mo lefifing.—Isaia 29:15, 16.

Ga go sepe se se fitlhegileng seo Mmopi wa rona a sa se boneng. Dafide o ne a bua jaana mabapi le seno: “Gonne u bopile diphilō tsa me: ua mpipa ke le mo sebopeloñ sa ga mmè. Ke tla gu ntshetsa malebogō; gonne ke dihilwe ka mo go boitshègañ le ka mo go gakgamatsañ: dia gakgamatsa, ditihō tsa gago: me go mo, mōea oa me oa go itse sentlè. Popègō ea me ga ea ka ea gu hitlhègèla, yale ka ke dihwa mo bosaitsiweñ, ka ke bopiwa ka maatlametlo kwa tlhatse tlhatse ga lehatshe. Matlhō a gago a na a bōna go nna ga me ke e se ke bopege, me mo lokwaloñ loa gago go no go kwadilwe ditokololō cotlhe tsa me, tse di ne di nntse di bopiwa [ditokololo tsa mmele] ka letsatsi le letsatsi, le morōrō go no go e se go nne epè ea [ditokololo tsa mmele ka go farologana ga] cōna.”—Pesalema 139:13-16.

Jehofa Modimo, yoo a itseng maikutlo a rona a a kwa botennye, o ne a dira diphilo tsa ga Dafide. Ka go bo di le kwa teng teng mo mmeleng, diphilo ke dingwe tsa dikarolo tse di fitlhegileng tseo di sa fitlhelelweng, mme Modimo o kgona go di bona. O kgona go bona le eleng mo mpeng ya ga mmè, kana sebopelo sa gagwe. Ebu, Jehofa o kgona go bona le ngwana yo o golang! Go akanya fela ka tsela e e gakgamatsang eo a dirilweng ka yone mo sebopelong go ne ga tlhotlheletsa Dafide go baka Modiri wa gagwe. Go lebega mopesalema a ne a bua ka sebopelo sa ga mmaagwe fa a ne a re “kwa tlhatse tlhatse ga lehatshe.” Koo, a sa bonweng ke batho mme Modimo one o kgona go bona, ke gone koo marapo a gagwe a bongwana, menape ya gagwe, mesifa, ditshika, le ditselana tsa madi di neng di logakanngwa gone.

Pele dikarolo tsa mmele wa ga Dafide di bonala sentle mo sebopelong sa ga mmaagwe, Modimo o ne o setse o itse tebego ya gagwe. Ka ntlhayang? Ka go bo ngwana o gola ka tsela nngwe e e kgethegileng, jaaka ekete go latelwa dikaelo tseo di kwadilweng mo bukeng. Abo seno se bontsha botlhale le nonofo ya Modimo ya go bona le eleng dilo tse di fitlhegileng jang ne! Go tshwanetse go re dira gore re anaanele go bo Modimo o bopile batho le gore o ikarabelela mo dithulaganyong tse di gakgamatsang tsa go tsholwa ga bana tseo di ileng tsa felela ka go nna gone ga rona jaaka batho.

Abo Megopolo ya Modimo e le Botlhokwa Jang Ne!

Fa a akanya ka go gola ga lesea mo sebopelong, Dafide o ne a lemoga botlhale jwa Modimo. Ka gone, mopesalema o ne a tlhaeletsa jaana: “Le gōna, Modimo, megopolō ea gago e ratèga yañ mo go nna! Ha e shōpanye, ea bo e le kgolo yañ!” (Pesalema 139:17) Dafide o ne a anaanela megopolo ya ga Jehofa Modimo, mme e mentsi mo e leng gore o ne a kgatlhiwa ke go bo e le ‘megolo thata.’ Fa megopolo ya Modimo e le botlhokwa jalo mo go rona, re tla nna baithuti ba ba tlhaga ba Dikwalo. (1 Timotheo 4:15, 16) Dikgopolo tsa gagwe tseo di kwadilweng di “molemō go ruta, le go kgalemèla, le go shokolola, le go kaèla ka tshiamō: Gore motho oa Modimo a tlè a nnè boitèkanèlō, a iketleeleletse rure tihō ñwe le ñwe e e molemō.”—2 Timotheo 3:16, 17.

Dafide o ne a bua jaana malebana le megopolo ya Modimo: “Ha nkabo ke e bala, eabo e le mentsi thata, go heta palō ea moshawa: ea re ke kubuga ke be ke nntse ke na nau hèla.” (Pesalema 139:18) Ereka megopolo ya Modimo e le mentsi go gaisa moshawa, fa Dafide a ne a ka simolola go e bala fa letsatsi le tlhaba, o ne a tla bo a ise a e fetse fa a ya go robala. Fa a tsoga mo mosong, o ne a santse a tla bo a na le Jehofa. Ke gore, o ne a tla bo a santse a bala megopolo ya gagwe. Ebile tota, ereka re tlhoka kaelo ya ga Jehofa, go tlhatlhanya ka thapelo ka megopolo ya gagwe le boikaelelo jwa gagwe go tshwanetse go nna mo megopolong ya rona jaaka selo sa bofelo fa re ya go robala le sa ntlha fela fa re tsoga mo mosong.—Pesalema 25:8-10.

Go Otlhaiwa ga Baikepi

Ereka Modimo o naya kaelo e e botlhale, Dafide o ne a ikutlwa jang ka bao ba neng ba gana kaelo ya Modimo? O ne a rapela jaana: “Rure, ua bo u tla bolaea baikepi, Modimo; ke gōna ntlogèlañ, lona batho ba lo nyorèlwañ madi a batho. Gonne ba bua mashwè kaga gago, le baba ba gago ba umakèla leina ya gago lehèla.” (Pesalema 139:19, 20) Dafide ga a ka a leka go bolaya baikepi mme o ne a ba rapelela gore ba otlhaiwe ke seatla sa ga Jehofa. Re tshwanetse go nna le boikutlo jo bo tshwanang. Ka sekai, re ka rapelela go bua lefoko la Modimo ka bopelokgale fa baba ba re bogisa. (Ditihō 4:18-31) Mme ga re batle go bolaya baba ba rona, ka go bo re itse gore Jehofa o ile a re: “Pusholoshō ke ea me, ke tla lehetsa.”—Bahebera 10:30; Duteronome 32:35.

Fa Modimo a ne a ka bolaya baikepi, banna bao ba ba nang le molato wa madi ba ne ba tla tlogela Dafide. Ba ne ba na le melato ya go tsholola madi le go bua dilo tsa dikakanyo tsa bone fela ka Jehofa, tse di seng tumalanong le dikgopolo tsa gagwe. Mo godimo ga moo, ba ne ba tshwanelwa ke loso ka go bo ba kgobile leina la Modimo ka go le tsaya jaaka e se la sepe, gongwe ba le dirisa jaaka ba ne ba ntse ba tswelela ka boikepo. (Ekesodo 20:7) A le ka motlha re seka ra nna le molato wa maleo a a tshwanang!

Dafide o ne a bua jaana ka go bo baikepi ba ne ba na le molato wa go tsholola madi le go kgoba leina la Modimo: “Yehofa, a ga ke ile bōnè ba ba gu ilañ? a ga kea tlhokohadiwa ke ba ba gu cogologèlañ? Kea ba ila ka kilō e tona thata: ke ba kaea e le baba ba me.” (Pesalema 139:21, 22) Dafide o ne a ikutlwa a ila banna bano ka gonne ba ne ba ila Jehofa ba bile ba Mo tsuologela. E ne e le baba ba ga mopesalema ka go bo o ne a tlhoile boikepo jwa bone, go gana ga bone Modimo, le go tsuologela Mogodimodimo.

A Modimo o go Tlhatlhobe

Dafide o ne a sa batle go nna jaaka banna ba ba boikepo bao, mme o ne a itse gore o ne a sa tshwanela go ba ila. Ka jalo, o ne a kopa jaana: “Modimo, a u ko u mphukutsè, u bo u itse pelo ea me: nteka, me u itse megopolō ea me: Me u bōnè ha go na le mokgwa moñwe oa boikèpō mo go nna; me u nkgōgè mo tseleñ e e sa khutleñ.” (Pesalema 139:23, 24) Jaaka mopesalema, re tshwanetse go batla gore Modimo o hukutse dipelo tsa rona go bona fa re sena maikaelelo a a sa siamang. (1 Ditihalō 28:9) Re tshwanetse go kopa Jehofa go re tlhatlhoba, go itse megopolo ya rona e e kwa teng, go bona fa go sena tsela epe e e sa itumediseng mo go rona. Fa re tshwenyegile ka diphoso tsa rona kana go na le sengwe seo se re utlwisang botlhoko kana maikaelelo a rona a le bosula, a re rapeleng ka boikobo mme re ineele mo kaelong ya moya wa Modimo le kgakololo ya Lefoko la gagwe. (Pesalema 40:11-13) Ka ditsela tseo, Tsala ya rona e kgolo Jehofa, e ka re isa mo tseleng e e sa khutleng, e re thusa go latelela tsela ya tshiamo e e isang botshelong jo bo sa khutleng.

Ka gone Pesalema 139 e re kgothatsa eleruri. E bontsha gore, ereka go sena sepe seo Rraarona wa selegodimo a sa kgoneng go se bona, a ka re thusa nako le nako fa re tlhoka thuso. (Bahebera 4:16) Mo godimo ga moo, ka gonne Jehofa a re itse go gaisa ka moo re ikitseng ka gone, re sireletsegile mo tlhokomelong ya gagwe e e lorato. (Duteronome 33:27) Fa re mo kopa ka boikobo go re tlhatlhoba le go re bontsha makoa a rona a botho, re ka kgona go baakanya dilo ka thuso ya gagwe. Eleruri, he, go itsiwe ga rona ke Modimo go tshwanetse ga ama tsela ya rona ya botshelo ka mo go molemo. Go tshwanetse ga re tlhotlheletsa go nna baboledi ba ba ikanyegang ba kobamelo ya boammaaruri le go tsamaya ka boikobo fa pele ga ga Jehofa, yo o re itseng sentle.