Buka E Ntšha E Kgatlha Dimilione tsa Batho

KAROLO e e kgatlhang thata ya Dikopano tsa “Batho Ba Ba Ratang Kgololesego” tse di neng tsa simolola ka June o o fetileng e ne e le puo e e reng “Monna yo Mogolo go Gaisa Botlhe Ba Ba Kileng Ba Tshela.” Selo se se neng sa kgatlha thata mo go yone ke fa go ne go gololwa buka ya setlhogo sone seo. Go ne ga ya batho ba ba fetang dimilione di le thataro mo lefatsheng lotlhe kwa metseletseleng ya dikopano tseno mme ebile ba utlwile puo eno, e e neng ya tlhaga mo ditlhogong tse pedi tse di fetileng tsa makasine ono e fetotswe fale le fale.

Go ile ga gatisiwa dikaelo di feta dimilione di le 12 tsa buka eno ya Monna yo Mogolo go Gaisa Botlhe Ba Ba Kileng Ba Tshela ka dipuo di le 60. Ebile e teng le ka dipuo tsa kwa Yuropa Botlhaba tsa Se-Albania, Se-Croatia, Se-Hungary, Se-Macedonia, Se-Poland, Se-Russia, Se-Serbia, le Se-Slovenia. Ba ba neng ba itumela segolobogolo e ne e le ba ba fetang 74 000 ba ba neng ba le teng kwa dikopanong tse supa kwa Soviet Union bao ba neng ba e amogela ka puo ya Se-Russia.

Kwa Buka Eno E Simologileng Teng

Tshedimosetso e e mo bukeng eno e ne ya tlhaga pele e tlhomagana mo ditokololong tse di tlhomaganang tse 149 tsa Tora ya Tebelo, go tloga ka tokololo ya April 1, 1985. Babadi ba bantsi ba ile ba bolela gore ba ne ba hutsafala fa motseletsele ono o ne o khutla mo tokololong ya June 1, 1991. Melissa yo o dingwaga di 12 wa kwa Italy, o ne a gelela dikeledi fa a ne a bala kgang ya bofelo go Tora ya Tebelo. “Bosigo jwa pele fela ga kopano ya rona,” o ne a bolela, “ke ne ka rapela Jehofa ke mo kopa buka e e buang kaga botshelo jwa ga Jesu. Fa buka eno e ne e ntshiwa, ke ne ka opa diatla go fitlha ke lapa.”

Tshedimosetso e e neng e tswa e tlhomagana mo go Tora ya Tebelo e ne ya rulaganngwa mme ya tsenngwa mo bukeng e ntšha e e nang le ditshwantsho ya ditsebe tse 448 e e nang le ditlhogo di le 133. Go ne ga dirwa maiteko a gore go akarediwe polelo nngwe le nngwe ya ga Jesu le tiragalo nngwe le nngwe e e kwadilweng kaga botshelo jwa gagwe jwa mo lefatsheng, go akaretsa le ditshwantsho le dikgakgamatso tse a neng a di dira. Fa go kgonegang teng, sengwe le sengwe se anetswe go ya ka nako e se diragetseng ka yone. Go na le lenaane la ditemana tsa Bibela kwa bokhutlong jwa kgaolo nngwe le nngwe tseo kgaolo eo e thailweng mo go tsone.

Mongwe a ka tswa a akanya jaana, ‘Gone mme, ke setse ke badile buka eo gonne ke ne ka bala metseletsele ya Tora ya Tebelo.’ Mme babadi ba Tora ya Tebelo ba ile ba amogela pego ya botshelo jwa ga Jesu e le makgaoganyane mo ditlhogong tse di neng di tswa dibeke dingwe le dingwe tse pedi ka lobaka lwa dingwaga tse di fetang tse thataro. Le eleng lefa ditlhogo tseno di ne di naya tshedimosetso fa di ntse di tla di tlhomagana jalo, akanya fela kafa go kgatlhang ka teng go bala pego yotlhe ka lobaka lo lokhutshwane lwa nako mme o bo o itse ka botlalo kaga monna yo mogolo go gaisa botlhe ba ba kileng ba tshela!

E Nonotsha Tumelo

“Ke ne ka fetsa go bala kgatiso eno mo dibekeng tse pedi,” go bega jalo mosadi mongwe go tswa kwa Washington, D.C., kwa U.S.A. “Fa ke ne ke ntse ke e bala, dikeledi di ne di tshologa fela mo matlhong a me. Ke ne ke emisa go bala ke bo ke rapela le go lela. E ne ya ntira gore ke ikutlwe ekete ke ne ke na le Jesu koo, ke boga mmogo le ene. Le eleng morago ga beke ke sena go bala buka eno, matlho a me a ne a santse a gelela dikeledi fa ke ne ke akanya ka seo ke neng ke se badile. Ke ikutlwa ke atamalane thata le Jehofa ka go bo a ne a re ntshetsa Morwawe.”

“Ke feditse go bala buka eno e e buang kaga Jesu gompieno,” mosadi mongwe go tswa kwa Pittsburgh, kwa Pennsylvania, kwa U.S.A., o ne a kwala. “E molemo tota. Matlho a me a ne a gelela dikeledi fa ke ne ke bala dikgaolo tsa yone tsa bofelo. Go ne go le monate tota go bala buka eno yotlhe ka gangwe. Tota ga ke kgone go tlhalosa gore ke ikutlwa jang ka yone—nka bolela fela gore ke ne ka e rata tota!”

Ditshwantsho tsa buka eno tse dintle di oketsa kafa e amang maikutlo ka teng, fela jaaka mmadi mongwe yo o e itumeletseng a kwala jaana: “Di dira gore e nne ekete ke a ba utlwa fa ba lelela ngwana yo o suleng (kgaolo 47) kana gone go itse gore Jesu o ne a akanya jang fa mosadi yo a neng a sa bolo go dutla madi a ne a mo ama a bo a fola (kgaolo 46). Difatlhego tsa bone di bonala sentle thata di utlwisa botlhoko. . . . Go na le gore go bala e nne namane e tona ya tiro, buka eno e go dira ekete ke go itlosa bodutu kana gone gore o dira sengwe se se monate kwa bokhutlong jwa letsatsi. Tsela e e kwadilweng ka yone go etswe mekgwa le maikutlo tlhoko ga e re bolelele fela seo Jesu a se dirileng mme gape e re naya lesedi la gore o ne a akanya ebile a ikutlwa ka tsela efe.”

Go Dirisiwa ga Yone ka Ditsela Tse Di Farofarologaneng

Ba le bantsi ba setse ba simolotse go dirisa buka eno mo thutong ya lelapa ya Bibela. “Re na le bana ba bararo ba babotlana,” batsadi bangwe go tswa kwa Silverton, kwa Oregon, kwa U.S.A. ba a kwala, “mme buka eno e siame sentle gore re ka ‘e ithuta jaaka lelapa maitseboa mangwe le mangwe.’ Ka boammaaruri, abo go tshwanela jang ne gore re ithute dilo tsa motheo kaga Kgosi ya rona e e lorato, Keresete Jesu.”

Mosha mongwe yo o mo dingwageng tsa bolesome wa kwa Japane o tlhalosa jaana: “Rre o ile a nna a re e balela fa re ikhuditse morago ga dijo tsa maitseboa. Re e bala go tloga kwa tshimologong jaaka lelapa, mme nna ke sweditse gore ke tla bala kgaolo e le nngwe bosigo bongwe le bongwe go tloga kwa buka e felelang teng pele ke ya go robala. Lefa go ntse jalo, buka eno e kgatlha tota mo gantsi ke fitlhelang e setse e le ura ya bongwe mo mosong ke sa lemoge gore nako e ile.”

Bontsi bo gakgamadiwa ke dintlha tse dintsi tse di akareditsweng mo dipegong tseno. “Ke ithutile dilo tse dintsi tse ke neng ke sa di itse,” Mosupi mongwe o ne a kwala jalo. Lekwalo lengwe go tswa kwa California, kwa U.S.A., le ne la bolela jaana: “Nna le mosadi wa me re sale re le mo boammaaruring ka dingwaga tse di fetang 35, mme re ka bolela fela gore ga re ise re tshware kgatiso e e kgatlhang jaaka eno ka diatla tsa rona.”

Buka eno e tshwanetse ya thusa go nyeletsa maaka a gore Basupi ba ga Jehofa ga ba dumele mo go Jesu. Mmadi mongwe yo a neng a supa tebogo o ne a akgela jaana: “Ke ne ke sa kgone go e baya fa fatshe, gonne e ne e le sengwe se segolo se se ganetsang botlhokakitso jwa bao ba bolelang gore batho ba ga Jehofa ga ba dumele mo go Jesu Keresete kana gone go mo tlotla. Selo fela se re tlhokang go se dira ke go tsenya karabo eno e ba sa e itseng mo diatleng tsa bone.”

Buka eno eleruri e tlile go nna le seabe sa botlhokwa mo bodiheding jwa Basupi ba ga Jehofa. “Ke ne ka naya mosadi mongwe yo ke ithutang le ene Bibela sekaelo sa yone,” go ne ga kwala jalo Mosupi mongwe, “mme tsela e e neng ya mo ama ka yone e lebega e le kgakgamatso ruri. O sale a ntse a ithuta ka lobaka lwa ngwaga, mme go ne go le thata mo go nna go dira gore a tle kwa dipokanong.” Fa moithuti yono a sena go bala dikgaolo di le 45 tsa buka e ntšha eno, Mosupi yono o ne a tlhalosa jaana, “o ne a mpolelela gore o tlile go nna teng kwa pokanong ka Sontaga gonne jaanong nako e ne e tsile gore a tseye kgato.”

Dikarolo Tse Di Botlhokwatlhokwa

Mme gone, Monna yo Mogolo go Gaisa Botlhe Ba Ba Kileng ba Tshela e bua ka dikwalo tsa Efangele. E tlhalosa dilo tse dintsi tseo Jesu a neng a di bolela le go di ruta, ka jalo buka eno e ka dirisiwa jaaka sedirisiwa sa go batlisisa, ka go bo e ikaegile thata ka dipego tsa Bibela.

Sengwe se se molemo thata ka yone ke gore dilo tsotlhe di anelwa go ya ka thulaganayo e di diragetseng ka yone. Fa o bula ditsebe tsa yone fela o akantse ka seno go ka go thusa thata gore o kgone go bona gore ditiragalo dingwe di diragetse ka lobaka lofe mo bodiheding jwa ga Jesu. Gantsi batho ba ba balang dikwalo tsa Efangele ba kopana le seo go lebegang ekete ke go ikganetsa. Buka e ntšha eno e dumalana sentle mo dikgannyeng tsotlhe tsa yone e sa gatelele dilo tse di ntseng jalo.

Jaaka Bakeresete, eleruri ga re a tshwanela go batla go tlhokomologa go ithuta ka kelotlhoko kaga botshelo jwa Motlhomasekao wa rona yo o ikanyegang, Jesu Keresete. Ka gone, a re sekasekeng ka kelotlhoko dipego tsa dikwalo tsa Efangele re thusiwa ke buka e ntšha ya Monna yo Mogolo go Gaisa Botlhe Ba Ba Kileng ba Tshela.