A O Tlotla Lefelo la Gago la Kobamelo?

“Go tswa fela fa efangele e simologa, Bakeresete ba ne ba ntse ba na le lefelo le e eleng la bone ebile le le tlhomameng le ba neng ba obamela Modimo kwa go lone.”—“Primitive Christianity,” ka William Cave.

BATHO ba Modimo ga ba bolo go nna ba itumelela go kopana mmogo ka nako ya kobamelo. Fela jaaka go ntse gompieno go ne go ntse fela jalo le mo lekgolong la ntlha la dingwaga. Bakwadi ba bogologolo le baruti ba ba tshwanang le Lucian, Clement, Justin Martyr, le Tertullian, botlhe ba a dumelana mo kgannyeng ya gore Bakeresete ba ne ba na le mafelo a a kgethegileng a ba neng ba kopanela mo go one ka metlha ka nako ya kobamelo.

Bibela e gatisa yone ntlha eno, ka go umaka gantsinyana ditlhopha tsa Bakeresete tse di neng di tshwara dipokano ka metlha. Ditlhopha tseno di ne di itsege jaaka diphuthego. Seno se ne se utlwala ereka lefoko “phuthego” mo dipuong tsa ntlhantlha tsa Bibela le raya setlhopha sa batho ba ba kopaneng mmogo ka boikaelelo bongwe kana ka go dira tiro nngwe.

Mafelo a Bogologolo a Bakeresete a Kobamelo

Ke eng se Bakeresete ba lekgolo la ntlha la dingwaga ba neng ba se dira fa ba kopane mmogo? Bibela e tlhalosa dikokoano di le mmalwa tse di ntseng jalo mme e bontsha gore thuto e ne e le selo sa botlhokwa. (Ditihō 2:42; 11:26; 1 Bakorintha 14:19, 26) Go ne ga dirwa dithulaganyo tsa go rutiwa, tse di neng di na le metlotlo, go tlotliwa ka dilo dingwe tse di kileng tsa ba diragalela tse di kgothatsang, le go bala ka kelotlhoko makwalo a a neng a tswa kwa setlhopheng se se laolang kwa Jerusalema kana a a neng a tswa kwa moaposetoloing mongwe.

Mo go Ditihō 15:22-35, re bala gore morago ga gore lekwalo lengwe la mofuta oo le balelwe setlhopha sengwe sa Bakeresete kwa Antioka, Judase le Silase ba ne ba “laea bakauleñwe ka mahoko a le mantsi, ba ba nitamisa.” Pego e nngwe gape e tlhalosa gore fa Paulo le Barenabase ba sena go goroga kwa Antioka ‘ba ne ba phutha phuthego, ba a bolelela dilo tsotlhe tse Modimo o di dirileng ka bone.’ Go rapela Jehofa e ne e le selo se sengwe gape sa botlhokwa mo dipokanong tsa Bakeresete.—Ditihō 14:27.

Mafelo ao diphuthego tsa lekgolo la ntlha la dingwaga di neng di phuthegela mo go one a kobamelo e ne e se dikago tse di manobonobo tse di tshwanang le tsa dikereke tse dintsi tsa Labokeresete gompieno. Gantsi Bakeresete ba pele ba ne ba kopanela mo matlong a batho. (Baroma 16:5; 1 Bakorintha 16:19; Bakolosa 4:15; Filemone 2) Gantsi go ne go dirisiwa kamore ya mongwe e e kwa marulelong kana e e kwa godimo. Ke teng koo Sejo sa Morena sa Maitseboa se neng sa jelwa teng. Gape ke teng kwa kamoreng e e kwa godimo koo barutwa ba le 120 ba neng ba tlodiwa ka moya o o boitshepo ka Pentekosete.—Luke 22:11, 12, 19, 20; Ditihō 1:13, 14; 2:1-4; 20:7, 9.

Basupi ba ga Jehofa gompieno ba latela mokgwa o o neng o dirisiwa ke baaposetoloi. Ba dirisa mafelo a ba kopanang mmogo kwa go one a a bidiwang Diholo tsa Bogosi. Ba thapisediwa go nna bareri ba dikgang tse di molemo tsa Bogosi jwa Modimo teng koo. (Mathaio 24:14) Gape ba ithuta Dikwalo, ba a rapela, le go kgothatsana kwa Holong ya Bogosi. Seno se dumelana sentle le kgakololo ya Bibela e e mo go Bahebera 10:24, 25 e e reng: “A re gopolaneñ re tlhotlheletsanyeñ mo loratoñ le mo ditihoñ tse di molemō; Re se ka ra bakèla go phuthèga ga rona, yaka mokgwa oa bañwe, me re laelanè; me bogolo thata ka lo bōna motlha o atamèla.”

Go Dirisa Lefelo la Rona La Kobamelo ka Tshwanelo

A o gakologelwa mafoko a ga moaposetoloi Paulo a a reng: “Modimo ga se Modimo oa tlhakatlhakanyō, ha e se oa kagishō hèla,” le a a reng “A dilō cotlhe di dihwè sentlè hèla, le ka thulaganyō”? Fa o tlhokomela kgang e go buiwang ka yone, o tla lemoga gore Paulo o ne a tlhalosa mokgwa o dipokano tsa Bakeresete di tshwanetseng go tshwarwa ka one. Fela jaaka mo motlheng wa baaposetoloi, Bakeresete gompieno ba tlhomamisa tota gore dipokano tsa bone di tsamaya ka tshwanelo le go rulaganngwa sentle.—1 Bakorintha 14:26-40.

Tokololo ya The Watchtower ya October 15, 1969 e ile ya tlhalosa jaana: “Moya o o renang mo Diholong tsa Bogosi ke wa mmatota, o tswa mo go rateng kobamelo ya boammaaruri ka pelo yotlhe le go kaelwa ke Bibela. Le tsela e holo e dirilweng ka yone ga se e e dirang batho gore fa ba tsena mo go yone ba sisibale, go na le moo e ntse ka tsela e e ba dirang gore ba ikutlwe ba phuthologile le go nna botsalano.” Ee gone, ba tlhokomela gore ka dinako tsotlhe Holo ya bone ya Bogosi e dirisiwa ka tsela e e tlotlegang ebile e na le seriti.

Labokeresete e ile ya itshupa gore ga e na tlotlo gotlhelele mo ntlheng eno. Mekgatlho mengwe ya bodumedi e dirisetsa mafelo a yone a kobamelo go tlosa batho bodutu. Go na le mo go tshamekelwang mmino wa roko wa sedumedi teng, phaposi e batho ba ba tsholetsang ditshipi ba itshidilelang mo go yone, ditafole tse go tshamekelwang billiard mo go tsone, mo go tsenyetswang keretšhe teng, le dibaesekopo tsa kereke. Mo kerekeng nngwe go ne go dirwa motshameko wa go mekamekana jaaka karolo ya thulaganyo ya bone. Seno ga se dumalane gotlhelele le sekao se se tlhomilweng ke baaposetoloi.

Mo lekgolong la ntlha la dingwaga, fa go ne go fitlhelwa gore phuthego nngwe ga e dire dilo ka tshwanelo, e ne e kgalemelwa. Ka sekai, bangwe mo phuthegong ya Bokeresete kwa Korintha ba ne ba dirisa moletlo wa Sejo sa Morena sa Maitseboa jaaka motlha wa go ja le go nwa. Ba ne ba tla ka dijo tsa bone tsa maitseboa gore ba tle go di ja pele kana ka nako ya kokoano, ba bangwe ba ne ba bile ba a ja le go nwa go feta selekanyo. Tota go ne go sa siama go dira jalo. Moaposetoloi Paulo o ne a ba kwalela jaana: “Ao! a ga lo na matlo a go yèla le go nwèla mo go aōna?”—1 Bakorintha 11:20-29.

Tumalanong le kgakololo ya ga Paulo, Basupi ba ga Jehofa ba lwela gore ba direle dilo tsa bone ka namana kwa gae kana gongwe go sele go na le kwa Holong ya Bogosi. Gone ke boammaaruri gore, dipokano tsa rona tsa ka metlha di re fa sebaka se se tshwanetseng sa go bona ditsala tsa rona di le mmalwa ka nako e le nngwe. Lefa go ntse jalo, Holo ya Bogosi e neetswe Jehofa, ka jalo, e tshwanetse gore e dirisetswe kobamelo ya gagwe fela. Ga re ele koo go ya go itirela dikgwebo tse e leng tsa rona, kana go itirela madi.

Mo godimo ga moo, phuthego ga e dirisetse Diholo tsa Bogosi go rulaganya dilo tsa boitapoloso, ditiro tsa go kokoanya madi, kana ditirelo tsa loago, jaaka go tlhokomela bana. Go na le mafelo a mangwe ao motho a ka a dirisetsang dilo tsa gagwe ka namana kana tsa kgwebo.

Bagolwane kwa Holong nngwe ya Bogosi ba ne ba lemoga gore maloko a phuthego eo a ne a tlwaetse go adima dilo dingwe mo go ba bangwe kana go di busa fa ba le kwa dipokanong. Gape, ba ne ba na le mokgwa wa go adimana dikhasete tsa dibidio tsa difilimi kwa Holong ya Bogosi. Lefa gone e ne e se kgwebo, bagolwane ba ne ba ba lemotsha gore go ka nna botoka gore ba direle dilo tseno kwa magaeng a bone fa ba bone nako.

Go tila maemo a a ka dirang gore ba bangwe ba akanye ka tsela nngwe e e phoso le go bona gore Holo ya Bogosi e dirisiwa ka tshwanelo, mongwe le mongwe wa rona o tshwanetse go ipotsa jaana: ‘A go na le dilo dingwe tsa me ka namana tse ke ntseng ke di direla kwa Holong ya Bogosi mme e le tse nka bong ke di diretse kwa gae?’ Ka sekai, fa o rulaganya maeto a go itlosa bodutu kana maitiso, a go ne go ka se nne botoka go tlotla ka dithulaganyo tse di ntseng jalo kwa gae? A re ne re ka se dirise megala kana ra latela batho bao re batlang go kopana le bone kwa magaeng a bone? Fa re adima mafoko a ga Paulo re ka nna ra re: ‘Tota re na le matlo ao re ka buang dikgang tse di ntseng jalo kwa go one, ga ke re?’

Nako le Lefelo tsa go Obamela Jehofa

Bibela e bolela jaana mo go Moreri 3:1: “Señwe le señwe se na le motlha oa shōna, le boikaèlèlō boñwe le boñwe tlhatse ga legodimo bo na le motlha oa yōna.” Fa re le kwa dipokanong kwa Holong ya Bogosi, re ka ineela ka bojotlhe jwa rona mo go direng ditiro tse di amang tirelo ya Bokeresete. Eo e a bo e le nako ya go obamela Jehofa.

Monnawe Jesu ebong Jakobe o ne a gakolola gore go se ka ga nna le moya wa go tlhaola ba bangwe mo phuthegong ya Bokeresete. (Yakobe 2:1-9) Re ka dirisa jang kgakololo eno mo Diholong tsa rona tsa Bogosi? Moya wa go tlhaola o ka itshupa fa bangwe ba neelwa makwalo kwa holong a a ba laletsang kwa meletlong e e rileng ba bangwe ba lebile. Kwa phuthegong nngwe go ne go tlwaelegile gore go tsenngwe ditaletso tseo mo dikgetsaneng tsa dibuka kana mo Dibibeleng tsa ba ba tla bong ba le teng. Gone ke boammaaruri gore, go bonolo go dira jalo go na le go romela ditaletso tseo ka poso kana go di isa ka namana kwa matlong a bone. Lefa go ntse jalo, bao ba sa amogeleng ditaletso tseo ba tla ikutlwa jang fa ba sena go lemoga gore batho bangwe ba ntse ba neelwa ditaletso? A seno se ka bontsha moya wa go tlhaola?

Legale, ga go tlhokege gore go nne le molao o o gagametseng o o reng go se ka ga nna le ope yo o ka neelang yo mongwe molaetsa wa gagwe kana sephuthelwana fa a le kwa Holong ya Bogosi; kana gore go phoso go bua kwa Holong ya Bogosi ka ditiro kana dilo dingwe tse di diragalang tsa letsatsi le letsatsi, go laleletsa mongwe kwa legaeng la gago, kana go kopa mongwe gore a tsamaye le wena kwa boitapolosong bongwe. Mme lefa go ntse jalo, seno ga se a tshwanela go nna seomodiro mme se tshwanetse go dirwa ka tsela e e botlhale le e e sa kgoreletseng. Dilo tsa rona ka namana ga di a tshwanela go kgoreletsa se tota re se tletseng fa re kopane mmogo kwa Holong ya Bogosi, eleng go agiwa semoyeng.—Mathaio 6:33; Bafilipi 1:10.

Banna Ba Ba Tlhomang Sekao

Bagolwane le batlhanka ba bodihedi ba dira bojotlhe go tlhoma sekao mo go tlotleng Holo ya Bogosi. Gantsi go a bo go ntse go na le mogolwane kana ba le babedi le batlhanka ba bodihedi ba ba abetsweng go rulaganya gore Holo ya Bogosi e tshwarwe ka tsela e e siameng. Koo diphuthego di le pedi kana go feta di dirisang holo e le nngwe, go nna le komiti ya bagolwane e e tlhokomelang dikgang tse di tshwanang le tseo.

Lefa go na le bangwe ba ba tlhophetsweng go tlhokomela ditiro tse di ntseng jalo, batlhanka botlhe ba bodihedi le bagolwane ba tshwanetse go bontsha gore tota ba rata gore holo e tlhokomelesege. Ba a itse gore Holo ya Bogosi e neetswe Jehofa mme e dirisetswa go mo obamela.

Bagolwane ga ba a tshwanela go nnela go dikadika fa go tlhokega gore sengwe se baakangwe. (2 Ditihalō 24:5, 13; 29:3; 34:8; Nehemia 10:39; 13:11) Mo diphuthegong dingwe Holo ya Bogosi e a tlhatlhobiwa ka metlha go bona gore a ga go na dilo dingwe tse di tlhokang go baakanngwa gore di baakanngwe ka bonako. Go bolokwa direkoto gore go tle go tlhomamisiwe gore dilo tse di tlhokwang go dirisiwa di nna di ntse di le teng fa di tlhokega. Fa go na le lefelo le le rileng la go boloka dilo tse di tlhokwang, didirisiwa, le dilwana tsa go phepafatsa, bagolwane botlhe le batlhanka ba bodihedi ba tshwanetse go bontsha gore ba tlhokomela gore le mo seemong se se siameng, ba tlhomamise le gore le bolokwa le le phepa. Ba ba dirang mo dikhaontareng tsa dibuka le tsa dimakasine ba ka bontsha gore ba kgatlhegela holo ya bone ka go tsaya kgato ka bonako go bona gore dibokoso tse di senang sepe ga di tlogelwe di gasame mo holong.

Ka go tlhoma sekao, bagolwane le batlhanka ba bodihedi ba ka thusa phuthego yotlhe gore e dire bojotlhe go tlhokomela Holo ya Bogosi. (Bahebera 13:7) Botlhe ba ka bontsha tota gore ba e tlotla ka go nna le sebe mo go phepafadiweng ga holo le go bontsha gore ba rata tota gore e lebege.

Jesu o ne a bolela jaana mo go Mathaio 18:20: “Kwa ba le babedi kgotsa ba le bararo ba phuthegileñ gōna ka leina ya me, hoo, nna ke gōna mo gare ga bōnè.” Ee, Jesu o kgatlhegela se re se dirang fa re kopane mmogo go obamela Jehofa. Seno se akaretsa dipokano dingwe le dingwe tse di tshwarelwang mo matlong a batho le dikokoano tse dikgolo jaaka dikopano tse dinnye le tse dikgolo.

Mo Basuping ba ga Jehofa ba ba dimilione, ga go na lefelo le ba le ratang go gaisa lefelo la bone le ba kopanelang mo go lone ka metlha la kobamelo, eleng Holo ya Bogosi. Ba e tlotla ka tsela e e tshwanetseng. Ba dinatla mo go e tlhokomeleng, mme ka dinako tsotlhe ba leka ka bojotlhe go re ba e dirise ka tshwanelo. Ekete le wena ka tsela e e tshwanang o ka latela kgakololo e Jehofa ka boene a e nayang e e reng: “U Re u tsèna mo tluñ ea Modimo u nannabetsè lonaō loa gago.”—Moreri 5:1.