Dipotso Tse Di Tswang go Babadi

Ereka Bakeresete ba sa bone madi ka go betšha, a ba ka amogela dithekethe kana ba tsaya karolo mo go itekeng lesego mo ba ka gapang dikgele?

Eno ke potso e e kileng ya nna ya botswa gangwe le gape, ka jalo, e setse e kile ya tlhalosiwa mo dikgatisong tsa rona. Mo dipuong tse dingwe, re dirile gore go nne le diintekese tsa dibuka tsa rona, jaaka Watch Tower Publications Index 1930-1985 (le e e tshwanang le yone e e nang le dikgatiso tsa 1986-1990). Fa e le gore Mokeresete o na le diintekese tsa go nna jalo ka puo ya gagwe, tseno di ka mo thusa tota go bona ka bonako dikarabo tse di kgotsofatsang.

Potso e e boditsweng fa godimo e tla dirisiwa jaaka sekai. Fa o leba Index ya 1930-1985 kafa tlase ga setlhogo se se reng “Dipotso Tse Di Tswang go Babadi,” o tla bona setlhogwana se se reng “‘go iteka lesego,’ (ka Seesemane) a Mokeresete a ka amogela thekete ya gone?” Mmadi o kaelwa gore a lebe mo karolong ya “Dipotso Tse Di Tswang go Babadi” mo go Tora ya Tebelo ya March 1, 1974, tsebe 71.a Basupi ba bantsi ba na le dibolumo (kana ditokololo tse e leng tsa bone) tsa The Watchtower ya 1973, kana o ka nna wa di leba mo laeboraring ya Diholo tsa Bogosi di le dintsi.

Kgang e e gatisitsweng ka 1974 e ile ya tlhalosa gore Bakeresete ba dira sentle fa ba tila go betšha go go akaretsang go iteka lesego (jaaka dithekethe tsa rafole) kana go dirisa madi go iteka lesego go gapa sekgele. Go phepafetse gore re tila go betšha, ka go bo e le bogagaru.—1 Bakorintha 5:11; 6:10; Baefesia 4:19; 5:3, 5.

Lefa go ntse jalo, lebentlele kana kgwebo nngwe, e ka nna ya dirisa go iteka lesego go bapatsa. Se se tla bong se tlhokwa fela ke gore motho a kwale leina la gagwe kana a romele foromo kana thekethe, kwantle ga go reka sepe. Go iteka lesego ke karolo nngwe ya go bapatsa; go dirilwe ka mokgwa wa go sa sekamele mo ntlheng epe wa go tlhopha yo o tla newang sekgele kana dikgele. Bakeresete bangwe ba ka ikutlwa gore ba ka nna ba amogela sekgele se ba se boneng ka go iteka lesego se go neng go sa betšhiwe mo go sone, fela jaaka ba ne ba ka amogela disampole tsa mahala kana dimpho dingwe fela tse kgwebo nngwe kana lebentlele le ka nnang la di dirisa mo thulaganyong ya lone ya go ipapatsa.

Lefa go ntse jalo, Bakeresete bangwe ba tla tila go tsaya karolo mo go sepe sa mofuta oo, ba sa batle go kgopisa ba bangwe kana go ba tlhakanya tlhogo gape le go re ba batla go ikgapha mo dilong dipe fela tse di ka gogelang mo go ikanyeng Modimogadi wa Lesego. Jaaka Isaia 65:11 e bontsha, batlhanka ba Modimo ga ba ikgolaganye le “modimo oa [Lesego]” kana “modimo oa Ditaolèla.” Gape ba ka nna ba seka ba batla go nna karolo ya phasalatso epe fela eo mo go yone e ka batlang gore batho ba ba gapileng sekgele ba tseye karolo. Bao ba ikutlwang ka tsela eo ga ba a tshwanela go tshwaya phoso Mokeresete kana Bakeresete bao letswalo la bone le ba letlelelang gore ba tsenelele mo dilong tsa go nna jalo tsa go iteka lesego.—Bapisa Baroma 14:1-4.

[Ntlha e e kwa tlase]