A o A Itshoka?
1 “Ga go na lebaka le legolo la go bontsha ditebogo le ke nang le lone go feta dilo tseno, . . . gore bana ba me ba tswelela ba tsamaya mo boammaaruring.” (3 Joh. 4) Johane o ne a itumedisiwa thata ke go itshoka ga bana ba gagwe ba semoya. A bo go tshwanetse ga bo go itumedisa Rraarona wa selegodimo jang ne go bona dimilione tsa ba e tlileng go nna bana ba gagwe “ba tsamaya mo boammaaruring”!—Dia. 23:15, 16; 27:11.
2 Le mororo ka kakaretso batho ba Modimo ba tsweletse pele ba tlhoafetse mo tirong ya Bokeresete, ba bangwe ba ile ba ngodiega ka iketlo. Le fa gone bano ba ka tswa ba ne ba le matlhagatlhaga fa ba ne ba simolola go ithuta boammaaruri, fa dingwaga di ntse di ya, ba ne ba itlwaetsa mokgwa wa go sa nne le seabe ka metlha mo tirong ya go dira barutwa.
3 Go a utlwala gore ba bangwe ba ka tswa ba fokoditse lobelo ka ntlha ya bolwetse le matswela a botsofe. Le fa go ntse jalo, ba tshwanetse go akgolelwa boitshoko jwa bone. Ba dira se ba ka se kgonang. Mme mongwe le mongwe yo o neetseng Modimo botshelo jwa gagwe o tshwanetse a ipotsa jaana: ‘A ke ile ka itetla go tlhoma mogopolo mo dilong tsa me mo e leng gore dilo tse di direlwang Bogosi di tla kwa morago mo botshelong jwa me? A ke setse ke le “mololo,” kana ke sa ntse ke iteka ka “tlhagafalo”?’ (Tshen. 3:15, 16; Luke 13:24) E kete rotlhe re ka akanyetsa se re se dirang ka thapelo le go dira diphetogo fa go tlhokega, re gakologelwa gore Jehofa o solofetsa go naya “kgalalelo le tlotlo le kagiso mo go mongwe le mongwe yo o dirang se se molemo.”—Bar. 2:10.
4 Tsela ya go Itshoka: Ke eng se se neng sa thusa Jesu gore a itshoke? Paulo o ne a tlhalosa jaana: “Ka ntlha ya boipelo jo bo neng bo tlhomilwe fa pele ga gagwe o ne a itshokela kota ya tlhokofatso, a nyatsa ditlhong, mme o ntse kafa seatleng sa moja sa setulo sa bogosi sa Modimo.” (Baheb. 12:1-3) Boipelo jo bo neng bo tlhomilwe fa pele ga ga Jesu bo ne bo le botlhokwa go gaisa diteko tsa nakwana tse a neng a lebana le tsone. Fa re gakologelwa boipelo jo bo beilweng fa pele ga rona, le rona go ka re thusa gore re itshoke. (Tshen. 21:4, 7; 22:12) Fa re ikanya Jehofa gore a re neye maatla ka go ithuta ka namana, go nna gone kwa dipokanong ka metlha le ka go rapela re sa kgaotse, re tla kgona go itshokela tiro e a re e neetseng.
5 Jehofa o a ipela fa batho ba gagwe ba ba ikanyegang ba itshoka. Ka jalo a re mo ipediseng thata ka go tswelela pele re “tsamaya mo boammaaruring.”