Thulaganyo ya Pokano ya Tirelo

Beke e e Simololang ka May 12

Pina 1

10 mets: Dikitsiso tsa phuthego. Dikitsiso tse di tlhophilweng go tswa go Tirelo ya Rona ya Bogosi. O dirisa dikakantsho tse di mo go tsebe 8, dira dipontsho tse pedi tse di farologaneng o bontsha kafa go ka tsamaisiwang Tora ya Tebelo ya May 15 le Tsogang! ya June 8 ka teng. Mo pontshong nngwe le nngwe, dimakasine tseno di tsamaisiwe mmogo le mororo go bueletswe o le mongwe fela. Umaka le thulaganyo ya go ntshiwa ga moneelo.

20 mets: Batsadi—Thusang Bana ba Lona go Gatela Pele. Puo e e tlotlang ka dintlhakgolo tse di tswang mo bukeng ya Sekolo sa Bodiredi, tsebe 9-12 le 21-38. Kgothatsa batsadi go dirisa dingwe tsa dintlha tseno mo thutong ya lelapa, ka boikaelelo jwa go thapisa bana ba bone gore ba gatele pele mo bodireding. Umaka dintlha tse di rileng tse di ka dirisiwang go thusa basha go nna le bokgoni jo bo tlhokegang.

15 mets: “Re Sikarisitswe Dikgang Tse di Molemo.”a Rulaganyetsa go sa le gale gore mmoledi kgotsa baboledi ba le babedi ba tlhalose ka bokhutshwane kafa ba kgonneng ka gone go rulaganya maemo a bone e le gore ba kgone go oketsa seabe sa bone mo tirong ya go rera.

Pina 46 le thapelo e e konelang.

Beke e e Simololang ka May 19

Pina 62

15 mets: Dikitsiso tsa phuthego. Pego ya diakhaonto. Tlotla ka “Go Agiwa ga Diholo Tsa Bogosi ga Boditšhabatšhaba Kwa Dinageng Dingwe Tsa Yuropa.” Umaka gore go agiwa ga Diholo Tsa Bogosi kwa dinageng tse di humanegileng le mo tshimong ya lekala go tshegediwa ka meneelo e e ntshediwang Letlole la Diholo Tsa Bogosi.

15 mets: Dilo tse phuthego e tlhokang go di ela tlhoko.

15 mets: “Baka Jehofa ka go Neela Bosupi jo e Seng Jwa ka Tlwaelo.” Puo le motlotlo le bareetsi. Fa lo tlotla ka serapa 3, botsa bareetsi gore ba ka simolola jang motlotlo wa Baebele mo go a mangwe a maemo a a latelang: (1) fa o le mo moleng wa go duela, (2) fa o le mo dipalangweng tsa botlhe, (3) fa o bua le moagelani yo o berekang mo jarateng ya gagwe, (4) fa o bua le motho yo o dirang le ene kwa tirong, le (5) moithuti yo o tsenang le ene mo tlelaseng kwa sekolong. Rulaganya go sa le gale boitemogelo bongwe jwa mo phuthegong ya lona jo bo bontshang kafa mmoledi a neng a atlega ka gone go neela bosupi jo e seng jwa ka tlwaelo.

Pina 135 le thapelo e e konelang.

Beke e e Simololang ka May 26

Pina 174

10 mets: Dikitsiso tsa phuthego. Gakolola botlhe go tlisa dipego tsa bone tsa tirelo ya tshimo tsa May. O dirisa dikakantsho tse di mo go tsebe 8, dira dipontsho tse pedi tse di farologaneng tsa kafa go ka tsamaisiwang Tora ya Tebelo ya June 1 le Tsogang! ya June 8 ka teng. Mo pontshong nngwe le nngwe, dimakasine tseno di tsamaisiwe mmogo le mororo go bueletswe o le mongwe fela. Kwa bofelong jwa nngwe ya dipontsho, tlogelela mong wa ntlo yo a sa amogelang dimakasine pampitshana ya A o ka Rata go Itse mo go Oketsegileng ka Baebele?

10 mets: Lebokoso la Dipotso. Puo. Boeletsa ka bokhutshwane dingwe tsa dikakantsho tsa go neela bosupi ka thelefouno tse di tlhagelelang mo kgatisong ya Tirelo ya Rona ya Bogosi ya February 2001, tsebe 6, serapa 12-15 kgotsa dikakantsho tse dingwe tse di ileng tsa dira mo tshimong ya lona.

25 mets: “Lefoko la Modimo ke Boammaaruri.”b Dirisa dipotso tse di mo setlhogong seno. Kopa bareetsi gore ba bolele kafa ba thusitsweng ka teng go ithuta boammaaruri fa baboledi ba ne ba dirisa Baebele go araba dipotso tsa bone. Fa lo tlotla ka serapa 4, dira gore mmoledi yo o nang le bokgoni a bontshe kafa Baebele e ka dirisiwang ka gone mo loetong lwa ntlha, a dirisa dingwe tsa dikakantsho tse di tlhagelelang mo setlhogong sa “Tshwara Lefoko la Modimo Sentle.”—km-TN 12/01 ts. 1 ser. 3-4.

Pina 188 le thapelo e e konelang.

Beke e e Simololang ka June 2

Pina 210

10 mets: Dikitsiso tsa phuthego. Dikgang Tsa Puso ya Modimo. Boeletsa kakantsho e le nngwe kgotsa di le pedi go tswa mo tsenyeletsong ya Tirelo ya Rona ya Bogosi ya January 2002 ya go tsamaisa boroutšhara jwa Re Direng le buka ya Kitso.

20 mets: Modimo o Batla re Nna le Manyalo a a Tlotlegang. Puo le motlotlo le bareetsi. Mo dinageng di le dintsi, go tlwaelegile gore batho ba babedi ba nne mmogo kwantle ga go nyalana ka molao. Bangwe ba bolela gore seno se na le melemo ya sone. Gatelela kgopolo e e tswang mo Baebeleng, o gatelela gore lenyalo le simolotswe ke Modimo. (rs-TN ts. 234-5) Go nna mmogo lo sa nyalana ke kgokafalo. (fy-TN ts. 17) Go farologana le se bontsi bo se dumelang, dipatlisiso di bontsha gore go nna mmogo pele ga lenyalo go ka dira gore lenyalo le se ka la atlega mo isagweng. (g02 3/8 ts. 29; g92 9/8 ts. 28; g91 5/8 ts. 28) Bakeresete ba tlotla Jehofa ka go tshela ka ditekanyetso tsa gagwe. Ka go dira jalo, le bone ba solegelwa molemo.—Isa. 48:17, 18.

15 mets: O Solegelwa Molemo Jang? Motlotlo le bareetsi o o tshwarwang ke molebedi wa sekolo. Go simolola ka January, re ne ra simolola thulaganyo e ntšha ya Sekolo sa Bodiredi sa Puso ya Modimo. Tlotla ka bokhutshwane dingwe tsa dintlha tse dintšha tsa sekolo. Bolela melemo e e setseng e bonwe go fitlha ga jaana. A go na le ba bangwe ba basha ba ba ikwadisitseng mo sekolong? A go na le ba le bantsi ba ba ratang go nna le seabe? Baithuti ba solegelwa molemo jang ke thulaganyo e ntšha ya go gakololwa? Kopa bareetsi gore ba bolele kafa ba solegetsweng molemo ka gone go fitlha ga jaana le gore ba akanya gore thulaganyo eno e ntšha e tla ba thusa jang mo isagweng.

Pina 225 le thapelo e e konelang.

[Dintlha tse di kwa tlase]