Dipina Tse Disha Tsa Kobamelo!
1 Kwa pokanong ya ngwaga le ngwaga ya bosheng ya Watch Tower Bible and Tract Society of Pennsylvania e e neng e tshwerwe ka Diphalane 4, 2014, go ne ga dirwa kitsiso ya go tlhabololwa ga kopelo e re e dirisang. Ruri tseo e ne e le dikgang tse di monate! Botlhe ba ba neng ba le gone ba ne ba gopodiwa ka botlhokwa jwa dipina tsa Bogosi mo kobamelong.—Pes. 96:2.
2 O ka tswa o ipotsa jaana, ‘Goreng kopelo e tlhabololwa?’ Go na le mabaka a le mmalwa. Sa ntlha, tsela e re tlhaloganyang Dikwalo ka yone e ntse e tlhabololwa, mme seo se ka ama mafoko a dipina tsa rona. (Dia. 4:18) Lebaka le lengwe ke gore: Mafoko a mantsi a a dirisitsweng mo kopelong e re e dirisang a tserwe mo Baebeleng ya Thanolo ya Lefatshe le Lesha ya Seesemane pele e tlhabololwa. Jaanong mafoko ao a tshwanetse go tlhabololwa gore a tshwane le a a dirisiwang mo Baebeleng e e tlhabolotsweng. E re ka e le tiro e ntsi go dira gore mafoko a tshwane, re sweditse ka gore re tsenye dipina di le mmalwa tse disha mo kopelong.
3 A re tshwanetse go letela gore kopelo e ntšha e gatisiwe pele, pele re simolola go dirisa dipina tse disha? Nnyaa. Re itumelela go lo itsise gore mo dikgweding di le mmalwa tse di latelang, dipina di le mmalwa di tla gololwa mo Web site ya rona ya jw.org/tn. Fa pina e ntšha e golotswe, e tla tsenngwa kwa bofelong jwa thulaganyo ya Pokano ya Tirelo e kwadilwe, “pina e ntšha.”
4 Re ka Ithuta Dipina Tse Disha Jang?: Go ithuta pina e ntšha e ka nna kgwetlho. Le fa go ntse jalo, fela jaaka mopesalema, fa re le kwa dipokanong re batla go opelela kwa godimo e seng go “didimala.” (Pes. 30:12) Ithute pina e ntšha ka go dira dilo tseno tse di motlhofo.
Reetsa ka makgetlo a le mmalwa pina e e rekotilweng ya diletswa fela e e tla tsenngwang mo Web site ya rona. Fa o reetsa molodi wa yone gantsi, go tla nna motlhofo gore o e gopole.
Ithute mafoko mme o leke go a tshwara ka tlhogo.
Opela mafoko a yone o tsamaisana le molodi. Dira jalo go fitlha o e itse.
Ithuteng dipina tse disha ka makgetlo a le mmalwa ka nako ya Kobamelo ya Lelapa go fitlha lelapa la gago le di itse.
5 Mo dikgweding tse di latelang fa pina e ntšha e konela Pokano ya Tirelo, phuthego e tla reetsa pina e e rekotilweng ya diletswa fela gangwe. Go tswa foo, bareetsi ba tla opela pina ba tsamaisana le molodi jaaka re dira ka dipina tse dingwe.
6 Go opela re le mmogo kwa dipokanong tsa rona re baka Jehofa go a itumedisa. Ka jalo, ga re a tshwanela go itlwaetsa go ya kwa ntle go sa tlhokege fa go opelwa kwa dipokanong tsa rona tsa Bokeresete.
7 Go na le tsela e nngwe e re ka bontshang ka yone gore re anaanela mmino wa rona o o boitshepo. Kwa dikopanong tsa rona tse dikgolo le tse dinnye go lediwa mmino pele thulaganyo nngwe le nngwe e simolola. Gabedi mo ngwageng, bakaulengwe le bokgaitsadi ba ba dirang ka natla ba ba tswang mo dikarolong tse nnè tsa lefatshe ba ituelela ditshenyegelo tsa go tla mo Patterson, New York, gore ba dire mmino o o monate o o dirisiwang mo kobamelong ya rona. Ka jalo, fa modulasetulo a re kopa gore re tseye manno mme re reetse mmino o o rulagantsweng, re tshwanetse go dira jalo. Seo se tla re thusa go baakanya dipelo tsa rona gore re reetse tshedimosetso e e latelang.—Esera 7:10.
8 Gompieno re tla konela pokano ya rona ka pina e ntšha e e reng “Bogosi bo a Busa—A bo Tle!” Pina eno e e opetsweng kwa pokanong ya ngwaga le ngwaga ya bosheng, e ne ya tlhamiwa gore e tshwaye ngwaga wa bo100 fa e sa le Bogosi bo simolola go busa.
9 Dipina tse disha ke “dilo tse di molemo” tse di tswang kwa go Jehofa. (Math. 12:35a) A re ikemisetseng go ithuta dipina tseno tse disha le go di opela go tswa pelong, re naya Modimo wa rona pako le tlotlo tse di mo tshwanelang!—Pes. 147:1.