Go Tlwaologa Bojalwa go A Kgonagala

“Re lebagane le kgetho: Go tlogela go nwa mme re tlwaologe mokgwa oo, kgotsa re tswelele ree nwa mme re felele re sule.”—Motho yo o tshwakgotsweng ke bojalwa yo o santseng a tlwaologa mokgwa ono.

AKANYA fela o thanya bosigo bongwe o bo o fitlhela ntlo ya gago e sha. Metsotsonyana e se mekae thuso e a goroga, mme kgabagare molelo o a tingwa. A o ne o ka tsena gape mo ntlong eo o ipolelela fela gore ga go a diragala sepe? Nnyaa le eseng. Ntlo e senyegile, mme go tla tlhokega go e aga sesha pele ga o ka boa wa nna jaaka pele mo go yone.

Kgwetlho e e tshwanang e lebagane le motho yo o tshwakgotsweng ke bojalwa yo o sa tswang go latlha bojalwa. Botshelo jwa gagwe bo ile jwa kgautlhanngwa ke bojalwa, gongwe ka dingwaga tse dintsi. Mme jaanong ga a sa tlhole a bo kgoma. “Molelo” o timile, mme lefa go le jalo go aga maikutlo sesha, mokgwa wa botshelo, le boitshwaro go a tlhokega e le gore motho yo o tshwakgotsweng ke bojalwa a tswelele pele a sa ame bojalwa ka gope. Dikakantsho tse di latelang di ka thusa motho yo o tshwakgotsweng gore a tswelele pele a sa kgome bojalwa ka go ya go ile.

1. Itse Mmaba

Bibela e a re dithato tsa nama ‘di tlhabana le moya wa motho.’ (1 Petere 2:11) Lefoko la Segerika le le ranotsweng go nna “ditlhabana” totatota le raya go “dira tiro ya bosole,” mme ebile le na le mogopolo wa ntwa e e matlho mahibidu.—Bapisa Baroma 7:23-25.

Fela jaaka lesole lepe fela le le botlhale le ipha nako go ithuta maretshwa a mmaba wa lone, motho yo o tshwakgotsweng ke bojalwa le ene o tshwanetse gore a ithute seo go tshwakgolwa ke bojalwa go leng sone le kafa go senyang yo o tshwakgotsweng ke bojalwa ene le ba losika ka gone.a—Bahebera 5:14.

2. Fetola Mokgwa O O Nwang ka One O bo o Fetole Mogopolo

Ngaka nngwe e ne ya re, “go tlhapogelwa go raya go latlha tami le go latlha mekgwa ya senyana.” Ka mafoko a mangwe, go raya gore go tshwanetse ga fetolwa dilo tse dingwe tse dintsi eseng go nwa fela; motho yo o ka kwa teng le ene o tshwanetse go fetoga.

Bibela e gakolola jaana ka botlhale: “Lo hetolwe ke boshahaco yoa pelo tsa lona.” (Baroma 12:2) ‘Lo apole motho wa bogologolo le ditiro tsa gagwe.’ (Bakolosa 3:9, NW) Fa ditiro di fetoga mme botho jone bo sala bo sa fetoga, motho yo o tshwakgotsweng ke bojalwa o tla tshwakgolwa gape ke sengwe se se diphatsa—kgotsa a boele gone kwa bojalweng.

3. Batla Mongwe Yo O Ka Mo Ikanyang Yo O go Tlhaloganyang

Seane sa Bibela sa re: “Eo o itomololañ o batla keleco ea gagwè ka esi, me a shakgalèlè botlhale yotlhe jo bo itekanetseñ.” (Diane 18:1) Lefa a ka tswa a tlhapogetswe, motho yo o tshwakgotsweng ke bojalwa gantsi o iteelwa ke go ikgatholosa mabaka. Ka jalo, o tlhoka motho yo o tla mo tlhaloganyang le go mo ikanya mme gape a nitame (yo gantsi a bidiwang motshegetsi). Go molemo thata bogolo jang fa e le gore motho yo a mo ikanyang yoo ene ka boene ke motho yo o latlhileng bojalwa mme a ile a tswelela pele a itebaganya le dikgwetlho tsa go nna a tlhapogetswe. (Bapisa Diane 27:17.) Motho yono yo o ikanngwang o tshwanetse go tlotla dilo tsa bodumedi tseo motho yo o tshwakgotsweng ke bojalwa a dumelang mo go tsone mme gape o tshwanetse go intsha setlhabelo go neela tshegetso nako nngwe le nngwe fa e tlhokega.—Diane 17:17.

4. Nna Pelotelele

Go tlwaologa bojalwa go tsaya nako. Go tsaya nako gore motho yo o tshwakgotsweng ke bojalwa a boe a age botshelo jwa gagwe sesha. Go ka nna ga nna le mathata mabapi le tsa madi, mathata a kwa tirong, tlhakatlhakano mo legaeng. Go bo o sa tlhole oo nwa ga go reye gore jaanong mathata aa bo a fedile. Fa motho yo o tshwakgotsweng ke bojalwa a ntse a tlwaologa bojalwa e ka nna ya re kwa tshimologong a nna le ditlhobaelo jaaka fa a itebaganya le botshelo a sa bo ‘tshwarela polaka.’ Fa ditlhobaelo tseo di lebega di le bokete fela thata, motho yo o tshwakgotsweng ke bojalwa yo o tlwaologang bojalwa o tshwanetse go gakologelwa mafoko ano a kgomotso a ga mopesalema a a reng: “Latlhèla morwalō oa gago mo go Yehofa, me o tla gu kokotletsa: ga a ketla a leseletsa mosiami gopè go tshikiñwa.”—Pesalema 55:22.

5. Batla Ditsala Tse Di Molemo

Motho yo o tshwakgotsweng ke bojalwa o tshwanetse go ipotsa ka boikanyegi jaana: ‘A ditsala tsa me di nthusa gore ke tlogele go nwa kgotsa ba aga ba bua ka “metlha e le ya maloba,” ba ntira gore ke ikutlwe okare ke latlhegelwa ke sengwe?’ Diane 18:24, (NW) e a re: ‘Go na le ditsala tse di ikemiseditseng go nyeletsana, mme lefa go le jalo go na le tsala e e kgomarelang motho go gaisa ngwana wa ga rraagwe.’ Go tlhoka temogo gore o kgone go tlhaola ditsala tsa boammaaruri mo go tse eleng gore tota tsone di ka nna tsa go tsenya mo diphatseng.

6. Tila go Itshepa Thata

“Ke ikutlwa ke le motlotlo—ebile ga ke sa tlhole ke ikutlwa ke na le keletso ya bojalwa gotlhelele!” Motho yo o tshwakgotsweng ke bojalwa yo o buang jalo o a tle a bo a feteletsa selekanyo seo a setseng a dirile kgatelopele ka sone mme ebile gape a tlhaetsa matlho bothata jo a nang najo jwa go tshwakgolwa ke bojalwa. Go itumelela go tlwaologa bojalwa ga ntlha, eleng boikutlo joo gantsi bo leng kgakala thata le se eleng boammaaruri, ke ga nakwana fela. Buka e go tweng Willpower’s Not Enough e gakolola gore, “lekela gore o nne le boikutlo jo bo lekalekaneng.” “Fa o ka se ka wa bo tlhagolela o bo o itse fela gore o itsenya mo seemong sa gore o boele gape mo mathateng a go nwa, mme o tla wela kgakala thata le mogopolo oo wa go ikaketsa.”—Bapisa Diane 16:18.

7. Tila go Tshwakgolwa ke Dilo Tse Dingwe mo Boemong jwa Bojalwa

Bontsi bo emisa go nwa, mme lefa go le jalo ba bo ba simolola mekgwa e e sareng ee ya go ja kgotsa ba bereka go feta selekanyo, kgotsa ba betšha mo go feteletseng, jalo le jalo. Motho yo o tshwakgotsweng ke bojalwa yo o tlwaologang bojalwa a ka nna a bolela jaana, ‘Mathata a gone ke eng? Go botoka ka gore ga ke nwe.’ Ee gone, go ikotlolola mmele ka mokgwa mongwe go ka nna ga bo go siame. Mme fa e le gore sengwe kgotsa tiro nngwe e dirisiwa go thethebatsa maikutlo, seno se ka gogela mo go reng motho a iphore mme e le ga nakwana fela a re o kgonne.

8. Ipaakanyetse Maikarabelo A Masha mo Lelapeng

Bontsi jwa batho ba ba tshwakgotsweng ke bojalwa bo senya thulaganyo ya bone ya go tlwaologa bojalwa fa fela dilo di re di a siama! Jang? Ka lebaka fela la go bo go nna motho a sa tlhole aa nwa e le selo se sesha mo go bone. Motho yo o tshwakgotsweng ke bojalwa a ka nna a ikutlwa a gogelwa fela thata ke mokgwa wa lelapa wa botshelo. Mo godimo ga moo, fa motho yo o tshwakgotsweng ke bojalwa a simolola go sa tlhole aa nwa a ka nna a tsosa tlhakatlhakano mo lelapeng. Ka jalo, leloko lengwe le lengwe la lelapa le tshwanetse go fetola maikarabelo a lone. Bukana e go tweng Recovery for the Whole Family e a re, “Mokwalo wa terama ya lelapa o o neng o ntse o le teng o tshwanetse go latlhiwa mme go dirwe o mosha go o emisetsa.” Ka mabaka a a utlwalang, go tlwaologa bojalwa go ile ga bidiwa gore ke maikarabelo a lelapa lotlhe.—Bapisa 1 Bakorintha 12:26.

9. Nna O Itisitse Gore O Seka wa Boela Gape kwa Seemong Sele Sa go Tshwakgolwa ke Bojalwa

Go itshepa thata, ditsala tse di sa siamang, dilo tse dingwe tse di tshwakgolang, le go ikgogona mo go ba bangwe, e ka nna dilo tse di ka gogelang kwa go reng o boele gape mo seemong sa pele sa go tshwakgolwa ke bojalwa. Bulela motho yo o mo ikanyang mafatlha a gago mabapi le ditshekamelo dipe tse di ntseng jalo.

Mongwe wa batho ba ba tshwakgotsweng ke bojalwa yo a sa ntseng a tlwaologa bojalwa a re: “Ea re kgabagare batho ba ba tshwakgotsweng ke bojalwa ba lese go nwa. Bangwe ba rona re sego ka re lesitse re santse re tshedile.”

[Ntlha e e kwa tlase]

[Lebokoso mo go tsebe 25]

Fa E Le Gore go a Tlhokafala Totatota Gore Motho A Nwe Melemo

Molemo mongwe le mongwe o o nang le bojalwanyana o ka kgona go tsosa keletso mme wa dira gore motho a boele gape mo go nweng.

Dr. James W. Smith o kwala jaana: “Ke selo se se tlwaelegileng gore motho yo o neng a ntse a le letagwa a boe gape a nwe morago ga dingwaga tse dintsi a ntse a bo tlogetse ka ntateng ya go bo a ile a nwa molemo wa sehuba o o nang le bojalwa mo teng.” Letagwa le iteelwa ke seokobatsi sengwe le sengwe. Fa e le gore molemo o o nang le seokobatsi tota o a tlhokega, motho yo o tshwakgotsweng ke bojalwa o tshwanetse gore . . .

1. a botse ngaka e e dirang melemo go mmolelela gore go ka nna diphatsa go le kanakang.

2. a itsise motho yo o ka mo ikanyang, mme fa go kgonega, a nne a mmitse pele ga a ka o nwa.

3. a boloke pego ya selekanyo sa molemo nako le nako fa a o nwa.

4. a emise go nwa molemo ka bofefo jo bo ka kgonagalang.

5. a latlhe molemo ope o o setseng fa a sena go fola.