Dibuka Tsa Baebele di a Itumelelwa Kwa e Neng e le Soviet Union Pele

Ka mmegadikgang wa Tsogang! kwa Russia

MO MASIMOLOGONG a 1991 naga e ka nako eo e neng e le Soviet Union e ne e dirilwe ka Russia le direpaboliki tse dingwe tse 14. Fa e sale ka nako eo, direpaboliki tseo di ne tsa nna dinaga tse di ipusang ka botsone. Lefa go ntse jalo, palo ya baagi ba Russia e feta ya dinaga tseo tse 14 di kopantswe e bile e na le naga e e fetang ya tsone gararo. Ka September 1994, go ne go na le Basupi ba ga Jehofa ba le 117 276 ba ba bolelelang baagisani ba bone boammaaruri jwa Baebele kwa go se pele e neng e le Soviet Union.

Gompieno go gatisiwa dimakasine tse dintsi tsa Se-Russia tsa Tora ya Tebelo le Tsogang! kgwedi le kgwedi gore di dirisiwe kwa go se pele e neng e le Soviet Union. Mo godimo ga moo, go anamisiwa dipampitshana di le dintsi le dibuka gone koo. Re kgona go lemoga sentle kafa dikgatiso tsa Baebele di itumelelwang thata ka teng go tswa mo makwalong a a neng a amogelwa ke ofise ya Basupi ba ga Jehofa ya kwa Russia e e leng gaufi le St. Petersburg.

Dimakasine Tse di Mebalabala di a Itumelelwa

Monna mongwe go tswa kwa bogareng jwa Siberia o ne a kwala jaana: “Go ne ga direga fela gore ke bone modirikanna a tshotse makasine wa Tora ya Tebelo. Ke ne ka mo kopa go o mpontsha. Sa ntlha ke ne ka lebaleba ditshwantsho tsa one tse di mebalabala e mentle. Morago ka nnela go o bala . . . Ke ne ka iphitlhela ke badile makasine otlhe ke sa lemoge. Dipotso tsa one di ne di bodiwa ka tsela e e kgatlhang, e e monate le ka tsela ya motlotlo.”

Monna mongwe go tswa kwa Siberia o ne a tlhalosa jaana: “Ke ne ka iphitlhela fela ke na le makasine wa lona. Ga ke rate go lo tlotlomatsa bobe, lefa go ntse jalo, eno ke tshedimosetso ya bodumedi e e di gaisang tsotlhe tse nkileng ka di bala.”

Mooki mongwe go tswa kwa St. Petersburg, e leng toropokgolo ya bobedi ka bogolo kwa Russia, o ne a kwala jaana: “Ke lo leboga thata ka ntlha ya metseletsele ya ditlhogo tsa Tsogang! ya January 8, 1995 kaga letsapa le le feteletseng. Ditlhogo tseno ga di a ka tsa nyeletsa mathata a me, lefa go ntse jalo, di ne tsa nkgothatsa ka tsela e ke neng ke e tlhoka le e ke neng ke ntse ke e senka.”

Moithuti mongwe wa dingwaga tse 17 o ne a kwala jaana: “Ruri ke leboga batho botlhe ba ba gatisang dibuka tseno tse di molemo. E ne ya re fa re tswa le ditsala tsa me mo holong ya dibaesekopo, re ne ra bona dimakasine tseno di le mmalwa di tlogetswe mo setulong sengwe se go neng go sena ope mo go sone. Re ne ra di tsaya. . . . Ke ne ke sa kgone go dumela se ke se bonang fa ke ne ke bala Tora ya Tebelo. A ruri isagwe e ne e tlile go nna jalo? Gone jaanong ke simolotse go bala dikwalo tsa Efangele e bile ke leka gore ke di tlhaloganye. Dimakasine tsa lona di tlhalosa se Baebele e se bolelang sentle.”

Monna mongwe wa dingwaga tse 26 o ne a re: “Ke lo leboga thata ka ntlha ya setlhogo sa ‘A go Ipolaya go ka Rarabolola Mathata?’ sa Tsogang! ya April 8, 1994. Ke setse nkile ka akanya go ipolaya gantsi ka ntlha ya go tshwenyega thata mo maikutlong le ka ntlha ya tlwaelo ya go itshwara dirwe tsa tlhakanelodikobo. Lefa go ntse jalo, Lefoko la Modimo le go nna ke rapela Jehofa di ile tsa nkganela gore ke se ka ka ipolaya. Setlhogo seno se nonotshitse tumelo ya me ya gore Modimo o tla nkutlwela botlhoko le gore Modimo o tla nthusa go itshokela mathata a me. O kgona go lemoga gore ke a ikwatlhaya. O batla gore ke tshele. Ke mo lebogela tsela e a ileng a nthusa ka yone a dirisa setlhogo seno.”

Mosetsana mongwe wa dingwaga tse 15 o ne a tlhalosa jaana ka sone setlhogo seo sa Tsogang!: “Makasine ono o ile wa ama botshelo jwa me tota. Fa ke ne ke le dingwaga tse robedi ke ne ka simolola go akanya gore ga go na motho ope yo o nthatang. Batsadi ba me ba ne ba se ke ba ipha nako ya go bua le nna mme ke ne ke leka go itharabololela mathata a me ka bonna. Ke ne ka ikgogona mo bathong ba bangwe. Ke ne ke aga ke omanya le ba losika. Morago ga moo ke ne ka tlelwa ke kakanyo ya go ipolaya. A bo ke ne ka itumela jang fa ke ne ke kopana le Basupi ba ga Jehofa!”

Mosadi mongwe go tswa kwa karolong e e nnang Bayuropa ya Russia o ne a re: “Nkile ka utlwa makawana mangwe a mabedi a tlotla ka Baebele ke le fa boemelong jwa dibese. Ke ne ka kgatlhegela seo mme ka buisana le bone. Makawana ano a ne a nnaya khopi ya Tora ya Tebelo. Ke ne ka bala makasine ono ka boitumelo e bile ke o kgatlhegela mme e bile ke batla go itse go le gontsi ka Baebele. Nka rata go aga ke ikgolaganya le lona ka dimakasine tseno tsa lona e bile ke batla go itse Baebele le go e ithuta ka metlha.”

Dibuka Tse Dingwe di a Itumelelwa

Mosadi mongwe wa moroba go tswa kwa Caucasus o ne a kwala jaana: “Mosadi mongwe o ne a tla kwa ofising ya rona mme a re bolelela ka kopano nngwe. Ke ne ka bona tsela e a neng a itumetse e bile a le matlhagatlhaga ka yone mme ka kgatlhega. Mo letsatsing le le latelang o ne a nnaya buka ya O Ka Tshelela Ruri mo Lefatsheng la Paradaise. Ke ne ka e bala yotlhe ka matlhagatlhaga. E ne e kgatlha tota. Ke ne ka ikutlwa gore ke bone kgoro e e isang mo leseding morago ga gore ke kgarakgatshege mo lefifing. Ke ne ka bona dikarabo tsa dipotso tsotlhe tse ke neng ke feditse lobaka lo loleele ke di ipotsa go tswa mo bukeng e le nngwe fela. Ruri seno ke boitumelo jo ke sa kgoneng go bo tlhalosa.”

Monna mongwe go tswa kwa Asia Bogare o ne a akgela jaana: “Ke leloko la Kereke ya Good News. Re tlhaela tota ka dibuka tsa dilo tsa semoya. Re lo kopa gore lo re romelele dibuka, diboroutšhara le dibukana ka bonako gore re tle re ithute ka tsone le go di aba.”

Motho mongwe go tswa kwa Armenia, gaufi le Lewatle le Lentsho, o ne a kwala jaana: “Ke badile boroutšhara jwa A Ruriruri Modimo O Amega Ka Rona?, mme bo ne jwa nthoba pelo tota. Kgabagare ke bone buka e nka e dirisang go ithuta Baebele. Ke kopa ka tsweetswee gore lo nthomelele dibuka tse nka di dirisang go ithuta jalo.”

Mosadi mongwe go tswa kwa Siberia o ne a re: “Mongwe wa Basupi ba ga Jehofa o ne a etela mo ntlong ya rona a bo a re tlogelela khopi ya buka ya Monna Yo Mogolo go Gaisa Botlhe Ba Ba Kileng Ba Tshela. Se ke neng ka se bala mo go yone se ne sa nkgothaletsa gore ke tlhatlhanye le go simolola go ithuta Baebele le mororo ke ile ka nna molatolamodimo ke santse ke tsena sekolo.”

Mmè mongwe wa bana ba babedi o ne a bua mafoko a go lebogela yone buka eno e e buang ka botshelo jwa ga Jesu Keresete a bo a tlhalosa jaana: “Bana ba e tlhaloganya sentle e bile e a ba kgatlha. E dira gore motho a rate go ithuta Baebele go ya pele le go bala dibuka tsa bodumedi. Buka eno e kgatlha tota e bile e gatisitswe ka bothakga e bile e dirilwe sentle.”

Ngogola batho ba le 34 608 kwa go se e kileng ya bo e le Soviet Union ba ne ba supa fa ba itumelela se ba neng ba se ithuta ka go kolobediwa. E kete dibuka tse di theilweng mo Baebeleng tse Basupi ba ga Jehofa ba di gatisang di ka anamisiwa ka bontsi le ka botlalo kwa karolong eno ya lefatshe mme e kete dikete tse dingwe tse dintsi tsa batho di ka tsibogela boammaaruri jwa Baebele jo di bo tshotseng!