Bodumedi Jwa Maaka bo Tloga bo Nyelediwa!

GORE re tle re itse gore a madumedi a lefatshe leno a tloga a nyelediwa, mma re sekaseke bongwe jwa boporofeti jwa Baebele jo bo kgatlhang thata. Bo bua ka mosadi wa tshwantshetso wa masaitsiweng yo o tlhalosiwang mo bukeng ya bofelo ya Baebele e leng ya Tshenolo.

A ka leitlho la gago la mogopolo o kgona go bona mosadi yo o busang ditšhaba e le kgosigadi a laola matshelo a batho ba le dimilione di le diketekete go ralala hisitori yotlhe—mosadi wa mohumi yo o apereng bohibidu jo bo mokgona le bohibidu jo bo letlhololo a ikgabisitse ka gauta e e tlhwatlhwakgolo, majana a a tlhokegang le diperela? Mo phatleng ya gagwe go kwadilwe leina leno le leleele le e leng masaitsiweng: “Babilone o mogolo, mma diaka, le mma makgapha a lefatshe.” O lemotshega sentle ka boitshwaro jwa gagwe jo bo repileng ka a ‘gokafetse’ le balaodi ba lefatshe. Maleo a gagwe a koelane go fitlha le kwa legodimong. O pagame sebatana se se boitshegang se se ditlhogo di supa sa dinaka di le lesome se se mmala o o bohibidu jo bo letlhololo.—Tshenolo 17:1-6; 18:5.

Fa e le gore o kgona go bona mosadi yono ka leitlho la mogopolo, he o na le lesedinyana ka monnaleseabe yono yo o di gogang kwa pele mo boporofeting jono jo bo kgatlhang yo moaposetoloi wa ga Jesu e bong Johane a neng a mmona mo ponatshegelong e a neng a e bontshiwa ke moengele. O e tlhalosa sentle ka botlalo mo go Tshenolo kgaolo 17 le 18. Ipalele dikgaolo tseno mo Baebeleng ya gago. O tla kgona go tlhaloganya ditiragalo tseo jaaka di latelana go tloga fa mosadi yono wa masaitsiweng a senolwa go fitlha fa kgabagare a nyelediwa.

Go Senola Seaka

Re bona lesedinyana le le re thusang go lemoga gore kgosigadi eno ya seaka ke mang ka dilo tse pedi tse e dutseng mo go tsone ka tsela ya tshwantshetso. Mo go Tshenolo 17:18, o tlhalosiwa e le “motse o mogolo, o o busang dikgosi tsa lefatshe.” Se se mo dira gore a dule mo “metsing a mantsi” a a emelang “ditšhaba, le boidiidi jwa batho, le merafe, le dipuo,” jaaka go tlhalosiwa mo go Tshenolo 17:1, 15. Go ya ka temana 3 ya yone kgaolo eo, gape o bonwa a dutse mo godimo ga sebatana se se ditlhogo di supa—gantsi dibatana mo Baebeleng di emela dipuso tsa selefatshe kana mekgatlho ya dipolotiki.

Seno se supa gore seaka seo e bong Babilone o Mogolo, se emela puso e kgolo e e laolang dipuso tse dingwe le babusiwa ba tsone. Puso e kgolo eo ga se epe fa e se bodumedi jwa maaka jwa lefatshe leno.

Go itsege sentle mo hisitoring kafa baeteledipele ba bodumedi ba laolang dikgang ka teng mo dilong tsa puso le tsa dipolotiki. The World Book Encyclopedia e bolela jaana: “E ne ya re fa Pusokgolo ya Bophirima ya Roma [ya lekgolo la bo5 la dingwaga] e sena go phutlhama, mopapa o ile a simolola go laola dilo thata go gaisa motho ope fela mo Yuropa. . . . Mopapa o ile a laola dipolotiki a bo a laola le dilo tsa semoya. Ka ngwaga wa 800, Mopapa Leo III o ne a rwesa mmusi wa Mo-Frank e bong Charlemagne [Charles yo Mogolo] serwalo sa go nna mmusimogolo wa Baroma. . . . Leo III o ne a naya mopapa tshwanelo ya go dira gore taolo ya mmusimogolo e tsewe semolao.”

Gape re bona sekai sa tsela e Kereke ya Katoliki le “dikgosana” tsa yone di neng di naya babusi taolo ka yone mo kgannyeng ya ga mokadinale Thomas Wolsey (1475?-1530). O tlhalosiwa e le “motho yo go fetileng dingwaga tse dintsi a na le taolo e kgolo go gaisa botlhe mo Engelane.” Ka nako ya ga Kgosi Henry VIII, “go ise go ye kae ke fa e le ene a laolang dikgang tsotlhe tsa puso. . . . O ile a tshelela mo manobonobong a segosi e bile a laola fela thata.” Pego ya saetlopedia eno e tswelela jaana: “Mokadinale Wolsey o ne a dirisa bokgoni jwa gagwe jo bogolo e le radipolotiki le molaodi segolobogolo a laola lephata la dikgang tsa dinaga di sele la Engelane la puso ya ga Henry VIII.”

Sekai se sengwe gape se se tlhomologileng sa tsela e Katoliki e laolang dilo tsa selefatshe tsa dipuso tsa lefatshe ka yone ke sa ga Mokadinale Richelieu wa Fora (1585-1642), yo “go neng ga feta dingwaga tse 18 . . . e le ene tota a busang Fora.” Buka e re sa tswang go e nopola e bolela jaana: “O ne a rata maemo thata mme go ise go ye kae ke fa a setse a gwalalela maemo a a kwa godimo.” O ne a tlhongwa go nna mokadinale ka 1622 “mme go ise go ye kae ke fa e le ene yo o laolang puso ya Fora thata.” Go bonala fa e ne e le monna yo o matlhagatlhaga thata ka gonne “o ne a etelela pele masole a kgosing ka namana fa go ne go tlhaselwa La Rochelle.” Setlhogo seo se oketsa jaana: “Richelieu o ne a kgatlhegela thata lephata la dikgang tsa dinaga di sele.”

O kgona go bona tsela e Vatican e santseng e nna le seabe ka teng mo dilong tsa dipolotiki mo tseleng e lekwalodikgang la Vatican la L’Osservatore Romano le agang le dira dikitsiso gangwe le gape ka teng ka badipolomate ba dinaga di sele ba naya mopapa yo o laolang makwalo a a supang maemo a bone. Go bonala fa Vatican e na le setlhopha sa Bakatoliki ba ba ineetseng ka bojotlhe ba ba nang le go loma mopapa tsebe kaga ditiragalo tsa mo lefatsheng lotlhe tsa dipolotiki le tsa bodipolomate.

Re ka kgona go ntsha dikai tse dintsintsi tse di bontshang kafa baeteledipele ba bodumedi—ba Labokeresete le ba e seng ba yone—ba laolang dilo thata ka teng mo dikgannyeng tsa lefatshe leno tsa dipolotiki. Kgang fela ya gore seaka seno sa tshwantshetso se dutse mo ‘metsing otlhe a mantsi’ (a a emelang “ditšhaba, le boidiidi jwa batho”) le mo godimo ga sebatana (se se emelang dipuso tsotlhe tsa lefatshe tsa dipolotiki), le lone le bontsha gore tsela e se laolang batho, ditšhaba le dipuso ka teng, ga se taolo fela e e tlwaelegileng ya dipolotiki, ke e e kwa godimo tota. Mma re bone gore ke ya mofuta mang.

Bontlhanngwe jwa leina la gagwe le leleele le le mo phatleng ke “Babilone o mogolo.” Le amana le Babilone wa bogologolo yo o neng a tlhomiwa ke Nimirote, yo o neng a le “kgatlhanong le Jehofa,” Modimo wa boammaaruri dingwaga di ka nna 4000 tse di fetileng. (Genesise 10:8-10, NW) Leina leno la gagwe le supa gore ke setshwani se segolo sa Babilone wa bogologolo se se nang le dipopego tse di tshwanang le tsa gagwe. Dipopego dife? Babilone wa bogologolo o ne a tletse ka madumedi a a tletseng ka masaitseweng, dingwao tse di sa siamang, kobamelo ya disetwa, boselamose, tepodinaledi le tumelabotlhodi—tsotlhe e le tse Lefoko la ga Jehofa le neng le di kgala.

The New International Dictionary of New Testament Theology e bolela gore mo lekgolong la bo18 la dingwaga B.C.E., Marduk o ne a dirwa “modimo wa motse wa Babilone ka jalo ya nna mookamedi wa tempele ya Basumeri le Baakhate e e nang le medingwana e ka nna 1300. E ne ya dira gore dingwao tsotlhe tsa teng tsa sedumedi di laolwe ke tsamaiso e le nngwe fela. . . . Mo go Gen. 11:1-9 polane ya kago ya tempele eo e e boitshegang ya Babilone e kaiwa e le sesupo sa boipelafatso jwa motho a batla go tsaya taolo ya legodimo.”

Ka jalo, Babilone wa bogologolo e ne e le pinagare ya bodumedi jwa maaka jo fa nako e ntse e ya bo neng jwa anamela mo lefatsheng lotlhe. Ditlwaelo, dithuto, dingwao le matshwao a bodumedi a Sebabilone di anametse mo dikarolong tsotlhe tsa lefatshe mme di bonala sentle mo diketeketeng tsa madumedi a mantsintsi a a tlhakatlhakaneng a lefatshe. Magosi le dipuso tsa dipolotiki di ile tsa tlhagoga tsa ba tsa phutlhama mme bodumedi jwa Sebabilone jone bo ile jwa sala.

Ke Eng Fa go Le Gaufi Jaana Gore bo Nyelediwe?

Jaaka fa go ilwe ga nna ga tlhalosiwa gangwe le gape mo dikgatisong tse di fetileng tsa makasine ono, boporofeti jwa Baebele le ditiragalo tse di tshikhinyang lefatshe fa e sa le ka 1914 di supa sentle gore gone jaanong re tshela mo motlheng wa “bokhutlo jwa lefatshe.” (Mathaio 24:3) Seno se kaya gore tsamaiso eno ya lefatshe ya sebatana e tloga e nyelediwa, le “sebatana . . . se se mmala o bohibidu jo bo letlhololo” sa dinaka tse di lesome se gone jaanong seaka se se pagameng le sone se tloga se nyelediwa. (Tshenolo 17:3) Go bonala sebatana seno se emela dipuso tsa dipolotiki tsa dinaga tsotlhe tsa lefatshe di kopane—lekgotla la Ditšhaba Tse di Kopaneng. Go nyelediwa gono go go boleletsweng pele go kaya gore puso ya batho ya dipolotiki e e bosula e e kgaoganyang batho e tla fedisiwa. Mme go tweng ka kgosigadi eno ya seaka e e pagameng sebatana?

Moengele wa Modimo o a tlhalosa: “Dinaka tse some tse o di bonyeng, le sone sebatana, di tlaa ila seaka seo, di tlaa se dira tshwafatso le bosaikatega, di tlaa ja nama ya sone, di se fisetsa ruri ka molelo. Gonne Modimo o gakolotse dipelo tsa tsone go tla di dira maikutlo a one, le gore di nne boikutlo bo le bongwe fela, di be di neye sebatana bogosi jwa tsone, go tle go tsamaye mafoko a Modimo a dirafale.”—Tshenolo 17:16, 17.

Ka jalo boporofeti joo bo bontsha gore pele fela ga gore sebatana sa dipolotiki se nyelediwe, se tla simolola go ila yo o se pagameng se bo se mo tlhanogela. Ka ntlha yang? Go bonala fa babusi le dipuso di tla ikutlwa gore bodumedi jo bo rulagantsweng jo bo mo mafelong a tsone bo leka go gapa maatla le taolo ya tsone. Ka tshoganetso, ka ntlha ya go ikutlwa di tlhotlhelediwa ke maatla mangwe di tla diragatsa “maikutlo” a Modimo, e leng tshwetso e a e tsereng ka go atlhola bodumedi jotlhe jwa maaka jwa lefatshe jo bo akafetseng le jo bo itladikileng ka madi.a—Bapisa Jeremia 7:8-11, 34.

Madumedi a maaka a lefatshe a tla nyelediwa ka nako ya fa a santse a bonala a nonofile e bile a santse a na le tlhotlheletso e kgolo. Ee, boporofeti jono bo bontsha gore pele fela ga gore seaka seno se senngwe, se tla bo se santse se ithaya jaana mo pelong ya sone: “Ke dutse ke le kgosi mohumagadi, ga ke motlholagadi, ga nketla ke bona selelo gope.” (Tshenolo 18:7) Lefa go ntse jalo, balatedi ba sone ba le dimilione di le diketekete ba tla gakgamadiwa ke go bo se sentswe. E tla bo e le masetlapelo a magolo a a diregileng a sa solofelwa go gaisa otlhe mo hisitoring ya motho.

Fa e sa le Babilone wa bogologolo a nna teng, bodumedi jwa maaka bo ile jwa nna le tlhotlheletso e kgolo thata mo bathong bo dirisa baeteledipele le balatedi ba jone; dithuto, dingwao le ditlwaelo tsa jone; dikago tsa jone tsa kobamelo tse dintsintsi le tse dikgolo; le mahumo a jone a a boitshegang. Ruri mang le mang o tla lemoga sentle gore di sentswe. Ka gone, moengele yo o laetsweng gore a bolele molaetsa wa katlholo ya seaka seno o bua fela a sa metse mafoko a re: “Dipetso tsa gagwe di tlaa [tla] ka letsatsi le le lengwe fela, e bong loso, le selelo, le popamo; o tlaa fisediwa ruri ka molelo, gonne go thata Morena Modimo o o mo atlhotseng.” Ka jalo, Babilone o Mogolo o tla nyelediwa a sa lebelela mme seo se tla direga ka bonako jaaka e kete ke ka “letsatsi le le lengwe fela.”—Tshenolo 18:8; Isaia 47:8, 9, 11.

Mafoko ao a a bogale a moengele a dira gore re ipotse gore, A go tla nna le bodumedi bongwe jo bo tla salang, mme fa e le gore go ntse jalo, ke bofe mme ke ka ntlha yang? Boporofeti bo bontsha eng? Seno se tla tlhalosiwa mo setlhogong se se latelang.

[Ntlha e e kwa tlase]

[Lebokoso mo go tsebe 6]

Molato wa Madi wa Labokeresete mo Afrika

Mo go Tshenolo 18:24, Baebele e bolela gore mo go Babilone o Mogolo go fitlhetswe madi a “botlhe ba ba bolailweng mo lefatsheng.” Akanya fela ka dintwa tse di lolweng ka ntlha ya dikgogakgogano mo bodumeding le ka ntlha ya go bo baeteledipele ba bodumedi ba paletswe ke go di kganela. Sekai sa bosheng jaana sa seno se ne sa direga fa batho ba Rwanda ba ne ba gailana mo go neng ga bolawa batho ba ka nna 500 000—nngwetharong ya bone e le bana.

Mokwaladibuka wa kwa Canada e bong Hugh McCullum, o bega jaana go tswa kwa Rwanda: “Moruti mongwe wa Mohutu wa mo Kigali [kwa Rwanda] o bolela gore motho ga a kgone go tlhalosa lebaka la go bo kereke e paletswe ke go ruta batho tsela e e siameng ya maitsholo. Bobishopo ba tshwanetse ba ka bo ba nnile le seabe se se botlhokwa thata mo setšhabeng sa Rwanda. Ba ne ba itse ka masetlapelo a a neng a tlile go direga go sa le gale pele ga dipolaano tseo di runya. Ba ka bo ba ile ba rera go tswa mo dialetareng gore mo e batlileng e nna baagi botlhe ba naga ba nne le tshono ya go utlwa molaetsa o o nonofileng o o ka bong o kganetse go gailana goo. Go na le moo, baeteledipele bao ba ne ba itidimalela fela.”

Morago ga polao e e maswemaswe eo ya kgailo ya 1994, moeteledipele wa kereke e bong Justin Hakizimana o ne a bua jaana mo kokoanong e potlana e e neng e tshwaretswe mo kerekeng ya Presbyterian kwa Kigali: “Kereke e ile ya nna seoposengwe le dipolotiki tsa ga Habyarimana [poresidente wa Rwanda]. Ga re a ka ra kgala se se neng se direga ka gonne re ne re le bosula. Ga go epe ya dikereke tsa rona, segolobogolo Katoliki e e neng ya kgala polao eo ya kgailo.”

Aaron Mugemera yo e leng moruti wa kereke o ne a bolela jaana mo kokoanong e nngwe kwa Rwanda morago ga kgailo eo: “Kereke e itlhabisitse ditlhong. . . . Batho ba sa le ba ntse ba bolaana mono go tloga ka 1959. Ga go ope yo o ileng a ba kgala. . . . Re ne ra itidimalela fela ka gonne re ne re tshaba e bile e le ka gonne re ne re sa tshwenngwe ke sepe.”

[Setshwantsho mo go tsebe 7]

“Seaka” seno se mo lefatsheng lotlhe

[Motswedi wa Setshwantsho]

Globe: Mountain High Maps® Copyright © 1995 Digital Wisdom, Inc.