Kgopolo E e Mo Baebeleng

Ngwaga wa 2000 o Botlhokwa go le Kana Kang?

BONTSI jwa batho ga bo bone fa ngwaga wa 2000 o na le botlhokwa bope mo dikgannyeng tsa bodumedi jaaka go ntse ka batho ba dinaga tsa Bophirima le tse dingwe. Ka sekai, Bajuda, Bamoseleme le Bahindu botlhe fela ba na le dikhalentara tsa bone tsa bodumedi tse di sa tshwaneng gotlhelele le tsa Bophirima. Ba-China bone ba dirisa khalentara e e tsamaisanang le go fetoga ga ngwedi go tshwaya matlha a bodumedi le a ngwao. Ke gone ka moo dimilione di le dikete tsa batho gompieno, gongwe bontsi jwa baagi ba lefatshe, ba sa tseyeng ngwaga wa 2000 o na le bokao bope jo bo kgethegileng.a

Le fa go ntse jalo, segolobogolo kwa dinageng tsa Bophirima, bontsi jwa batho bo letetse sekete se se latelang sa dingwaga se se ntseng se atamela thata ka go swegaswega dipelo jaaka go supiwa ke khalentara ya ga Gregory. Mo go ba bangwe ga se kgang fela ya go rata dilo. Ba leba ngwaga wa 2000 e le masimologo a motlha wa dilo tse disha, e le nako ya phetogo e kgolo thata mo hisitoring. Bontsi jwa ba ba dumelang mo Baebeleng ba amanya go diragadiwa ga boporofeti le ngwaga wa 2000. Bangwe ba solofetse gore go tla diragala ditiragalo tse dikgolo thata tsa semoya. Batho ba bangwe ba boifa gore go tla tla masetlapelo—bokhutlo jwa lefatshe. A Baebele e na le sengwe se e se bolelang ka ditsholofelo tseno?

Jehofa, Mmolokanako

Modimo wa Baebele o tlhalosiwa e le “Mogologolo wa Malatsi.” (Daniele 7:9, NW) O laola nako ka botswerere jo bogolo, jaaka re bona kafa bontsi jwa popo ya gagwe bo dirang ka teng, go tloga ka go dikologa ga dipolanete go fitlha ka motsamao wa dikarolwana tsa atomo. O na le thulaganyo ya nako e a e gagamalelang ka tlhomamo. Baebele ya re: “O ne a laolela dinako tse di tlhomilweng le ditekanyetso tse di tlhomilweng tsa bonno jwa batho.” (Ditiro 17:26) Jehofa ke Mmolokanako yo o manontlhotlho.

Baebele e re neela tatelano ya ditiragalo ka tsela e e kgethegileng. E re neela mogolagang wa rekoto o motho a kgonang go o bala sentle go ya ka go latelana ga one go fitlha kwa tshimologong ya hisitori ya motho. Dipalopalo tseo di supa gore Modimo o bopile Adame ka ngwaga wa 4026 B.C.E. Aberahame o ne a tsalwa dingwaga di ka nna 2000 moragonyana. Morago ga dingwaga tse dingwe tse 2000 Jesu o ne a tsalwa.

Batho bangwe ba ba ithutileng tatelano ya ditiragalo tsa Baebele ba itlhametse ditsela tsa go bala nako tse ba di dirisang go supa matlha mangwe a a rileng a mo isagweng. Ka sekai, bangwe ba dirisitse makgamu a dingwaga di ka nna 2000 tse di latelanang a a kgaoganyang motlha wa ga Adame, Aberahame le Jesu jaaka motheo wa go bolelela pele gore go tla diragala tiragalo ya masetlapelo kwa bokhutlong jwa ngwaga wa bo2000 fa e sa le ka botsalo jwa ga Jesu. Seno ke sekai se le sengwe fela sa ditsela tse dintsi tsa go bala nako tse batho ba bolelang fa di theilwe mo tatelanong ya ditiragalo tsa Baebele.

Gone ke boammaaruri gore Baebele e bua ka nako e ka yone Jehofa Modimo a tla tsenelelang mo dikgannyeng tsa batho ka go tlosa bosula le go lere lefatshe le lesha. Boporofeti jwa Baebele bo bua ka “nako ya bokhutlo,” “bokhutlo jwa tsamaiso eno ya dilo,” “malatsi a bofelo” le “letsatsi la ga Jehofa.” (Daniele 8:17; Mathaio 24:3; 2 Timotheo 3:1; 2 Petere 3:12) Le fa go ntse jalo, “bokhutlo” jo bo boleletsweng pele mo Baebeleng ga bo kopane gope le ngwaga wa 2000. Ga go na sepe mo Dikwalong se se bolelang fa bokhutlo jwa sekete sa bobedi sa dingwaga bo na le bokao bongwe jo bo kgethegileng jaaka fa go balwa go ya ka khalentara ya ga Gregory.

“Dilo Tseno di Tla Nna Leng?”

Baaposetoloi ba ga Jesu ba ne ba kgatlhegela thulaganyo ya Modimo ya nako fa ba ne ba botsa Jesu jaana: “Re bolelele, dilo tseno di tla nna leng, mme sesupo e tla nna eng sa go nna gone ga gago le sa bokhutlo jwa tsamaiso eno ya dilo?” (Mathaio 24:3) Le gompieno bontsi jwa batho bo rata go itse ka tsela e e tshwanang kaga isagwe. Ke ga tlholego go kgatlhegela boporofeti jo bo kgethegileng jono jwa Baebele le nako ya go diragala ga jone. Le fa go ntse jalo, go molemo gore re amogele le go tlotla boemo jwa Modimo mo kgannyeng eno.

Jehofa o senotse maikaelelo a gagwe ka Morwawe e bile o neetse karabo e e tlhamaletseng mo kgannyeng eno. Nakonyana fela pele ga Jesu a tlhatlogela kwa legodimong, barutwa ba gagwe ba ne ba mmotsa gape ka ga nako ya go diragala ga ditsholofetso tsa Modimo. Jesu o ne a araba jaana: “Ga se ga lona go nna le kitso ya dinako kgotsa dipaka tse Rara a di beileng mo taolong ya gagwe.” (Ditiro 1:7) Pele ga moo, Jesu o ne a boleletse barutwa ba gagwe gore: “Malebang le letsatsi leo le ura eo ga go na ope yo o itseng, lefa e le baengele ba magodimo kgotsa Morwa, fa e se Rara fela.”—Mathaio 24:36.

Go phepafetse gore motho ga a newa thata ya go nna le “kitso ya dinako kgotsa dipaka,” segolobogolo malebana le go diragadiwa ga dipolelopele tsa Baebele tsa isagwe. Modimo o tlhophile gore a se re senolele tshedimosetso eo. (Mathaio 24:22-44) A re ka ama maikaelelo a Modimo ka tsela nngwe fela ka go fopholetsa “letsatsi leo le ura” ka borona, kwantle ga thato ya gagwe? Go phepafetse gore seo se ka se kgonege. (Dipalo 23:19; Baroma 11:33, 34) Baebele e bolela jaana: “Kgakololo ya ga Jehofa e eme ka tlhomamo ka bosenabokhutlo.” (Pesalema 33:11) E re ka e le Modimo mothatayotlhe, o atlega ka metlha.—Isaia 55:8-11.

Le fa gone e le thata ya Modimo go boloka “kitso ya dinako le dipaka . . . mo taolong ya gagwe,” bontsi jwa batho bo santse bo rata go fopholetsa. Bangwe ba itira baperofeti ba ba bonelang masetlapelo pele. Ke gone ka moo moaposetoloi Paulo a neng a neela Bathesalonika ditaelo tse di tlhamaletseng malebana le kotsi ya go reetsa batho ba ba fopholetsang matlha. O ne a kwala jaana: “Re a lo lopa gore lo se ka lwa tshikhinngwa ka bofefo mo go akanyeng ga lona lefa e le go tsosiwa maikutlo ka polelwana e e tlhotlheleditsweng kgotsa ka molaetsa o o buiwang ka molomo kgotsa ka lekwalo jaaka e kete le tswa mo go rona, kaga gore letsatsi la ga Jehofa le gorogile. A ope a se ka a lo faposa ka mokgwa ope.”—2 Bathesalonika 2:1-3.

Basupi ba ga Jehofa ba dumela ba sa belaele gore maikaelelo a Modimo kaga isagwe a tla diragala ka nako e a e tlhophileng go sa le gale, mo letsatsing le mo ureng e a e tlhomileng. (Habakuke 2:3; 2 Petere 3:9, 10) E bile re dumela gore ditiragalo tseno di tla diragala gautshwane. (2 Timotheo 3:1-5) Le fa go ntse jalo, ga re fopholetse kana gone go ema nokeng dikgopolo tse di anamang gompieno.b Eleruri, ngwaga wa 2000 kana wa 2001 kana nako epe fela e e itlhometsweng ke batho ga e amane ka gope le thulaganyo ya ga Jehofa ya nako.

[Dintlha tse di kwa tlase]