Botlhodi—Ke ka Ntlha Yang bo le Kotsi Jaana?
AGO dumela mo botlhoding go ka go gobatsa? Bangwe ba ka nna ba itlhokomolosa kgopolo eno kgotsa ba e tsaya e se selo se se kotsi go le kalo. Lefa go ntse jalo, mo bukeng ya gagwe ya Believing in Magic—The Psychology of Superstition, Porofesa Stuart A. Vyse o tlhagisa jaana: “Botlhodi bo ka felela ka go dira gore motho a tshele botshelo jwa maemo a a kwa tlase fa a senya madi a le mantsi mo bathong ba ba dirisanang le meya, ba ba bolelelang dilo pele, ba ba dirisanang le masaitseweng, kgotsa mo bathong ba ba balang dikarata tsa Tarot, kgotsa fa e le gore ditiro tsa motho yono tsa botlhodi di mo thusa go tswelela pele ka bothata jwa go betšha.” Go letlelela botlhodi go laola matshelo a rona go ka nna le diphelelo tse di masisi thata.
Jaaka re setse re bone, ditumelo di le dintsi tsa botlhodi di thusa go kokobetsa dipoifo tse batho ba nang le tsone ka isagwe. Le fa go ntse jalo, go botlhokwa gore re dire pharologanyo magareng ga botlhodi le go nna le kitso e e ikanyegang malebana le se se tla diregang mo isagweng. Akanya ka sekai seno.
Kgang e e Sedimosang
Ka 1503, morago ga dikgwedikgwedi a ntse a batlisisa gaufi le lobopo lwa Amerika Bogare, Christopher Columbus o ne a kgona go emisa dikepe tsa gagwe tsa bofelo di le pedi mo go se jaanong e leng setlhaketlhake sa Jamaica. Mo tshimologong, baagi ba setlhaketlhake seno ba ne ba se na mathata le go abelana dijo le babatlisisi bano ba ba neng ba le mo mathateng. Le fa go ntse jalo, fa nako e ntse e ya, boitshwaro jo bo sa siamang jwa batsamayakadikepe bano bo ne jwa dira gore baagi bano ba setlhaketlhake ba tlogele go ba naya dijo. Boemo bo ne bo le maswe, ka gonne go ne go tla tsaya lobakanyana pele ga sekepe se sengwe se ka tla go ba namola.
Go ya ka kgang eno, Columbus o ne a leba alemanaka ya gagwe mme a lemoga gore ngwedi o ne o tlile go fifala ka February 29, 1504. A dirisa go dumela mo botlhoding ga baagi ba setlhaketlhake seno, o ne a ba tlhagisa gore fa ba sa neye setlhopha se a tsamayang le sone dijo, lefifi le ne le tlile go aparela ngwedi. Baagi bano ba ne ba itlhokomolosa tlhagiso eno—go fitlha fa ngwedi o simolola go fifala! Ya nna gone “ka go bokolela go gogolo le khutsafalo,” ba “tlhagang ba taboga go tswa kwa dintlheng tsotlhe ba tabogela kwa sekepeng ba tshotse dijo di le dintsi.” Babatlisisi bano ba ne ba newa dijo ka nako yotlhe e ba neng ba ntse foo ka yone.
Mo baaging bano ba setlhaketlhake, go ne go lebega Columbus a dirile boselamose jo bo maatla thata. Le fa go ntse jalo, ba sweditse jalo ka gonne ba ne ba dumela mo botlhoding. Totatota, “polelelopele” eno e ne e thailwe mo metsamaong e e tlhomameng ya lefatshe, ngwedi, le letsatsi. Baithutadinaledi ba kgona go bolelela pele ka tlhomamo dilo tse di jaaka go fifala ga ngwedi lobaka lo loleele pele di direga, mme tshedimosetso eno e tlhaga mo dialemanakeng. Mo godimo ga moo, tsela e go tsamaya ga dipopo tsa magodimo go tlhomameng ka yone e kgontsha baithutadinaledi go bona kwa di leng teng nako nngwe le nngwe. Ka jalo, fa lokwalodikgang lwa gago lo go itsise nako e letsatsi le tla tlhabang kgotsa le tla phirimang ka yone, o tsaya seo e le boammaaruri.
Ka jalo Mmopi yo Mogolo wa dipopo tsa magodimo ke ene motswedi wa tshedimosetso e e gatisitsweng e e malebana le dinako tsa go fifala ga ngwedi le tsa go tlhaba le go phirima ga letsatsi. Mme dipolelelopele tsa batho ba ba bolelelang dilo pele, ba ba dirisanang le meya, ba ba lebang bolo ya kirisetale go bolelela pele ditiragalo tsa isagwe, le ba ba balang dikarata tsa tarot, di tswa mo motsweding mongwe o o farologaneng, o o leng kgatlhanong le Modimo Mothatayotlhe. Akanya ka se re se bolelang.
Motswedi o o Kotsi
Mo go Ditiro 16:16-19, pego e e boitshepo e bolela gore “mosetsana mongwe wa motlhanka” kwa motsemogolong wa bogologolo wa Filipi o ne a naya beng ba gagwe poelo e ntsi thata ka go dira “tiro ya go bolelela pele.” Le fa go ntse jalo, pego e bolela ka tlhamalalo gore motswedi wa dipolelelopele tsa gagwe e ne e se Mmopi mothatayotlhe, mme e ne e le “ledimona la boitseanape.” Ka gone, fa moaposetoloi Paulo a sena go leleka ledimona leno, mosetsana yono wa motlhanka o ne a latlhegelwa ke maatla a gagwe a go bolelela dilo pele.
Fa re tlhaloganya gore dipolelelopele tse di ntseng jalo di tlhaga mo motsweding wa bodimona, re bona lebaka la go bo Molao wa Modimo mo Baiseraeleng o ne o bolela jaana: “Go se ka ga fitlhelwa mo go wena . . . ope yo o dirisang boitseanape, yo o dirang maselamose kgotsa ope yo o batlang ditshupo dipe tse di bolelelang pele isagwe kgotsa moloi, kgotsa yo o dirisang lefoko la maselamose go kolopa ba bangwe kgotsa ope yo o lopang kgakololo mo go yo o buang le meya kgotsa yo o dirang tiro ya go bolelela ditiragalo pele . . . Gonne mongwe le mongwe yo o dirang dilo tseno ke selo se se makgapha mo go Jehofa.” (Duteronome 18:10-12, NW) Tota e bile, Molao o ne o dirile gore ditiro tse di ntseng jalo e nne molato o o atlholelwang ka loso.—Lefitiko 19:31; 20:6.
Go ka nna ga go gakgamatsa go itse gore meya e e bosula ke yone e e tlhotlheletsang dilo di le dintsi tsa botlhodi tse di lebegang di se kotsi. Le fa go ntse jalo, Baebele e bolela gore Satane ‘o iphetola moengele wa lesedi.’ (2 Bakorintha 11:14) Satane le badimona ba gagwe ba ka dira gore ditlwaelo tse di kotsi di lebege di se kotsi, e bile di le mosola. Ka dinako tse dingwe, ba ka nna ba loga maano a go dira botlhodi bongwe, ba bo ba dira gore bo diragale, ba tsietsa ba ba bonang gore ba itheye ba re botlhodi jo bo ntseng jalo bo tswa kwa Modimong. (Bapisa Mathaio 7:21-23; 2 Bathesalonika 2:9-12.) Seno se go thusa go bona gore ke ka ntlha yang fa dipolelelopele dingwe tse di dirilweng ke batho ba ba ipolelang gore ba na le maatla a a kgethegileng di diragala ka dinako dingwe.
Gone mme, ba le bantsi, fa e se botlhe, ba ba ipolelang gore ba na le maatla mangwe a a kgethegileng ke batsietsi, maferefere fela, ba boikaelelo jwa bone e leng go ya go tseela batho ba ba seng kelotlhoko madi ka boferefere. Le fa go ntse jalo, go sa kgathalesege gore a ke batsietsi kgotsa nnyaa, botlhe ba dirisiwa ka botswerere ke Satane go dira gore batho ba tlhanogele Jehofa, a ba foufatsa gore ba se bone “dikgang tse di molemo tse di galalelang.”—2 Bakorintha 4:3, 4.
Dipheko Tsa “Masego” le Kobamelo ya Medingwana
Mme go tweng ka dipheko tsa “masego” le ditlwaelo tsa botlhodi tse batho ba di dirisang gore ba ikutlwe ba sireletsegile le gore ba ikutlwe ba kgona go laola ditiragalo tse di itiragalelang fela mo botshelong? Dilo tseno di tlhagisa dikotsi di le dintsinyana tse di fitlhegileng. Sa ntlha, motho yo o dumelang mo botlhoding totatota o a bo a ineela gore botshelo jwa gagwe bo laolwe ke maatla a a sa bonweng. Go na le gore a dumele dilo tse di utlwalang le tse di dirwang ka mabaka, o ineela mo poifong e e se nang tlhaloganyo.
Mokwadi mongwe o umaka kotsi e nngwe gape e e masisi. O bolela jaana: “Fa motho a ikanya dipheko tsa masego gore di mo sireletse, mme di bo di sa mo sireletse, motho yono o sekamela mo go boneng batho ba bangwe molato wa gore ke bone ba mmaketseng bomadimabe, go na le gore a tseye gore molato ke wa gagwe.” (Bapisa Bagalatia 6:7.) Se se kgatlhang ke gore mokwaladitlhamo mongwe e bong Ralph Waldo Emerson o kile a bolela jaana: “Batho ba ba sa tlhalefang ba dumela mo masegong . . . Batho ba ba nonofileng bone ba dumela gore sengwe le sengwe se motho a se dirang se na le matswela a sone.”
Ntlha eno e e dirang mo matshelong a rona ya gore “sengwe le sengwe se motho a se dirang se na le matswela a sone” gantsi e felela ka ditiragalo tse di itiragalelang fela—“nako le tiragalo e e sa bonelwang pele” tse di re diragalelang rotlhe. (Moreri 9:11, NW) Ditiragalo tseno tse di itiragalelang fela ga di direge ka gonne motho a nnile “madimabe.” Bakeresete ba a itse gore ditiragalo tseno tse di itiragalelang fela ga di bakwe ke ditlwaelo tsa botlhodi le ke dipheko tsa maselamose. Fa di direga, di re gakolola ka boammaaruri jwa Baebele: “[Ga lo] itse se botshelo jwa lona e tla bong e le sone ka moso. Gonne lo mouwane o o bonalang ka lobakanyana mme go tswa foo o bo o nyelela.”—Jakobe 4:14.
Mo godimo ga moo, Bakeresete ba boammaaruri ba a itse gore batho ba tlotla thata dipheko tsa masego le dingwao kgotsa ditlwaelo tsa botlhodi. Ka gone, Bakeresete ba leba dilo tseno tsotlhe e le mefuta ya kobamelo ya medingwana, e Lefoko la Modimo le e nyatsang ka phepafalo.—Ekesodo 20:4, 5; 1 Johane 5:21.
Kafa re ka Itseng Isagwe ka Gone
Seno ga se bolele gore Bakeresete ga ba a amega ka isagwe. Go na le moo, mabaka a a utlwalang a bontsha gore go itse se se larileng kwa pele go solegela motho molemo thata. Fa re itse go sa le gale gore go tlile go direga eng, re ka tsaya dikgato tse di siameng, gore rona le baratiwa ba rona re solegelwe molemo.
Le fa go ntse jalo, go botlhokwa thata gore re senke tshedimosetso eno mo motsweding o o siameng. Moporofeti Isaia o ne a tlhagisa jaana: “Batho ba tla lo bolelela gore lo botse ba ba bolelelang dilo pele le ba ba buang le meya . . . Lo tshwanetse go ba araba lo re, ‘Reetsang se Morena a lo rutang sone! ‘Lo se ka lwa reetsa ba ba buang le meya—se ba lo bolelelang sona ga se kitla se lo thusa ka sepe.’”—Isaia 8:19, 20, Today’s English Version.
Motswedi o o siameng wa tshedimosetso e e ikanyegang ka ga isagwe ke Mokwadi wa Baebele. (2 Petere 1:19-21) Buka eno e e tlhotlheleditsweng e tshotse bosupi jo bontsi jo bo bontshang gore dipolelelopele tse di dirilweng ke Modimo mothatayotlhe, Jehofa, di a ikanyega—tota e bile, di ikanyega fela jaaka go tsamaya ga dipopo tsa magodimo go go boleletsweng pele mo dialemanakeng di le dintsintsi go ntse. Go bontsha tsela e boporofeti jwa Baebele bo tlhomameng ka teng, akanya ka sekai seno. Mma re re gongwe motho mongwe yo o itsegeng o a tlhaga mme a bo a bolelela pele ditiragalo dingwe dingwaga di le 200 pele ga di direga, a bolelela pele dilo tse di tlileng go direga ka ngwaga wa 2199. Dipolelelopele tsa gagwe di akaretsa dintlha tseno:
◻ Go tlile go tlhagoga ntwa e kgolo ya sesole magareng ga ditšhaba tse di e seng di nne mebusomegolo ya lefatshe e e gaisanang, mme phelelo ya yone e tlile go fetola hisitori.
◻ Leano le le tlileng go dirisiwa le akaretsa tiro e e gakgamatsang ya boenjeniri e e tlileng go fetola go elela ga noka e kgolo.
◻ Go kaiwa leina la yo o tlileng go fenya—dingwaga di le dintsi le pele ga a tsholwa.
◻ Go tlhalosiwa gore yo o fentsweng o tlile go felela kae, mme seno se dira gore polelopele eno e tswelele pele makgolokgolo a le mantsi a dingwaga mo isagweng.
Fa dipolelelopele tseno tsotlhe di ne di diragetse, a seno se ne se se kitla se dira gore batho ba sekaseke dilo tse dingwe tse motho yono a di buileng ka isagwe?
Tota se re fetsang go se tlhalosa se ne sa direga. Dingwaga di ka nna 200 pele Babelona e menolwa ke Bameda le Baperesia, Jehofa, ka moporofeti Isaia, o ne a bolelela pele dilo tse di latelang:
◻ Go ne go tlile go tlhagoga ntwa e kgolo ya sesole, mo gare ga Bameda le Baperesia go lwantsha Babelona.—Isaia 13:17, 19.
◻ Leano le le neng le tlile go dirisiwa le ne le akaretsa go kgadisiwa ga noka e e neng e dira jaaka mosele o mogolo o o neng o femela motse ono. Mo godimo ga moo, dikgoro tsa motse ono o o sireleditsweng di ne di tlile go lesiwa di sa tswalwa.—Isaia 44:27–45:2.
◻ Mofenyi o ne a tlile go bidiwa Kurose—yo go boleletsweng pele ka ene dingwaga di ka nna 150 pele a tsholwa.—Isaia 45:1.
◻ Fa nako e ntse e ya, Babelona e ne e tlile go fetoga thotobolo ya marope.—Isaia 13:17-22.
Dipolelelopele tseno tsotlhe di ne tsa direga. Ka jalo, a ga go molemo go sekaseka dipolelelopele tse dingwe tse Jehofa a di buileng mo Lefokong la gagwe le le kwadilweng?
Isagwe e e Molemolemo e Modimo a e Solofetsang
Ke eng se Baebele e se bolelelang pele? Baebele e solofetsa gore mo lefatsheng le lesha le le dirilweng ke Modimo, ga go na ope yo o tlileng go bogisiwa ke gore ga a tlhomamisege ka isagwe. Ela tlhoko gore ke eng se Modimo a se tlhomamisetsang bao ba tla bong ba tshela ka nako eo: “Ope ga a ketla a boifisa [batho ba me].”—Mika 4:4.
Baebele e solofetsa gape gore Modimo o tla ‘huporola seatla sa gagwe, a kgorise keletso ya ditshedi tsotlhe fela.’ (Pesalema 145:16) A tsholofetso eno e kgakala le go diragadiwa? Nnyaa! Baebele e ne ya bolelela pele go sa le gale gore maemo a re a bonang gompieno mo lefatsheng ke bosupi jwa gore re tshela mo “metlheng ya bofelo” ya tsamaiso eno e e boikepo.—2 Timotheo 3:1-5.
Go ise go ye kae, Mmopi yo o lorato o tlile go fedisa maemo ano a a boikepo. O tla khutlisa dintwa tsotlhe, e leng tsone tse di dirang gore batho mo lefatsheng lotlhe ba ikutlwe ba sa sireletsega ba bo ba boge. Mo godimo ga moo, letlhoo, bopelotshetlha, tlolomolao, le thubakanyo e tla nna dilo tse di fetetseng ruri. Baebele e solofetsa jaana: “Bapelonomi ba tlaa rua lefatshe, ba tlaa inatefisa mo letlotlong la kagiso.”—Pesalema 37:10, 11.
Gareng ga masego a mantsi a batho ba tlileng go a itumelela mo lefatsheng le lesha ke botsogo jo bontle. Tota le loso le mahutsana a lone di tla bo di sa tlhole di le gone. Modimo ka boene o bolela jaana: “Bona! Ke dira dilo tsotlhe disha.”—Tshenolo 21:4, 5.
Ka nako eo, ga go na motho yo o tla bong a diragalelwa ke dilo tse di itiragalelang fela tse di fetolang le go senya matshelo a batho gompieno. Badimona ba ba boikepo le Satane, ba e leng motswedi wa dilo tse di boifiwang tsa botlhodi le maaka a a boikepo, ba tla bo ba ile le bone. Boammaaruri jono jo bo itumedisang bo fitlhelwa mo Baebeleng.
[Ditshwantsho mo go tsebe 24, 25]
Botlhodi bo amana thata le mekgwa ya tirisabadimo
[Motswedi wa Setshwantsho]
Except woman inside crystal ball: Les Wies/Tony Stone Images
[Setshwantsho mo go tsebe 26]
Go tla bo go se na botlhodi mo lefatsheng le lesha la Modimo