Basadi ba ba Berekang​—Diteko le Dikgwetlho tsa Bone

“BASADI ba ile ba tsenelela mo meberekong ka dipalo tse di sa tlwaelesegang mo dingwageng tse di masome a mararo tse di fetileng.” Go ne ga bega jalo lekgotla lengwe la patlisiso la Worldwatch Institute. “Mo dinageng tse di humileng le tse di humanegileng,” pego e ne ya tswelela, “tlhatlogo-ditlhwatlhwa e kgothaletsa basadi go tsena mo ditirong gore ba bone tuelo.” Kana jaaka mosadi mongwe wa Monigeria a ile a tlhalosa: “Mathata a itsholelo a dirile gore ke seka ka dira sepe se sele fa e se fela go ya go bereka.”

Jaaka “mosadi eo o mokgwa o o iphaphileñ” yo o umakilweng mo Bibeleng, basadi ba le bantsi ba itumelela go ntsha thuso e e tlhokafalang mo go tsa itsholelo go tshegetsa malapa a bone. (Diane 31:10, 16, 24) Mme bangwe ba fitlhela gore go bereka ke selo se se gwetlhang le se se kgotsofatsang. Mme lemororo tiro ya boitshediso e na le melemo mengwe, e ntse e ka nna le mathata mangwe.

Ka sekai, mosadi mongwe yo eleng menejara wa lebentlele o bolela ka gore: “Ke rata tiro ya me. Menejara wa me o molemo, ofisi ya me e ntle. Mme ga ke itumele fa tiro eo e ntseela nako e kgolwane go feta eo ke ka e e neelang, ka go bo morago ga yone go na le tiro e nngwe e e ntetetseng kwa gae​—jaaka mosadi yo o nyetsweng le mmè.” Lefa go le jalo, basadi ba bantsi ba kgona go bereka, go tlhokomela legae, le lelapa ka tsela e e atlegileng, mme ruri ba tshwanetse go akgolelwa seo thata.a

Lefa go le jalo, mebereko ya boitshediso e ntse ebile e tlhagisetsa basadi mathata a le mantsinyana ao a tlhagang kwa tirong fela. Mo go ba le bantsi, kgwetlho e nna ya gore ba ipoloke ba na le boikutlo jo bo leka-lekanyeng fa ba patelesega go bereka mo lefelong leo le tletseng ka kgaisanyo e e boitshegang kana e go tletseng tlhokomologo mo go yone. Keletso ya go gatela pele, go tlhatloga, di ile tsa tlhotlheletsa basadi bangwe gore ba dire mebereko ya bone selo se segolo mo matshelong a bone.

Fa gongwe lefelo la tiro gape le ka nna le dikgatelelo tsa kafa boitsholong. Ngongorego e nngwe e e tlhagisiwang ke basadi ba ba berekang ke ya gore ka metlha ba bo ba tlhaselwa ka dipuo tsa matlhabisa ditlhong. Mme ebile se se maswe go feta, bangwe ba iphitlhela ba le mo kotsing ya go tlhaselwa ka metlha yotlhe mo dikgannyeng tsa dikobo. “Erile fa ke simolola go bereka,” ga tlhalosa jalo mosadi mongwe wa Mokeresete, “E ne e le nna mosetsana fela mo ofising eo. Banna ba ne ba tle ba nnele go latlhela mafokonyana a a akantshang boitsholo jo bo sa siamang, mme seo ruri se ne se nketefaletsa dilo.”

Mathata a a ntseng jalo ke selo se se masisi tota mo basading ba ba nang le go lebagana le one ka metlha yotlhe, segolo-bogolo bao ba eletsang go tshegetsa ditekanyetso tsa Bokeresete. Ka boitumelo, go na le kwa ba ka bonang thuso ya mmannete gone.

[Dintlha tse di kwa tlase]