Pego ya Baboledi ba Bogosi
Ga Baa Itsapela Thomo ya Bone ya Bomodimo
BASUPI BA GA JEHOFA ba tsaya thomo ya bone ya bomodimo ya go rera mafoko a a molemo a Bogosi jwa Modimo ka masisi tota. (1 Bakorintha 9:16; Ditihō 20:26, 27) Banyalani bangwe mo France ba ne ba ikutlwa ba patelesega go dira thomo eno ka go fitlhelela mongwe le mongwe ka mafoko a a molemo. Mo tshimong ya bone go ne go na le hosetele eo go neng go nna batshabi ba sepolotiki le babereki ba babotlana ba ba tswang mafatsheng a sele mo go yone. Banyalani bano ba tlhalosa ka go re: “Re ne re ipotsa gore re ne re ka tsena jang mo teng kwantle ga go bo re laleleditswe ke mongwe yo o nnang mo go yone. Jalo re ne ra fetsa ka gore re bue le batho ka kwantle fela mme gongwe ba ne ba ka re laleletsa go ba etela mo teng. Lekawana lengwe le ne la amogela makasine ka tlhagafalo a ba a kopa gore a etelwe.
“Re ne ra etela lekawana leno, mme re ne ra simolola thuto le ene go ise go ye kae. Nako le nako tsala nngwe ya gagwe e ne e nna teng, mme tsala eo ya gagwe e ne e seke e bua lefa e le sepe. Fa, kwa bokhutlong jwa thuto ya bobedi, re ne re mmotsa gore a le ene o ne a rata go ithuta mo go oketsegileng kaga Lefoko la Modimo, o ne a fetola ka go re: ‘Ke ka bo ke sa batle ka ntlha yang?’ Ka gone re ne ra simolola thuto ya bobedi. Re ne ra ba laleletsa go tla kwa dipokanong go tswa fela kwa tshimologong, mme ga ba ise ba ke ba tlhoke go nna teng lefa e le mo go e le nngwe fela. Botswelelo jwa bone bo ne bo bonala sentle, bogolo jang kwa hoseteleng, koo ka bokhutshwane fela ba neng ba simolola go bua ka dilo tse ba neng ba di ithuta, mo go neng ga felela ka gore re simolole thuto ya boraro le banyalani bangwe. Letsatsi lengwe setlhopha seo sotlhe se ne se le kwa kgorong, ba tloga ba ya dipokanong, fa tsala e nngwe ya bone a ne a batla go tla le ene. O ne a le matlhagatlhaga fela thata a bile a batla gore moratiwa wa gagwe a ithute kaga gone gotlhe. Boo-babedi ba ne ba simolola go ithuta.
“Go tla go fitlha jaanong re ne re tsamaisa dithuto di le tlhano. Nngwe le nngwe e ne e tshwana le pokano! Mongwe le mongwe wa bone o ne a nna teng mo thutong ya yo mongwe, le ba basha ba ne ba nna teng le bone. Botlhe ba ne ba bua kaga boammaaruri, mme ka baka leo, re ne ra simolola thuto ya borataro le monna yo mongwe, yoo le ene a neng a simolola go tla dipokanong a bo a rerela moratiwa wa gagwe.
“Ee tota, gotlhe mono e ne e le bosupi jo bo gakgamatsang mo hoseteleng eo. Go ne go se motlhofo ka batho bano ba basha go apara botho jo bosha. Ba ne ba tshwanelwa ke go tlogela go goga, botagwa, bothubaki, maitsholo a a repileng, le ditsala tse di bosula. Satane o ne a dira gore ditsala tsa bone tsa pele di leke go kgoreletsa botswelelo pele jwa bone, a ba hepisetsa go goga motsoko kana go dira meletlo ya medumo e megolo. Mongwe wa banna ba ba neng ba kgatlhega o ne a beeletse mosetsana mongwe yo o neng a le mo kobamelong ya maaka. O ne a leka go mo haposa mo boammaaruring. Lefa go ntse jalo, kgabagare o ne a simolola go ithuta mme fa e sale ka nako eo o dira botswelelo pele jo bo molemo.
“Go ya ka dikgang tsa bosheng” banyalani bano ba a bega, “mongwe wa makawana ao o ne a isiwa kgolegelong ka baka la boemo jwa gagwe jwa boitlhaodi. Ngwaga o ise o fele, ba bangwe ba le barataro ba ne ba kolobediwa, bao ba le batlhano ba bone ba neng ba tsenelela tirelo ya bobulatsela jo bo thusang. Mo setlhopheng seo sotlhe, ba le barataro ke babulatsela ba ka metlha, ba ipeetse mokgele wa bobulatsela jo bo kgethegileng.”
Abo banyalani bano ba ne ba duelwa ka mo gogolo jang ne ka baka la go sa itsape ga bone mo go direng thomo ya bone ya bomodimo ya go senka baseka-dinku! Ruri Jehofa o ne a segofatsa maiteko a bone a boikanyegi. Lefa re ka tswa re sena maitemogelo a a ntseng jalo a a tlhomologileng, ka metlha re batla go dira thomo ya rona ya bomodimo ya go rera mafoko a a molemo a Bogosi ka boikanyegi.—Mathaio 24:14.
[Setshwantsho mo go tsebe 21]
Banyalani ba kwa France mmogo le babulatsela ba le barataro ba ka metlha