Pego Ya Baboledi ba Bogosi

Ba Fetotse Tsela ya Bone ya Botshelo

GA GO na pelaelo ya gore o setse o kile wa ba bona ba bua le ba bangwe mo mebileng, ba eta ka ntlo le ntlo, kgotsa o ba bona ba ya dipokanong tsa Bokeresete kwa Diholong tsa bone tsa Bogosi. Re bua ka basha ba ba ipaakantseng sentle ba Basupi ba ga Jehofa. O ka tswa o ile wa tla mo tshwetsong ya gore ke Basupi ka gonne batsadi ba bone ba ba rutile gore ba nne jalo mme ebile go ntse jalo ka ba le bantsi ba bone. Kafa letlhakoreng le lengwe, go na le basha ba ba ntseng jalo bao ba godileng ka tsela e e farologaneng gotlhelele le bao botshelo jwa bone jwa pele bo neng bo farologane gotlhelele le ka tsela eo ba tshelang ka yone gone jaanong. Totatota, ba o ba bonang mo tsebeng e e latelang pele e ne e le batho bao ba neng ba itsalantse le digongwana tseo mo go tsone boikepo le go dirisa diokotsadi ka tsela e e sa tshwanelang e neng e le dilo tseo ba neng ba di dira letsatsi le letsatsi. Ke eng seo se ileng sa ba tlhotlheletsa gore ba fetole matshelo a bone gotlhelele jaana? E re re eteleng kwa toropong nngwe ya kwa Norway mme re ke re buisane le batho bangwe ba basha bao ba ileng ba dira diphetogo tse di ntseng jalo.

Seo Se Neng sa Lere Phetogo

Fa Basupi bangwe ba babedi ba ne ba kopana le Annette mo tirong ya ntlo le ntlo, o ne a na le dingwaga di le 19. “Ke ne ke kile ka bolelelwa nako le nako gore le ka motlha ke seka ka buisana le Basupi ba ga Jehofa, lefa go le jalo ke ne ke rata go itse mme ka ba laletsa gore ba tsene,” o gakologelwa jalo. O ne a sale a ntse a dirisa diokobatsi go tloga ka nako ya fa a le dingwaga di le 11 mme o ne a setse a kile a kopanela mo go thubeleng matlo le mo go utsweng dikoloi.

Mafoko a a molemo a Bogosi a ne a mo kgatlha. O ne a kgatlhiwa segolobogolo ke tsholofelo ya tsogo, ereka jaana a ne a swetswe ke mmaagwe ka nako ya fa a le dingwaga di le tlhano. Ka gone o ile a dumela go tshwarelwa thuto ya mahala ya Bibela mme a simolola go tla dipokanong kwa Holong ya Bogosi. O ne a lotlegela lekau la gagwe le ba bangwe ka seo a neng a ithuta sone. Ba ne ba arabela jang? Ba ne ba sa batle go utlwa sepe kaga seno mme ba latofatsa Annette ka gore a tshereantswe tlhaloganyo. Go sa kgathalesege seo, bangwe ba bao pele ba neng ba mo ganetsa thata e ne ya re moragonyana ba simolola go ithuta Bibela.

Ka sekai, akanya ka Espen yo e neng e le monna yo mmotlana wa dingwaga tse 20. O ne a utlwa kaga mafoko a a molemo a Bogosi go tswa mo lekaung la ga Annette mme ka gangwe fela o ne a batla gore go ithutiwe Bibela le ene. Lefa go ntse jalo, o ne a santse a letetse gore a ye go fetsa dikgwedi di le nnè kwa kgolegelong, ka jaana a ne a ile a nna le seabe mo go fetisetseng diokobatsi kwa mafelong a mangwe e se kafa molaong, mme gape fela jaaka Annette, le mo go thubeleng matlo makgetlo a le mmalwa. O ne gape a goga motsoko, matokwane, le diokobatsi tse dingwe. Jaanong, ke eng seo se neng se ka dira gore motho yo o ntseng a tsene ka tlhogo mo dilong tse di ntseng jalo a batle go ithuta Bibela? Espen o ne a simolola go lemoga kafa tsela eo a neng a tshela ka yone e neng e sena mosola ka gone le ka tsela eo e neng e sena maikaelelo ka gone. O aneela jaana: “Ke ile ka kgatlhiwa thata ke ditsholofetso tse di kaga isagwe tsa Bibela tseo di ileng tsa dira gore ke nne le boikaelelo mo botshelong. Ka jalo ke ne ka simolola go ithuta e le gore ke tle ke kgone go lemoga gore a ke ne ke bolelelwa boammaaruri.”

Ba Bangwe ba Batla go Ithuta Bibela

Mo e ka nnang mo go lone lekgetlo leno, lekawana lengwe go tswa mo go sone setlhopha seno le ile la utlwa mafoko a a molemo, mme le ene o ne a simolola go ithuta le go nna gone kwa dipokanong. Moragonyana, go ile ga simolola thuto le yo mongwe wa bone basha bano, mme a simolola a nna gone kwa dipokanong. Mo lobakeng lo lo sa fediseng pelo morago ga moo, lekawana le lengwe gape le lone le ne la sala ditsala tsa lone morago mo go ithuteng Bibela le mo go gateleng pele semoyeng. Go ntse go le jalo mosha yo mongwe gape go tswa mo go sone setlhopha seno o ile a kgatlhiwa thata ke diphetogo tse di molemo tseo ditsala tsa gagwe di neng di di dirile, mme mo lobakeng lo lo sa fediseng pelo, o ne a batla go ithuta Bibela.

Gilbert, rrammino mongwe yo mmotlana go tswa mo go sone setlhopha seno, jaanong le ene o ne a simolola go ithuta Bibela. Batsadi ba gagwe ka bobedi ba ne ba swa ka ntlha ya kankere, ka jalo o ile a gomodiwa ke tsholofelo ya Bibela ya tsogo. (Yohane 5:28, 29) Le ene o ne a goga matekwane ebile a tshela botshelo jo bo repileng, mme gape a na le maikaelelo a a nonofileng a gore e nne naletsana ya mmino wa rock. Lefa go ntse jalo, e ne ya re fa nako e ntse e feta, o ile a gatela pele semoyeng mme mo lobakeng lo lokhutshwane o ne a dira tshwetso ya go nna Mosupi wa ga Jehofa. Kgabagare, morwarragwe Espen o ne a simolola go dira dipatlisiso ka Bibela mme a simolola go kopanela le Basupi.

Boammaaruri jwa Bibela Bo Fetola Matshelo

Go ile ga nna le phetogo e kgolo eo e ileng ya nna gone mo basheng bano bao ba neng ba tlwaetse go apara botlhaswa, ba tlwaetse go tlogela meriri ya bone e tlhatlhabetse, le go inaakanya le diokobatsi, bogodu, le mefuta e mengwe ya tlomolao. Annette ke mmoledi yo o molemo wa Bogosi ebile o ile a direla jaaka mmulatsela ka mo e ka nnang lobaka lwa ngwaga. Espen le Gilbert ba setse ba ile ba direla jaaka babutsela ba ba thusang, mme ebile gape ke batlhanka ba bodihedi. Bobeding jwa bone ba nyetse mo phuthegong ya Bokeresete. Ba bangwe gape ba bane mo segongwaneng seno sa pele le bone ke baboledi ba ba matlhagatlhaga ba Bogosi!

Go tweng ka katlholo ya dikgwedi di le nnè eo Espen a neng a tshwanelwa ke go e dira? Ka ntlha ya diphetogo tseo a neng a di dirile mo botshelong jwa gagwe, katlholo eno ya gagwe e ne ya fetolelwa go nna diura tse 80 a dira tirelo setšhaba. Ka tumalano ya mapodisi le ba bangwe, o ne a fetsa diura tseno a dira kwa Holong ya Bogosi ya Basupi ba ga Jehofa ba lefelo leo. Mapodisi a ne a itumelela thulaganyo eno thata.

Ee, basha ba bangwe ba le bantsi go ralala lefatshe lotlhe ba godile e le boimalatswathipana. Lefa go le jalo, boammaaruri jwa Lefoko la Modimo bo ile jwa ba naya dikarabo tsa dipotso tsa botlhokwa le tsholofelo e e tlhomameng kaga isagwe. Ke gone ka moo, e sa tlholeng e le dikebekwa kgotsa badirisi ba diokobatsi, ebile ga ba tlhole ba apara botlhaswa. Ka go bo ba fetotse tsela ya bone ya botshelo, ba tshwana kgo le batho ba ba umakilweng fa godimo—Basupi ba ga Jehofa ba banana, ba ba ipaakanyang sentle, ebile ba le matlhagatlhaga. Ba batla go itsise ba bangwe kaga tharabololo e e tla nnelang ruri ya Bibela ya mathata ao a tshwentseng basha ba le bantsi gompieno.—Bona 1 Bakorintha 6:9-11.

[Setshwantsho mo go tsebe 8]

Basha ba kwa Norway ba tsaya kgato ka boammaaruri