Go Lemoga Dikgang
Tlhotlheletso ya Bosatane
Morago ga go dira patlisiso ka tlhotlheletso ya Bosatane mo mminong wa rock le mmino o o kwa godimo wa ditshipi wa rock, mokwadi wa lekwalodikgang la Toronto Tom Harpur o kwala jaana go The Sunday Star: “Ke tshwanela go neela tlhagiso e e maatla ka mo go ka kgonegang ka gone kaga seo se diragalang. . . . Le ka motlha ga ke ise nke ke bone sepe se se bosula jaana. Dipina di laolwa ke botsenwa, badimo, madi, diphutso, bothubaki jwa mefuta yotlhe, go akareletsa le go betelela, go ikgolafatsa, polao, le go ipolaya. Loso le tshenyego, dipolelelopele tsa tshenyego, go ganetsa tsotlhe tse di leng molemo le go ngaparela tsotlhe tse di leng maswe le tse di bosula—tseno ke ditlhogo tsa tsone.”
Seo se diragalang ka nako e le nngwe le go oketsega ga mmino wa bosatane ke go oketsega ga tiro ya go obamela Satane kwa United States le Canada. Fa e bega malebana le seminara ya bosheng jaana ya mapodisi ya kwa Ontario, The Globe and Mail, e e leng lekwalodikgang la kwa Canada, e bolela gore dikobamelo tsa ga Satane di “kopanela mo ditlhabelong tsa diphologolo, maitshekologo a a dirwang kwa mabitleng le meetlo ya go gobolola bana.” Letseka James Bradley wa kwa Washington, D.C., o ne a nyalanya dikgetse tse di makgolokgolo tsa go gobololwa ga bana le bokebekwa jwa meetlo ya Bosatane. Jaaka fa go tsopotswe go The Globe and Mail, letseka Bradley o oketsa ka gore mo dingwageng tse tlhano tse di fetileng, dipego tse di kaga meetlo ya go gobololwa ga bana di ile tsa tla di tswa mo “makgolokgolong a bana, mo makgolokgolong a badiredi ba loago le mo barutabaneng.”
Fa a ne a bua malebana le ‘metlha ya bofelo’ ya tsamaiso ya ga jaanong e e boikepo ya dilo, moaposetoloi Johane o ne a kwala jaana: “Ka diabolo a hologetse kwa go lona, a tletse bogale, ka a itse ha lobaka loa gagwè lo le lokhutshane.” (2 Timotheo 3:1; Tshenolō 12:12) Tlhotlheletso ya ga Satane, “kgōsana ea thata ea loapi,” e feteletse le eleng mo mminong o o rategang thata wa lefatshe leno. (Baefesia 2:2) Ke ka lebaka leo moaposetoloi Paulo a neng a tlhagisa Bakeresete ka ene ka gore “lo tlè lo itse go ganela le maanō a a boherehere a ga diabolo.”—Baefesia 6:11.
“Go Sa Laolesege”
Erile fa mosadi mongwe yo o neng a ikatisa ka go taboga wa dingwaga tse 28 a ne a bediwa le go betelelwa kwa New York City’s Central Park, batho ba le dimilione ba ne ba tshoga ba bo ba rerega. Lebaka? New York Post e bega gore tlhaselo eo ya bobatana le e e setlhogo e ne e bakilwe ke setlhopha sa basha ba dingwaga tsa bolesome bao “go ipelela ga bone diphelelo tsa seo go go makgapha le go sa kgathalele ga bone pogisego ya kgobalo eo e ba e bakileng go tsitlisa marapo ruri.” Bangwe ba basha bao ba ikarabelelang mo molatong o o maswemaswe ono go ne ga begiwa fa ba le bobotlana jwa dingwaga tse 14. Ka ntlha ya go reregisiwa ke tlhaselo eno, mokwadi mongwe wa Post o ne a dumela gore lefatshe le fetogile “mokgatlho wa batho ba ba boitaolo, ba ba itlhapedisang, ba eleng makgoba a diokobatsi, ba ba nang le keletso e e feteletseng ya go tlhakanela dikobo, ba malapa a a thubegileng, ba ba tlhakaneng tlhogo ke bothubaki” ba ba “sa laolesegeng mme potso ke gore: ka ntlhayang?”
Tota-tota, kokomana eno ya bothubaki jo bo sa tshwaneng le bope ke sone seo tota se boleletsweng pele ke moaposetoloi Paulo mo go 2 Timotheo 3:1-5. Mo go lone o ne a tlhalosa gore ‘metlha ya bofelo’ e ne e tla tshwaiwa ka batho ba ba “pelotshetlha, ba ba bogagapa, ba ba ikgantshang, le ba ba mabela.” go feta moo, “e tla nna ba ba kgopisang, ba ba sa utlweng batsadi ba bone, ba ba sa lebogeng, le ba ba sa rateng bodumedi; e tla nna ba ba senang bopelonomi, ba sena kutlwelo botlhoko, e le basebi, ba rata bothubaki, ebile ba le bogale; ba tla ila molemo; ba tla nna boferefere, e le ba ba sa kgathaleng, mme ba tletse boikgantsho; ba tla rata dikgatlhego bogolo go Modimo.” (Today’s English Version) A lefatshe le le ratang bothubaki leno le tla nna le ntse “le sa laolesege” ka bosakhutleng? Nnyaa! Jesu o ne a bolela jaana: “E tla re dilo tse di simologa go dihala, hoñ lo lelalè, lo choletse ditlhōgō tsa lōna; ka gonne thekololō ea lona e tla bo e atamèla.”—Luke 21:28.