Lefelo la Thutelo la Watchtower le Romela Barongwa

SEKOLO SA BAEBELE SA WATCHTOWER SA GILEATE se ile sa tshwarela dithuto mo mafelong a a farologaneng. Fa gare ga 1943 le 1960, ditlhopha tse 35 tsa baithuti ba ba neng ba tswa kwa dinageng di le 95, ba ne ba thapisiwa ka tsela e e kgethegileng kwa dikagong tse di kwa South Lansing, New York, U.S.A. Go tswa foo sekolo seno se ne sa fudugela kwa ntlokgolong ya lefatshe lotlhe kwa Brooklyn, New York, koo se ileng sa tswelela pele se dira ka dingwaga di ka nna 28. Go simolola ka 1988 go ya kwa tshimologong ya 1995, Sekolo sa Gileate se ne sa tshwarela dithuto kwa Wallkill, New York.

Mo go tsone dingwaga tseno sekolo seno se ne sa atolosa tiro ya sone. Se ne sa kaela gore ditlhopha tse tharo di thapisiwe ka khoso ya dibeke di le lesome kwa Mexico; ditlhopha tsa go nna jalo di le tlhano di ne tsa kopanela kwa Jeremane; tse pedi kwa India. Fa e sale ka 1987 sekolo se se thusang se se bidiwang Sekolo sa Thapiso sa Bodiredi se ne sa tshwara dithuto mo dinageng di le 34, se thapisa makawana a a tshwanelegang ka khoso e e kgethegileng ya dibeke tse robedi. Lefa go ntse jalo, thapiso e e neetsweng setlhopha sa bo99 sa Gileate kwa Lefelong le le sa tswang go agiwa la Thutelo la Watchtower kwa Patterson, New York, e ne e le khoso ya dibeke tse 20, e e neng e akaretsa thuto e e tseneletseng ya Baebele yotlhe, go tlhalosiwa ga hisitori ya motlha wa segompieno ya Basupi ba ga Jehofa le kafa ba rulagantsweng ka gone, mmogo le kgakololo e e atologileng ka tiro ya borongwa kwa dinageng di sele.

Setlhopha seo sa bo99 se ne sa aloga ka September 2. Thulaganyo ya kaloso eo e e tsereng diura tse tharo e ne e tshwaretswe mo holong e ntšha kwa Lefelong la Thutelo la Watchtower. E ne e tletse tota. Bareetsi ba bangwe kwa dikagong tsa Bethele kwa Patterson, Wallkill, le Brooklyn ba ne ba golagantswe ka mogala gore ba kgone go utlwa. Leno e ne e le letsatsi le le itumedisang thata e seng mo setlhopheng se se alogang mmogo le ba masika a bone le ditsala tsa bone tse di gaufi fela mme le mo makgolokgolong a bao ba neng ba ithaopile go thusa go aga dikago tse disha tse dintle tsa sekolo.

Mo mafokong a gagwe a a bulang, Carey Barber wa Setlhopha se se Laolang o ne a bua thata ka botlhokwa jwa se se neng se diragala. O ne a re: “Leno e tla nna lefelo la konokono la tiro ya go ruta ka bomodimo e kgolo go feta yotlhe e e kileng ya dirwa mo lefatsheng.” O ne a tlhalosa gore re gaufi le konelo ya ntwa e e fa gare ga losika lwa mosadi le losika lwa noga. (Genesise 3:15) O ne a bontsha gore batho fela ba ba tla falolang kgotlhang e kgolo ka sepitla se segolo se se tlang, e tla nna batho ba ba nang le kitso e e tlhomameng ya Lefoko la Modimo e bile ba le utlwa.

O ne a bolela jaana: “Thulaganyo ya rona ya gone jaanong ya go ruta, e diretswe gore batho botlhe ba ga Jehofa mo lefatsheng lotlhe ba fitlhe mo seemong sa go gola se se tlhalosiwang mo go Diane 1:1-4—sa gore ba itse botlhale le thuto, ba kgone go lemoga tlhaloganyo, ba tshole thuto ya go dira ka botlhale, tshiamo, katlholo, tekatekanyo le go kgona go akanya.” A bo go sireletsa jang ne go nna le metswedi e e ntseng jalo ya semoya!

Kgakololo e e Newang Setlhopha se se Alogang

Morago ga mafoko ao a a bulang go ne ga latela motseletsele wa dipuo tse tlhano tse dikhutshwane di lebisitswe kwa setlhopheng se se alogang. Harold Jackson, yo o kileng a nna motlhatlheledi wa Gileate mme jaanong a le mongwe wa badiri ba kwa ntlokgolong kwa Brooklyn, o ne a rotloetsa setlhopha ka go re, “Nna o Ntse o Kgotsofetse ka Tsela ya Bomodimo.” Lloyd Barry, yo o nnileng morongwa ka nako e telele mme jaanong e le leloko la Setlhopha se se Laolang, o ne a bua ka setlhogo se se reng “Go Direla Jehofa ka Boikokobetso.” O ne a tlhalosa gore go nna le nonofo eno go ne go tla nna botlhokwa thata mo baaloging gore ba kgone go tlwaelana le maemo a masha mmogo le go dirisana le barongwa ba bangwe, le diphuthego tse ba tla direlang mo go tsone, le batho ba lefelo leo.

Karl Adams, yo ga jaanong a direlang mo lephateng la Gileate, o ne a tlotla le setlhopha ka potso e e reng “Tumelo e Tla go Tlhotlheletsa go Dira Eng?” O ne a ba kgothatsa gore ba se ka ba tshwana le Baiseraele bale ba ba neng ba ngongorega ka maemo a kwa nageng mme ba eletsa go boela kwa Egepeto, mme bogolo ba tshwane le Aberahame, yo o neng a lebile kwa Bogosing jwa Modimo go na le go akanya gore go boela kwa Ure wa Bakalatea go ne go tla rarabolola mathata. (Ekesodo 16:2, 3; Bahebere 11:10, 15, 16) Ulysses Glass, mokwadisi wa sekolo, o ne a dirisa boitemogelo jwa ga Asafe jaaka bo kwadilwe mo go Pesalema 73 go kgothatsa setlhopha se se alogang a re, “Anaanela Masego a Gago Thata.” Mme Albert Schroeder, leloko la Komiti e e Rutang ya Setlhopha se se Laolang, o ne a bua ka setlhogo se se reng “Jehofa o re Neela Se re Se Tlhokang.” O ne a bolela gore Sekolo sa Gileate ka bosone ke bosupi jwa sengwe se re se newang jalo a bo a tlhalosa kafa se nnileng le seabe ka gone mo tirong e kgolo ya go rera le go dira barutwa.

Moragonyana bareetsi ba ne ba tlhwaya tsebe thata fa Milton Henschel, poresidente wa Mokgatlho wa Watch Tower, a ne a bua kaga “Maloko a a Tlhokanang.” O ne a bala Baroma kgaolo 12 a ba a e tlhalosa ka boleele. Sengwe sa dilo tse a neng a di bua ke gore: “Re tshwanetse go gopola gore re na le kamano e e gaufiufi le batlhankakarona mo phuthegong.” O ne a oketsa jaana: “Go botlhokwa gore ka dinako tsotlhe re lebe ba bangwe jaaka thoto ya ga Jehofa, mme go na le gore re tshwayatshwaye diphoso, go na le gore re pegane melato, a re thusaneng ka dinako tsotlhe. Re a bo re ithusa fa re nna re utlwana semoyeng jaaka phuthego ya Bokeresete.” O ne a bontsha kafa go thusana ka tsela e e ntseng jalo go ka bontshiwang ka teng fa go apewa dijo kwa magaeng a barongwa, gore go akanyediwe ntlha ya gore fa gongwe ga se botlhe ba ba kgonang go ja dijo tse di tshwanang. Gape o ne a kgothatsa gore ba thusane go na le go tshwayatshwaya diphoso fa ba le mo tirelong ya tshimo le Bakeresetekabone ba ba humanegileng. Mokaulengwe Henschel o ne a tlhalosa gore fa ruri re rata go thusana, re agana, e bile re kgothatsana, “Jehofa o tla re ratela sone seo.” A kgakololo e e molemo jang ne ya barongwa ba ba neng ba tla direla kwa dinageng tse di farologaneng thata le dinaga tse ba tswang kwa go tsone!

Go Itse Setlhopha Botoka

Baithuti ba ba 48 ba setlhopha sa bo99, ka kakaretso ba ne ba na le dingwaga tse 32 mme ba setse ba diretse ka dingwaga di feta 11 mo bodireding jwa nako e e tletseng.

Dipotsolotso di ne di le mo thulaganyong ya kaloso mme di ne tsa dira gore bareetsi ba kgone go itse bangwe ba bone botoka. Nikki Liebl, yo o tswang kwa United States, le Simon Bolton, yo o tswang kwa Engelane, ba ne ba bolela ka ditiragalo tse di neng tsa leka tumelo ya bone ya gore Jehofa o ne a tla ba neela dilo tse ba di tlhokang mo mmeleng. Ba bone gore Jehofa o a ba tlhokomela fa ba ntse ba baya bodiredi jwa nako e e tletseng kwa pele.

Isabelle Kazan, yo puo ya gagabo e leng Sefora, o ne a bolela gore o ne a ithutile Searabea gore a kgone go rerela batho ba ba nnang kwa nageng ya gabone ba ba buang Searabea. Fa a ne a simolola ka 1987, setlhopha se sennye se e neng e le sone fela kwa Paris se ne se na le bakaulengwe ba le bane fela ba ba neng ba bua Searabea, kwantle ga gagwe le kgaitsadi yo mongwe yo le ene a neng a ithuta puo eo. (Go ne go se motlhofo. Ba ne ba dirisa diura tse robedi beke le beke ba baakanyetsa Tora ya Tebelo gore ba tle ba kgone go akgela.) A maiteko ao a ne a na le mosola? Ebu, gompieno Basupi ba ba buang Searabea ba rulagantswe ka dipotologo di le tlhano go ralala Fora yotlhe. Moithuti yo mongwe, Miko Puro, o ne a bolela kafa Sefora se a se ithutileng kwa sekolong se neng sa mo thusa ka gone gore a kgone go rerela batshabi ba Baafrika kwa Finland kwa a tswang teng, le gore gape se tla mo thusa kwa tshimong e a e abetsweng jaaka morongwa kwa Benin. Bonny Bowes o ne a tlhalosa kafa a neng a leka ka gone go bua Sefora sentle gore a kgone go direla sentle kwa Quebec, Canada. Mme Bjarki Rasmussen, yo o tswang kwa Denmark, o ne a tlhalosa maitemogelo ao ene le mosadi wa gagwe ba neng ba nnile le one mo dingwageng tsa fa ba direla kwa Ditlhaketlhakeng tsa Faeroe. Ee, barongwa bano ba basha, ke badiredi ba ba nang le maitemogelo ba nako e e tletseng.

Baalogi ba ne ba abelwa kwa dinageng di le 19—kwa Afrika, Amerika Bogare le Borwa, Yuropa Botlhaba, le kwa Dinageng tsa Botlhaba. Baalogi ba ditlhopha tse di setseng di fetile ba diretse mo dinageng tse di fetang 200. Baalogi bao ba le bantsi ba santse ba tshwaregile mo dikabelong tsa bone. Barongwa bano ba basha jaanong ba kopanela le bone mo go anamiseng bosupi kaga Bogosi kwa dikhutlong tsa lefatshe.—Ditiro 1:8.

[Ditshwantsho mo go tsebe 25]

Ditshwantsho tsa mo phaposing ya borutelo kwa Lefelong la Thutelo la Watchtower

[Setshwantsho mo go tsebe 26]

Setlhopha se se Alogang sa bo99 sa Sekolo sa Baebele sa Watchtower sa Gileate

Mo lenaaneng le le fa tlase leno, dinomoro tsa mela eno di kwadilwe e balwa go tswa kwa pele go ya kwa morago, mme maina a thathamisitswe go tswa kafa molemeng go ya kafa mojeng wa mola mongwe le mongwe.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Ditshwantsho mo go tsebe 27]

Ba santse ba direla kwa ba abetsweng teng: (kafa molemeng) Charles Leathco le mosadi wa gagwe, Fern, kwa Brazil, baalogi ba setlhopha sa ntlha le sa borataro sa Gileate; (fa tlase) Martha Hess, kwa Japane, o alogile mo setlhopheng sa bosupa sa Gileate