Pego ya Baboledi ba Bogosi

“Lefoko la Modimo la Tota”

PHUTHEGO ya Bokeresete e ne ya gola go tloga mo e ka nnang maloko a le 120 go ya go a a fetang 3 000 ka bonako fela morago ga gore e tlhongwe. (Ditiro 1:15; 2:41) Baebele e tlhalosa gore “lefoko la Modimo la tota; le palo ya barutwa ya ntsifala mo gogolo thata mo Jerusalema.” (Ditiro 6:7) Morago ga dingwaga di sekae fela, phuthego e ntšha eo e ileng ya tlhongwa e ile ya nna mokgatlho wa Bakeresete o o mo dikontinenteng tsotlhe, mo Afrika, Asia le Yuropa.

Phuthego ya Bokeresete gompieno le yone e ntse e gola ka potlako. Ka sekai, kwa Mexico, palo ya baboledi ba Bogosi e ile ya gola fela mo dingwageng tse tlhano ka palo e e fetang 130 000 go ya go 443 640! Ka 1995 motho a le 1 mo go ba ba 59 kwa Mexico o ile a nna gone kwa Segopotsong sa loso lwa ga Keresete se se ketekwang ke Basupi ba ga Jehofa. Lefa go ntse jalo, thobo ya semoya mo nageng eo ga e ise e fele, jaaka go bontshiwa ke maitemogelo a a latelang.—Mathaio 9:37, 38.

Mo toropong nngwe mo kgaolong ya Chiapas, ga go na ope yo o ileng a dumela go rutiwa Baebele mo gae ke Basupi ba ga Jehofa, tota le morago ga gore ba rere mafoko a a molemo ka dingwaga di le 20 mo tikologong eo. Ka phepafalo bontsi jwa batho ba toropo eo ba ne ba tshosediwa ke monna yo o neng a itsege ka go rata thubakanyo. Ba ne ba tshaba gore o tla reng fa a ka fitlhela gore ba ithuta Baebele le Basupi.

Basupi ba babedi ba ba pelokgale ba ba neng ba fudugetse kwa lefelong leo ba ile ba swetsa ka gore ba fedise bothata jono ka go ya kwa monneng yo ka tlhamalalo. Fa ba fitlha kwa legaeng la gagwe, mosadi wa gagwe o ile a ba bulela lebati mme a reetsa molaetsa wa bone ka kelotlhoko. O ne a kgatlhiwa thata ke seo Baebele e neng e se bua ka go tshela mo lefatsheng la paradaise. Mme o ne a itse gore monna wa gagwe o ne a tla mo ketefaletsa dilo fa a ne a ka re o ithuta Baebele. Basupi ba ne ba mo tlhalosetsa gore fa fela a sa tlhatlhobe seo Baebele e se buang ka kelotlhoko o ne a sena go ithuta go direla Modimo le go itumelela botshelo mo lefatsheng ka bosakhutleng. O ne a dumela go ithuta Baebele.

Jaaka fa go ne go lebeletswe, monna wa gagwe ga a ka a itumedisiwa ke tshwetso eo. O ne a mo itsa go dirisa koloi ya gagwe go ya dipokanong tsa Bokeresete, le mororo a ne a mo letleletse go e dirisetsa mabaka a mangwe. Lefa monna wa gagwe a ne a mo ganetsa, ka gale o ne a ya kwa Holong ya Bogosi ya Basupi ba ga Jehofa e e gaufi, eo e neng e ka nna bokgakala jwa dikilometara di le lesome. Ka bonako fela bangwe mo toropong ba ne ba lemoga bopelokgale jwa gagwe le kafa a ikemiseditseng ka gone. Batho ba ne ba simolola go reetsa fa Basupi ba etela magae a bone. Bangwe ba ne ba simolola tota le e leng go tsamaya le ene kwa dipokanong. Morago ga nakonyana e khutshwane fela, Basupi ba ile ba tshwara dithuto tse di ka nnang 20 tsa Baebele mo toropong eo!

Tsala ya mosadi yono le yone e ne ya swetsa ka gore e ithute Baebele lefa monna wa gagwe a ne a mo ganetsa. Se se gakgamatsang ke gore o ne a tlhotlheleditswe go dira jalo ke monna wa mosadi yole wa ntlha yo o neng a ithuta. Morago ga gore monna yo a bue le monna wa gagwe o ne a khutla go mo ganetsa. Jaanong morago ga dingwaga tse 20 peo ya boammaaruri jwa Baebele e ile ya mela, batho ba ba fetang 15 ba ne ba ithuta Baebele e bile ba nna gone kwa dipokanong tsa Bokeresete, go akaretsa le basadi bano ba babedi, bao jaanong ba anamisang mafoko a a molemo.