Re Tshwanetse go Tshepa Jehofa

“Totatota, Jehofa ka boene o tla itshupa e le yo o ka mo tshepang.”—DIANE 3:26, NW.

1. Le mororo batho ba le bantsi ba bolela gore ba ikanya Modimo, ke eng se se bontshang gore ga ba dire jalo ka metlha?

MAFOKO a a reng “Re Ikanya Modimo” a kwadilwe mo mading a United States of America. A mme botlhe ba ba dirisang madi ano, mo nageng eo kana gongwe go sele, tota ba ikanya Modimo? A kana ba ikanya madi ao thata? Go ikanya madi a naga eo jalo kana a naga epe fela ga go supe go ikanya Modimo yo o maatla otlhe yo o lorato, yo le ka motlha a sa diriseng maatla a gagwe ka tsela e e sa tshwanelang e bile a se pelotshetlha ka tsela epe fela. Tota e bile, o kgala bopelotshetlha a sa tikatike.—Baefeso 5:5.

2. Bakeresete ba boammaaruri ba na le boikutlo bofe malebana le maatla a dikhumo?

² Bakeresete ba boammaaruri ba tshepa Modimo, e seng dikhumo tse di nang le “maatla a a tsietsang.” (Mathaio 13:22) Ba a itse gore madi ga a kgone go ba leretse boitumelo le go boloka botshelo. Modimo Mothatayotlhe ene ga a nna jalo. (Sefania 1:18) Ka gone, a bo tlhagiso eno e le botlhale jang ne: “A mokgwa wa lona wa botshelo o se nne wa go rata madi, lo ntse lo kgotsofetse ka dilo tsa jaanong. Gonne o rile: ‘Ruri ga ke na ke go tlogela ka gope lefa e le go go latlha ka gope’”!—Bahebera 13:5.

3. Mafoko a Duteronome 31:6 a re sedimosetsa eng malebana le se Paulo a se nopotseng mo temaneng eno?

³ Fa moaposetoloi Paulo a ne a kwalela Bakeresete ba Bahebera mafoko a a fa godimo, o ne a nopola ditaelo tse Moshe a neng a di neela Baiseraele pele fela ga gore a swe: “Lo nne thata le pelokgale, lo se boife, lo se ka lwa ba tshoga; gonne Jehofa Modimo wa gago ke ene yo o tsamayang nao; ga a ketla a go tlhaela le fa e le go go latlha.” (Duteronome 31:6) Mafoko ano a bontsha gore Moshe o ne a ba kgothaletsa go tshepa Jehofa ka tsela e e fetang go ikanya fela gore o ne a tla ba neela dilo tse ba di tlhokang. Jang?

4. Modimo o ne a tlhomamisetsa Baiseraele jang gore a ka ikanngwa?

⁴ Mo dingwageng tse 40 tse Iseraele e neng e kgarakgatshega mo nageng ka tsone, Modimo o ne a ba tlamela ka dilo tse ba neng ba di tlhoka mo botshelong ka metlha. (Duteronome 2:7; 29:5) Gape o ne a ba eteletse pele. Selo sengwe se a neng a supa seno ka sone ke leru le le neng le nna teng fa go le motshegare le molelo fa go le bosigo, tse di neng tsa etelela Baiseraele pele go ya kwa “lefatsheng le le elang maši le dinotshe.” (Ekesodo 3:8; 40:36-38) Fa nako e goroga ya gore tota ba tsene mo Nageng e e Solofeditsweng, Jehofa o ne a tlhopha Joshua gore a nne motlhatlhami wa ga Moshe. Go ne go ka lebelelwa gore banni ba naga eno ba ba tlhabantshe. Mme Jehofa o ne a tsamaile le batho ba gagwe ka masomesome a dingwaga, ka jalo go ne go sa tlhokege gore ba boife. Baiseraele ba ne ba na le mabaka a a utlwalang a go itse Jehofa e le Modimo yo o neng a ka ikanngwa!

5. Boemo jwa Bakeresete gompieno bo tshwana jang le jwa Baiseraele pele ba tsena mo Nageng e e Solofeditsweng?

⁵ Bakeresete gompieno ba ntse ba tsamaya mo nageng ya lefatshe la gompieno le le boikepo ba le mo tseleng e e isang kwa lefatsheng le lesha la Modimo. Bangwe ba bone ba ntse ba tsamaya mo tseleng eno ka dingwaga tse di fetang 40. Jaanong ba eme mo molelwaneng wa go tsena mo lefatsheng le lesha la Modimo. Le fa go ntse jalo, baba ba sa ntse ba eme mo tseleng, ba leka go kgoreletsa ope fela go tsena mo go se se tla tshwanang le Naga e e Solofeditsweng, se se ntle thata go gaisa naga eo ya bogologolo e e neng e elela mashi le dinotshe. Ka jalo, a bo mafoko a ga Moshe a tshwanela Bakeresete jang ne gompieno, jaaka fa Paulo a ile a a boeletsa jaana: “Ruri ga ke na ke go tlogela ka gope lefa e le go go latlha ka gope”! Botlhe ba ba nnang ba nonofile e bile ba le pelokgale, ba tletse tumelo, ba tshepa Jehofa, ba tla bona tuelo.

Tshepo e e Theilweng mo Kitsong le mo Botsalanong

6, 7. (a) Ke eng se se neng sa leka gore a Aborahame o tshepa Jehofa? (b) Aborahame o ka bo a ile a ikutlwa jang fa a ntse a ya kwa lefelong le a neng a ya go ntshetsa Isake setlhabelo gone?

⁶ Mo tiragalong nngwe mogologolwane wa Baiseraele e bong Aborahame o ne a laelwa go ntsha morwawe Isake setlhabelo e le tshupelo e e fisiwang. (Genesise 22:2) Ke eng se se neng sa thusa rre yono yo o lorato gore a tshepe Jehofa jaana ka nitamo mo a neng a se ka a okaoka go mo ikobela? Bahebera 11:17-19 e araba jaana: “Ka tumelo Aborahame, e rile a lekwa, ga tshwana le fa a ne a isitse Isake tshupelo, mme monna yo o neng a amogetse ditsholofetso ka pelo e e thamileng a leka go isa morwawe yo o tsetsweng a le esi tshupelo, le mororo a ne a teilwe ga twe: ‘Se se tla bidiwang “peo ya gago” se tla nna ka Isake.’ Mme o ne a itlhoma gore Modimo o ne o kgona go mo tsosa le eleng mo baswing; mme go tswa koo ruri o ne a mo amogela gape ka tsela ya tshwantshetso.”

⁷ Se lebale gore go ne ga tsaya Aborahame le Isake malatsi a le mararo go goroga kwa lefelong le go neng go tla ntshediwa setlhabelo kwa go lone. (Genesise 22:4) Aborahame o ne a na le nako e ntsi ya gore a akanye thata ka se a neng a kopilwe go se dira. Tota o ne a ikutlwa jang? Go tsholwa ga ga Isake go ne ga dira gore go nne le boitumelo jo bo neng bo sa lebelelwa. Sesupo seo sa gore e ne e le Modimo yo o dirileng seo se ne sa dira gore Aborahame le mosadi wa gagwe yo pele a neng a le moopa e bong Sara, ba rate Modimo ka lorato lo lo boteng. Eleruri morago ga moo ba ne ba letetse go bona gore isagwe e ne e tshwaretse Isake eng le ditlogolwana tsa gagwe. A ditoro tsa bone di ne di tlile go felela fano, jaaka go ne go lebega jalo go ya ka se jaanong Modimo a neng a se kopa?

8. Tsela e Aborahame a neng a tshepa Modimo ka yone e ne e feta jang tsela e a neng a dumela ka yone gore O ka tsosa Isake mo losong?

⁸ Le fa go ntse jalo, Aborahame o ne a na le tshepo e e neng e theilwe mo go se a itseng ditsala tse di ratanang thata di tle di se direlane. E re ka Aborahame e ne e le “tsala ya ga Jehofa,” “o ne a baya tumelo mo go Jehofa, mme ga kaiwa e le tshiamo mo go ene.” (Jakobe 2:23) Tsela e Aborahame a neng a tshepa Jehofa ka yone e ne e feta fela go dumela gore Modimo o ne a ka tsosa Isake. Mme gape Aborahame o ne a tlhatswegile pelo gore se Jehofa a neng a mo kopa gore a se dire se ne se tshwanela, le mororo Aborahame a ne a sa itse mabaka otlhe. O ne a se na lebaka la go belaela gore a Jehofa o ne a dira tshiamo fa a ne a mo kopa go dira seno. Go tswa foo, tshepo ya ga Aborahame e ne ya nonotshiwa fa moengele wa ga Jehofa a ne a tsereganya, a thibela gore Isake a se ka a bolawa go nna setlhabelo.—Genesise 22:9-14.

9, 10. (a) Aborahame o ne a bontsha leng pelenyana gore o ne a tshepa Jehofa? (b) Ke thuto efe e e botlhokwa e re ka e ithutang mo go Aborahame?

⁹ Aborahame o ne a kile a bontsha mofuta ono o o tshwanang wa go tshepa tshiamo ya ga Jehofa dingwaga di ka nna 25 pelenyana ga moo. E re ka a ne a tlhagisitswe gore Sodoma le Gomora di ne di tlile go senngwa, ka tlholego fela o ne a amega ka boitekanelo jwa batho bape ba ba siameng ba ba neng ba nna koo, go akaretsa le setlogolo sa gagwe Lote. Aborahame o ne a ipiletsa mo Modimong ka mafoko ano: “A go nne kgakala nao go dira mo go ntseng jalo, go bolaya basiami le baikepi, ka e tlaa bo e le go re basiami ba ntse jaaka baikepi. Golo mo, a go nne kgakala nao; a Moatlhodi wa lefatshe lotlhe ga a ketla a dira tshiamo?”—Genesise 18:25.

¹⁰ Tlhogo ya lotso Aborahame o ne a tlhatswegile pelo gore Jehofa ga a ke a dira sepe se se sa siamang. Moragonyana mopesalema o ne a opela jaana: “Jehofa o tshiamo mo ditseleng tsotlhe tsa gagwe, o pelotshweu mo ditirong tsotlhe tsa gagwe.” (Pesalema 145:17) Re dira sentle go ipotsa jaana: ‘A ke amogela se Jehofa a letlang gore se ntiragalele ke sa belaele tshiamo ya gagwe? A ke tlhatswegile pelo gore sengwe le sengwe se a se letlang kwa morago se tla ntsholegela molemo le go solegela ba bangwe molemo?’ Fa re ka araba ka ee, re tla bo re ithutile thuto e e botlhokwa mo go Aborahame.

Go Tshepa ba Jehofa a ba Tlhophileng

11, 12. (a) Ke tsela efe ya go tshepa e batlhanka ba Modimo ba tlhokang gore ba nne le yone? (b) Ka dinako tse dingwe re ka nna le bothata bofe?

¹¹ Batho ba ba tshepang Jehofa gape ba tshepa banna ba Jehofa a ba tlhophileng gore ba diragatse maikaelelo a gagwe. Mo Baiseraeleng, seno se ne se ba tlhoka go tshepa Moshe mme moragonyana go tshepa le motlhatlhami wa gagwe, Joshua. Mo Bakereseteng ba bogologolo, se ne se ba tlhoka go tshepa baaposetoloi le banna ba bagolo ba phuthego ya Jerusalema. Mme rona gompieno, seno se re tlhoka go tshepa “motlhanka yo o boikanngo le yo o bonokopela” yo o tlhomilweng gore a re neele ‘dijo tsa semoya ka nako e e tshwanetseng,’ mmogo le bangwe ba ba bopang Setlhopha se se Laolang.—Mathaio 24:45.

¹² Tota e bile fa re tshepa ba ba eteletseng pele mo phuthegong ya Bokeresete ke rona ba re tla solegelwang molemo. Re bolelelwa jaana: “Utlwang ba ba etelelang pele gareng ga lona mme lo ikobe, gonne ba nna ba lebeletse meya ya lona jaaka ba ba tla ikarabelelang; gore ba tle ba dire seno ka boipelo mme e seng ka go ubuga, gonne seno se ka lo gobatsa.”—Bahebera 13:17.

Tila go Belaela ba Jehofa a ba Tlhophileng

13. Re na le lebaka lefe la gore re tshepe ba ba tlhomilweng gore ba re etelele pele?

¹³ Baebele e re thusa go nna tekatekanyo fa re bontsha go tshepa ba ba eteletseng pele mo bathong ba ga Jehofa. Re ka nna ra ipotsa jaana: ‘A Moshe o kile a dira diphoso? A baaposetoloi ka metlha ba ne ba bontsha boikutlo jwa ga Keresete jo Jesu a neng a batla gore ba nne le jone?’ Dikarabo di motlhofo. Jehofa o ile a tlhopha go dirisa banna ba ba ikanyegang le ba ba ineetseng gore ba kaele batho ba gagwe, le mororo e le batho ba ba sa itekanelang. Ka gone, le fa gone bagolwane gompieno ba sa itekanela, re tshwanetse go ba tsaya e le ‘[ba ba tlhomilweng ka] moya o o boitshepo [go nna] balebedi gore ba dise phuthego ya Modimo.’ Ba tshwanelwa ke gore re ba eme nokeng le go ba tlotla.—Ditiro 20:28.

14. Re lemoga eng mo kgannyeng ya go bo Jehofa a ile a tlhopha Moshe go nna moeteledipele go na le Arone kana Miriame?

¹⁴ Arone o ne a le mogolo mo go Moshe ka dingwaga di le tharo, mme ka bobedi ba ne ba le bannye mo go kgaitsadiabone, Miriame. (Ekesodo 2:3, 4; 7:7) Mme e re ka Arone a ne a le seleta mo puong go feta Moshe, o ne a tlhomiwa go nna mmueledi wa morwarraagwe. (Ekesodo 6:29–7:2) Le fa go ntse jalo, Jehofa o ne a se ka a tlhopha yo mogolo thata mo go bone, e bong Miriame, gore a etelele Baiseraele pele kana yo o seleta thata mo puong, e bong Arone. O ne a tlhopha Moshe ka a ne a itse mabaka otlhe sentle le dilo tse di neng di tlhokega ka nako eo. Fa ka nako nngwe fa Arone le Miriame ba ne ba sa tlhole ba leba dilo sentle, ba ne ba ngongorega jaana: “A ruri Jehofa o buile le Moše a le esi? A le rona ga a a bua le rona?” Miriame, yo gongwe e neng e le ene yo o tlhotlheletsang seno thata, o ne a otlhaelwa boikutlo jono jo bo tlontlololang yo Jehofa a mo tlhophileng, yo ene le Arone ba ka bong ba ile ba mo tsaya a le “boikokobetso thata go feta batho botlhe ba ba neng ba le mo lefatsheng.”—Dipalo 12:1-3, 9-15.

15, 16. Kalebe o ne a supa jang gore o ne a tshepa Jehofa?

¹⁵ Fa ditlhola tse 12 di ne di romilwe go ya go tlhola Naga e e Solofeditsweng, di le 10 di ne tsa tla ka pego e e bosula. Ba ne ba dira gore dipelo tsa Baiseraele di boife ka go bua ka “banna [ba Kanana e le] ba ba godileng.” Seno se ne sa dira gore Baiseraele ba “ngongorege[le] Moše le Arone.” Mme e ne e se ditlhola tsotlhe tse di neng di sa supe go tshepa Moshe le Jehofa. Re bala jaana: “Kalebe a kgaodisa batho fa pele ga Moše a re: ‘A re tlhatlogeng ka bonako re yeng go le rua, gonne re nonofile sentle fela go le fenya.’” (Dipalo 13:2, 25–33; 14:2) Joshua le ene fela jaaka Kalebe setlholakaene o ne a ema a nitame. Ka bobedi ba ile ba bontsha go tshepa Jehofa fa ba ne ba re: “Fa Jehofa a itumela mo go rona, o tlaa re fitlhisa mo lefatsheng leo, o tlaa le re naya; ke lefatshe le le elang maši le dinotshe. Fela . . . lo se ka lwa boifa batho ba lefatshe leo . . . Jehofa o na le rona; lo se ka lwa ba boifa.” (Dipalo 14:6-9) Ba ne ba duelelwa go tshepa Jehofa jalo. Mo kokomaneng e e godileng e e neng e tshela ka nako eo, ke Kalebe fela, le Joshua le Balefi ba bangwe ba ba neng ba nna le tshiamelo ya go tsena mo Nageng e e Solofeditsweng.

¹⁶ Dingwaga di le mmalwa moragonyana Kalebe o ne a re: “Nna ka sala Jehofa Modimo wa me morago ka botlalo. . . . Jaana bona, Jehofa o ntshedisitse, jaaka a ne a bua, ka dinyaga tse di 45 tse, go tswa mo lobakeng lwa jale jaaka Jehofa a bua lefoko le le Moše, Iseraele o ntse a sepela mo nageng; mme jaana bona, gompieno ke botsofe jwa dinyaga di le 85. Gompieno ke sa ntse ke le thata, fela jaaka mo letsatsing le Moše o ne a nthoma ka lone, jaaka thata ya me e ne e ntse jale, thata ya me e ntse fela jalo le jaana.” (Jošua 14:6-11) Ela tlhoko boikutlo jo bo siameng jwa ga Kalebe, boikanyegi jwa gagwe le dinonofo tsa gagwe tsa mmele. Le fa go ntse jalo, Jehofa ga a ka a tlhopha Kalebe gore a tlhatlhame Moshe. Tshiamelo eno e ne ya neelwa Joshua. Re ka tshepa gore Jehofa o ne a na le mabaka a go bo a tlhophile jalo, mme e ne e le tlhopho e e molemolemo.

17. Ke eng se se neng se ka dira gore Petere a lebege a sa tshwanele go newa boikarabelo?

¹⁷ Moaposetoloi Petere o ne a itatola Mong wa gagwe ka makgetlho a mararo. Gape o ile a nna mafega go ikatlholela dilo, ka go kgaola tsebe ya motlhanka wa moperesiti yo mogolo. (Mathaio 26:47-55, 69-75; Johane 18:10, 11) Batho bangwe ba ka nna ba bolela gore Petere e ne e le motho yo o boboi, yo o neng a sa dire dilo ka tekatekanyo, yo o neng a sa tshwanele go nna le ditshiamelo tse di kgethegileng. Le fa go ntse jalo, ke mang yo o neng a neelwa dilotlolo tsa Bogosi, yo o neng a nna le tshiamelo ya go bulela ditlhopha tse tharo tsela ya go bilediwa kwa legodimong? E ne e le Petere.—Ditiro 2:1-41; 8:14-17; 10:1-48.

18. Ke phoso efe, jaaka e umakilwe ke Jude, e re batlang go e tila?

¹⁸ Dikai tseno di bontsha gore re tshwanetse go nna kelotlhoko gore re se ka ra atlhola batho go ya ka tebego ya bone. Fa re tshepa Jehofa, re ka se belaele batho ba a ba tlhophileng. Le mororo phuthego ya gagwe ya mo lefatsheng e bopilwe ka batho ba ba sa itekanelang, ba ba sa boleleng gore ga ba dire phoso, o ba dirisa thata. Jude, e bong morwarraagwe Jesu ka mmaagwe o ne a tlhagisa Bakeresete ba lekgolo la ntlha la dingwaga ka batho “ba ba itlhokomolosa[ng] borena e bile ba bua ba ba galalelang ka tsela ya go kgoba.” (Jude 8-10) Le ka motlha re se ka ra tshwana le bone.

19. Ke ka ntlha yang fa re se na lebaka la go belaela batho ba Jehofa a ba tlhophileng?

¹⁹ Go bonala Jehofa a na le go tlhopha batho bangwe go dira maikarabelo mangwe ka dinonofo tse di rileng tse di batlegang mo go kaeleng batho ba gagwe mo tseleng e a batlang ba e tsamaya ka nako eo. Re tshwanetse go leka go tsaya ntlha eno tsia, re sa belaele batho ba Modimo a ba tlhophileng, mme ka boikokobetso re kgotsofalele go direla Jehofa mo maemong a a re beileng mo go one. Ka go dira jalo re tla bo re bontsha gore re tshepa Jehofa.—Baefeso 4:11-16; Bafilipi 2:3.

Go Tshepa Tshiamo ya ga Jehofa

20, 21. Ke eng se re ka se ithutang mo tseleng e Modimo a neng a dirisana le Moshe ka yone?

²⁰ Fa ka dinako tse dingwe re itshepa thata mme re sa tshepe Jehofa go le kalo, a re ithuteng mo go Moshe. Fa a ne a le dingwaga di le 40, o ne a ipolelela gore o ya go golola Baiseraele mo botshwarong jwa Egepeto. Kwantle ga pelaelo o ne a dira jalo ka ntlha ya go nna le maikaelelo a mantle, mme seo ga se a ka sa dira gore Iseraele e gololwe ka yone nako eo, kana gone go tokafatsa boemo jwa gagwe. Tota e bile, o ne a patelesega go tshaba. Ke fela morago ga go thapisiwa ka botlalo kwa nageng e sele ka dingwaga di le 40, a neng a tshwanelega go tlhophiwa go dira se pelenyana a neng a batlile go se dira. Mo lekgetlhong leno o ne a ka tshepa gore Jehofa o mo eme nokeng ka gonne jaanong dilo di ne di dirwa ka tsela ya ga Jehofa ka nako e e neng e tshwanela thulaganyo ya Gagwe.—Ekesodo 2:11–3:10.

²¹ Mongwe le mongwe wa rona a ka nna a ipotsa jaana: ‘A ka dinako tse dingwe ke a tle ke etelele Jehofa pele le bagolwane ba ba tlhomilweng mo phuthegong, ke leka go akofisa dilo kana ke leka go dira dilo ka tsela ya me? Mo boemong jwa gore ke ikutlwe ke tingwa ditshiamelo dingwe, a ke amogela nako ya go nna ke ntse ke thapisiwa?’ Totatota, a re ithutile thuto e e botlhokwa mo go Moshe?

22. Le fa Moshe a ile a latlhegelwa ke tshiamelo e kgolo, o ne a ikutlwa jang ka Jehofa?

²² Mo godimo ga moo, re ka ithuta thuto e nngwe mo go Moshe. Dipalo 20:7-13 e re bolelela ka phoso e a neng a e dira, e e neng ya dira gore a latlhegelwe thata. O ne a latlhegelwa ke tshiamelo ya go etelela Baiseraele pele go tsena mo Nageng e e Solofeditsweng. A ka nako eo o ne a tsibogela seo ka go akanya gore tshwetso ya ga Jehofa mo kgannyeng eno e ne e sa siama? A o ne a emela kgakala, jaaka go ka tualo, a tlhontse a akanya gore Modimo o mo tshwara makgwakgwa? A Moshe o ne a se ka a tlhola a tshepa gore Jehofa o tshiamo? Re ka bona dikarabo mo mafokong a Moshe ka boene a neng a a bolelela Iseraele pelenyana fela ga gore a swe. Moshe o ne a bolela jaana ka Jehofa: “Tiro ya gagwe e itekanetse; gonne ditsela tsa gagwe tsotlhe ke tshiamiso; Modimo o o boikanngo, o o se nang tshiamololo, one o tekatekanyo, o tshiamo.” (Duteronome 32:4) Ruri Moshe o ne a nna a tshepa Jehofa go ya fela kwa bokhutlong. Go tweng ka rona? A rona motho ka namana re tsaya dikgato tsa go nonotsha tsela e re tshepang Jehofa ka yone le tshiamo ya gagwe? Re ka dira seno jang? A re boneng.

O ne O Tla Araba Jang?

◻ Baiseraele ba ne ba na le mabaka afe a go ikanya Jehofa?

◻ Malebana le go tshepa, ke eng se se ka ithutiwang mo go Aborahame?

◻ Ke ka ntlha yang fa re tshwanetse go tila go belaela batho ba Jehofa a ba tlhophileng?

[Setshwantsho mo go tsebe 13]

Go tshepa Jehofa go akaretsa go tlotla ba ba eteletseng pele mo phuthegong