Bolelang Mafoko a a Molemo lo Dirisa Tora ya Tebelo
1 Makasine wa Tora ya Tebelo o tlhomologile eletota ka gonne o tshotse mafoko a a molemo. Go farologana le one, dikgatiso di le dintsi tsa lefatshe di tshotse dikgang tseo di seng monate le tseo di kgobang marapo. Re ka kgona jang go bontsha ba bangwe gore makasine wa Tora ya Tebelo o farologana le tsone, gore one o tshotse molaetsa o o lapolosang eletota?
2 Re ka nna ra supetsa motho karolwana e e reng “Boikaelelo jwa Tora ya Tebelo” mo go tsebe 2 ya makasine ono. Mo tlhalosetse gore boikaelelo jwa yone ke go tlotlomatsa Jehofa jaaka Mmusi wa Lobopo lotlhe, go ela tlhoko ditiragalo tsa lefatshe tseo di diragatsang boperofeti jwa Bibela, go naya bao ba gatelelwang molaetsa o o gomotsang, le go nonotsha tumelo ya rona mo dilong tseo Modimo o re tlamelang ka tsone gore re bone poloko.
3 A dikakgelo tseo re di bolelang kaga Tora ya Tebelo di ba naya dikgopolo tse di ntseng jalo ka tsela e e tlhatswang pelo? Seo re se buang ga e a tshwanela go nna mafokonyana fela ao a tsosang kgatlhego ya nakwana; e tshwanetse go nna selo seo se leng botlhokwa, seo se tsosang tsholofelo mo mothong gore a nne le keletso ya go ithuta ka mo go oketsegileng.
4 Go Baakanyetsa go a Tlhokega: Re tlhoka gore re bale makasine mongwe le mongwe ka kelotlhoko, re sekaseka dilo tse di farologaneng tseo re ka di buang mo tshimong re dira jalo re akantse ka tshimo ya rona. Go leba ditemana tsa Dikwalo tse di umakilweng go godisa kitso ya rona ka namana. Seno se ka kgona go dira gore re anaanele boammaaruri ka tsela e e boteng le go re tlhotlheletsa gore re bo abele ba bangwe. Fa e le gore boammaaruri ga bo yo mo dipelong tsa rona, ga re kitla re tlhotlheletsega go le kalo gore re bue ka jone.
5 Re batla go kgothatsa batho ba le bantsi ka moo re ka kgonang ka gone gore ba dire peeletso ya Tora ya Tebelo. Le mororo go sena pelaelo epe gore re tlile go bona dipeeletso tsa rona tse dintsi mo tirong ya ka ntlo le ntlo, ga re batle go lebala bao re dirisanang nabo mo go tsa kgwebo, baagelani ba rona, le balosika. A bana ba rona ka namana ba na le peeletso? A re akantse ka go romelela mongwe yoo re amegang thata ka ene mpho ya peeletso? Go tweng ka bao re dirang maeto a go boela mo go bone ka metlha kana le eleng bao re ithutang Bibela nabo? Fa e le gore batho ga ba kgone go dira peeletso ya ngwaga otlhe, akantsha gore ba dire peeletso e e tsayang dikgwedi di le thataro. Fa e le gore motho ga a batle go dira peeletso, akantsha gore a tseye dimakasine di le pedi.
6 Ka nako ya fa o bala tokololo ya bosheng ya Tora ya Tebelo, leka gore o gakologelwe dilo tseo o di tlotlileng le beng ba matlo mo nakong e e fetileng koo ditlhogo tseno di neng tsa tsosa kgatlhego gone. Tlhomamisa gore o boela gone o tshotse tokololo eo gore o tle o kgone go tsweledisetsa motlotlo pele.
7 Ga re itse gore mafoko a a molemo a santse a tla bolelwa ka lobaka lo lo kana kang le go ya bokgakaleng jo bo kana kang. Lefa go ntse jalo, re ka tlhomamisega gore makasine wa Tora ya Tebelo o tla nna le seabe se segolo thata mo go seo se fitlhelelwang. Re tshwanetse ra etsa baaposetoloi mo go ‘ruteng le mo go rereng lefoko la Morena.’—Ditihō 15:35.