Boikepo

Tlhaloso: Seo se bodileng tota kafa boitsholong. Ka dinako tse dingwe go raya se se makgaphila, bopelo-e-tlhoi kana tlhotlheletso e e senyang.

Ke goreng go na le boikepo jo bo kana kana?

Modimo ga o a tshwanelwa go pegwa molato. O ne a neela setho tshimologo e e itekanetseng, mme batho ba ne ba ikgethela go tlhokomologa dipatlafalo tsa Modimo le go itirela diphetso ka bobone ka se se siameng le se se bosula. (Dute. 32:4, 5; Mor. 7:29; Gen. 3:5, 6) Ka go dira jalo, ba ile ba tla tlaseng ga tlhotlheletso ya masomosomo a a fetang motho ka nonofo a a boikepo.—Baef. 6:11, 12.

1 Yoh. 5:19: “Lehatshe yeotlhe le namaletse ha tlhatse ga eo o boshula.”

Tshen. 12:7-12: “Me ga nna ntwa mo legodimoñ . . . me kgōgèla ea tlhabana e na le baengele ba eōna: Me ba se ka ba henya, le gōna ba se ka ba tlhōla ba na le bonnō mo legodimoñ. Me kgōgèla e kgolo, nōga ea bogologolo ea pirigañwa, eōna e e bidiwañ Diabolo le Satane, motsietsi oa lehatshe yeotlhe; ea piriganyediwa koñ kwa lehatshiñ, le baengele ba eōna ba piriganyediwa kwa tlhatse naeō. . . . Ke gōna a lo ko lo itumeleñ, lona magodimo, le lona ba lo agileñ mo go aōna. A bo go latlhèga lehatshe le lewatlè! ka diabolo a hologetse kwa go lona, a tletse bogale, ka a itse ha lobaka loa gagwè lo setse lo le lokhutshane.” (Tatlhego eno e e ileng ya oketsega ya lefatshe e ile ya diragala fa e sa le Satane a piriganngwa go tswa legodimong morago ga botsalo jwa Bogosi. Bona temana 10.)

2 Tim. 3:1-5: “Me itse seo se, go re, mo metlheñ ea bohèlō go tla tla dipaka tse di tlhokohatsañ. Gonne batho ba tla nna baithati, le barati ba madi, le babelahadi, le baipegi, le bakgadi, le ba ba sa utlweñ batsadi ba bōnè, le ba ba sa lebogeñ, le ba ba sa itshèpañ, Ba sena loratō loa tlhōlègō, e le ba ba sa ichwareleñ, e le bapateletsi, ba sena boithibō, ba le bogale, e se barati ba molemō gopè, E le baoki, e le ba ba tlhōgōethata, e le ba ba ikgogomosañ, e le barati ba dikgatlhègō, bogolo go go nna barati ba Modimo; E le ba ba chotseñ sechwanchō hèla sa poihōmodimo, me thata ea eōna ba e latotse.” (Lono ke loungo lwa makgolo a dingwaga lwa go tenegela kobamelo ya boammaaruri. Maemo ano a ile a nna gone ka gobo batho bao ba ithayang ba re ke ba bodumedi ba ile ba tlhokomologa seo Lefoko ja Modimo tota le se bolelang. Ba ile ba itshupa ba latola thata ya go dira molemo eo poifomodimo ya boammaaruri e ka nnang le yone mo botshelong jwa motho.)

Ke goreng Modimo o bo dumelela?

Ka dinako tse dingwe go ka bonala mo go rona ekete selo se se molemo go se dira fela ke gore go tlosiwe mongwe le mongwe yo o boikepo. Re tlhoafaletse go bona boikepo bo fela, mme lefa go le jalo re bo itemogetse fela ka lobaka lo lo nnye mo dingwageng fa go bapisiwa le nako e boikepo bo nnileng teng ka yone. Jehofa Modimo o tshwanetse go ikutlwa jang? Ka dikete tsa dingwaga batho ba ile ba mo tshwaya phoso, le eleng go mo roga, ka maemo a a bosula a ba ileng ba a itshokela. Lefa go le jalo, ga a dirwe ke ene, mme ke Satane le batho ba ba boikepo. Jehofa o na le nonofo ya go senya baikepi. Eleruri go tshwanetse ga nna le mabaka a a molemo a gore ke goreng a ile a ikgapa ka tsela e. Fa tsela ya ga Jehofa ya go tshwara seemo seno e farologane le eo re ka e hakang, a re tshwanetse go gakgamala? Boitemogelo jwa gagwe bo bogolwane thata thata go na le jwa motho, mme tsela eo a lebang seemo ka yone e atlabetse thata go na le ya motho ope.—Bapisa Isaia 55:8, 9; Esekiele 33:17.

Go ka bo go se na boikepo bope fa e le gore Modimo o ka bo a ile a dira gore dibopiwa tsa gagwe tse di botlhale di se ka tsa nna le boikgethelo. Mme Modimo o ile a re neela kgono ya go ikgethela go mo utlwa ka go bo re mo rata kana go sa mo utlwe. (Dute. 30:19, 20; Yosh. 24:15) A re eletsa ekete go ka bo go le ka tsela e sele? Fa e le gore re batsadi, re itumedisiwa ke eng—fa bana ba rona ba re utlwa ka gobo ba re rata kana fa re ba pateletsa gore ba go dire? A Modimo o ne a tshwanetse go pateletsa Adame gore a nne kutlo? A eleruri re ne re ka itumelela go tshela mo lefatsheng le re patelediwang go utlwa Modimo? Pele ga go senya lefatshe leno le le boikepo, Modimo o letlelela batho sebaka gore ba supe go re a jaana eleruri ba batla go tshela tumalanong le melao ya gagwe e e tshiamo kana nnyaa. Ka nako e e leng ya gagwe, kwantle ga pelaelo o tla senya baikepi.—2 Bathes. 1:9, 10.

O dumelela ka botlhale nako ya go rarabolola dikganetsano tse dikgolo tse di botlhokwa-tlhokwa: (1) Tshiamo le tshwanelo ya go busa ga ga Jehofa e ile ya gwetlhiwa kwa Edena. (Gen 2:16, 17; 3:1-5) (2) Bothokgami jwa batlhanka botlhe ba Modimo kwa legodimong le mo lefatsheng bo ile jwa belaelwa. (Yobe 1:6-11; 2:1-5; Luke 22:31) Modimo o ka bo a ile a senya batsuolodi (Satane, Adame le Efa) ka ponyo ya leitlho, mme seo se ka bo se se ka sa rarabolola dikgang tseo. Dikgoka ga di ke di supa fa motho a siame. Dikganetsano tse di ileng tsa tsosiwa e ne e le tsa boitsholo. Fa Modimo a ne a letlelela nako, e ne e se gore a itshupegetse sepe ka boene, mme go letlelela gore dibopiwa tsotlhe tse di nang le kgololesego di iponele ka botsone loungo lo lo bosula lo lo nnang gone ka botsuolodi kgatlhanong le bobusi jwa gagwe, gape le go ba neela sebaka sa go supa gore ka sebele ba ema kae mo dikgannyeng tseno tse di botlhokwa. Fa dikgang tseno di rarabolotswe, le ka motlha ga go ketla go nna le ope yo o tla dumelelwang go senya kagiso. Tsamaiso e e molemo, tshwaragano, le boleng jo bontle jwa lobopo lotlhe bo ikaegile ka go itshepisiwa ga leina la ga Jehofa, go tshwarwa ga gagwe ka tlotlo e e tswang mo pelong ke dibopiwa tsotlhe tse di botlhale. (Bona gape ditsebe 347-349, tlaseng ga setlhogo “Satane Diabolo.”)

Tshwantshetso: Fa e le gore mongwe o ka bo a ile a tsamaya a go gasagasa mo motseng otlhe gore o ne o dirisa maemo a gago jaaka tlhogo ya lelapa ka boatla, le gore bana ba gago ba ne ba ka dira botoka fa ba ka itirela diphetso kwantle ga gago, le gore botlhe ba a go utlwa, eseng ka go bo ba go rata, mme ka ntlha ya melemo ya dilo tse di bonalang eo o ba baakanyetsang yone, selo se se molemo go se dira go rarabolola kgang e ke eng? A go bolaya mopateletsi go ne go tla dira gore ditatofatso tseo di tswe mo megopolong ya batho ba motse? Go na le moo, a bo e tla nna karabo e e molemo jang fa o ne o ka fa bana ba gago sebaka sa gore e nne basupi ba gago go bontsha gore o tlhogo ya lelapa fela e e siameng le e e lorato le gore ba nna le wena ka go bo ba go rata! Fa bangwe ba bana ba gago ba ne ba ka dumela mmaba wa gago, ba tlogela legae, mme ba itshenyetsa botshelo ka go tsaya mekgwa ya botshelo e sele, go ne go tla dira gore balebeledi ba ba ikanyegang ba lemoge gore bana ba ka bo ba ile ba nna botoka fa e le gore ba ka bo ba ile ba tsaya-tsia kaelo ya gago.

A re solegetswe molemo ka tsela epe ke go dumelela ga Modimo boikepo nako kgolo ke eno?

2 Pet. 3:9: “[Jehofa] ga a bonya kaga polèlō ea gagwè ea choloheco, yaka bañwe ba tle ba kaee bonya; me o pelotelele mo go lona, a sa rate gore opè a shwè, ha e se gore botlhe ba tlè mo boikwatlhaoñ.” (Ka gobo bopelotelele jwa gagwe bo ile jwa fitlha le mo go rona, re na le sebaka sa go bontsha gore re ikwatlhaile le gore, mo boemong jwa gore re itirele diphetso tsa rona kaga se se molemo le kaga se se bosula, re batla go ineela go puso ya tshiamo ya ga Jehofa.)

Bar. 9:14-24: “Yalo re tla reñ? A go na le tshiamololō mo Modimoñ? A go ko go se tualo. . . . Go no go ka tweñ, ha e rile Modimo o rata go shupa bogale yoa ōna, le go utlwatsa nonohō ea ōna, oa iphapaanya ka pelotelele yo bogolo le diyana tsa kgalehèlō tse di etleegetseñ tshenyègō [ke go re, a ile a itshokela go nna gone ga baikepi ka lobakanyana]: Le gore o utlwatsè botlalō yoa kgalalèlō ea ōna ka diyana tsa kutlwèlō botlhoko, tse o di baakanyeditseñ kgalalèlō galè [ke go re, o tla dirisa nako e go atolosetsa boutlwelo botlhoko mo bathong ba ba rileng ba ba dumalanang le boikaelelo jwa gagwe], Eboñ rona, ba o cwañ go re bitsa, e señ mo Bayudeñ ba le bosi, e leñ le mo go Badichaba?” (Ka gone Modimo o ile a tlosolosa tshenyego ya boikepo e le gore a tle a letlelele nako go kgetha batho ba a neng a tla ba galaletsa le Keresete jaaka maloko a Bogosi jwa selegodimo. A go dira ga Modimo jalo e ile ya nna tshiamololo go ope? Nnyaa; ke karolo ya thulaganyo ya ga Jehofa ya go segofatsa batho ba mefuta yotlhe bao a tla ba neelang sebaka sa go tshelela ruri mo lefatsheng la paradaise. Bapisa Pesalema 37:10, 11.)

Fa Mongwe A Re—

‘Ke goreng Modimo o dumeletse boikepo jo bo ntseng jalo?’

O ka nna wa araba ka gore: ‘Potso ya gago ke e e molemo. Batlhanka ba bantsi ba ba ikanyegang ba Modimo ba ile ba tshwenngwa ke boikepo jo bo ba dikologileng. (Hab. 1:3, 13)’ Mme gongwe o bo o ka oketsa jaana: (1) ‘Ga se ka ntlha ya botlhokomologi mo letlhakoreng la Modimo. O re tlhomamisetsa go re o tlhomile nako eo a tla tlosang baikepi ka yone. (Hab. 2:3)’ (2) ‘Mme ke eng se o se tlhokang mo letlhakoreng la rona fa e le gore re tla nna gareng ga bafalodi fa nako eo e tla? (Hab. 2:4b; Sefa. 2:3)’

Kana o ka nna wa re: ‘Ke itumelela go bo o ile wa botsa potso eo. Ke e nngwe e e tshwentseng batho ba le bantsi ba dipelo tse di ikanyegang. Ke tshotse fano boikitsiso jo bo thusang fela thata go arabela potso eo ya gago. (Go tswa foo o bo o bala mmogo le ene boikitsiso jo bo mo ditsebeng 92-95.)

‘Morago ga dingwaga tseno tsotlhe, ga ke dumele gore Modimo o tla dira sepe go fetola dilo’

O ka nna wa araba ka gore: ‘Ke itumelela go utlwa gore o dumela mo Modimong. Eleruri go boammaaruri gore go na le boikepo jo bontsi, mme bo sa le bo simologile pele ga motlha wa rona. A mme o kile wa akanyetsa seno . . .? (Dirisa kgopolo e e mo serapeng 1 mo tsebeng 92, malebana le boleele jwa nako jo Modimo a bo letleletseng ka yone.)’

Kana o ka nna wa re: ‘Ke tlhomamisega gore o tla dumalana le nna ke go raya ke re ope fela yo o nang le kgono ya go ka aga ntlo eleruri o ka kgona go e phepafatsa. . . . Ereka Modimo a bopile lefatshe, ga go ketla go nna bokete mo go ene go le phepafatsa. Ke ka baka lang fa a ile a dumelela nako e e kalo? Ke bone karabo ya seno e kgotsofatsa tota. Mpolelela gore o akanya eng wena. (Go tswa foo lo bo lo bala mmogo boikitsiso jo bo mo ditsebeng 92-95.)’