Go Simolola Dithuto Tsa Bibela Tsa Legae
1 Bongwe jwa maitemogelo a a duelang tota le a a kgotsofatsang Bakeresete ba boammaaruri ke go ruta mongwe boammaaruri o dirisa thuto ya Bibela ya legae. Lefa go ntse jalo, ba bangwe ba ka nna ba se ka ba nna le seabe mo karolong eno e e duelang le e e kgotsofatsang ya bodihedi ka gonne ba ikutlwa gore ga ba kgone go ka simolola thuto ya Bibela le go e tshwara. Baboledi ba le bantsi ba ba tlhagafetseng le babulatsela ba kile ba ikutlwa ka tsela e e ntseng jalo. Lefa go ntse jalo, ba ne ba ithuta ka fa ba ka simololang le go tshwara dithuto tsa Bibela ka teng, le go ipelela bodihedi jwa bone ka go ikanya mo go Jehofa le go dirisa dikakantsho tse di tswang go Tirelo ya Rona ya Bogosi. Le wena o ka itirela mokgele o o tshwanang le oo.
2 Ka go Dirisa Mokgwa O O Tlhamaletseng le Dipampitshana: Nngwe ya ditsela tse di motlhofo tsa go simolola thuto ke ya go dirisa mokgwa o o tlhamaletseng. Se batho ba bangwe ba se tlhokang fela ke go ba kopa ka lorato gore ba ithute Bibela. Seno se ka dirwa fela ka go botsa mong wa ntlo jaana: “A o ka rata go nna le thuto ya Bibela ya legae ya gago ka namana le go oketsa kitso ya gago ya Bibela le boikaelelo jwa Modimo ka lefatshe leno?” Kana o ka nna wa bolelela mong wa ntlo gore o ka itumelela go mmontsha ka fa thuto ya Bibela ya legae e tshwarwang ka teng. Le mororo ba bantsi ba ka nna ba gana mpho eno, akanya fela gore go tla nna boipelo jo bo kanakang fa o bona mongwe yo o ka e amogelang!
3 Tsela e nngwe ya go simolola thuto ya Bibela ke ya go dirisa nngwe ya dipampitshana tsa rona. Le mororo di le dinnye, di na le molaetsa o o maatla le o o sokololang. Re ka simolola thuto jang ka pampitshana? Ka go neela fela mong wa ntlo pampitshana e o bonang e ka mo itumedisa. Go tswa foo, e nne wena o simololang, o bo o kopa mong wa ntlo go bala serapa sa ntlha le wena. Lebang dikwalo tse di umakilweng, o bo o mo tlotlela ka fa di tsenang ka teng mo kgannyeng eo. Lo ka nna lwa bala serapa se le sengwe kana di le pedi fela mo loetong lwa ntlha. O ka nna wa oketsa nako e lo e dirisang mo motlotlong wa lona, fa mong wa ntlo a lemoga gore o ithuta ka dilo tse di itumedisang tse di tswang mo Bibeleng.
4 Ka go Dirisa Bibela Fela: Ka dinako tse dingwe motho o ka dumela gore re tlotle le ene ka Bibela mme a lebega a sa batle re ka ithuta le ene ka tsela e e tlwaelegileng kana a sa batle re ka dirisa nngwe ya dikgatiso tsa rona. O ka nna wa simolola le go tshwara thuto ya Bibela ka go baakanyetsa dipuisano tsa Dikwalo tse di kgatlhang tse di theilweng mo bukeng ya O Ka Tshelela Ruri kana mo bukeng ya Go Fetolana mme he o tshotse Bibela fela fa o etela motho yo o kgatlhegang yoo. Dipuisano tse di ntseng jalo di ka tsaya metsotso e le 15 kana 20, kana go feta, go ikaegile ka maemo. Fa o dira jalo ka metlha le ka mokgwa o o bontshang botswelelopele wa go ruta boammaaruri jwa Bibela, o setse o simolotse thuto ya Bibela, mme o ka e bega. Fa nako e tshwanela, mmontshe buka ya O Ka Tshelela Ruri, o bo o tshwara thuto e e tlwaelegileng ka yone.
5 Mo godimo ga go batla ditshono tsa go simolola dithuto tsa Bibela mo bodiheding jwa tshimo, a o ile wa leka go di simolola le baagisani, ditsala, kana le balelapa la gago? A ke bogologolo o dirile jalo? A o kile wa leka gape bosheng jaana? Fa mokgwa mongwe o ne o se mosola, a o ile wa akanya go leka o mongwe?
6 O ka atlega mo go simololeng dithuto fa o dirisa dikakantsho tse di neetsweng fano, o nna ka metlha mo tirelong ya tshimo, le go ikanya Jehofa gore o tla go segofatsa. Le ka motlha o se ka wa nyatsa maatla a boammaaruri le thuso e Jehofa a e nayang. E kete o ka ipelela bodihedi thata ka go simolola le go tshwara dithuto tsa Bibela tsa legae.