“Go Aba ka Bopelontle, go Iketleeletsa go Abelana”
1 Makgolokgolo a dingwaga a a fetileng moaposetoloi Paulo o ne a laela Timotheo gore a kgothatse badumedikaene gore “ba lwele go dira molemo, go huma ditiro tse di molemomogolo, go aba ka bopelontle, go iketleeletsa go abelana.” (1 Tim. 6:18) Gape Paulo o ne a gakolola Bakeresete ba Bahebera gore ba se ka ba lebala “go dirwa ga molemo le go abalana dilo le ba bangwe.” (Baheb. 13:16) Ke ka ntlha yang fa a ne a kwala ditaelo tseno? Ka gonne o ne a itse gore go tla nna le “kgalalelo le tlotlo le kagiso mo go mongwe le mongwe yo o dirang se se molemo.”—Bar. 2:10.
2 Jehofa Modimo ke Mong wa dilo tsotlhe, ka gonne ke Mmopi. (Tshen. 4:11) Eleruri re itumelela se a re direlang sone ka dilo tsa gagwe. Le fa batho ba le bantsi ba sa itse go leboga, Mogodimodimo o tswelela pele a letla batho botlhe gore ba solegelwe molemo ke dithulaganyo tsa gagwe tsa bopelotshweu tse di bolokang botshelo. (Math. 5:45) O ile a bo a ntsha Morwawe yo a mo ratang thata go nna setlhabelo gore re bone botshelo jo bo sa khutleng. A lorato lo re lo bontshitsweng ga le a tshwanela go re tlhotlheletsa go bontsha tebogo ka go abela batho ka bopelontle?—2 Bakor. 5:14, 15.
3 Re ka Abelana Eng? Go a tshwanela tota gore re dirise dithoto dipe fela tse re nang le tsone ka tsela e e itumedisang Modimo. Eleruri re batla go ema nokeng tiro ya Bogosi ya lefatshe lotlhe ka dithoto le ka tsela ya semoya. Ke boammaaruri gore dikgang tse di molemo ke letlotlo le le botlhokwa thata le motho a ka nnang le lone, ka gonne ke “maatla a Modimo a poloko.” (Bar. 1:16) Fa re dirisa nako le dikhumo tsa rona ka bopelontle kgwedi nngwe le nngwe ka go nna le seabe mo tirong ya go rera le ya go ruta, re ka kgona go abela ba bangwe letlotlo leno la semoya, le le tla dirang gore ba bone botshelo jo bo sa khutleng.
4 Jehofa o a itumela fa re thusa ba ba tlhokang. O solofetsa go re segofatsa, mme gape o re gakolola jaana: “Dikhumo ga di thuse sepe mo tsatsing la bogale, mme tshiamo e golola mo losong.” (Dia. 11:4; 19:17) Go ema nokeng tiro ya Bogosi ka dithoto le ka go nna le seabe ka botlalo mo go rereng dikgang tse di molemo, ke ditsela tse di molemolemo tse re ka bontshang ka tsone gore tota re aba ka bopelontle, le go iketleeletsa go abelana.