“Tlhabana Tlhabano e e Molemomogolo ya Tumelo”
1 Moaposetoloi Paulo o ne a tlhagisa Timotheo go “tlhabana tlhabano e e molemomogolo ya tumelo.” (1 Tim. 6:12) Paulo o ne a tshela go dumalana le mafoko ao. Moragonyana mo botshelong jwa gagwe, o ne a bua a tlhomamisegile gore o ile a tlhabana tlhabano e e molemomogolo. (2 Tim. 4:6-8) Ka ditsela tsotlhe, o ne a dira bodiredi ka bopelokgale, ka bonatla le ka boitshoko. Fa re etsa sekao sa gagwe, le rona re ka tlhomamisega mo mogopolong gore re dira sotlhe se re ka se kgonang mo ntweng ya rona ya tumelo ya Bokeresete.
2 Dira Boiteko jo bo Tlhokegang: Paulo o ne a dira ka natla mo bodireding. (1 Bakor. 15:10) Le rona re tshwanetse go dira jalo fa re ntse re batla botlhe ba ba tshwanelegang mo tshimong ya rona. (Math. 10:11) Gore re fitlhelele bangwe ba bone, re ka nna ra tshwanelwa ke go tsoga go sa le makuku gore re neele batho ba re kopanang le bone mo mmileng bosupi. Kana re ka tshwanelwa ke go dira motshegare wa maitseboa kana ka lotlatlana gore re kopane le batho fa ba boela kwa magaeng a bone.
3 Go tlhokega boikgapo le go rulaganya dilo sentle gore re tshware nako fa re ya go kopana le setlhopha sa thuto ya buka ya rona go ya tirelong ya tshimo. Ka sekai, maloko a mangwe a lelapa la Bethele a tsamaya metsotso e ka nna 45 e le go ya fela, gore ba nne le seabe mo bodireding le diphuthego tse ba di abetsweng mo mafelobekeng. Gape, re ka nna ra kgatlhiwa ke baboledi le malapa mangwe mo phuthegong ya rona ba ba tsamayang sekgala se setelele mme ba tshwara nako. Re tshwanetse go etsa dikao tse di ntseng jalo tsa batho ba ba tlhoafetseng le ba ba dirang dilo ka thulaganyo.
4 Re tshwanetse go tlhotlheletsega go boela kwa bathong botlhe ba ba bontshitseng kgatlhego. Tota le fa re tsamaisitse buka mo mmileng kana mo bosuping jo e seng jwa tlwaelo, re tshwanetse go leka go tsaya aterese ya motho yoo kana nomoro ya founo. Go tswa foo re mo etele gore re godise kgatlhego le go leka go simolola thuto ya Baebele.
5 Nna Gone ka Metlha mo Tirelong: Paulo o ne a rera ka metlha le ka botlalo. (Bar. 15:19) Go tweng ka wena? A o nna le seabe ka metlha mo bodireding? A o setse o nnile le seabe mo tirelong ya tshimo mo kgweding eno? Batshwari ba Thuto ya Buka ya Phuthego ba ka itumelela go bona gore mongwe le mongwe mo setlhopheng sa bone o nna le seabe mo bodireding ka August. Ba tla go thusa go dira jalo.
6 Ka go etsa sekao sa ga Paulo malebana le go tshegetsa dikgang tse di molemo ka botlalo, re tla tswelela pele re “tlhabana tlhabano e e molemomogolo ya tumelo.”