Thulaganyo e Ntšha ya Kopano ya Potologo
1 Mong wa rona o ne a bolelela pele gore barutwa ba gagwe ba ne ba tla nna le pitlagano. (Math. 24:9) Re tshwanetse go leba diteko jang? Ke eng se se tla re thusang go itshokela pitlagano? Thulaganyo ya kopano ya potologo ya ngwaga wa tirelo wa 2004 e tla araba dipotso tseno. Setlhogo sa yone sa re “Ipeleng mo Tsholofelong. Itshokeng mo Pitlaganong.”—Bar. 12:12.
2 Metseletsele e Mebedi ya Dipuo Tsa Neeletsano: Motseletsele wa ntlha wa dipuo tsa neeletsano, wa setlhogo se se reng “Ungwa Maungo ka Boitshoko,” o tla sekaseka ditsela tse re ungwang maungo ka tsone. Baboledi ba le mmalwa ba tla botsolodiwa malebana le kafa ba rerang le go ruta ka teng ka tsela e e bontshang gore dinako di potlakile. Batsadi ke bone ba segolobogolo ba tla ratang go tsaya tsia karolo e e reng “Fa re Kgalemelwa ke Jehofa,” e e tla tlhalosang kafa batsadi ba ka buisanang le bana ba bone ka teng. Sebui sa bofelo sa dipuo tseno tsa neeletsano se tla tlhalosa gore re tshwanetse ra dirang gore lefatshe le se ka la re tlhotlheletsa ka tsela e e maswe mme la dira gore re se ka ra ungwa maungo.—Mar. 4:19.
3 “Taboga Lobelo ka Boitshoko” ke setlhogo sa motseletsele wa bobedi wa dipuo tsa neeletsano. O tla bontsha gore botshelo jwa rona bo tshwana le lobelo ka tsela efe. Ke ka ntlha yang fa re tshwanetse go taboga go ya ka melao? Re ka apola jang bokete bongwe le bongwe le go taboga re sa lape mo lobelong lwa botshelo? Kgakololo e e mo nakong ya Dikwalo e e tla newang e tla re thusa rotlhe gore re tswelele pele re taboga ka boitshoko.
4 Go Itshoka go Dira Gore re Amogelwe ke Modimo: Dipuo tsa balebedi ba ba etang di tla dira gore ba ba reetsang ba bo ba dirisa kgakololo ya tsone ba nonofe tumelo. Nngwe ya dipuo tsa molebedi wa kgaolo e tla bo e na le setlhogo se se reng “Boitshoko bo Felela ka Boemo jo bo Amogelesegang.” Puo ya phatlalatsa e tla araba dipotso tseno: Ditšhaba di tshwanetse tsa ikanya mang le gone go dira jalo go akaretsa eng? Puo e e konelang e e reng, “Lo Tla Bona Meya ya Lona ka go Itshoka,” e tla tlhalosa kafa Jesu a neng a kgona go itshokela go se tshwarwe sentle ka teng kwantle ga go galefa.
5 Se lebale go tla ka buka ya gago ya Sekolo sa Bodiredi le makasine wa gago wa Tora ya Tebelo o o balwang mo bekeng eo. Tsaya dintlha gore o kgone go tlhoma mogopolo le gore o di dirise mo nakong e e tlang. Moragonyana go tla dirwa poeletso ya thulaganyo eno kwa phuthegong.
6 Jehofa ke ene a rulagantseng mokete ono wa dijo tsa semoya. Tlang re jeng! Re tla goa ka boipelo fa re ka nna teng gore re solegelwe molemo ke thulaganyo yotlhe.—Isa. 65:14.