THUTO 14

Tlhomolola Dintlha Tsa Botlhokwa

Bahebera 8:1

KGANGKGOLO: Thusa bareetsi go tsamaisana le wena fa o ntse o tsweletse ka puo gape o dire gore dintlha tsa botlhokwa di tsamaisane le setlhogo sa puo.

KAFA O KA DIRANG SEO KA GONE:

Itse boikaelelo jwa puo ya gago. Leka go lemoga gore a boikaelelo jwa puo ya gago ke go ruta, go tlhatswa bareetsi pelo kgotsa go ba kgothatsa. Go tswa foo, e baakanyetse o akantse ka dintlha tseo. Dirisa dintlha tsa botlhokwa tsotlhe go fitlhelela boikaelelo jwa puo ya gago.

Ipotse jaana: ‘Bareetsi ba ka ipotsa potso efe ka kgang eno? Fa ba sena go bona karabo, ba ka ipotsa potso efe gape?’ Go tswa foo, rulaganya dintlha tsa gago go ya ka tatelano ya dipotso tseo gore bareetsi ba tsamaisane le wena, ba go tlhaloganye le go amogela se o se rutang.
Gatelela setlhogo sa puo. Fa o ntse o tsweletse ka puo ya gago, nna o umaka setlhogo sa puo ka go boaboeletsa mafoko a konokono a setlhogo kgotsa ka go dirisa makaelagongwe.
Dira gore dintlha tsa botlhokwa di utlwale sentle. Tlhopha fela dintlha tsa botlhokwa tse di tsamaisanang le setlhogo sa gago, tse o tla kgonang go di ruta mo nakong e o e abetsweng. O se ka wa dirisa dintlha tsa botlhokwa tse dintsi, umaka ntlha nngwe le nngwe ya botlhokwa ka tsela e e utlwalang sentle, o tla o didimala go se kae gore go utlwale fa o tswa mo ntlheng e nngwe ya botlhokwa o ya kwa go e nngwe.

O ka nna wa umaka dintlha tsa botlhokwa fa o simolola puo gore bareetsi ba kgone go tsamaisana le wena kgotsa o ka nna wa di boeletsa kwa bofelong gore ba kgone go di gopola.