1 Tukupā

KO HONO ʻUHINGÁ

Ko e ngaahi husepāniti mo e ngaahi uaifi ʻoku nau tukupā ki heʻenau nofo malí ʻoku nau vakai ki ai ko ha haʻi tuʻuloa, pea ʻoku fakatupu ai ha ongoʻi malu ʻi honau vaá. ʻOku falala pau ʻa e hoa taki taha ʻe fakaʻapaʻapaʻi ʻe he hoa ʻe tahá ʻena nofo malí, naʻa mo e ʻi he ngaahi taimi faingataʻá.

Ko e ngaahi hoa mali ʻe niʻihi ʻoku nau ongoʻi ʻoku kounaʻi kinautolu ke kei nofo fakataha koeʻuhi ko e tenge mei he kaungāmeʻá pe fāmilí. Neongo ia, ʻoku lelei mamaʻo ange ʻa hono maʻu ha ongoʻi tukupā ʻa ia ʻoku makatuʻunga ʻi he feʻofaʻaki mo e fefakaʻapaʻapaʻaki.

TEFITOʻI MOʻONI FAKATOHITAPU: “ʻOku ʻikai totonu ke liʻaki ʻe ha husepāniti ʻa hono uaifí.”​—1 Kolinitō 7:11.

“Kapau ʻokú ke tukupā ki hoʻo nofo malí, te ke tali ʻokú ke fai ʻa e fehālaaki. ʻOkú ke fakavave ke faʻa fakamolemole pea kole fakamolemole. ʻOkú ke vakai ki he palopalemá ko ha fakafaingataʻaʻiaʻanga, ʻo ʻikai ko ha makatuʻunga ki ha vete.”​—Micah.

ʻUHINGA ʻOKU MAHUʻINGA AÍ

ʻI he fetaulaki mo e palopalemá, ko e ngaahi hoa mali ʻoku ʻikai ke nau tukupaá ʻoku ngalingali ange te nau fakamulituku, ‘Naʻe ʻikai pē ko hoku fika ia ʻoʻoku’ pea kumi ki ha founga ke mavahe ai mei he nofo malí.

“Ko e tokolahi naʻa nau mali ʻo ʻiloʻi ka nau taʻelavameʻa ʻe lava pē ke nau vete. ʻI he taimi ʻoku mali ai ʻa e kakai ʻoku nau ʻosi maʻu ʻa e fakakaukau ko iá, ko ʻenau tukupaá ʻoku vaivai pē mei he kamatá.”​—Jean.

MEʻA ʻE LAVA KE KE FAÍ

SIVISIVIʻI KOE

ʻI he lolotonga ha fakakikihi . . .

• ʻOkú ke fakaʻiseʻisa ʻi hoʻo mali mo ho hoá?

• ʻOkú ke fakaʻānaua naʻá ke mali mo ha taha kehe?

• ʻOkú ke faʻa leaʻaki ha meʻa hangē ko e “Te u liʻaki koe” pe “Te u kumi ʻe au ha taha ʻoku houngaʻia ʻiate aú”?

Kapau ʻokú ke tali ʻio ki ha taha ʻo e ngaahi fehuʻi ko iá, ko e taimi eni ke ke fakaivimālohiʻi ai hoʻo tukupaá.

TALANOA MO HO HOÁ

• Kuo hōloa ʻa e tukupā ʻi heʻeta nofo malí? Kapau ko ia, ko e hā hono ʻuhingá?

• Ko e hā ʻa e ngaahi sitepu ʻe lava ke ta fai he taimí ni ke fakaivimālohiʻi ai ʻeta tukupaá?

FOKOTUʻU

• Fai maʻu pē ha kiʻi tohi ʻofa ki ho hoá

• Fakahaaʻi hoʻo tukupaá ʻaki hono ʻai ha laʻitā ho hoá ʻi ho tesi he ngāué

• Tā ki ho hoá he ʻaho kotoa mei he ngāueʻangá pe ʻi he taimi ʻokú ke mavahe aí

TEFITOʻI MOʻONI FAKATOHITAPU: “Ko e meʻa kuo haʻi fakatahaʻi ʻe he ʻOtuá, tuku ke ʻoua naʻa fakamāvae ia ʻe ha tangata.”​—Mātiu 19:6.