Fehuʻi mei he Kau Lautohí

ʻE feʻungamālie ki ha ongo mātuʻa Kalisitiane ke tangutu fakataha mo ha kiʻi tama kuo tuʻusi ʻi he ngaahi fakataha ʻa e fakatahaʻangá?

ʻOku ʻikai ha ʻuhinga ia ke hohaʻa tōtuʻa ki he tangutuʻanga ʻo ha tokotaha tuʻusi ʻi he Fale Fakatahaʻangá. Kuo fai ʻe he makasini ko ení ha feinga mālohi ke fakalototoʻaʻi ʻa e ngaahi mātuʻa Kalisitiané ke tokonaki ʻa e tokoni fakalaumālie ki heʻenau kiʻi tama kuo tuʻusi ʻoku kei nofo ʻi ʻapí ʻo kapau ʻoku hā feʻungamālie ke fai pehē. Hangē ko ia ʻoku hā ʻi he ʻīsiu ʻo e Taua Leʻo ʻo Sune 1, 1989, peesi 19 mo e 20, ʻe ako nai ʻa e ongo mātuʻá mo ha kiʻi leka kuo tuʻusi ʻoku kei nofo mo kinaua. ʻOku ʻamanekina ʻe maʻu ʻe he kiʻi tamá ʻa e fakalototoʻa ʻoku fiemaʻú ke fakatonutonu ai hono ʻalungá.

ʻI he haʻu ki he tangutuʻanga ʻi he Fale Fakatahaʻangá, ʻe hā ngali ʻuhinga lelei ke tangutu fakalongolongo foki ha kiʻi leka kuo tuʻusi fakataha mo ʻene ongo mātuʻá. Koeʻuhi ʻoku ʻikai fiemaʻu ia ke tangutu ha tokotaha tuʻusi ʻi mui ʻi he holó, ʻoku ʻikai totonu ke fehuʻia kapau ʻoku tangutu ha kiʻi tama kuo tuʻusi ʻi he tafaʻaki ʻene ongo mātuʻá, pe ko fē pē ʻokú na tangutu aí. ʻI he tokanga ʻa e ongo mātuʻá ki he tuʻunga fakalaumālie ʻena kiʻi tamá, ʻoku totonu ke na fakapapauʻi ʻokú ne maʻu ʻaonga mei he ngaahi fakatahá. ʻI hono ʻai ke tangutu fakataha ʻa e kiʻi tamá mo kinaua kae ʻikai tuku taʻetokangaʻí ʻe ʻaonga ia.

Fēfē leva, kapau ʻoku ʻikai toe nofo ʻa e kiʻi tama tuʻusí ia mo ʻene ongo mātuʻá? ʻE kehe ʻa e tuʻunga ia ko ení? ʻI he kuohilí, naʻe fakahaaʻi mahino ʻi heʻetau ʻū tohí ʻa e tōʻonga totonu ʻoku totonu ke feinga ha Kalisitiane ke tauhi maʻu ʻi he haʻu ki he feohi mo ha kāinga kuo tuʻusi ʻa ia ʻoku ʻikai nofo ʻi ʻapi.a Kae kehe, ko e tuʻunga ʻo e tangutu fakalongolongo ha tokotaha kuo tuʻusi ʻi ha tangutuʻanga he tafaʻaki hono kāingá ʻi he taimi fakatahá ʻoku kehe ʻaupito ia mei he tuʻunga ʻo e feinga ʻikai fiemaʻu ʻa e ngaahi kāingá ke feohi mo iá. Kapau ko e kau mēmipa faitōnunga ʻi he fāmilí ʻoku nau maʻu ʻa e fakakaukau totonu ki honau kāinga kuo tuʻusí pea ʻoku nau feinga ke muimui ki he akonaki Fakatohitapu fekauʻaki mo e feohi mo iá, ʻe ʻikai nai ha ʻuhinga ia ke hohaʻa ai.—1 Kol. 5:11, 13; 2 Sio. 11.

Pe ʻoku tangutu nai ha tokotaha tuʻusi ʻi he tafaʻaki ʻo ha kāinga pe ofi ki ha mēmipa kehe ʻo e fakatahaʻangá ʻoku ʻikai totonu ke fakatupunga ai ha hohaʻa kapau ʻokú ne tōʻonga lelei pē. Ko hono fakangatangata ʻa e feituʻu ke tangutu ai ha tokotaha ʻe lava ke fakatupunga ai ha ngaahi palopalema, ʻo makatuʻunga pē ʻi he ngaahi tuʻungá. Kapau ko e kotoa ʻi aí, kau ai ʻa e ngaahi kāinga faitōnungá, ʻoku nau feinga ke fakaʻapaʻapaʻi ʻa e ngaahi tefitoʻi moʻoni Fakatohitapu fekauʻaki mo e tuʻusí, pea ʻikai hoko ia ko ha fakatupu tūkia ki he fanga tokouá, ʻoku ʻikai ha fiemaʻu ia ke fai ha hohaʻa fekauʻaki mo e tangutuʻanga ʻo e faʻahinga ʻoku nau maʻu ʻa e ngaahi fakataha faka-Kalisitiané.