Feinga Tōtōivi ʻi he Kumi ki ha Ngaahi Ako Tohitapu

¹ ʻOku fakaʻau ke lahi ange ʻa e fakamoʻoni ʻoku toe siʻi pē ʻa e taimi ʻo e māmani motuʻa ko ʻení. (2 Tīm. 3:​1-5) Ko e hā ʻokú ne fakahaaʻi maí? ʻOkú ne fakahaaʻi mai ʻoku ʻi he tuʻunga fakatuʻutāmaki ʻa e moʻui ʻa e kakaí. Kaekehe, ʻoku malava ke tau fai ha tokoni ke fakahaofi ha niʻihi. (Pal. 3:27) ʻI hono manatuʻi ʻa e taumuʻa ko iá ʻoku totonu ke tau feinga tōtōivi ke kamata mo fai ha ngaahi ako Tohitapu.

² Kuo lelei lahi ʻa hono tufaki ʻo ʻetau ngaahi tohi fakatuʻunga mei he Tohitapú. Ka ko e meʻa ʻoku fiemaʻu lahi taha ki he kakaí ko ha tokoni fakaekita ʻo fakafou ʻi hono fai tuʻumaʻu ha ako Tohitapu ʻi ʻapi. ʻE lava fēfē ke tau tokoni kiate kinautolu ke nau sio ki he meʻa ko iá.

³ Te tau malava ke langaʻi ha ngaahi fehuʻi ʻa ia ʻoku tokanga ki ai ha kakai tokolahi. Ko e ngaahi fehuʻi peheé ʻe lava ke ne fakahanga nai ʻa e tokangá ki he ʻuhinga kuo tō lalo pehē ai ʻa e ngaahi ʻulungaangá, ʻuhinga ʻoku feliliuaki ai ʻa e moʻui fakafāmilí, ʻuhinga ʻoku hoko ai ko e fakamana ʻa e fakamālohí mo e faihiá, ʻuhinga ʻoku fakangofua ai ʻe he ʻOtua anga-ʻofá ʻa e tuʻunga lolotonga ko ʻení, mo e ngaahi alā meʻa pehē. Fakatokangaʻi ʻa e ngaahi meʻa ʻoku fai ʻa e fakakikihi ki aí mo e ngaahi meʻa ʻoku hoko ʻoku tokanga lahi ki ai ʻa e kakai ʻi ho feituʻú. Fakahā ʻa e ngaahi tali mahino mei he Tohitapú ki he ngaahi fehuʻi ko iá. Fakahā ʻa e founga ʻe lava ai ʻe he ngaahi tohi ʻoku tau tufakí ke tokoni kiate kinautolu ke nau ako ke ʻilo pe ko e hā ʻa e lau ʻa e Tohitapú ʻo kau ki he ngaahi meʻa ko iá mo e toe ngaahi meʻa mātuʻaki mahuʻinga kehe ʻoku nau uesia kitautolu kotoa.

⁴ ʻOku mahuʻinga ke tau ʻai ke kau ʻa e tokotaha-ʻapí ki he fetalanoaʻakí. Fakatokangaʻi pe ko e hā ʻa e meʻa ʻokú ne tokanga ki aí. Faʻu hoʻo fetalanoaʻakí ke fakakau ki ai ʻa e meʻa ʻokú ne mahuʻingaʻia pe tokanga ki aí. Fakahanga ʻa e tokangá ki he ngaahi fakamatala ʻoku hā ʻi ha tohi, polosiua, makasini, pe ko ha tuleki ʻa ia ʻoku fakamatalaʻi ai ʻa e fakaleleiʻanga ʻa e Tohitapú ki he ngaahi palopalema ʻa e faʻahinga ʻo e tangatá. Ki muʻa ke ke ʻalú, langaʻi ha fehuʻi ʻe taha pe ua ʻokú ke tui ʻe langaʻi hake ai haʻane tuʻamelie ki hoʻo toe ʻaʻahi atú. ʻI hoʻo toe foki atú, ʻoua ʻe ngalo ke fakamanatu kiate ia ʻa e fehuʻi ʻe taha pe ua ko iá, pea ngāueʻaki ʻa e ngaahi tohí ke tokoniʻi ia ke ne maʻu ʻa e ngaahi tali mei he Tohitapú.

⁵ ʻE malava ke liliu ʻa e ngaahi moʻui ʻa e kakaí ʻe heʻetau kamata ha ngaahi ako Tohitapu pea ke tuʻumaʻu hono faí. ʻOku fiemaʻú ke tau fakahā ʻa e mahuʻingaʻia moʻoni ʻi he meʻa ʻoku tokanga ki ai ʻa kinautolu ʻoku tau fetaulaki ʻi he ngāue fakamalangá pe ʻi he ngaahi taimi kehe. ʻOku fiemaʻu ʻa e teuteu lelei ke ueʻi ʻenau mahuʻingaʻiá. ʻOku fiemaʻu ʻa e faʻa kātaki ke toutou ʻaʻahi kaeʻoua kuo fai fakafounga mo tuʻumaʻu hono fafanga fakalaumālié. ʻOku fiemaʻu ʻa e tokanga anga-ʻofa ki he kakaí tonu. Kuo pau ke tau loto-lelei moʻoni ke tokoniʻi kinautolu ke nau hao moʻui atu mei he fakaʻauha ʻoku vave ke hokó. ʻOku totonu ke hoko ʻetau ngāue ako Tohitapú ko ha meʻa ke fai ʻa e lotu tōtōivi mo tuʻumaʻu ki ai.​—1 Tes. 5:17.

⁶ ʻOku mātuʻaki fakalototoʻa ke sio atu naʻe meimei aʻu ki he kakai ʻe taha miliona ne hoko ko e kau ākonga papitaiso ʻi he taʻu ʻe tolu kuo maliu atú. (Mt. 28:​19, 20) ʻI he taimi ní ʻoku tau fai ha ngaahi ako Tohitapu ʻe fā mo e konga miliona nai ʻi he māhina taki taha, pea ʻoku fakahā heni ʻetau tokanga ki he moʻui ʻa e niʻihi kehé. Fēfē koe? Kuó ke fai ha feinga tōtōivi ke kau ʻi he ngāue ako Tohitapu ʻi ʻapí? Manatuʻi, ko ʻetau moʻuí mo e moʻui ʻa e niʻihi kehé ʻe fakatuʻunga ia ʻi heʻetau fai angatonu fekauʻaki mo e ngāué ni.​—ʻIsi. 3:​17-19.