Fetuʻutaki Fakafou ʻi he Ngaahi Faitohi
KUO fakaleleiʻi ʻe he ngaahi faitohí ʻa e moʻui mo e tōʻonga ʻa e kakai ʻe laui miliona. Ko e lahi taha ʻo e ngaahi tohi ʻi he Ngaahi Konga Tohitapu Faka-Kalisi Kalisitiané ʻi he kamatá ko e ngaahi faitohi. Ko kitautolu ʻi he ʻaho ní ʻe lava ke tau fai ʻa e ngaahi tohi koeʻuhí ke langa hake ai ʻa e kau tui foʻoú, hanganaki fetuʻutaki ai mo e ngaahi kaumeʻá, fakalototoʻaʻi ʻa e fanga tokoua mo e fanga tuofāfine kuo nau fua ʻa e ngaahi fatongia makehé, fakaivimālohiʻi ʻa e faʻahinga ʻoku nau fehangahangai mo e ngaahi faingataʻá, pea fakahaaʻi ʻa e fakamatala ʻoku fiemaʻu ki hono tokangaʻi ʻa e ngaahi ngāue ʻi he fakatahaʻangá.—1 Tes. 1:1-7; 5:27; 2 Pita 3:1, 2.
Ko e faitohí ko ha toe founga ola lelei ia ke faifakamoʻoni ai. ʻI he ngaahi feituʻu ʻe niʻihi, ʻoku nofo ai ʻa e kakai tokolahi ʻi ha ngaahi fale ʻapaatimeni pe ngaahi hōtele nofoʻanga ʻoku leʻohi lahi ʻa ia ʻoku ʻikai lava ke ngāueʻi tauʻatāina. ʻOku mamaʻo ʻa e niʻihi mei ʻapi ʻi he taimi lahi tahá, ko ia ʻoku ʻikai ai te tau maʻu kinautolu ʻi heʻetau faifakamoʻoni mei he fale-ki-he-falé. ʻOku nofo ʻa e niʻihi kehe ʻi he ngaahi feituʻu mamaʻo.
Ko e puké, kovi ʻa e ʻeá, pe ko ha tapui ʻoku fai te ne ʻai nai koe ʻi he taimi ʻe niʻihi ke ke nofo maʻu ai ʻi ho ʻapí. Te ke malava nai ke faitohi ke ʻoatu ai ha fakamoʻoni lahi ange ki ha kāinga pe ki ha taha ʻokú ke talanoa ki ai ʻo ʻikai ʻi he founga anga-mahení? Kuo hiki ha taha ʻo hoʻo kau ako Tohitapú? Ko ha tohi meia koe ʻa e meʻa nai pē ko ia ʻokú ne fiemaʻú ke tauhi ai ke moʻui ʻa ʻene mahuʻingaʻia fakalaumālié. Pe mahalo pē ʻe lava ke ke vahevahe ʻa e fakamatala Fakatohitapu feʻungamālié mo e faʻahinga ko ia kuo nau toki ʻosi malí, hoko ko e mātuʻa tauhi fānaú, pe mole atu ʻa e faʻahinga ʻoku nau ʻofa aí ʻi he maté.
Faifakamoʻoni ʻAki ʻa e Faitohi
ʻI he faitohi ke faifakamoʻoni ki ha taha kuo ʻikai ʻaupito te mo feʻiloakí, ʻuluaki fakafeʻiloaki atu koe. Te ke fakamatalaʻi nai ʻokú ke kau ʻi ha ngāue pole fakavahaʻapuleʻanga. Kapau ʻe hā ngali feʻungamālie ke fai pehē, fakahaaʻi ko e taha koe ʻo e Kau Fakamoʻoni ʻa Sihová. ʻAi ke ʻiloʻi ʻe he tokotahá ʻa e ʻuhinga ʻokú ke tohi atu ai kae ʻikai ke fai ange ha ʻaʻahi fakafoʻituituí. Tohi ʻo hangē pē ʻokú ke talanoa mata ki he mata mo e tokotahá. Neongo ia, ʻi he feongoongoi mo e fakahinohino ke “fakapotopoto ʻo hangē ko ha ngata, pea vale ʻi he kovi ʻo hangē ko ha lupe,” fai ha fakakaukau fakamātoato ki he lahi ʻo e fakamatala ʻoku totonu ke ke fai ʻo fekauʻaki mo koé.—Mt. 10:16.
Fakakau ʻi he faitohí ʻa e meʻa naʻá ke mei leaʻaki ki he tokotahá kapau naʻe lava ke ke ʻaʻahi kiate ia. Te ke fakakau nai ki ai ha lea kamata mei he tohi Reasoning pe ngāueʻaki ha tuʻuaki Fakatohitapu mei ha ʻīsiu ki muí ni ʻo ʻEtau Ngāue Fakafaifekau ʻo e Puleʻanga. ʻE lava ke ke fokotuʻu atu ha foʻi fehuʻi pea fakalototoʻaʻi ʻa e tokotahá ke ne fakakaukau fekauʻaki mo ia. ʻOku fakamatalaʻi pē nai ʻe he kau malanga ʻe niʻihi ʻoku tau maʻu ha polokalama taʻetotongi ki hono tali ʻa e ngaahi fehuʻi faka-Tohitapú pea lave leva ki he niʻihi ʻo e ʻuluʻi-kaveinga ʻo e vahé mei he taha ʻo ʻetau ngaahi tohi ako tokoní. Ko ha sīpinga faitohi ke fai ha fakamoʻoni ʻoku hā ia ʻi he peesi 73. Te ne ʻoatu nai kia koe ʻa e ngaahi fakakaukau, ka ʻoku lelei ke kehekehe ʻa e meʻa ʻi lotó. He ka ʻikai, ʻe toutou maʻu nai ʻe he kakaí ʻi he faai atu ʻa e taimí ʻa e tohi tatau.
ʻOku fakatoupīkoi ʻa e kakai ʻe niʻihi ke lau ha tohi lōloa mei ha sola. Ko ia ai, ko e ʻalunga nai ia ʻo e potó ke tauhi ke nounou hoʻo tohí. Fakangata hoʻo tohí ki muʻa ke hela nai ʻa e tokotaha ʻokú ne maʻú ʻi hono lau iá. ʻE feʻungamālie ke ʻoatu fakataha ai ha fakaafe kuo pulusi ki he ngaahi fakataha ʻi he Fale Fakatahaʻangá. ʻE lava ke ke fakakau ai ha tuleki, ko ha polosiua, pe ko ha ʻīsiu ʻo e Taua Leʻo pe ʻĀ Hake! pea fakamatalaʻi ʻe lava ke ʻoatu eni ʻi ha tuʻunga tuʻumaʻu kapau ʻe fiemaʻu. Pe ʻe lava ke ke ʻeke pe ʻe fai atu nai ha ʻaʻahi ki he ʻapi ʻo e tokotaha ʻokú ne maʻú ke talanoa lahi ange mo ia ʻi he tuʻunga-lea ʻoku fai ki ai ʻa e lāuleá.
Ko ha Fakamatala Fekauʻaki mo e Faʻungá
Sio he taimí ni ki he sīpinga faitohí. Fakatokangaʻi ʻa e meʻa hokó: (1) ʻOku hā maau, ʻo ʻikai felekeu. (2) Neongo kapau ʻe ʻavehalaʻi ʻa e silá, ʻe kei maʻu pē ʻa e hingoa ʻo e tokotaha naʻá ne fai ʻa e tohí mo e tuʻasila fakaemeilí. (3) Ko e taumuʻa ʻo e tohí ʻoku fakahaaʻi faingofua mo hangatonu ia ʻi he ʻuluaki palakalafí. (4) Ko e foʻi fakakaukau tefito taki taha ʻoku fakahoko ia ʻi ha palakalafi mavahe. (5) ʻI he fakakaukau atu ki hono taumuʻá, ko e tohí ke ʻoua ʻe fuʻu fāinoa pe fuʻu tuʻunga maau.
ʻI ha faitohi tuʻunga maau ange, hangē ko ia ʻe ʻoatu nai ʻe he sekelitali ʻa e fakatahaʻangá ki he ʻōfisi vaʻá, ʻe kau nai ki ai ʻa e hingoa ʻo e fakatahaʻangá, fakataha mo e hingoa ʻo e sekelitalí tonu, ko hono tuʻasila fakaemeilí, mo e ʻahó. Ko e hingoa mo e tuʻasila ʻo e tokotahá pe ko e kautaha ʻoku ʻave ki ai ʻa e tohí ʻe toe hā mo ia. ʻE hoko atu ai ha fakaʻapaʻapa feʻungamālie. Ke tāpuni ʻa e tohí, ʻi he ngaahi lea ʻe niʻihi ko e kupuʻi lea hangē ko e “Fakaʻapaʻapa atu” ʻoku hā nai ia ʻi ʻolunga ʻi he fakamoʻoni hingoá. Ko e fakamoʻoni hingoá tonu ʻoku totonu ke tohinimaʻi.
ʻI ha faitohi pē, fai ha tokanga ki he sipela totonú, kalamá, ngaahi fakaʻilonga mālōloó pea mo e tuʻunga maʻá foki. Ko hono fai iá ʻe ʻoatu ai ʻa e tuʻunga taau ki hoʻo tohí pea mo e pōpoaki ʻoku ʻi aí.
ʻI tuʻa ʻi he silá, fokotuʻu maʻu pē ai ha tuʻasila fakafoki—ʻe lelei ange ʻa ho tuʻasila fakaemeilí tonu. Kapau ʻokú ke ongoʻi ʻe taʻefakapotopoto ke ʻoatu ho tuʻasilá tonu ʻi he faifakamoʻoni ʻaki ʻa e faitohi ki he kau solá, ʻeke ki he kau mātuʻá pe te nau loto ke ke ngāueʻaki ʻa e tuʻasila fakafoki ʻo e Fale Fakatahaʻanga fakalotofonuá. Ko e tuʻasila ʻo e Sōsaieti Taua Leʻó ʻoku ʻikai ʻaupito totonu ke ngāueʻaki ia ki he taumuʻá ni, he ʻe fakahaaʻi taʻetotonu ai ko hoʻo fetuʻutakí naʻe fai ia mei he ngaahi ʻōfisi ʻo e Sōsaietí pea ʻe fakatupunga ai ʻa e puputuʻu. Kapau ʻoku ʻikai ke ʻi ai ha tuʻasila fakafoki pea ʻoku ʻave fakataha ai mo ha kiʻi tohi kuo pulusi, ʻe ʻoatu ʻe he meʻá ni foki ha fakakaukau hala ko e Sōsaietí naʻe ʻoatu mei aí.
Fakapapauʻi ke ke fakapipiki ki ai ha sitapa feʻunga, tautefito kapau ʻokú ke ʻave fakataha ai mo ha kiʻi tohi kuo pulusi. Kapau ʻoku ʻikai ke feʻunga ʻa e sitapá, ʻe fakamoʻuaʻi nai ʻa e tokotaha ʻokú ne maʻu ʻa e tohí ʻaki ʻa e toenga totongi ʻoku fiemaʻú, pea ʻe toʻo nai ʻe he meʻá ni ʻa e tokangá mei hoʻo pōpoakí. Manatuʻi ʻi he ngaahi fonua lahi ʻi he taimi ʻoku ʻave fakataha ai ha polosiua pe ko ha makasiní, ʻoku toe lahi ange ai ʻa e totongi fakaemeilí ʻi he meʻa ʻoku fiemaʻu ki ha faitohi ʻataʻatā peé.
Ko e Ongo Totonú
ʻI hoʻo fakakakato pē hoʻo tohí, lau ia ke fakapapauʻi ʻa e meʻa ʻi lotó. ʻOku ongo fēfē ia? ʻOku ongo fakakaumeʻa mo fakapotopoto? Ko e ʻofá mo e anga-ʻofá ʻoku ʻi he lotolotonga ia ʻo e ngaahi ʻulungaanga ʻoku tau feinga ke fakahāhā ʻi heʻetau feangainga mo e niʻihi kehé. (Kal. 5:22, 23) Kapau ʻokú ke ʻiloʻi ha ongo taʻepau pe ko ha fakahaaʻi ʻo e tuʻunga ʻoku ʻikai sai, fakatonutonu ʻa e fakaleá.
ʻE lava ke ʻalu ha faitohi ki he ngaahi feituʻu ʻe ʻikai te ke lava ʻo ʻalu ki aí. Ko e moʻoniʻi meʻa pē ko ení ʻokú ne ʻai ia ko ha meʻangāue mahuʻinga ki he ngāue fakafaifekaú. Koeʻuhi ʻoku fakafofongaʻi koe ʻe hoʻo tohí pea mo e ngaahi meʻa ʻokú ke mahuʻingaʻia aí, fai ha fakakaukau ki he meʻa ʻoku leaʻaki aí, anga hono fōtungá mo e anga ʻo ʻene ongó. ʻOkú ne tokonaki mai nai ʻa e meʻa tofu pē ko ia ʻoku fiemaʻu ke kamataʻi, fakaivimālohi, pe fakalototoʻaʻi ai ha soulu mahuʻinga ʻi he hala ki he moʻuí.