Puha Fehuʻi

◼ Ko e hā ʻoku totonu ke tau fakakaukau ki ai ʻi he taimi ʻoku fai ai ha tohi ki he tokotaha-ʻapí, ʻa ia naʻe ʻikai malava ke maʻu atu ki ʻapí?

ʻI ha ngaahi ʻuhinga kehekehe, ʻoku tau ʻiloʻi ʻoku faingataʻa ange ke feʻiloaki mo e kakaí ʻi he taimi ʻoku tau ʻaʻahi atu ai ki honau ngaahi ʻapí. Kuo ʻiloʻi ʻe he kau malanga ʻe niʻihi ko hono fai ha tohi ko ha founga ʻaonga ia ke aʻu ai kiate kinautolú. Lolotonga ʻe lava ke maʻu ai ha ngaahi ola lelei, ʻoku ʻi ai ha fiemaʻu ke fai ha fakakaukau ki he ngaahi fakamanatu ʻe niʻihi ʻa ia ʻe lava ke tokoni kiate kitautolu ke fakaʻehiʻehi ai mei ha ngaahi faingataʻa ʻe niʻihi:

ʻOua ʻe ngāueʻaki ʻa e tuʻasila ʻo e Sōsaietí. ʻE fakahaaʻi taʻetotonu ai heni ko e tohí naʻe ʻoatu mei hotau ngaahi ʻōfisí, ʻo fakatupunga ai ha ngaahi palopalema ʻoku ʻikai ke fiemaʻu pea ʻi he taimi ʻe niʻihi ko ha toe fakamole kehe.

Fakapapauʻi ʻokú ke maʻu ʻa e tuʻasila totonú mo ha sitapa feʻunga ke līʻaki.

ʻOua ʻe fakatuʻasila ʻa e ngaahi tohí ki ha “Taha Pē”; ngāueʻaki ha hingoa pau.

ʻOua ʻe tuku ʻa e ngaahi tohí ʻi he matapaá ʻi he taimi ʻoku ʻikai ai ha taha ʻi he ʻapí.

ʻOku lelei ange ha tohi nounou. Fakahū atu ai ha tuleki pe ha makasini ʻo ʻikai ko e feinga ke hiki ha pōpoaki ʻoku fuʻu lōloa.

Ko hono taipeʻi ʻo e tohí, ʻoku faingofua ange ai ke lau pea hā fakatupunga fakamānako.

ʻOku ʻikai lau ʻa e tohí ko ha ngaahi toe ʻaʻahi tukukehe kapau naʻá ke faifakamoʻoni ki muʻa ki he tokotaha ko iá.

Kapau ʻokú ke fai ha tohi ki ha taha naʻá ne fakahā ha mahuʻingaʻia ki muʻa, ʻoku totonu ke ke ʻoatu ha tuʻasila pe fika telefoni koeʻuhi ke lava ʻo fai ha fetuʻutaki mai kiate koe. Fakamatalaʻi ʻetau polokalama ako Tohitapú.

Fakalahi atu ʻaki ha fakaafeʻi ki he ngaahi fakataha ʻa e fakatahaʻangá ʻi he feituʻu ko iá. Talaange ʻa e tuʻasilá pea mo e taimi ʻo e fakatahá.

ʻOua ʻe hokohoko atu hono fai ha tohi ki he ngaahi ʻikai-ʻi-ʻapí hili hono fakafoki atu ʻa e mape ʻo e feituʻu ko iá; ko e tokotaha malanga ʻoku lolotonga ngāue ʻi he feituʻú ʻoku totonu ke ne ngāueʻi ia.