Ngāueʻaki ʻa e Fakamatala Kuo Vaheʻí

ʻOKU fakahoa ʻe he Tohitapú ʻa e fakatahaʻanga Kalisitiané ki ha sino fakaetangata. ʻOku fiemaʻu ʻa e konga taki taha ka “ʻoku ʻikai ke faiva taha ʻa e kupu kotoa pe.” ʻI he fehoanaki mo e meʻa ko iá, ʻoku totonu ke tau ngāue ki ha monū pē kuo tuku mai kia kitautolu. ʻOku fiemaʻu ʻi he meʻá ni ke tau mahinoʻi mo tokangaʻi lelei ha konga malanga pē ʻoku vaheʻi mai kae ʻikai ko hono fakasiʻisiʻi ʻa e mahuʻinga ʻo ha ngaahi tuʻunga-lea ʻe niʻihi koeʻuhi ʻoku tau fakakaukau ʻe fakamānako ange ha ngaahi tuʻunga-lea kehe. (Loma 12:​4-8) ʻOku maʻu ʻe he kalasi tamaioʻeiki anga-tonu mo potó ʻa e fatongia ki hono tokonaki mai ʻa e meʻakai fakalaumālié “ʻi hono taimi totonu.” (Mt. 24:45) ʻI heʻetau ngāueʻaki ʻetau ngaahi malava fakafoʻituituí ke fakahoko ʻa e ngaahi malangá ʻo fakatatau ki he ngaahi fakahinohino kuo tau maʻú, ʻoku tau fakahaaʻi ai ʻa e houngaʻia ki he fokotuʻutuʻu ko iá. ʻOku tokoni eni ki he lele lelei ʻa e fakatahaʻangá ʻi he tuʻunga fakalūkufuá.

Meʻa ke Fakakaú. ʻI hono vaheʻi atu kiate koe ha tuʻunga-lea ʻi he akó, fakapapauʻi ke fakahoko ʻa e tuʻunga-leá ʻo ʻikai ko ha meʻa kehe. ʻI he ngaahi tuʻunga lahi tahá, ʻe ʻoatu ai ʻa e maʻuʻanga fakamatala pau. Kapau ʻoku ʻikai ke tala atu ʻa e fakamatala kuo pulusi ke ngāueʻaki ko e makatuʻunga ia ki hoʻo malangá, te ke tānaki fakataha nai ʻa e fakamatala mei ha ngaahi maʻuʻanga fakamatala ʻi he fili pē ʻaʻau. Kae kehe, ʻi hoʻo teuteu hoʻo malangá, fakapapauʻi ko e malangá kotoa ʻoku langa takatakai ia ʻi he tuʻunga-lea kuo vaheʻi atú. ʻI hono fili ʻa e meʻa ke fakakaú, ʻe toe fiemaʻu ke ke fakakaukau ki hoʻo kau fanongó.

Ako fakalelei ʻa e maʻuʻanga fakamatalá, ʻo ʻanalaiso ʻa e ngaahi konga Tohitapu ʻoku kau ki aí. Fakakaukau leva ki he founga ke ngāueʻaki ia ʻi he tuʻunga ola lelei tahá ke ʻaonga ki he kau fanongó. Fili ha poini ʻe ua pe tolu nai mei he fakamatala kuo pulusí ke ngāueʻaki ko e ngaahi poini tefito ia ʻi hoʻo malangá. ʻI he founga tatau, fili mei he fakamatala kuo vaheʻí ʻa e ngaahi konga Tohitapu ʻokú ke palani ke lau mo lāulea ki aí.

Ko e hā hono lahi ʻo e fakamatalá ʻoku totonu ke ke kāpuí? Ko e meʻa pē ko ē ʻe lava ke ke ngāueʻaki leleí. ʻOua ʻe liʻaki ʻa e faiako leleí koeʻuhi pē ke fakakau ai ha fakamatala lahi. Kapau ʻoku ʻikai ke feʻunga ʻa e niʻihi ʻo e fakamatalá mo e taumuʻa ʻo hoʻo malangá, tokangataha ki he ngaahi konga te ne tokoniʻi koe ke ke aʻu ai ki he taumuʻa ko iá. Mei he fakamatala kuo vaheʻí, ngāueʻaki ʻa e meʻa ʻe fakatupu-ʻilo mo ʻaonga taha ki hoʻo kau fanongó. Ko hoʻo taumuʻa ʻi he poini akonakiʻi ʻi he lea ko ení ʻoku ʻikai koeʻuhí ke sio ai ki he anga ʻo e lahi ʻo e meʻa ʻe lava ke ke kāpuí, ka ke ngāueʻaki ʻa e meʻa kuo vaheʻí ko e makatuʻunga ia ki hoʻo malangá.

Ko hoʻo malangá ʻoku ʻikai ʻuhinga iá ke hoko ko ha fakanounou pē ʻo ha fakamatala kuo vaheʻi atu. ʻOku totonu ke ke palani ke fakamatalaʻi ha ngaahi poini pau, fakamatala fakaikiiki lahi ange ki ai, fakatātaaʻi ia, pea fai nai ha fakatātā ki honau ngāueʻakí. ʻOku totonu ke ngāueʻaki ʻa e ngaahi fakakaukau lahi ange ke fakatupulekina ai ha ngaahi poini mahuʻinga ki hoʻo fakamatala kuo vaheʻi atú kae ʻikai ke fetongi ʻa e fakamatala ko iá.

Ko e fanga tokoua ʻoku nau maʻu ʻa e ngaahi tuʻunga taau ʻoku fiemaʻu ʻi he tuʻunga ko e kau faiakó ʻe fakaafeʻi nai ʻi ha taimi ke nau fai ha fakahinohino ʻi he Fakataha Ngāué. ʻOku nau mahinoʻi ʻa e fiemaʻu ke ngāueleleiʻaki ʻa e fakamatala kuo vaheʻí kae ʻikai ko hono fetongi ia ʻaki ha meʻa kehe. ʻI he founga meimei tatau, ko e fanga tokoua ʻoku nau fakahoko ʻa e ngaahi malanga maʻá e kakaí ʻoku ʻoange kia kinautolu ʻa e ngaahi ʻautilaine ke muimui ai. ʻOku fakaʻatā heni ki ha feʻunuʻaki, ka ʻoku nau fakahaaʻi mahino ʻa e ngaahi poini tefito ke fakahokó, ko e ngaahi fakaʻuhinga fakaepoupou ke ngāueʻakí, pea mo e ngaahi konga Tohitapu ʻoku tokonaki mai ai ʻa e makatuʻunga ki he malangá. Ko hono ako ʻa e founga ke faiako ai ʻo ngāueʻaki ʻa e fakamatala kuo vaheʻí ko ha makatuʻungá ko ha konga mahuʻinga ia ʻo e teuteu ki ha ngaahi monū fakaemalanga kehe.

ʻE toe lava ʻe he ako ko ení ke tokoniʻi koe ke fai ha ngaahi ako Tohitapu fakalakalaka ʻi ʻapi. Te ke ako ai ke fakahanga ʻa e tokangá ki he fakamatala akó kae ʻikai ko e liliu mei he tuʻunga-leá ʻaki hono fakaeʻa ʻa e ngaahi meʻa kehe ʻa ia ʻe fakamānako nai kae ʻikai fiemaʻu ki hano mahinoʻi ʻo e tuʻunga-leá. Neongo ia, kapau ʻokú ke maʻu ʻa e taumuʻa ʻo e lēsoni ko ení, ʻe ʻikai te ke hoko ai ʻo fuʻu fefeka ʻo ʻikai ai te ke lava ke tokonaki ha fakamatala lahi ange ʻa ia ʻe fiemaʻu nai ʻe he tokotaha akó.