ʻI he Tēpile ʻa e ʻEikivaká

KO E kakai mahuʻingá, meʻakai leleí, mo e fetalanoaʻaki fakafiefiá ʻokú ne ʻai ke ifo ha meʻakai ʻi he tēpile ʻa e ʻeikivaka ʻi he vaká. Ka ko ha lāulea ʻi he tēpile ʻa ʻEikivaka Robert G. Smith, ʻo e Kautaha Vaka White Star, naʻe fakaeʻa ai ha kātoanga kai fakalaumālie.​—Aisea 25:6.

ʻI he 1894, ʻi hono taʻu 24, naʻe angi ai ʻe Robert ʻa e vaka faifolau ko e Kinclune of Dundee ʻi heʻene fai ʻene ʻuluaki folau takai ʻi he māmaní. Ki mui aí, naʻá ne ʻeikivaka ʻi he ngaahi vaka White Star, hangē ko e Cedric, ko e Cevic, pea mo e Runic.a Lolotonga ʻa e kolosi ʻi he ʻAtalanitikí mei Niu ʻIoke ki Liverpool, ʻIngilani, ʻi he taha ʻo e ngaahi vaká ni, naʻe talitali ai ʻe Robert ʻi he tēpile ʻa e ʻeikivaká ʻa Charles Taze Russell. Ko e fetalanoaʻaki mo Russell naʻá ne kamataʻi ʻa e mahuʻingaʻia ʻa Robert ʻi he pōpoaki ʻa e Tohitapú, pea ke tokoniʻi ia ke ne ʻilo lahi angé, naʻá ne maʻu fiefia meia Russell ʻa e ngaahi tatau ʻo e Studies in the Scriptures.

Naʻe hokohoko fetuʻutaki faitohi ki ai ʻa Russell, pea ko hono olá, naʻe tupulekina ai ʻa e mahuʻingaʻia ʻa Robert ʻi he pōpoaki ʻa e Tohitapú. Naʻe vahevahe ʻe Robert ʻa ʻene ʻilo foʻoú ki hono uaifí. Naʻe ʻikai fuoloa kuó na fakatou hoko ko e ongo Ako Tohitapu longomoʻui, hangē ko ia naʻe uiʻaki ʻa e Kau Fakamoʻoni ʻa Sihová he taimi ko iá. Naʻe maʻu ʻe Robert ki mui ange ʻa e monū ʻo hono fakahoko ʻa e ngaahi malanga faka-Tohitapú. Ko e fakatātaá, ʻi Pilisipeini, ʻAositelēlia, naʻá ne malanga ai ʻi he “Faitoʻo Fakafiemālie ʻo Kiliatí” pea fakahaaʻi ai ʻa e founga ʻo e maʻu ʻi he Folofola ʻa e ʻOtuá ha pōpoaki ʻa ia ko ha “faitoʻo ia ki he ngaahi mamahi fakamāmaní kotoa.” ʻI ʻIngilani, naʻe tokoni ai ʻa hono uaifí mo e fānau īkí ki hono huluʻi ʻa e “Tulama-ʻAta ʻo e Fakatupú,” ʻi hono tā ʻa e ngaahi hiki ʻo e malanga ʻa Russell lolotonga hono hulu ʻa e ngaahi silaití.

Naʻe tuku ʻe Robert ki heʻene fānaú ʻa e tofiʻa ʻo e moʻoni ʻo e Puleʻangá naʻá ne maʻú. ʻI he ʻahó ni, ko e toʻutangata ia ʻe nima ki mui, ʻoku moʻumoʻua ai ʻa e ngaahi mēmipa fakafāmili ʻe toko 18 ʻi hono vahevahe atu ʻa e ongoongo leleí ki he niʻihi kehé, ʻo houngaʻia ʻi he meʻa naʻe ʻomai ʻi he tēpile ʻa e ʻeikivaká.

Fakafou ʻi heʻenau ngaahi tohí mo ʻenau ngāue fakaeako Tohitapú, ʻoku tokoniʻi ai ʻe he Kau Fakamoʻoni ʻa Sihová ʻa e kakai ʻi māmani lahí ke nau ʻiloʻi ʻa e pōpoaki faka-Tohitapu ʻa ia naʻá ne langaʻi ʻa e mahuʻingaʻia ʻa ʻEikivaka Smith. Ko koe foki ʻe lava ke ke ʻiloʻi ʻa e meʻa naʻe fakamoʻoniʻi ʻa ʻene mātuʻaki mahuʻinga ʻi he tēpile ʻa e ʻeikivaká.

[Fakamatala ʻi lalo]

[Fakatātā ʻi he peesi 8]

Robert G. Smith

[Fakatātā ʻi he peesi 8]

Charles T. Russell