Tokoniʻi ʻa e Kau Foʻoú ke Laka Ki Muʻa

¹ Naʻe ofi ʻi he 11.5 miliona ʻa e kakai ʻi māmani lahi naʻa nau fakatahataha ki he Fakamanatu ʻo e pekia ʻa Kalaisi ʻi ʻEpeleli 17, 1992. Naʻe tokolahi ange eni ia ʻi he liunga ua mo e konga ʻo e tokolahi fakakātoa ʻo e kau malanga ʻi he ngaahi fakatahaʻanga ʻo e Kau Fakamoʻoni ʻa Sihová. Ko e meʻa fakatupu fiefia ē ʻi heʻetau vakai atu ki he fuʻu tokolahi ʻoku ʻaukolo mai ki he “moʻunga ʻo Sihova”! (Mai. 4:2) ʻI he taimi lolotongá ni ʻoku ʻi ai ʻa e kakai ʻe toko fitu miliona nai ʻoku nau fakahā ʻa e tuʻunga mahuʻingaʻia ʻi he lotu moʻoní ka ʻoku teʻeki ai ke nau hoko ʻo fakahāhā ko e kau fakalāngilangiʻi ʻo Sihova. ʻOku fakapapauʻi kuo toki fakamoʻoniʻi ʻa e ngaahi lea ʻa Sīsū “kuo lahi ʻa e taʻu kuo motuʻu”!​—Mt. 9:​37, 38.

² Lolotonga ʻo e māhina ko ʻEpelelí, te tau fai ha feinga makehe ke tokoniʻi ʻa kinautolu kotoa ʻoku taau ke nau kau ʻi he ngāue fakamalangá. ʻE tokoni ʻa e kau malanga alafuá mo e kau taaimuʻá ki he tokotaha faiako ʻo e Kulupu Ako Tohitapu Fakaefakatahaʻangá ʻi he ngafa tefito ko ʻení. Ko ʻetau kolo ʻe tolu ko e (1) fokotuʻutuʻu ke fai ha ako Tohitapu mo kinautolu kau foʻou naʻa nau maʻu ʻa e malanga fakahāhā makehé mo e Fakamanatu ʻi he taʻu ní; (2) ke fakalototoʻaʻi ʻa kinautolu ʻoku nau akó ke nau hoko ʻo taau ko e kau malanga taʻepapitaiso; pea (3) ke fakalahi ʻa ʻetau kau fakafoʻituitui ki he ngāue fakamalangá.

³ ʻOku totonu ke fai ha feinga makehe ʻe kitautolu kātoa ke talitali lelei mo fakamaheni mo kinautolu kei foʻou ʻoku nau haʻu ki ha taha ʻo ʻetau ngaahi fakatahá. Ko e hā te tau malava ke fai ke fakalotolahiʻi ʻa e tokolahi ange ʻo e kakai ko eni ʻoku mahuʻingaʻiá ke fai maʻu pē ha ako Tohitapu ʻi ʻapi mo kinautolu?

⁴ Ko e ʻavalisí, naʻe feʻunga mo e ngaahi ako Tohitapu ʻe 80 naʻe fai ʻi Tongá ni ʻi he māhina taki taha ʻo e taʻu fakangāue 1992. ʻE fakaafeʻi nai ʻe he kau malangá ʻa e tokotaha ʻokú ne fai ʻenau ako fakakulupú ke na kaungā ō ʻi he ngaahi ako Tohitapú ke fakamaheni mo ʻene kau akó. (km 3/81 p. 4) Ko ha niʻihi ʻo e ngaahi ako Tohitapu ko ʻení kuo nau haʻu nai ki he ngaahi fakatahá pea kuo nau taau ke kau ki he ngāue fale-ki-he-falé. Kuo kau maʻu pē ʻa e kau foʻoú ki ha ngāue fakamoʻoni ʻikai ʻi he founga anga-mahení? Kuo nau aʻusia ʻa e tuʻunga taau ke hoko ko ha tokotaha malanga taʻepapitaiso ʻo hangē ko ia ʻoku fakahā ʻi he tohi ko e Our Ministry, peesi 97-99? Kapau ʻoku pehē, fakamatalaʻi kiate kinautolu ʻa e founga te nau malava ai ke kamata ʻi he ngāue fale-ki-he-falé ʻi he hili haʻanau hoko ʻo taau ko e kau malanga taʻepapitaiso.

⁵ Ke ʻoua naʻa ngalo ʻiate kitautolu ʻetau fefakalototoʻaʻaki ʻi heʻetau feohi ko e kau Kalisitiané. (Hep. 10:​24, 25) Kapau kuo ʻi ai ha taha kuo kiʻi māmālie hifo ʻi heʻene ngāue fakamalangá, ko e tokotaha ko ia ʻokú ne fai ʻa e ako Tohitapu ʻa e kulupú ʻoku totonu ke ne fai ha ngaahi fokotuʻutuʻu pau ke fai ha tokoni mo ha fakalototoʻa. ʻI he taimi ʻe niʻihi ko e meʻa pē ʻoku fiemaʻú ko ha fakaafeʻi loto-māfana pē ke kau fakataha mo kitautolu ʻi he ngāue fakamalangá.

⁶ Kuo pau ke tau ngāue fakataha kotoa ke ʻai ʻa ʻEpeleli ko e māhina tuʻu-ki-muʻa ʻi he ngāue fakamalangá. ʻE tokoni lahi ki he meʻá ni ʻa e loto-māfana ʻa e tokotaha taki ʻo e kulupu ako Tohitapú ʻo tokoniʻi ʻa e kau mēmipa taki taha heʻene kulupú ke nau kau kakato ki he ngāue fakamalangá. ʻE fokotuʻutuʻu nai ha toe ngaahi fakataha lahi ange ki ha ngāue fakamalanga. ʻE lava ke fai ha tokanga makehe kiate kinautolu ʻoku taʻumotuʻá, pea mo fai ha tokoni ki he kau talavoú ʻi ha ngaahi founga ʻaonga. ʻOku totonu ke fakapapauʻi ʻe he ngaahi mātuʻá ke kau kātoa ʻa e fāmilí ki he ngāue fakamalangá he lolotonga ʻo ʻEpelelí. Kapau te tau foaki kotoa ʻe kitautolu ʻa e lelei tahá kia Sihova ʻi he taimi ko ʻeni ʻo e ututaʻú, te tau maʻu ʻa ʻene tāpuaki lahi.