Puha Fehuʻi

◼ Ko e taimi fē ʻoku totonu ke fai ai ʻa e Ako Tohi ʻa e Fakatahaʻangá?

ʻOku faʻa ʻaonga mo faingamālie ke fai ha ngaahi kulupu ako tohi ʻa e fakatahaʻangá ʻi ha ngaahi feituʻu kehekehe ʻi he feituʻu ko ia ʻoku ʻi ai ʻa e fakatahaʻangá kae ʻikai ko e haʻu kotoa pē ke fakataha ʻi he Kingdom Hall. ʻOku totonu ke fai ʻa e ngaahi ako ko ʻení ʻi he taimi ʻoku faingamālie ki he tokolahi taha kuo vaheʻi ke kau ki aí. ʻOku faʻa fai eni ʻi ha efiafi lolotonga ʻo e uiké ʻa ia ʻoku ʻikai ke toe fai ai ha fakataha pe ha fokotuʻutuʻu ki he ngāue fakamalangá. Kae kehe ʻe toe ʻaonga nai ke fokotuʻutuʻu ke fai ha ako tohi ʻa e fakatahaʻangá he lolotonga ʻa e taimi ʻahó ke kau ki ai ʻa e kau taʻumotuʻá ʻa ia ʻoku ʻikai te nau faʻa saiʻia ke ʻalu holo ʻi he taimi poʻulí pea pehē kiate kinautolu ʻoku ngāue poʻulí. ʻI ha ngaahi tuʻunga ʻe niʻihi, ʻe fakapotopoto ke fai ha ako ʻi he taimi ʻahó ʻi he ngataʻanga ʻo e uiké.

ʻE fai ʻe he kau mātuʻá ha fakaʻekeʻeke feʻunga ke fakapapauʻi ʻa e taimi ki he fakatahá ʻa ia ʻe “feʻunga mālie ki he toko taha lahi taha ʻo e kau malangá” pea pehē kiate kinautolu ʻoku fie fanongó. (om p. 62) ʻOku totonu ko e taimi ʻe fili ke fai ai iá ko e ʻaho mo e taimi ʻe ʻikai te ne toe uesia lahi pe fakangatangata ai ʻa e ngaahi fokotuʻutuʻu ki he ngāue fakamalangá.