Ngaahi Fakataha Mohu ʻUhinga ki he Ngāue Fakamalangá

¹ ʻI he Luke 10:​1-11, ʻoku tau maʻu ai ha fakamatala ʻo kau ki he fakataha naʻe fai ʻe Sīsū mo ʻene kau ākonga ʻe toko 70 naʻe toki vaheʻi foʻoú ke tokoniʻi kinautolu ke nau teuteu ki he ngāue fakamalangá. Naʻá ne tokonaki ʻa e ngaahi fakahinohino mahino ke tokoniʻi kinautolu ke ʻai ke nau fokotuʻutuʻu maau, teuteu ʻa e meʻa ke nau leaʻakí, pea ke nau fekuki mo e ngaahi tuʻunga faingataʻá. Te tau ako ha meʻa ʻaki ʻetau vakaiʻi ʻa e fakamatalá ni.

² ʻOku hā mahino ko e kotoa ʻo e kau ākonga ʻe toko 70 naʻa nau maʻu ʻa e fakatahá mo Sīsū. ʻOku mole noa ʻa e taimí ʻi he ngaahi fakataha ki he ngāue fakamalangá kapau ʻoku angaʻaki ʻe ha niʻihi ʻa e tōmui ki aí. Ko ʻenau tōmuí ʻoku faʻa toe liliu ai ʻa e ngaahi meʻalele mo e feituʻu kuo ʻosi vaheʻí. ʻOku faʻa fakatupunga ai ke toe tatali ʻa e toenga ʻo e kulupú. Ko kitautolu hono kotoa ʻoku lava ke fai hotau lelei tahá ke tau aʻu taimi totonu pea ke mateuteu ke ʻalu leva ki he feituʻu kuo vaheʻí.

³ Naʻe ʻoange ʻe Sīsū ki he kulupú ha tuʻunga-lea mahino ʻo e fetalanoaʻakí ke ngāueʻaki, ʻa ia ko e “Puleʻanga ʻo e ʻOtua.” (Luke 10:9) Kuo vaheʻi mai kiate kitautolu ke malangaʻaki ʻa e pōpoaki tatau pē, pea ʻoku tau faʻa houngaʻia ʻi he ngaahi fokotuʻu ʻaonga fekauʻaki mo e meʻa te tau leaʻakí. Ko e toko taha ʻokú ne tokangaʻi ʻa e kulupú te ne lave nai ki he tohi ko e Reasoning, ʻa ia ʻoku ʻomai ai ʻo laka hake ʻi he ngaahi lea kamata kehekehe ʻe 40 pea mo e ngaahi konga Tohi Tapu feʻunga mālie ʻe lava ke ngāueʻaki ʻi he ngaahi tuʻunga lahi kehekehe. Ko hano toe fakamanatu nounou ha fakamatala ʻe taha pe ua ʻe tokoni ia kiate kitautolu ke tau maʻu ha meʻa ʻi heʻetau fakakaukaú ke tau leaʻaki, ʻo tokoniʻi ai kitautolu ke tau lea ʻi he ngaahi matapaá mo e tui pau lahi ange.

⁴ Naʻe ʻikai ke ngata pē ʻi hono tala ʻe Sīsū ki heʻene kau ākongá ʻa e meʻa ke nau leaʻakí ka naʻá ne toe tala ange foki kiate kinautolu ʻa e founga ke nau leaʻaki ai iá. (Luke 10:​5, 6) Ko e ngaahi fakahāhā ʻoku fai ʻi he polokalama ʻo e Fakataha Ngāué ʻoku fakahā mai ai kiate kitautolu ʻa e founga ʻoku malava ke tau fai ai ha fakamatala ola lelei. Ko e toko taha ʻokú ne tokangaʻi ʻa e kulupú te ne toe fakamanatu nai ha ngaahi meʻa naʻe lave ki ai ʻi he fakataha fakamuimuí pea ʻohake ʻa e ngaahi fokotuʻu ʻo kau ki he founga ʻe lava ke ngāueʻaki ai ia ʻi he ngāue fakamalangá ʻi he ʻaho ko iá. Ko ha fakahāhā fuonounou kuo ʻosi teuteuʻi ʻo fekauʻaki mo ha fakamatala fakatohitapu faingofuá ʻe tokoni ia kiate kitautolu ke fakatahaʻi mo ʻetau ngaahi fakakaukaú pea ʻai ia ʻi heʻetau lea pē ʻatautolu.

⁵ Naʻe toe hīnoiʻi foki ʻe Sīsū ʻene kau ākongá fekauʻaki mo honau ʻulungāangá. (Luke 10:​7, 8) Ko e toko taha ʻokú ne tokangaʻi ʻa e kulupú te ne toe fakahā mai nai kiate kitautolu ʻa e fakahinohino fakahangatonu ke tokoniʻi ai kitautolu ke fakaʻehiʻehi mei ha faʻahinga meʻa pē ʻe hoko ʻo fakasiʻisiʻi ai ʻetau ngāué. Te ne fakatokanga mai nai kiate kitautolu ʻo fekauʻaki mo e fakapupunga ʻi he ngaahi tuliki he halá pe ko e mole ʻo e taimí ʻi he fakakikihi mo e kau fakafilí. Te ne fakamanatu mai nai kiate kitautolu ʻo kau ki he fie maʻu ke tau tauhi ha ngaahi lēkoti fale-ki-he-fale ʻoku tonu, pe ke ʻai ʻa e toko taha ʻapí ke ne ʻilo ʻoku tali lelei ʻa e ngaahi tokoni loto-fiefoaki ki he ngāué ʻi māmani lahí. ʻOku fie maʻu nai ki he ngaahi mātuʻá ha fakamanatu ʻo fekauʻaki mo hono tokangaʻi lelei ʻenau fānaú.

⁶ Naʻe kau loto-lelei ʻa e kau ākonga ʻe toko 70 ʻo nau ngāueʻaki ʻa e ngaahi fakahinohino ʻa Sīsuú pea ʻi he hili iá naʻa nau “foki fiefia.” (Luke 10:17) Kapau ʻoku lelei ʻa e anga ʻo ʻetau tali ʻa e ngaahi tataki ʻoku tau maʻu ʻi he ngaahi fakataha ki he ngāue fakamalangá, te tau fakatuʻamelie atu foki ki he fiefia ʻoku lahi ange ʻi hono malangaʻi ʻa e pōpoaki fekauʻaki mo e Puleʻangá.​—Ngāue 13:​48, 49, 52.