Hoko ko e Kau Faiako ʻo e Folofola ʻa e ʻOtuá—ʻI Hono Ngāueʻaki ʻa e Ngaahi Polosiuá
1 Ko e kau sevāniti ʻosi fakatapui kotoa pē ʻa Sihova ʻoku ʻi ai honau fatongia ke kau ʻi he ngāue ko hono akoʻi ʻa e Folofola ʻa e ʻOtuá ki he niʻihi kehé. Ko e māfatukituki ʻo e fatongiá ni ʻoku hoko ia ʻo hā mahino ʻi heʻetau houngaʻia ʻi he fekau kuo tuku kiate kitautolu ʻe he tokotaha ʻoku ʻaʻana ʻa e mafai kotoa ʻi hēvani pea ʻi he māmaní ke ‘ngaohi ʻa e ngāhi kakai kotoa pe ko ʻene kau ako, mo akoʻi kinautolu.’ (Mt. 28:18-20) Ko ia ai, ko e kau ʻi hono malangaʻi ʻo e ongoongo leleí ʻoku fiemaʻu ke tau hoko ko e kau faiako!—2 Tīm. 2:2.
2 ʻE lava ke tau ngāueʻaki ʻa ʻetau pōtoʻi ʻi he faiakó ʻi hono tuʻuaki ʻo e ngaahi polosiuá ʻi he lolotonga ʻo ʻAokosí. ʻE lava ke tau fili ha ngaahi fakakaukau Fakatohitapu fakamānako mei ai ʻo teuteuʻi ha fakamatala ʻa ia te ne tokoniʻi kitautolu ke kamata ha fetalanoaʻaki.
3 ʻI hono tuʻuaki ʻo e polosiua “‘Vakai! ʻOku Ou Fakafoʻou ʻa e Meʻa Kotoa Pe’” ʻe lava ke ke pehē:
◼ “Kuo mau ʻaʻahi ki he tokolahi ʻo ho ngaahi kaungāʻapí ʻo ʻiloʻi ai ʻoku nau fuʻu hohaʻa fekauʻaki mo e fakafokifā ʻa e lahi ʻo e tupulekina ʻi he faihiá, tau toitoí, mo e fakamālohí. ʻI hoʻo fakakaukaú, ko e hā kuo hoko ai ʻa e meʻá ni ko ha palopalemá? [Tuku ke ne tali.] ʻOku mahuʻinga makehe kiate kitautolu ʻa hono tomuʻa tala ʻe he Tohitapú ʻe hoko ʻa e meʻá ni. [Lau ʻa e 2 Tīmote 3:1-3.] Fakatokangaʻi ko e meʻá ni ʻe hoko ia ʻi he “kuonga fakamui.” ʻOku fakaʻali mai ʻi he meʻá ni ʻoku ʻi ai ʻa e meʻa ʻoku vavé ni ke ngata. ʻOkú ke fakakaukau ko e hā ʻa e meʻá ni?” Tuku ke ne tali. Huke ki he peesi 24, tuhu ki he fakatātaá, pea fetalanoaʻaki ʻi ha konga Tohitapu ʻe taha pe ua ʻoku hiki ʻi he peesi ko iá. Fai ha fokotuʻutuʻu ke foki ki ai ʻamui ange ke fakamatalaʻi ʻa e ʻuhinga ʻoku tau tui ai ʻoku ofí ni ʻa e ngaahi tāpuaki lahi.
4 Pe te ke saiʻia nai ke fakaofiofi atu ʻo ngāueʻaki ʻeni ʻi hono tuʻuaki ʻo e polosiua “Vakai!”:
◼ “ʻOku hokosia ʻa e faingataʻa ʻe he kakai tokolahi ʻi he feinga ke maʻu ha taumuʻa moʻoni ʻi he moʻuí. ʻI he lolotonga ʻoku fiefia ʻa e tokosiʻi ʻi he fiefia ʻoku fakangatangatá, ko e tokolahi tahá ʻoku nau moʻui ʻi he ngaahi moʻui ʻoku fakafonuʻaki ʻa e loto-mamahi mo e faingataʻaʻia. ʻOkú ke fakakaukau ko e founga ia naʻe taumuʻa ʻa e ʻOtuá ke tau moʻui aí? [Tuku ke ne tali.] ʻOku fakahā ʻe he Tohitapú ʻoku loto ʻa e ʻOtuá ke tau moʻui ʻi ha māmani hangē ko ʻení.” Tuhu ki he fakatātā ʻi he takafi ʻi muʻá, pea toki huke ki he peesi 4 pea lave ki ha konga Tohitapu ʻe taha pe ua mei he fakamatala ʻi laló, ʻo fakamatalaʻi ai ʻa e meʻa kuo talaʻofa ʻe he ʻOtuá. Langaʻi ʻa e fehuʻi ko ʻení ke fetalanoaʻaki ai ʻi hoʻo toe foki ki aí: “ʻE lava fēfē ke tau fakapapauʻi ʻe fakahoko ʻe he ʻOtuá ʻa ʻene ngaahi talaʻofá?”
5 Hili hono fakafeʻiloaki koé, ʻe lava ke ke lea hangē ko ʻení:
◼ “Ngalingali pē ʻokú ke tui ko e meʻa mātuʻaki faingataʻa ia kapau ʻe mole ha taha ʻoku tau ʻofa ai ʻi he maté. ʻE lava ke tau maʻu mei fē ʻa e akonaki ʻaonga ke fakahā mai ai kiate kitautolu ʻa e founga ke fekuki ai mo e tuʻunga ko ʻení? [Tuku ke ne tali.] ʻOku ou ʻiloʻi ʻoku papau ʻa e Tohitapú koeʻuhi ʻokú ne akoʻi kitautolu ʻo kau ki he ʻamanaki ki he kau maté. [Lau ʻa e Sione 5:28, 29.] Ko e taumuʻa ʻo ʻemau ngāué ko hono fakalototoʻaʻi ʻa e kakaí ke lau ʻa e Tohitapú mo maʻu ha ʻaonga mei heʻene fakahinohinó. Ko e tokoni ko ʻeni ki he ako Tohitapú, ʻI he Mate ha Taha ʻOkú Ke ʻOfa Ai, ʻe lava ke ne tokoniʻi koe ke ke fai ia. Fakatokangaʻi ʻa ʻene lau ʻo kau ki he ʻamanaki papau ki he kau maté. [Lau ʻa e palakalafi hono tolu mo hono fā ʻi he peesi 26.] Kapau te ke saiʻia ke lau ʻa e polosiuá ni, te u fiefia ke tuku atu ʻa e tatau ko ʻení maʻau.”
6 ʻOku fiefia ʻa Sihova ʻi heʻetau ʻai ke ‘ha ʻetau laka ki muʻa ʻaki ʻetau lamalama ʻa e meʻa ʻoku tau akoʻaki.’ (1 Tīm. 4:15, 16) ʻE lava ke hoko ʻetau ngaahi polosiuá ko e tokoni moʻoni kiate kitautolu ʻi heʻetau ngaahi feinga ke tokoniʻi ʻa kinautolu ʻoku fakaʻamu ke fanongo ki he “ongoongo mai ʻa e lelei.”—ʻAi. 52:7.