Fai ʻa e Ngāue Toputapú ʻi he ʻAho mo e Pō
1 Kuo fakaaʻu mai kiate kitautolu ha faingamālie lahi ʻaupito. Ko e hoko ʻo faifakamoʻoni kia Sihova. ʻOku tau hoko ko e konga ʻo e kautaha ʻi māmani lahi ʻo e kau ʻevangeliō ʻoku ngāueʻaki ʻe Sihova ke fakaʻosi ʻa e ngāue lahi taha ko hono fanongonongo ʻo e Puleʻanga ʻoku lolotonga faí! (Mk. 13:10) ʻI he vakai atu ki he fakavavevave hotau taimí, ʻoku tau kau ʻi he ngāué ni ʻaki ʻa e lelei taha ʻoku malava ʻo faí?
2 ʻOku ʻikai te tau ʻilo pe ko e hā nai hono tokolahi te nau tali ʻetau malangá. ʻOku fakapapauʻi mai ʻe Sihova kiate kitautolu ʻe ʻi ai “ha fuʻu kakai lahi” ʻa ia ko kinautolu kotoa ʻoku fakaʻilongaʻi ʻe heʻenau “tauhi ia i he aho moe bo.” (Fkh. 7:9, 15, PM) Ko e Kau Fakamoʻoni laka hake ʻi he toko nima milioná ʻa ia ʻoku nau femouʻekina ʻi he ngāue ʻa e ʻOtuá ʻoku ʻikai ko e kau fanongo ʻoku mahuʻingaʻia pē, pe ko e kau maʻu fakataha pē. Ko e kau ngāue kinautolu ʻoku nau fanongonongo ʻa e ongoongo leleí ʻi māmani lahi!
3 ʻI he ʻaho kotoa pē, ʻoku ʻi ai ʻa e ngaahi faingamālie ke fakahīkihikiʻi ai ʻa Sihova, pe ʻi he malaʻe malangá pe founga ʻikai anga-mahení. Fakakaukau atu ki he fakamoʻoni mātuʻaki lelei ʻaupito ʻe fai kapau ko e tokotaha taki taha ʻo kitautolu te ne feingaʻi ke ʻi ai ha faingamālie ke ne fakahā atu ʻa e moʻoní ki ha taha pē ʻi he ʻaho taki taha. Ko ʻetau houngaʻia kia Sihová ʻoku totonu ke ne ueʻi kitautolu ke tau lea ʻi he loto-māfana ʻo kau kiate Ia.—Sāme 92:1, 2.
4 Tokoniʻi ʻa e Niʻihi Kehé ke Nau Fai ʻa e Ngāue Toputapú: ʻOku hokohoko mai hono tāpuakiʻi kitautolu ʻe Sihová ʻaki ʻa e fakatokolahí. (Hāk. 2:7) ʻI he lolotonga ʻa e taʻu fakangāue kuohilí ʻi he ngaahi fonua he malumalu ʻo e vaʻa ʻi Haʻamoa Hihifó, ko ha ʻavalisi ʻo e ngaahi ako Tohitapu ʻe 738 naʻe fai ʻi he māhina taki taha. Ko ʻetau taumuʻa ʻi hono akoʻi ʻa e faʻahinga peheé ke tokoniʻi kinautolu ke hoko ko e kau ākonga ʻa Sīsū. (Mt. 28:19, 20) Ko e tokolahi ʻo kinautolu kuo nau ʻosi fai ha ngaahi fakalakalaka lelei ʻaki ʻa e maʻu maʻu pē ʻa e ngaahi fakatahá. Kuo nau kamata ke lea ki honau ngaahi mahení ʻo kau ki he “gaahi gaue fakaofo ae Otua” ʻa ia kuo nau akó. (Ng. 2:11, PM) ʻE lava ke fakaafeʻi kinautolu he taimí ni ke kau ʻi he ngāue fakamalangá?
5 ʻI he lolotonga ʻo ʻEpelelí ʻoku totonu ke tau fai ha feinga makehe ke fakaafeʻi ʻa e faʻahinga foʻou ʻoku taaú, ke kau mo kitautolu ʻi he ngāue fakamalangá. Kuo fakahā ʻe hoʻo tokotaha akó ha holi ke fai ʻeni? Kapau ko ia, kuó ne aʻusia ʻa e ngaahi fiemaʻu Fakatohitapú? (Sio ki he tohi Our Ministry, peesi 97-99.) ʻI he taimi ʻoku loto ai ʻa e tokotaha akó ke kau ki he ngāue fakamalangá, fetalanoaʻaki ki heʻene ngaahi ʻamanaki leleí mo e ʻovasia tauhí, ʻa ia te ne fokotuʻutuʻu ki ha mātuʻa ʻe toko ua ke vakaiʻi ʻa e meʻá ni. Kapau ʻoku taau ʻa e tokotaha akó ke hoko ko ha tokotaha malanga teʻeki papitaiso, fakaafeʻi ia ke mo ngāue fakataha he malangá. Ko e kau ʻovasia ngāué mo e kau faiako ʻi he ako tohí ʻoku totonu ke tautefito ʻenau tokangá ki hono tokoniʻi ʻa e faʻahinga te nau taau nai ke kamata ngāue fakamalanga ʻi ʻEpelelí.
6 Ko e ngaahi mātuʻá ke nau fakakaukau nai pe ʻoku taau ʻenau fānaú ke hoko ko e kau malanga teʻeki papitaiso. (Sāme 148:12, 13) Kapau ko hoʻo tamá ʻoku holi ke kau ʻi he ngāue ʻo e Puleʻangá pea ʻoku lelei hono ʻulungaangá, te ke ʻalu ʻo lea nai ki ha taha ʻo e kau mātuʻá ʻi he kōmiti ngāué ke fakamatalaʻi ʻa e tuʻungá ni. ʻI he hili ʻa e fakataha mo koe pea mo e kiʻi tamá, ko e toko ua ʻo e kau mātuá te na fakapapauʻi pe ʻoku taau ke lau ia ko ha tokotaha malanga. ʻOku ʻi ai ha tupunga makehe ki he fiefiá ʻi he taimi ʻoku kau ai ʻa e fānaú mo kitautolu ʻi hono fakahīkihikiʻi ʻa e ʻOtuá!
7 Ko Sihova tokotaha pē ʻoku taau ki ai ʻa ʻetau ngāue toputapú. (Luke 4:8) ʻOfa ke ngāueʻaki ʻe he tokotaha taki taha ʻo kitautolu hotau faingamālie fakaofó ke fakahīkihikiʻi “lahi” ia.—Sāme 109:30; 113:3.