Ngāueʻaki ʻa e Ngaahi Polosiua ʻOku Fakamānako ki he ʻAtamaí mo e Lotó Fakatouʻosi
1 ʻOku totonu ke fakaeʻa ʻa e moʻoni ʻo e Tohitapú koeʻuhí ke fakamānako ki he ʻatamaí mo e lotó fakatouʻosi. ʻI he taimi naʻe fakahā atu ai ʻe Sīsū ʻa e moʻoní ki heʻene kau fanongó, naʻá ne fili ʻa e ngaahi tuʻunga-lea ʻa ē naʻe mahuʻinga pea ueʻi ai kinautolú. (Luke 24:17, 27, 32, 45) Ko e lavameʻa ʻo ʻetau ngāue fakafaifekaú ʻoku fakatuʻunga lahi ia ʻi he feinga ʻoku tau fai ke ʻilo fakapapau ʻa e ngaahi fiemaʻu fakalaumālie ʻa ʻetau kau fanongó.
2 Ko e ngaahi polosiuá ʻoku lava ke hoko ia ko e ngaahi meʻangāue ola lelei ke aʻu ai ki he ʻatamai mo e loto ʻo e faʻahinga ʻoku tau fetaulaki ʻi he ngāue fakafaifekaú. Tomuʻa fai ha fakakaukau pe ko hai te ne tali nai ʻa e pōpoaki ʻi he polosiua taki taha ʻoku tufa ʻi ʻAokosí:
—“Vakai! ʻOku Ou Fakafoʻou ʻa e Meʻa Kotoa Pe.” Ko e kakai ʻoku nau faingataʻaʻia fakaʻikonōmiká pe ko kinautolu ʻoku nau hokosia ha meʻa fakamamahí te nau houngaʻia ʻi he pōpoaki fakafiemālie ko ʻeni fekauʻaki mo ha kahaʻu ʻoku ʻatā mei he faingataʻá.
—Moʻui Fiefia ʻI he Mamani ʻO Taʻengata! Ko e ngaahi fakatātā lahi pea mo e ngaahi konga tohi ʻoku lave ki aí te ne tokoniʻi ʻa e fānau tupú pea mo e faʻahinga ʻoku fakangatangata ʻenau malava fakaelautohí ke nau mahinoʻi ʻa e ngaahi taumuʻa ʻa e ʻOtuá.
—Ko e Puleʻanga Te ne ʻOmai ʻA e Palataisi. Ko e faʻahinga kotoa pē ʻoku ʻi ai haʻanau kaunga ki he meʻa fakapuleʻangá te nau tali nai ki he pōpoaki ko ʻeni fekauʻaki mo e founga ʻe solova ai ʻe he Puleʻanga ʻo e ʻOtuá ʻa e ngaahi palopalema faingataʻa ʻa e faʻahinga ʻo e tangatá.
—ʻI he Mate ha Taha ʻOkú Ke ʻOfa Ai. ʻOku houngaʻia ʻa e tokolahi ʻo e kau tuʻutuʻuni ʻi he putú ke maʻu ha ngaahi tatau ʻo e polosiua ko ʻení maʻá e ngaahi fāmili ʻo e mamahí. Ko e kau malanga ʻoku nau faifakamoʻoni ʻi he ngaahi faʻitoká ʻoku nau ngāueʻaki ʻa e polosiua ko ʻení ke fakafiemālieʻiʻaki ʻa e kau mamahí. Naʻe fakaofiofi atu ha ongo tuofāfine ki ha fāmili ko ha toko fitu naʻa nau lotu ʻi ha veʻe faʻitoka. ʻI ha ola ʻo hono vahevahe atu ʻa e pōpoaki fakafiemālie mei he polosiuá, naʻe kamata ai ha ako Tohitapu mo e faʻeé ʻi he ʻaho hono hokó!
—ʻOku Totonu Ke Ke Tui ki he Tolu-tahaʻi-ʻotua? Ko ha tokotaha lotu fefeka te ne tali nai ʻa e moʻoni ʻoku maʻu ʻi he fakamatala fakamoʻoni papau lelei ko ʻeni ʻokú ne fakaeʻa ʻa e tokāteline tefito ʻa Puleʻanga-Haʻa-Kalisitiané.
3 ʻAi ke ke alāanga mo e polosiua taki taha, pea fakapapauʻi ʻa e founga lelei taha ke ngāueʻaki ai ia ʻi ho feituʻú. Ki ha ngaahi tuʻuaki ʻoku fokotuʻu mai, sio ki he peesi fakamuimui ʻo e tatau ʻo ʻEtau Ngāue Fakafaifekau ʻo e Puleʻanga ʻo Siulai 1998. ʻOfa ke tāpuakiʻi ʻe Sihova hoʻo ngaahi feinga ke aʻu ki he ʻatamai mo e loto fakatouʻosi ʻo e kakaí.—Mk. 6:34.