Polokalama ʻAho ʻAsemipilī Makehe Foʻou
Ko e polokalama ʻaho ʻasemipilī makehe foʻoú ʻoku kamata ia ʻi Sepitema 1999 ʻa ia ko hono kaveingá: “Hakule ki he Ngaahi Meʻa Loloto ʻa e ʻOtuá.” (1 Kol. 2:10) Ko e hā ʻa e ngaahi meʻa mahuʻinga te tau akó?
ʻI heʻenau kumi ki he ʻiló, ʻoku ʻikai ke fakaivifoʻou ʻa e tokolahi ʻi he meʻa ʻoku nau maʻú. ʻOku fakalongomoʻuiʻi kitautolu ʻe he Tohitapú, hangē ko ia ʻe fakahaaʻi ʻe he ʻovasia fakafeituʻú ʻi heʻene kongá ʻoku fakakaveinga “Ko e Hakule ki he Folofola ʻa e ʻOtuá ʻOkú Ne ʻOmai ʻa e Fakaivifoʻou.” Ko e tokotaha malanga ʻaʻahí te ne fai ha fakafehokotaki ʻi he vahaʻa ʻo e hakule ki he ngaahi meʻa loloto ʻa e ʻOtuá mo hono malangaʻi ʻa e ongoongo leleí ʻi heʻene fakahaaʻi mai ʻa e fehuʻi “ʻOku Anga-Fēfē Hoʻo Vakai ki Hono Malangaʻi ʻo e Puleʻangá?”
ʻE anga-fēfē hono tokoniʻi ʻe he ngaahi mātuʻá ʻenau fānaú ke nau keli ke loloto ki he Folofola ʻa e ʻOtuá? ʻE tokonaki mai ʻa e ngaahi fokotuʻu ʻaonga ʻi he konga “Uhuʻi ʻa e Folofola ʻa e ʻOtuá ki Hoʻo Fānaú.” ʻOku tākiekina ʻa e kau talavou Kalisitiané ʻi ha founga lelei ʻi heʻenau feohi ko ia mo e faʻahinga ʻoku matuʻotuʻa fakalaumālie ʻi he fakatahaʻangá. ʻE fakaeʻa mai ʻi he konga “Kau Talavou ʻOku Nau Ako mei he Faʻahinga Taʻumotuʻá” ʻa e ngaahi fakatātā ʻo e founga ʻoku ola lelei ai kiate kinautolú.
Ko e hā ʻoku totonu ai ke tau hakule tōtōivi ki he ngaahi koloa fakalaumālie fufuú ʻi he taimi ní? Ko Sihová ko e Tokotaha-Fakaeʻa ia ʻo e ngaahi fakaliloliló. ʻE fakamatalaʻi ʻe he tokotaha malanga ʻaʻahí ʻa e meʻa kuo fakaeʻa ʻe Sihova ʻi he ngaahi taimi ki muʻá mo onopōní ʻi he malanga “ʻOku Fakaeʻa Fakalakalaka ʻe Sihova ʻa e Ngaahi Meʻa Lolotó.” ʻE fakaivimālohiʻi ai heni ʻetau fakapapau ke hokohoko atu ʻa e “hakule ki he ngaahi meʻa loloto ʻa e ʻOtuá.”
Palani he taimí ni ke kau ki ai. Ko e faʻahinga ʻoku nau loto ke fakaʻilongaʻi ʻenau fakatapui kia Sihová ʻaki ʻa e papitaisó ʻoku totonu ke nau fakahā ki he ʻovasia tauhí ʻi he vave tahá. Ko ʻetau holi fakamātoato ke kumi ki he Folofola ʻa e ʻOtuá ʻe fakaivimālohiʻi ia ʻaki ʻa e meʻa ʻoku tau fanongo ki aí. Ko ia, ʻoua naʻá ke tō ʻi he ʻaho makehe ko ʻeni ʻo e fakahinohino fakalaumālié!