Hoko ʻo “Femoʻuekina Lahi” ʻi Hoʻo Ngāue Fakafaifekaú
1 ʻI he taimi ʻoku tau lau ai naʻe tuitui tēniti ʻa e ʻapositolo ko Paulá he lolotonga ʻo ʻene ʻi Kolinitoó, te tau fakaʻosiʻaki nai naʻe fakangatangata heni ʻa hono faingamālie ke malangá. Kae kehe, ʻoku pehē ʻe he Ngāue 18:5 (NW): “Naʻe kamata ke femoʻuekina lahi ʻa Paula ʻi heʻene malangá, ʻo ne fakamoʻoni ki he kakai Siú ke fakamoʻoniʻi ko Sīsū ʻa e Kalaisí.” Ko e hā naʻe femoʻuekina lahi ai ʻa Paula ʻi heʻene ngāue fakamalangá? Neongo ko e tokolahi ʻi Kolinitō naʻa nau ʻosi hoko ko e kau tui, naʻe fakapapauʻi ange ʻe he ʻEikí ʻoku ʻi ai ha toe kau ākonga tokolahi ange ke maʻu ʻi he kolo ko iá. (Ng. 18:8-11) ʻOku tau maʻu ha ʻuhinga meimei tatau ke tau hoko ai ʻo femoʻuekina lahi ʻi heʻetau ngāue fakafaifekaú? ʻIo. ʻOku lava ke maʻu ʻa e kakai tokolahi ange pea akoʻi ki ai ʻa e moʻoní.
2 Fakamoleki ha Taimi Lahi Ange ʻi he Ngāue Fakamalangá he Lolotonga ʻo ʻEpelelí: ʻOku hangehangē ko hoʻo taumuʻá ia ke ke hanganaki femoʻuekina ʻi hono malangaʻi ʻa e ongoongo leleí ʻi he māhina kotoa pē. Ka ʻoku ʻi ai ha ngaahi māhina ʻoku nau ʻomai tautefito ha ngaahi faingamālie lahi ange ke tau hoko ai ʻo “femoʻuekina lahi” ʻi he ngāue ko ʻení. ʻOku kau heni ʻa e māhina ko ʻEpelelí, ko e tumutumu ʻo e faʻahitaʻu Fakamanatú. Kuo fakaʻatā koe ʻe ho ngaahi tuʻungá ke ke tāimuʻa tokoni pe ke fakalahi ʻa hoʻo feinga ʻi he ngāue fakafaifekaú ʻi he faʻahitaʻu failau ko ʻení? Ko e kau malanga tokolahi ʻoku nau fai peheé kuo tāpuakiʻi lahi kinautolu. (2 Kol. 9:6) Kapau te ke fai ʻa e meʻa kotoa te ke malavá, manatuʻi ʻoku hōifua ʻa Sihova ki hoʻo ngāue ʻaufuatoó. (Luke 21:2-4) Ko e hā pē ho ngaahi tuʻungá, ʻai ia ko hoʻo taumuʻá ke ke “femoʻuekina lahi” ʻi hoʻo ngāue fakafaifekaú he lolotonga ʻo ʻEpelelí. Pea ʻoua naʻa ngalo ke ʻomai hoʻo līpooti ngāue fakamalangá ʻi he ngataʻanga ʻo e māhiná koeʻuhi ke fakakau ʻa hoʻo feingá fakataha mo e toenga ʻo e kakai ʻa Sihová.
3 ʻAʻahi ki he Faʻahinga Foʻou Naʻa Nau Haʻu ki he Fakamanatú: ʻI he feituʻu ʻo e vaʻa ʻi Haʻamoá he taʻu kuo ʻosí, ko e kau maʻu Fakamanatú naʻe toko 2,292. Ko e fakakātoa ʻo e kau maʻu Fakamanatu ki he taʻu ní ʻoku teʻeki ke ʻiloʻi. Ka, ʻoku fakahaaʻi ʻe he ngaahi līpōtí ʻoku ʻi ai ha “utu-taʻu” lahi fakaofo. (Mt. 9:37, 38, NW) Ko ia ai, ʻi he vave taha ʻe malavá, fokotuʻutuʻu ke ʻaʻahi ki he faʻahinga mahuʻingaʻia naʻa nau haʻu ki he Fakamanatú ke tokoniʻi fakalaumālie kinautolu. Ko hono toloi ʻa e ngaahi ʻaʻahi peheé ʻe lava ke ne fakaʻatā ai ʻa e ‘filí, ke ne faʻao ʻa e meʻa naʻe to ki honau lotó.’ (Mt. 13:19) ʻE fakahaaʻi ʻe ha ʻaʻahi vave ʻa hoʻo “femoʻuekina lahi” moʻoni ʻi hoʻo ngāue fakafaifekaú.
4 Hokohoko Atu ke Tokoniʻi ʻa e Faʻahinga ʻIkai ke Longomoʻuí: Naʻe kamata ha feinga makehe ʻi Fepueli ke tokoniʻi ʻa e faʻahinga ʻikai ke longomoʻuí. Kapau ʻoku ʻi ai ha niʻihi ʻoku teʻeki ke fai ki ai ha ʻaʻahi fakatauhisipi, ʻoku totonu ki he kau mātuʻá ke nau fokotuʻutuʻu ke ʻaʻahi kiate kinautolu ki muʻa ke ngata ʻa ʻEpelelí. ʻE feinga ʻa e kau mātuʻá ke fakapapauʻi ʻa e tupuʻanga tefito ʻo e palopalema ʻa e tokotahá pea mo e founga lelei taha ke tokoniʻi ai ia ke ne toe ngāue longomoʻui kia Sihová. ʻOku fakahaaʻi ʻe he tokoni anga-ʻofa ko ʻení ʻoku fai fakamātoato ʻe he kau mātuʻá honau fatongiá ʻi he tuʻunga ko e kau tauhi “ʻa e fanga sipi ʻa e ʻOtua.” (1 Pita 5:2; Ng. 20:28) Ko e ʻīsiu ʻo e The Watchtower ʻo Sepitema 15, 1993, peesi 22-23, ʻoku tokonaki mai ai ha ngaahi fokotuʻu lelei ʻa ia ʻe lava ke ngāueʻaki ʻe he kau mātuʻá ʻi hono tokangaʻi ha taha ʻo e ngaahi palopalema anga-maheni ʻe nima ʻokú ne uesia nai ʻa e faʻahinga ʻoku ʻikai ke longomoʻuí. ʻI heʻene peheé, ko ha niʻihi ʻe lava ke toe fakalongomoʻuiʻi ʻi he ngāue fakamalangá he lolotonga ʻo ʻEpelelí.
5 Tokoniʻi ha Tokolahi Ange Ke Nau Hoko ko e Kau Malanga Teʻeki Papitaiso: Kuo taau hoʻo fānaú ke nau hoko ko e kau malanga foʻou ʻo e ongoongo leleí? Fēfē ʻa e niʻihi kehe ʻokú ke ako Tohitapu mo iá? Kapau kuo fakaʻatā ʻa e faʻahinga peheé ʻe he kau mātuʻá, ʻikai ko ʻEpelelí ko ha taimi lelei ia kia kinautolu ke nau kamata ai ʻi he ngāue fakamalangá? Kapau ʻoku fakalakalaka ha tokotaha pea kuó ne ʻosi ako ʻa e polosiua Fiemaʻu pea mo e tohi ʻIlo, ʻe hoko atu nai ʻa e ako Tohitapú ki ha tohi hono ua—pe ko e tohi True Peace, pe ko e tohi Fāʻūtaha ʻi he Lotu. Ko hoʻo taumuʻá ke tokoniʻi ʻa e tokotaha akó ke ne maʻu ʻa e vavanga lahi ange ki he moʻoní, taau ko ha tokotaha malanga teʻeki papitaiso, pea hoko ko ha Fakamoʻoni fakatapui mo papitaiso ʻa Sihova.—Ef. 3:17-19; 1 Tim. 1:12; 1 Pita 3:21.
6 Ko hoʻo huʻufataha mo mahuʻingaʻia moʻoni ʻi hoʻo kau ako Tohitapú ʻe tokoni nai ia kiate kinautolu ke faifai atu pē ʻo nau ʻai ʻa e moʻoní ko ʻenau meʻa tonu. Ko ha Fakamoʻoni ʻe taha naʻá ne fetaulaki mo ha ongo meʻa mali taʻumotuʻa ʻa ia naʻá na loto-moʻoni ki ha ako Tohitapu. Ka naʻe toloi ʻe he ongo meʻa malí ʻa e akó ʻi ha uike hokohoko ʻe tolu. Faifai atu pē naʻe kamata ʻa e akó. Pea, naʻe kaniseli ʻe he ongo meʻa malí ʻa e akó ʻo meimei ʻi he uike ki he uike. Kae faifai atu pē, naʻe fakalakalaka ʻa e uaifí ʻo aʻu ki ha tuʻunga ʻo e papitaisó. “ʻI he hili ʻa ʻene papitaisó,” ʻoku pehē ʻe he tokouá, “naʻe fonu e mata ʻo e fefiné ʻi he loʻimata ʻo e fiefiá, ʻa ia naʻá ne ʻomai ai ha loʻimata fiefia fakatouʻosi ki hoku uaifí mo au.” ʻIo, ko e hoko ʻo “femoʻuekina lahi” ʻi he ongoongo leleí ʻokú ne ʻomai ʻa e fiefia lahi!
7 ʻOku fakahaaʻi ʻe he kikite ʻa e Tohitapú mo e ngaahi meʻa ʻoku hoko he māmaní ʻoku tau moʻui ʻi he uhouhonga ʻo e taimi ʻo e ngataʻangá. ʻI he taimí ni, ʻoku fiemaʻu ki he kotoa ʻo e kakai ʻa e ʻOtuá ke nau “femoʻuekina lahi” ʻi hono ʻai ʻa e ongoongo leleí ke ʻiloʻi ʻe he niʻihi kehé. ʻOku fakapapauʻi mai ʻe he ʻapositolo ko Paulá ʻo pehē ko e ngāue peheé ʻoku moʻoni “ko e meʻa ki he ʻEiki, . . . ʻoku ʻikai ko e laufanō ia.”—1 Kol. 15:58.